Digitaka na Bula Tawamudu

Randall K. Bennett

Ena Vitusagavulu

E sega ni ka vakacalaka na rawati ni bula tawamudu, ia e ka ni digidigi. Ena sega ni bera sara me tekivu digitaki oqo na bula tawamudu!

Ena veiyabaki sa oti, ni keitou a tiko voli e baravi kei iratou na noqu matavuvale, au raica kina e so na ivakaro kei na kuila ka vakasalataki keimami tiko baleta e dua na kui ni wai ka rawa ni kauti keda yani ki waitui titobu voravora. E sega niu raica rawa, ka niu sega ni vulica, ia e raica rawa tiko na dauveitaqomaki ka dabe toka ena vale ni vakatawa, ni kui ni wai oqo e rerevaki sara vei ira era na biuta na baravi mera siro yani ki wai. Au nanuma niu a veikayaka e lomaqu, “O au na tamata dauqalo. Na qalo e ka ni vakaukauwa yago vinaka. Au na maroroi ena vanua vovodea.”

Au sega ni kauwaitaka na ivakaro o ya ka nuidei ena noqu vakatulewa ka siro yani ki wai meu laki marautaka na “veivakabulabulataki” ni noqu na sisili. Au rai cake mai ni sa oti e vica na miniti ka raica ni ratou sa yawa sara mai vei au na noqu matavuvale. Na kui ni wai kau a vakaroti tiko kina sa dreti au ka kuitaki au tani mai vei iratou na noqu matavuvale.

Taumada au a yalodei, oti au a qai taqaya, kau saga meu qalo yani ki matasawa, ia sa dreti au laivi tikoga yani kina wai titobu voravora na kui ni wai. Au sa tekivu oca mai kau sa tekivu ceruma na wai niu cegu cake. Au sa kila ni sa voleka sara na luvu. Ni sa yali na noqu kaukauwa, au sa qai kaci ka kere veivukei.

Vaka na cakamana ni sa tu e yasaqu e dua na dauveitaqomaki. Au a sega tu ni kila ni a raica vinaka toka mai o koya na noqu sa siro sobu i wai. E kila tu o koya ni kui ni wai ena vesuki au ka kila talega na vanua ena kauti au yani kina. Ni drovaka tani mai na kui ni wai sa qai qalo wavoki me laki waraki au ena vanua au sa tekivu sasaga tiko mai kina, ka waraka meu kaci ka kere veivuke. Niu sa oca sara ka sega ni rawa meu qalo lesu duadua, au a ka se vakavinavinakataka tikoga na nona veivueti. Kevaka me a sega na nona veivuke keu a sega ni lesu tale vei iratou na noqu matavuvale.

Au a cakava e dua na digidigi vakaloloma sara ena siga o ya ka vakavuna vei au e dua na leqa levu vakakina na neitou matavuvale. Ni da mai vakasamataka vata tiko yani na isolisoli ni digidigi, au masuta na Yalo Tabu me vukei keda meda na vakatulewataka vakavuku na noda digidigi.

Sa vakatavuvulitaka tiko na noda parofita lomani o Peresitedi Thomas S. Monson: “Au na sega ni vakabekataka ni ivotavota ena vakatau mai na vakatulewa. Ena sega ni rawa mo vakatulewataka e dua na ka e tawamudu ka sega ni tawamudu na kena revurevu.”¹

O kemuni yadua—me vaka eda sa vakavulici ena koniferedi oqo—ni sa luvedrau lomani e dua na itubutubu vakalomalagi. Ko ni sa vakalougatataki ka sa tiko na nomuni ivotavota.² Ena nomuni bula taumada o ni a vulica kina mo ni lomana na dina. E a ka tawamudu na nomuni digidigi. Ko ni a kila ni bula eke, ena sotavi kina na veivakararawataki kei na dredre, na rarawa kei na mosi, na veivakatovolei kei na veitemaki, me vukea na nomuni tubucake. Ko ni a kila talega ni rawa ni ko ni mai tomana na nomuni digidigi donu, veivutunitaka na digidigi cala, ka Veisorovaki i Jisu Karisito ena rawa kina na bula tawamudu.

