Sa Biuta Tani na Rere na Loloma Levu Sara

L. Tom Perry

Ena Kuoramu ni iApositolo Le Tinikarua

Kevaka o na rogoca na veisureti mo wasea na nomu vakabauta kei na nomu nanuma me baleta na kosipeli vakalesui mai i Jisu Karisito, ena yaco me nomu itokani tudei na yalo ni loloma kei na yaloqaqa.

I Peresitedi Monson, sa vakamarautaki keimami dina na itukutuku matanidavui me baleta eso tale na valetabu vovou. E vakauasivi cake na kena taleitaki vei ira na wekaqu ka ra bini tu ena yasana o Wyoming.

E dau cakava na Lotu eso na ka e vuravura raraba ena kena tara e dua na valetabu ka sa matau tu na kena ivakarau e Amerika kei Kenada—eda dau dolava raraba kina. Ena loma ni vica na macawa ni bera na kena vakatabui e dua na valetabu vou, eda dolava na katuba ka sureti ira na veiliuliu vakamatanitu kei na lotu, o ira na kena lewe ni Lotu, kei ira na tamata mai na vakabauta vakalotu tale eso me ra lako mai ka sarava na valetabu e se qai tara vou.

Oqo eso na veika vakasakiti ka na vukei ira na tamata e sega ni matata vinaka sara tu vei ira na Lotu me ra vulica vakalevu cake kina na veika e baleta. E voleka ni o ira vakayadua era a laki sarava na valetabu vou era qoroya na totoka ni taudaku ni vale kei na lomana. Era vakadrukai ena maqosa ni cakacaka ni liga kei na kena qarauni vakamatailalai na igacagaca kece sara ni dua na valetabu. Me kena ikuri, e vuqa vei ira na vulagi era vakila eso na ka e sega ni vakatautauvatani rawa ka kilai tani mai na nodra dusimaki mai na valetabu ka se bera ni vakatabui. Sa ikoya oqo na ka era tukuna na vulagi ena noda siga ni dola raraba, ia e sega soti ni bibi na ka e tukuni. Na ka ga e vakurabuitaki ira vakalevu na vulagi mai na so tale na ka sa ikoya o ira na lewe ni Lotu era sotava ena noda siga ni dola raraba. Era dui gole yani na vulagi ka laki balolo tu ni nodra vakanananu na veika era raica mai vei ira na itaukei ni soqo, o ira na Yalododonu Edaidai.

Sa levu cake tikoga na mata e vuravura raraba sa malele tiko mai ki na Lotu ni vakatauvatani ki na veigauna e liu. O ira na dau vakau itukutuku era vola se veivosakitaka e veisiga na Lotu, ripotetaki ni vuqa na itaviqaravi. E vuqa na sala ni itukutuku bibi duadua e Amerika era veivosakitaka e veigauna na Lotu se o ira na lewenilotu. Na veivosaki oqo ena tarai vuravura raraba.

E sa vakayarayarataka tale ga na vakasama na Lotu ena Initaneti, ka, me vaka o sa kila, e sa veisautaka vakalevu sara na sala era veiwaseitaka kina na tamata na itukutuku. Ena gauna taucoko ni dua na siga e vuravura raraba, e veivosakitaki ena Initaneti na Lotu kei na kena ivakavuvuli, ena boloko [blog] kei na mataveilawa veisemai ni veitaratara mai vei ira na tamata era se sega vakadua ni volavola ena dua na niusipepa se dua na mekasini. Era sa cakava na vidio ka veiwaseitaka ena komipiuta. Oqo ko ira na tamata wale ga—ruarua na lewe ni noda vakabauta kei na so tale na vakabauta—ka ra veivosakitaka tiko na Lotu i Jisu Karisito ni Yalododonu Edaidai.

Na veiveisau ena sala ni noda veitaratara e vakamacalataka vakatikina ga se cava na vuna eda laurai vakalevu cake sara kina na “Momani” me vaka e liu. Ia na Lotu e sa tubu tiko ga ka sa toso tiko ki liu. E kena irairai ni levu na tamata era tiko veivolekati kei ira na lewe ni Lotu ka ra veitokani vata, ka ra tu tale ga na lewe ni Lotu kilai ena matanitu, ena bisinisi, ena buturara ni vakalasalasa, ena vuli, kei na veivanua tale eso. O ira mada ga era sega ni lewe ni Lotu era raica na ka oqo, ka ra lomatarotarotaka se cava e sa yaco tiko. E veivakurabuitaki dina ni lewe levu sara era kila vinaka na Lotu kei ira na Yalododonu Edaidai.

