Na Kaukauwa ni Matabete i Eroni

Keith B. McMullin

Karua ni Daunivakasala ena Matabisopi Vakatulewa

O ni sa rui bibi sara oi kemuni kei na nomuni ilesilesi ni Matabete i Eroni ki na cakacaka nei Tamada Vakalomalagi vata kei ira na Luvena kei na kena vakarautaki ko vuravura oqo ki na iKarua ni Nona Lesu Mai.

Ena soqoni ni veituberi sa oti baleti ira na Vakaitutu Raraba, a vakamatatataka vakavinaka tale kina o Peresitedi Thomas S. Monson na nodra itavi kei na madigi na lewe ni Matabete i Eroni.¹ Mai na yalo ni veivakasalataki o ya au sa na vosa kina vei kemuni.

Na vakayacori vakadodonu ni itavi, ena vakatau kina na nodra icavacava na tamata kei na veimatanitu. Sa ka bibi dina na ivakavuvuli ni itavi ka ra sa vakasalataki kina vakaoqo na lewe ni matabete, “Raica sa kilikili ki na tamata yadua me kila ka kila na nona itavi, io me vakayacora ena yalodina na itavi ni ilesilesi sa digitaki kina.”²

E vakamacalataka o Peresitedi Monson, “E rawa ni yaco mai vakamalua na itavi ni da qarava o keda eda taura tu na matabete na ilesilesi eda lesi kina.”³ O Peresitedi Monson a lavetaka mai vei George Albert Smith: “Sa nomu itavi taumada mo kila na veika e vinakata na Turaga, ni oti, ena kaukauwa kei na igu ni Nona Matabete tabu mo qai qarava kina vakavinaka na nomu itavi ena kedra iserau na wekamu ka me ra marautaka kina na tamata na muri iko.”⁴

Ni tukuna tiko na Nona itavi, e kaya kina na noda Turaga: “Niu sa sega ni muria na lomaqu, a lomai Tamaqu ga.”⁵ “Niu sa sega ni lako sobu mai lomalagi meu kitaka na lomaqu, meu kitaka ga na loma i koya sa talai au mai.”⁶ Ena vuku ga ni sa cakava o Jisu Karisito na Nona itavi, “ena vakabulai na tamata kecega eda sa muria na vunau kei na ivakavuvuli ni itukutuku vinaka.”⁷ Kemuni na veitacini, sa ikoya oqo na ivakatagedegede me da na muria.

Au sa raica ka kila ni ko ni sa veiqaravi tiko vaka-dikoni, ivakavuvuli, kei na bete ni sa lomamuni dina oqo, ka sa vakabauti tiko, ni ko ni na rawa ni cakava na nomuni itavi ka keimami sa namaka tiko vei kemuni. Keimami qoroi kemuni. Ko ni sa veivakabulabulataki tiko, sa veivakurabuitaki na nomuni gugumatua, ka vaqaqacotaki keimami na neimami maliwai kemuni. O ni sa rui bibi sara oi kemuni kei na nomuni ilesilesi ni Matabete i Eroni ki na cakacaka nei Tamada Vakalomalagi vata kei ira na Luvena kei na kena vakarautaki ko vuravura oqo ki na iKarua ni Nona Lesu Mai na Luvena savasava. Na neimami rai baleti kemuni kei na nomuni itavi e ulabaleta yani na yabaki ni nomuni bula. A tukuni kemuni kina vakaoqo o Paula “Me kakua ni beci iko e dua ni ko sa cauravou; ia mo yaco mo nodra ivakarau era sa vakabauta, ena vosa, ena ivalavala, ena loloma, ena lomadina, ena yalosavasava.”⁸

Vei ira na qase sa yaco mai
Na matabete ena yacai Eroni.
Vaka-Livai, bete, kei na parofita talega,
Ena veiqaravi me vakalougatataki ira na Luve ni Kalou.

Sa qai tadu mai na iVakabula kei vuravura
Ko Joni, me mai vakasaqara,
Me papitaisotaki ena kaukauwa vata ga
Ka tadolava na mataka ni veivakabulai.

Ena kaukauwa vata ga oqo edaidai
Ki vuravura sa vakalesui tale mai,
iTekivu ki na itinitini ni dina ni kosipeli o ya
Sa rawa me sucu vou kina e dua.

Matabete i Eroni, tosoi kina na dina,
Yaco mai ena vakavakarau—
Me rawa kina na veivakabulai o ya
Ni Luvena Daulomani na Kalou!