Na cava e vakavulica na parofita o Liai baleta na digidigi? E vakasalataka ni da sa “galala meda digitaka na galala kei na bula tawamudu, ena vukui koya na Dauveisorovaki ni tamata kecega, se mera digitaka na tiko vakabobula kei na mate, me vaka na nona veivakabobulataki kei na nona inaki na tevoro.” Sa qai vakavulica, “Mo dou vakararavi vua na Dauveisorovaki ka vakarorogo kina nona ivunau; dou muria na nona vosa, ka digitaka na bula tawamudu.”³

Kemuni na taciqu kei na ganequ, mai na veika eda digitaka meda vakananuma, vakila, ka cakava, eda sa digitaka tiko beka na bula tawamudu?

Eratou sa vulica tiko na makubui keirau, ni gauna eratou sa digitaka kina e dua na ka, eratou sa digitaka tale tikoga na kena revurevu. Se qai oti wale toka ga oqo na nona a sega ni via kania na kena i vakayakavi e dua na makubui keirau. A vakamacalataka vua o tinana, “Sa voleka na gauna ni moce. Kevaka mo digitaka mo kania na kemu i vakayakavi ko sa digitaka tiko mo gunu aisikirimu me ivakalomavinaka. Kevaka mo digitaka mo kua ni kania na kemu ivakayakavi, o sa digitaka tiko mo sa lako sara ga imoce qo, ka sega ni gunu aisikirimu.” Vakasamataka o makubui keirau na rua na digidigi oya ka kaya cake mai ena nona sa vakabutubutu, “Au vinakata na digidigi qo—meu qito ka gunu aisikirimu ka kua ni lako i moce.”

Taciqu kei na ganequ eda vinakata li na qito, gunu aisikirimu walega, ka kakua ni laki moce, ka qai kua ni sotava na revurevu ni kana vakaca kei na oca?

Na kena dina ga oqo, e tiko walega e rua na digidigi tawamudu, ka tiko vata kei na kena revurevu: digitaka mo muria na iVakabula kei vuravura ka digitaka mo laki bula tawamudu vata kei na Tamada Vakalomalagi se digitaka mo vakamuri vuravura ka digitaka mo sa wasei iko tani mai vua na Tamada Vakalomalagi me tawamudu.

Ena sega ni rawa meda digitaka ruarua na veimaroroi ni buladodonu, kei na rerevaki ni bula vakavuravura. Ni da bula ka lako voli e vuravura ena rairai sega soti ni taqayataki, ia e vaka sara ga o ya na noqu a laki sili “bulabula”!

Me vaka sara ga na kui ni wai ka a rawa ni veisautaka vakadua na ituvaki ni neitou matavuvale, na kui ni wai e vuravura nikua, na veivakavuvuli veitemaki, ivakavuvuli cala, kei na bula vakasisila e ra saga me na tawamudu na kena dreti keda laivi mai na noda matavuvale kei na Tamada Vakalomalagi.

Sa raica ka gadreva na noda parofita, daurairai, ka dauvakatakila, me vakasalataki keda mai na kui ni wai rerevaki ka vakadomobula ka sa bolei keda tu ena gauna oqo. Era sa veisureti, veivakayaloqaqataki, veivakavulici, veivakananumi, ka veivakasalataki tiko vei keda. Era kila ni noda na maroroi ena vakatau ena noda na digitaka meda muria na (1) ivakavuvuli eda vulica ena wili ivolanikalou kei na masu ena veisiga; (2) veituberi ni Yalo Tabu; kei na (3) nodra ivakasala vaka-parofita. Era kila ni tiko na veimaroroi kei na vakacegu ena vakamuria na iVakabula o Jisu Karisito, ka bulataka na Nona kosipeli.”⁴