Ena kena sa yaco me laurai vakalevu cake na Lotu, era se lewe vuqa ga na tamata era se sega tiko ga ni kila vinaka. Eso na tamata era sa vakatavulici me ra lomalomaruataka na Lotu ka vakabauta na vakasama cala me baleta na Lotu ka sega ni taroga na kena dina na nodra ivurevure ni itukutuku. Era tu tale ga e vuqa sara na itukutuku sega ni dina ka veilecayaki me baleta na Lotu kei na ka e tutaka. E ka dina sara oqo me vakatekivu mai na nona gauna na Parofita o Josefa Simici.

A vola nona itukutuku o Josefa Simici ka dua na kena inaki “meu vakadodonutaka kina na irogorogo oqori vei ira na tamata, era na vakacegu tale ga kina ko ira era via kila na kena dina” (Josefa Simici—Ai Tukutuku 1:1). E ka dina sara ni ra na dau tiko ga e veigauna o ira era veisautaka na dina ka nakita me ra vakacala na ivakavuvuli ni Lotu. Ia e levu ga vei ira era vakataroga na Lotu era vinakata wale ga me ra kila. Oqo o ira na tamata savasava na nodra vakasama ka ra kauwaitaka dina na veika me baleti keda.

Na tubu ni kena irairai kei na kena kilai na Lotu e solia e dua na madigi vakasakiti kivei keda na lewena. E rawa me da veivuke ena kena “vakadodonutaki na cala ni nodra vakasama na tamata,” ka vakadodonutaka na itukutuku cala ni noda vakatauvatani kei na so na ka e sega ni o keda. E bibi cake duadua ga na noda rawa ni wasea se o cei o keda.

Era tu e vica na ka e rawa me da cakava—rawa mo cakava—me vakatorocaketaka na kilai ni Lotu. Kevaka eda cakava ena yalo vata ka kevaka eda vakaitovotaki keda ena ivakarau ni bula vata ga eda dau cakava ena noda vakaitavi ena siga ni dola raraba ni valetabu, era na kilai keda vinaka cake sara o ira na noda itokani kei ira eda tiko veivolekati. Na nodra lomalomarua ena yali yani, na vakasama cala ena yali yani, era sa na qai tekivu kila na Lotu ena kena ituvaki dina.

Meu vakatura mada e vica na vakasama ena ka eda rawa ni cakava.

Matai, e dodonu me da doudou ena noda vunautaki Jisu Karisito. Eda vinakata me ra kila na tani ni da vakabauta o Koya na tamata bibi duadua ena itukutuku kece vakatamata. Na Nona bula kei na Nona ivakavuvuli era usutu ni iVolatabu kei na veivola tale eso eda wilika me ivolanikalou tabu. Na Veiyalayalati Makawa e vakavakarautaki keda ena veiqaravi vakavuravura nei Karisito. Na Veiyalayalati Vou e vakamacalataka na Nona veiqaravi vakavuravura. Na iVola i Momani e solia vei keda e dua na ikarua ni ivakadinadina ni Nona veiqaravi vakavuravura. A lako mai ki vuravura me vakaraitaka na Nona kosipeli me dua na yavudei vei ira na tamata kece ga me rawa kina vei ira na luve ni Kalou kece me ra vulica ka muria na Nona ivakavuvuli. A mani solia o Koya na Nona bula me noda i Vakabula ka Dauveivueti. Mai vei Jisu duadua ga eda rawata kina na noda vakabulai. Sa ikoya gona oqo na vuna eda vakabauta kina ni sa i Koya na usutu ni itukutuku kece vakatamata. E tiko ga e Ligana na noda icavacava tawamudu. E sa dua na ka lagilagi na noda vakabauti Koya ka ciqomi Koya me noda iVakabula, noda Turaga, ka noda iVakavuvuli.

