Na cava na vuna e bibi kina me muri na ivakasala mai vei ira na iliuliu ena matabete?

Era ciqoma na iliuliu ni matabete na veivakauqeti mai vua na Yalo Tabu me vakasalataki ira era sa kacivi me ra veiliutaki. Eda vulica vakacava meda vakarorogoka muria na ivakasala mai vei ira noda iliuliu ni matabete me na vukea noda taqomaki mai na veika rerevaki vakayalo ka vakayago, ka na vukea noda digidigi vakayalomatua.

Mo vakarautaki iko vakayalo

E sa bau vakalougatataki iko vakacava nomu vakamuria nodra ivakasala na iliuliu ni matabete ena nomu bula vakataki iko? Ena nomu ilesilesi? Ena nomu matavuvale?

Na madigi cava e tu vei ira na itabagone me ra vakasaqara kina na ivakasala ni matabete? Mo na vakayaloqaqataki ira vakacava na itabagone me ra vakamuria nodra ivakasala na iliuliu ni matabete, okati kina na iliuliu ni tabanalevu kei na iteki?

Vakayagataka na veiivurevure e koto e ra mo kila kina vakai iko na vuna e bibi kina na vakamuria nodra ivakasala na iliuliu ni matabete. Qai vakasamataka se rawa me vukei iko vakacava na veiitaviqaravi ena vo ni ituvatuva oqo me vukea nomu tuva na ivakarau me vakaitavitaki ira na itabagone ena vuli. Na veika o sotava vakai iko ena nomu vakamuria na ivakasala ena vukea me yaga nomu veivakavulici.

Efeso4:11–14 (Veivakalougatataki e lako mai vei ira na iliuliu ni Lotu)

V&V 1:38; V&V 21:4–5 (Na vosa ni Turaga mai vei ira Nona tamata digitaki)

V&V 124:45–46 (Muria na ivakaro ni tamata digitaki ni Turaga)

Dallin H. Oaks, “Rua na Sala ni Veitaratara,” Ensign se na Liaona, Nove. 2010, 83–86.

Veivakavulici ena ivakarau ni Turaga

Na i Vakabula e wasoma nona wasea na italanoa, vosa vakatautauvata, kei na ivakaraitaki dodonu ni bula me vakamacalataka na ivunau kei na ivakavuvuli. Na italanoa cava e rawa mo wasea vata kei ira na itabagone me baleta na muri ira na veiliutaki ena matabete?

Semata vata

Ena imatai ni vica na miniti ni kalasi yadua, vukei ira na itabagone me ra semasemata vata na veika era sa vulica tiko ena veikalasi (me vaka na vuli yadua, semineri, so tale na kalasi ni Lotu se na ka era sotava vata kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama era koto oqo e ra ena rawa ni vukei iko:

Sureti ira na cauravou ena kalasi me ra vakavulici ira na gone yalewa ena so na ka era a vulica me baleta na matabete ena nodra veikuoramu ni Matabete i Eroni. Qai sureti ira na gone yalewa me ra vakavulica na veika era sa vulica me baleta na matabete ena nodra veikalasi.
Sureti ira na itabagone me ra vola na ivakasala era ciqoma walega oqo mai vei ira na iliuliu ni matabete ena noda vanua (me vaka na bisopi se peresitedi ni iteki). Na veivakalougatataki cava era sa ciqoma ena kena vakamuri na ivakasala oqo? Ena nomu vakila na veivakauqeti ena gauna taucoko ni lesoni, wasea na ivakadinadina ni veivakalougatataki e yaco mai ena vakamuri ira na iliuliu ni matabete.

Vulica vata

Na veitaviqaravi yadua e koto e ra ena vukei ira na itabagone me ra kila kina na bibi ni kena vakamuri na nodra ivakasala na iliuliu ni matabete. Muria na veivakauqeti ni Yalotabu, digitaka e dua se sivia ka na ganita vakauasivi sara na nomu kalasi:

Kerei ira na itabagone me ra wasea na ivakaraitaki mai na ivolanikalou me baleta e dua a vakasaqara ka vakamuria na ivakasala ni dua na iliuliu ni matabete (me vaka ena 2Tui 5:1–14, Mosaia 28:1–8, se Alama 16:5–8). Sureti ira na itabagone me ra veivosakitaka na veika era vulica mai na veiivakaraitaki oqo me baleta na ciqomi ni ivakasala. Era ciqoma vakacava o ira na iliuliu na veivakauqeti ena italanoa oqo me dusimaki ira era qaravi ira? Sureti ira na itabagone me ra wasea na veika era sotava ka sa vaqaqacotaka nodra ivakadinadina ni noda iliuliu ni matabete era sa vakauqeti kina.
Sureti ira na itabagone me ra wilika na Efeso 4:11–14 kei na Vunau kei na Veiyalayalati 1:38; 21:4–5; 124:45–46 ka sauma na taro oqo: Na cava na vuna e bibi kina meda muria nodra ivakasala na iliuliu ni matabete? Kerei ira na itabagone me ra wasea na veika era sotava ka ra muria kina na ivakasala ni dua na iliuliu ni matabete ka ra qai vakalougatataki kina.
Veisoliyaka na ilavelave ni vosa nei Elder Dallin H. Oaks “Rua na Sala ni Veitaratara.” Kerea na veimama ni kalasi me ra wilika na iwasewase I, “Na Sala ni Tamata Yadua” ka cakacaka vata me droinitaki e dua na ivola vivi me matataka na ka e vakavulica o Elder Oaks. Kerea e dua tale na veimama ni kalasi me ra cakava na ka vata ga ena iwasewase II, “Na Sala ni Matabete.” Ni oti nodra veiwaseitaka vakai ira e rua na ilawalawa na nodra ivola vivi, me ra wilika vata kece na iwasewase III, “E Gadrevi na Sala Ruarua Oqo,” ka tarogi ira na itabagone nodra sa vakalougatataki vakacava o ira kei na nodra matavuvale mai na ivakatakila vakatamata kei na ivakatakila mai vei ira na iliuliu ni matabete.

Kerei ira na itabagone me ra wasea na veika era sa vulica nikua. Era kila beka na vuna e sa rui bibi kina na muria nodra ivakasala na iliuliu ni matabete? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu cake na gauna ena ulutaga oqo?

Me Veivuke ena Veivakavulici

“Na qasenivuli e dau vosa se dau veivakavulici ena veigauna kece se dau sauma na taro vakataki ira, era dau vakayalolailaitaki ira na lewenikalasi me ra vakaitavi ena soli vakasama” (Veituberi, Me iLutua Ni Noda Bula [1999], 73).

Veisureti me caka

Nacava era sa vulica na itabagone nikua me baleta na vakasaqarai ni ivakasala mai vei ira na iliuliu ni matabete? Sureti ira me ra vola ena nodra ivola ni veisiga na ivakasala era ciqoma kei na veivakalougatataki era ciqoma ena nodra vakamuria tiko.