O koya sa veiqaravi ena kaukauwa oqo—
’Sega na gone tagane lailai walega me vakuwai.
iUbi ni matabete me vakaqaqacotaki kina
Eda na kaya, “Raica na tagane!”9

“Raica sa tu ki na ilesilesi e ra … na Matabete vaka-Eroni, na kaukauwa kei na lewa ni nodra cakacaka na agilosi dauveiqaravi, io me ra vakayacora na cakacaka vakayago me vaka sa volai ena ivakavuvuli; io me ra papitaisotaki ira sa veivutuni me bokoci kina na nodra ivalavala ca, me vaka sa virikotori ena veiyalayalati kei na vunau.”¹⁰ O Peresitedi Boyd K. Packer a dikeva: “Eda sa vinaka sara tiko ena kena veisoliyaki tiko na dodonu ni matabete. Eda sa tauyavutaka na lewa ni matabete volekata na veivanua kece ga. … Ia sa totolo sara na kena veisoliyaki tiko na kaukauwa ni matabete, au vakasamataka, e sega ni sa tiko ena matabete na kaukauwa e dodonu me tu kina.”¹¹ Me baleta na nodra tiko vinaka tawamudu na luve ni Kalou, e dodonu me wali na ka oqo.

Sa tukuna vei keda na noda parofita na sala e rawa me na vakayacori kina oqo. Lavetaki mai vei George Q. Cannon, a kaya o Peresitedi Monson: “Au vinakata meu raica me vaqaqacotaki na kaukauwa ni Matabete. … Au vinakata me curuma yani na qaqaco kei na kaukauwa oqo na lewe taucoko ni Matabete, me tekivu mai uluna ka yacova yani na lewe ni dikoni yalomalua duadua ena Lotu. Me na vakasaqara na tamata yadua na ivakatakila ni Kalou ka reki kina, me sa rarama na lomana ena rarama kei lomalagi ka solia vua na kila-ka me baleta na nona itavi, vakabibi na tiki ni cakacaka e nona ilesilesi ena Matabete.”¹²

Na cava e rawa ni cakava e dua na dikoni, ivakavuvuli, se bete me ciqoma kina na yalo ni ivakatakila ka vakarabailevutaka na nona veikacivi? Sa rawa kina me bula voli tiko ena nona rekitaka na veivakasavasavataki, veivakatabui, kei na kaukauwa veivakararamataki ni Yalo Tabu.

Na bibi ni ka oqo e cauraka tiko kina vakaoqo o Alama: “Ia au sa kaya vei kemudou sa noqu ilesilesi meu vunau vei, … ira kece ga na qase … kei na gone … mo dou veivutuni ka sucu vou tale.”¹³ Ni sa sucu vou tale e dua, sa veisau na lomana. Sa sega ni gadreva tale na veika butobuto se tawa savasava. Sa lomana vakatitobu ka vakaidina na Kalou. Sa gadreva o koya me vinaka, me qaravi ira na tamata, ka muria tiko na vunau.¹⁴

A vakamacalataka na ka e sotava o Peresitedi Joseph F. Smith baleta na veisau qaqa oqo: “Na yalo a sobuti au e dua na vakacegu dina, loloma kei na rarama dina. Au vakila e lomaqu ni kevaka meu a ivalavala ca … au sa vosoti kina; kau sa vakasavasavataki dina mai na noqu ivalavala ca, e tarai na yaloqu, kau vakila niu sa sega ni rawa ni vakamavoataka e dua na manumanu lailai e ruku ni yavaqu. Au vakila niu sa vinakataka ga meu caka vinaka ena veivanua kecega kivei ira na tamata kecega ki na veika kecega.Au sa vakila e dua na bula vou, e dua na gagadre vou meu cakava ga na veika sa dodonu. Sa sega sara ga ni dua na tiki lailai ni butobuto sa tu e lomaqu. Io au sa qai dua ga na cauravou lailai, sa dina sara, … ia sa ikoya oqo na veivakauqeti sa sobuti au, kau kila ni sa mai vua na Kalou, ka sa ikoya o ya ka sa ivakadinadina bula tiko mai vei au ni noqu sa ciqoma na Turaga.”¹⁵

Ia keimami sa kacivi kemuni tiko na cauravou veivakurabuitaki mo ni sasagataka mo ni “sucu vou tale.”¹⁶ Ni masulaka na veisau cecere oqo ena nomuni bula. Vulica na ivolanikalou.Gadreva vakalevu cake mai na ka eso mo ni kila na Kalou ka yaco mo ni vakataka na Luvena sa savasava. Rekitaka na nomuni bula vakaitabagone ia “biuta tani na ka vagonegonea”:¹⁷

Lako tani mai na vosa e vakatani.

Drotani mai na veika butobuto kecega.

Kakua ni veicudruvi.