Eda vakabauta tale ga ni sa rawa wale ga ena vukui Karisito na noda kunea na vakacegu ni yalo, na inuinui, kei na mamarau—ena bula oqo kei na tawamudu. Na noda ivunau, e vakatavulica na iVola i Momani, e tukuna vakabibi: “Ia, mo dou toso ki liu ka tudei vei Karisito ena nomudou vakanuinui taucoko sara, mo dou lomana na Kalou kei na tamata kece ga. Ia, kevaka dou sa toso ki liu ka tugana ki lomamudou na vosa i Karisito ka vosota me yacova na ivakataotioti, raica sa kaya vakaoqo na Tamada: Dou na rawata na bula tawamudu” (2 Nifai 31:20).

Eda vakaraitaka noda vakabauti Jisu Karisito ka ciqomi Koya me noda i Vakabula. Ena vakalougatataki keda ka dusimaki keda ena noda sasaga kece sara. Ena noda cakacaka vakavuravura eke, ena vakaukauwataki keda o Koya ka na kauta mai vei keda na vakacegu ena gauna ni veivakatovolei. Kemuni na lewe ni Lotu i Jisu Karisito ni Yalododonu Edaidai mo ni bulataka na nomuni bula ena vakabauti Koya ka sa ikoya oqo na Nona Lotu.

iKarua, mo ivakaraitaki vinaka vei ira na tani. Ni oti na noda vunautaka na noda vakabauta, e dodonu me da muria na ivakasala e solia vei keda ena 1 Timoci 4:12: “Ia mo yaco mo nodra ivakarau era sa vakabauta, ena vosa, ena ivalavala, ena loloma, ena lomadina, ena yalosavasava.”

A vakatavulica na iVakabula me baleta na kena bibi ni noda ivakaraitaki ni noda vakabauta ena nona kaya, “Me caudre vakakina na nomudou rarama ena matadra na tamata, me ra raica na nomudou ivalavala vinaka ka vakarorokotaka na Tamamudou sa tiko mai lomalagi” (Maciu 5:16).

Na noda bula e dodonu me ivakaraitaki ni caka vinaka ka ivalavala dodonu, ena noda tovolea me da muria na Nona ivakaraitaki e vuravura. Na noda caka vinaka o keda vakayadua e rawa ni da vakatorocaketaka kina na noda ivalavala kivei rau ruarua na i Vakabula kei na Nona Lotu. Ena noda vakaitavitaki keda ena cakacaka vinaka, ena noda buladokai ka buladodonu na tagane kei na yalewa, ena seraka yani mai na noda bula na Rarama i Karisito.

Tarava, tukuna yani na Lotu. Ena noda bula e veisiga, eda sa vakalougatataki ena vuqa na madigi me da wasea vei ira na tani na veika eda vakabauta. Ena gauna era vakataroga kina na noda itokani vakatamata kei na itokani vakacakacaka me baleta na noda vakabauta vakalotu, era sa sureti keda tiko me da wasea o cei o keda kei na noda vakabauta. Era na taleitaka beka se sega na Lotu, ia era taleitaka me ra kilai keda ena dua na itagede titobu cake.

Na noqu vakatutu vei kemuni mo ni ciqoma na nodra veisureti. O ira na nomuni itokani era sega ni sureti kemuni mo ni veivakavulici, veituberi, veivakayarayarataki se veivakauqeti. Vakayagataki ira ena rua na sala ni veitalanoa—wasea eso na ka me baleta na nomuni vakabauta vakalotu ia mo ni tarogi ira tale ga me baleta na nodra vakabauta. Vakarautaka na itagede ni nodra taleitaka mai na taro era taroga. Kevaka era taroga e levu na taro, me vakanamata tiko ga na veitalanoa ena saumi ni nodra taro. Mo ni nanuma matua tiko ni vinaka cake me ra taro tiko, mai na nomuni tukuna tiko ga yani na ka.

Eso na lewenilotu era rairai vinakata me ka vuni toka mada na nodra lewena na Lotu. E tu na vuna. Me kena ivakaraitaki, e rawa me ra vakabauta ni sega ni o koya oqo na nodra vanua me ra wasea kina na nodra vakabauta. Era rivarivabitaka beka de ra mani vakacalaka se tarogi ena dua na taro ka ra sega ni sauma rawa. Kevaka e lako mai vei kemuni na vakasama oqo, meu vakasalataki kemuni mada. Nanuma ga na vosa nei Joni: “Sa sega ni tu vata na rere kei na loloma; ia sa biuta tani na rere na loloma levu sara” (1 Joni 4:18). Kevaka eda lomana vakarawarawa na Kalou ka lomani ira eda tiko veivolekati, e yalataki vei keda ni da na vorata na noda rere.