Ena gauna ni dredre ni bula kei na veivakararawataki mai Rusia, e a digitaka kina o Anatoly kei Svetlana Reshetnikov na bula dodonu mai na bula vakavuravura. Ena nodrau sa lewena na Lotu, erau a vakasewasewani. E a tosoi sobu na nona itutu mai na nona vanua ni cakacaka. Ena yaloqaqa erau a vakananuma, “Qo sa na qai levu na gauna ni nodaru qarava na Kalou!” Vakawasoma na nodra dau vakarerei, ia e rau digitaka ga me rau vakamuria na ivakavuvuli ni kosipeli. Sa imatai ni kai Rusia o Elder Anatoly Reshetnikov me lewe ni Vitusagavulu ni iWasewase. Ena nodrau sa digidigi, erau sa tomana tiko na Reshetnikovs na digidigi ni bula tawamudu.

Eda na sotava taucoko na dredre. Eda na vakatovolei taucoko. Eda sa cala taucoko. Eda se sega ni bera ka se sega ni dredre meda digidigi donu. Na veivutuni sa ikoya e dua vei ira na digidigi donu.

E a sa vakatavuvulitaka o Peresitedi Dieter F. Uchtdorf:

“Na cala lalai kei na toki laivi mai na ivakavuvuli ni kosipeli i Jisu Karisito ena rawa ni kauta mai na revurevu e veivakararawataki kina noda bula. Sa ka bibi kina meda bula vakaivakarau, me rawa kina ni da digitaka meda na lesu tale kina sala dodonu ka kakua ni waraka se vakanuinuitaka ni na qai vakadodonutaki koya ga vakaikoya na cala.

“Na dede ni kena vakalaivi na leqa, na levu ni ka e gadrevi me na caka me rawa na veisau, kei na kena na balavu tiko na gauna ena taura meda lesu tale kina sala dodonu—ena rawa sara ga ni kauti keda yani kina rusa.”⁵

Ena dau dodo tu ga na liga dauloloma ni noda iVakabula vei keda kece sara.⁶ Ni da sa veivutuni dina sara, eda sa na rawa ni vosoti ena noda ivalavala ca ka na sega tale ni qai nanuma na iVakabula na noda cala.⁷

Ni ko ni sa vakananuma tiko na nomuni digidigi kei na kena revurevu, mo ni na qai tarogi kemuni tiko:

Au sa vaqara dina tiko li na veidusimaki vakalou ena noqu wili ivolanikalou e veisiga, se au sa osososo saraga ka sega ni kauwaitaka se sega ni dau vulica na vosa i Karisito ka veivosaki kei na Tamaqu Vakalomalagi?
Au sa digitaka tiko li meu muria na ivakasala ni parofita ni Kalou, seu sa muria tiko na sala vaka vuravura kei na nodra vosa veisaqasaqa na tani?
Au sa vaqara tiko li na veituberi ni Yalo Tabu ena veisiga ena ka au digitaka meu vakasamataka, vakila, ka cakava?
Au sa cakava tiko ena veigauna na noqu dodoliga ni veivukei, veiqaravi se vukei na nodra vueti na so tale?

Kemuni na taciqu kei na ganequ, e sega ni ka vakacalaka na rawati ni bula tawamudu, ia e ka ni digidigi. Ena sega ni bera sara me tekivu digitaki oqo na bula tawamudu!

Au vakadinadinataka ni mai na yavu ni bulamarau ni Tamada Vakalomalagi, eda na rawa ni vinaka sara ena Veisorovaki i Jisu Karisito. Ena rawa ni da laki bula vata kei na Tamada Vakalomalagi kei ira na noda matavuvale ka rawata na taucoko ni bula marau. Oqo na veika au vakadinadinataka ena yaca i Jisu Karisito, emeni.