Veivutuni ni sa dodonu vakakina.¹⁸

Oqo ena vukei iko mo torocake ki na kemu ituvaki qaqa vakatagane. Na itovo ni yaloqaqa, veivakabauti, yalomalumalumu, vakabauta, kei na caka vinaka ena nomu. Era na qoroi iko na nomu itokani, ka vakacaucautaki iko na itubutubu, era na vakararavi tiko vei iko na matabete, ka ra na taleitaki iko na goneyalewa ka ra yaco me ra vinaka cake ena vukumu. Ena vakavinavinakataki iko na Kalou ka vakalougatataka na cakacaka ni nomu matabete ena kaukauwa mai lomalagi.

Oi keimami na kena vo keimami na cakava na neimami itavi. Oi keimami na itubutubu, tukamuni ka bumuni keimami na vakarautaki kemuni ki na veiqaravi yalodina ena matanitu ni Kalou. Ni keimami sa tacimuni keimami na ivakaraitaki vinaka vei kemuni mo ni vakatotomuria. Keimami na vaqaqacotaka cake na nomuni kuoramu. Keimami na tokona na nomuni mataveiliutaki ni kuoramu ni ra cakacakataka na nodra idola ni vakatulewa. Keimami na vakarautaka na madigi vei kemuni mo ni vakayacora taucoko na itavi ni Matabete i Eroni ka vakarabailevutaka na nomuni veikacivi.

Mai na nomuni cakacaka vakalotu oqo, ena yaco na veivakalougatataki cecere ki na Lotu.“Era sa vosa na agilosi ena kaukauwa ni Yalo Tabu.”¹⁹ E rawa tale ga ni o cakava. Ni ko vosa ena kaukauwa ni Yalo Tabu, ka qarava na ivakatakilakila tabu ni sakaramede, era na sasagataka na tagane kei na yalewa, cauravou kei na goneyalewa mer a veivutuni, ka vakatorocaketaka na nodra vakabauti Karisito, ka me tiko ga kei ira na Yalo Tabu ena veigauna.

Ni ko lolo ka vakasokomuna mai na isolisoli ni lolo, era na vakayavalati na lewenilotu me ra muria na ivakarau ni cakacaka ni iVakabula. Na Turaga e kauwaitaki ira na dravudravua kei ira na vakalolomataki, ka yalovi ira o Koya, “Mo lako mai, mo muri au.”²⁰ Na nomuni veiqaravi ena kauwaitaki ira na vakaloloma e vakaitavitaki keda ena Nona cakacaka tabu ka vukea na noda rawata na veivosoti ni noda dui ivalavala ca ena gauna sa oti.²¹

Ni ko ni “dausikova na nodra vuvale na lewe ni lotu,”²² kakua ni rere se mamadua. Ena solia vei kemuni na Yalo Tabu ena gauna vata ga o ya na vosa mo ni cavuta, na ivakadinadina mo ni cauraka, kei na veiqaravi mo ni cakava.

Na nomuni sasaga gugumatua mo ni “dau vakaraici ira na lewe ni lotu”²³ ena vuavuai vinaka sara. Na nomuni itovo tudei ena drutia laivi na yalo tawavakabauta kaukauwa ka sereka na ivesu nei vu-ni-ca. Na nomuni veisureti vei ira eso me ra gole mai ki lotu vata kei iko, ka votai vata kei iko ena sakaramede, ka veiqaravi vata kei iko ena yaco me dua na rarama veikidavaki vei ira sa yali tu ena butobuto na vanua e rarama lailai tiko kina na cina ni kosipeli se sega sara ga ni waqa tiko kina.

Oi kemuni na taciqu itabagone lomani ni, “kakua ni vakawalena na isolisoli sa tu vei kemuni,”²⁴ na kena ko ni a ciqoma ena gauna a soli kina vei kemuni na Matabete i Eroni ka vakatabui kina.

“Ni sa sega ni solia mai vei keda na Kalou na yalo ni rere; a yalo ni kaukauwa ga, kei na yalololoma, kei na yalomatua.

“O koya mo qai kakua ni maduataka na kena itukutuku ni noda Turaga. … Ia mo vakaivotavota … ena vuku ni itukutuku vinaka me vaka na kaukauwa ni Kalou;

“O koya sa … kacivi keda me da yalosavasava, … sa soli vei keda e liu, ena vuku i Karisito Jisu, sa vakatekivu e muri ko vuravura.”²⁵

Na noda parofita lomani e sa “kacivi iko ki na veiroka.”²⁶ Keimami vakamuduotaki kemuni, masulaki kemuni, rekitaka na veiqaravi vata kei kemuni, ka vakavinavinakataka na Kalou ena kaukauwa ni veiqaravi ni veivakabulai ena lotu.

Au sa vakadinadinataka, ni sa Tamada Vakalomalagi na Kalou ka sa tiko sara mai lomalagi. O Jisu Karisito na Luveni Kalou savasava, na Dauveivueti kei vuravura, kei kemuni na lewe ni Matabete i Eroni yalodina ko ni sa matataki Koya ena vuravura oqo, ena yaca i Jisu Karisito, emeni.