Kevaka mo a se qai sikova wale tale na Mormon.org, sa ikoya na mataveilawa ni Lotu me baleti ira era taleitaka me ra vulica na veika me baleta na Lotu, o ni sa na raici ira na lewenilotu era sa veiwaseitaka na itukutuku me baleti ira. Era sa bulia na itukutuku ena initaneti ka vakamacalataka se o cei o ira kei na vuna e bibi kina vei ira na nodra vakabauta vakalotu. Era sa veivosakitaka sara tiko ga na nodra vakabauta.

E dodonu me da dau goleva na mataqali veivosaki vakaoqori ena loloma Vakarisito. Na rorogo ni domoda, kevaka eda vosa se volavola, e dodonu me dokai ka vakarokoroko, veitalia ga na kena isau mai vei ira tale eso. E dodonu me da yalodina ka dauveinanumi ka tovolea me dau savasava na veika eda kaya. Eda vinakata me da levea na veileti se me da sasabai ena kena ivakarau cava ga.

A vakamacalataka o Pita na iApositolo “Ia ni sa yalosavasava ko koya sa kacivi kemudou, dou yalosavasava tale ga koi kemudou e na ivalavala kece ga” (1 Pita 1:15).

Edaidai na “ivakarau ni veivosaki” e sa vaka me vakayagataki vakalevu cake ga na Initaneti. Keimami sa vakauqeta na tamata, gone se qase, mo ni vakayagataka na Initaneti kei na iyaya me tabaki kina na itukutuku me ra veitaratara ka veiwaseitaka kina na nodra vakabauta vakalotu.

Ena nomuni vakayagataka na Initaneti, e rawa mo ni sotava na veivosaki e lako tiko me baleta na Lotu. Ena nomuni sa dusimaki mai na Yalotabu, mo ni kakua ni lomalomaruataka na nomuni vakuria na domomuni ena veivosaki oqo.

E sega ni vakatautauvatani rawa kei na dua tale na ka mai na nomuni wasea vata kei ira tale eso na itukutuku ni kosipeli i Jisu Karisito. Ena itabagauna vakaitukutuku, sa ikoya na itukutuku yaga duadua ena itukutuku kece e vuravura. E sega ni dua na taro me baleta na kena yaga. Sa ikoya e dua na mataniciva talei (raica na Maciu 13:46).

Ena gauna e veivosakitaki kina na Lotu, eda sega ni tovolea me rogo vinaka cake mai na kena ituvaki sa tu kina. E sega ni gadrevi me da moica vakalailai na noda itukutuku. E gadrevi me da wasea na itukutuku ena yalodina ka vakadodonu. Kevaka eda na dolava na sala ni veitaratara, na itukutuku ni kena vakalesuimai na kosipeli i Jisu Karisito ena vakadinadinataki koya kivei ira era sa vakavakarau tu me ra ciqoma.

Ena so na gauna e tu e dua na duidui levu—se dua na duidui levu ena kila—ena maliwa ni sala eda Lotu tiko kina e loma kei na sala era raica mai kina eso tale mai taudaku. Oqori na vuna taumada eda dau dolava raraba kina na valetabu ni se bera ni vakatabui. O ira na lewenilotu voladia ena dolavi raraba ni valetabu era dau tovolea me ra vukei ira na so me ra raica na Lotu me vaka na noda raica o keda eda sa tiko yani e loma. Era kila ni Lotu e dua na cakacaka vakurabui vakaidina sara, ka ra vinakati ira tale eso me ra kila tale ga. Au kerei kemuni mo ni cakava vakakina.

Au yalataka vei kemuni kevaka o na rogoca na veisureti mo wasea na nomu vakabauta kei na nomu nanuma me baleta na kosipeli vakalesui mai i Jisu Karisito, ena yaco me nomu itokani tudei na yalo ni loloma kei na yaloqaqa, me baleta “ni sa biuta tani na rere na loloma levu sara” (1 Joni 4:18).

Sa ikoya oqo na gauna me vakalevutaki kina na madigi ni wasei ni kosipeli i Jisu Karisito vata kei ira tale eso. E rawa me da vakavakarautaki keda ena noda vakaliuca na madigi e soli kivei keda me da wasea kina na noda vakabauta, sa noqu masu ena yalomalua ena yaca i Jisu Karisito, emeni.