Ko e hā ʻoku mahuʻinga ai ʻa e ngaahi ouaú ʻi heʻeku moʻuí?

Ko e ouaú ko ha ngāue toputapu mo maau ʻoku ʻi ai hono ʻuhinga fakalaumālie. ʻOku fakahoko ʻa e ngaahi ouaú ʻi he mafai ʻo e lakanga fakataulaʻeikí pea ʻi he fakahinohino ʻa kinautolu ʻoku nau maʻu ʻa e ngaahi kī ʻo e lakanga fakataulaʻeikí. ʻOku tokoni e ngaahi ouaú ke tau manatuʻi ko hai kitautolu pea mo fakamanatu mai hotau faotngia ki he ʻOtuá. ʻOku nau tokoni ke tau haʻu kia Kalaisi ʻo maʻu ʻa e moʻui taʻengatá.

Teuteuʻi fakalaumālie koe

Ko e hā ha ngaahi ouau ʻo e ongoongoleleí kuó ke ʻosi maʻu? Kuo tāpuekina fēfē ʻe he ngaahi ouau ko ʻení hoʻo moʻuí? Ko e hā ʻoku nau mahuʻinga ai kiate koé?

Ko e hā ha ngaahi ouau kuo ʻosi maʻu ʻe he kau talavoú? Ko e hā e ngaahi ouau ʻoku nau teuteu atu ke maʻú? Ko e hā ʻoku fie maʻu ai ke mahino kiate kinautolu e mahuʻinga e ngaahi ouau ʻo e ongoongoleleí?

Ako ʻi he faʻa lotu ʻa e ngaahi potufolofola mo e ngaahi maʻuʻanga tokoni ko ʻení. Ko e hā e ongo ʻokú ke ongoʻi ke vahevahe mo e kau talavoú ke tokoni ke mahino kiate kinautolu hono mahuʻinga ʻo e ngaahi ouaú?

Mātiu 3:13–17 (Ko e Papitaiso ʻo Sīsū Kalaisí)

Ngāue 19:1–6 (Ko hono toe papitaiso ʻe Paula ha niʻihi naʻe ʻikai papitaiso totonú)

3 Nīfai 11:21–26 (Ko e foaki ʻe Sīsū Kalaisi ʻa e mafai ke fai papitaisó mo fakahinohinoʻi ange ʻa e founga totonú)

Molonai 8:10–12 (Ko e akonaki ʻa Molomona fekauʻaki mo e papitaisó)

T&F 84:19–21 (Ko e ʻfakahaaʻi e mālohi ʻo e anga faka-ʻOtuá ʻi he ngaahi ouau ʻo e lakanga fakataulaʻeikí)

Ngaahi Tefito ʻo e Tuí 1:3–5 (ʻOku mahuʻinga e ngaahi ouaú ki he fakamoʻuí)

David A. Bednar, “Tauhi Maʻu Ai pē ha Fakamolemole ʻo Hoʻomou Ngaahi Angahalá,” Ensign pe Liahona, Mē 2016, 59–62

Gary E. Stevenson, “Ko Hoʻo Miniti ʻe Faá,” Ensign pe Liahona, Mē 2014, 84–86

“Ngaahi Ouau mo e Ngaahi Tāpuaki ʻo e Lakanga Fakataulaʻeikí,” Tohi Tuʻutuʻuni Fika 2: Ko Hono Puleʻi ʻo e Siasí (2010), 20.1

“Ngaahi Ouaú,” Tuʻu Maʻu ʻi he Tuí (2004), 136–37

Vitiō: “Faith in the Power of the Priesthood”

Tuku ke taki e kau talavoú

ʻE hanga ʻe ha mēmipa ʻo e kau palesitenisī ʻo e kōlomú (pe ko ha ʻasisiteni ki he pīsopé ʻi he kōlomu ʻa e kau taulaʻeikí) ʻo tataki e fakataha fakakōlomú. ʻOkú ne tataki e kau talavoú ʻi he fealeaʻaki fakataha kau ki he ngaahi meʻa ʻa e kōlomú, akoʻi kinautolu ʻi honau ngaahi fatongia fakataulaʻeikí (mei he folofolá mo e tohi Fatongia ki he ʻOtuá), fakalotolahiʻi kinautolu ke vahevahe ʻenau ngaahi aʻusia ʻi hono fakahoko ʻenau fatongia ki he ʻOtuá, pea fakaafeʻi ha ʻetivaisa pe mēmipa kehe ʻo e kōlomú ke akoʻi ha lēsoni ʻo e ongoongoleleí. Te ne lava ʻo teuteu ʻaki hano fakafonu ha ʻasenita ʻo e fakataha fakakōlomú lolotonga ha fakataha fakapalesitenisī.

Kamata ʻa e akó

Fili mei he ngaahi fakakaukau ko ʻení pe ko haʻo fakakaukau pē ʻaʻau ke fakamanatu e lēsoni he uike kuo ʻosí mo fakafeʻiloaki ʻaki e lēsoni ʻo e uike ní:

Fakaʻaliʻali ki he toʻu tupú ha fakatātā pe meʻa ʻoku fekauʻaki mo e lēsoni he uike kuo ʻosí, pea kole ki he kau talavoú ke nau fakamatalaʻi e founga ʻoku fekauʻaki ai mo e lēsoni ko iá. Naʻe anga fēfē ʻenau fakaʻaongaʻi e meʻa ne nau akoʻí?
Kole ki he kau talavoú ke nau hiki ki he lahi taha te nau lavá ʻa e ngaahi ouau ʻo e ongoongoleleí ʻoku nau lava ʻo fakakaukau ki ai. Pea tokoni ke nau tala pe ko e fē ʻa e ngaahi ouau ʻi he lisí ʻoku fie maʻu ki he hakeakiʻí.Ko e hā naʻe ʻomi ai ʻe he Tamai Hēvaní e ngaahi ouaú ni kiate kitautolú? ʻE tali fēfē ʻe he kau talavoú ki ha taha ʻokú ne pehē ʻoku ʻikai fie maʻu e ngaahi ouaú ia? (Kapau ʻoku fie maʻu ʻe he kau talavoú ha ngaahi fakakaukau, te nau lava ʻo ʻalu ki he “Ngaahi Ouau” ʻi he Tuʻu Maʻu ʻi he Tuí pe vahe ʻoku kaveinga ko e “Ko e Laumālie Māʻoniʻoní mo e Ngaahi Ouau ʻo e Lakanga Fakataulaʻeikí” ʻi he lea ʻo ʻEletā David A. Bednar “Tauhi Maʻu Ai pē ha Fakamolemole ʻo Hoʻomou Ngaahi Angahalá.”)

Ako fakataha

ʻE tokoni ʻa e ngaahi ʻekitivitī takitaha ʻi laló ke mahino ki he kau mēmipa ʻo e kōlomú e ʻuhinga ʻoku mahuʻinga ai ʻa e ngaahi ouaú. Muimui ʻi he fakahinohino ʻa e Laumālié, pea fili ha [ʻekitivitī] ʻe taha pe toe lahi ange ʻe ʻaonga taha ki hoʻo kōlomú:

Fakamatalaʻi ʻa e ngaahi tāpuaki ʻo e ngaahi ouau ʻo e papitaisó, hilifaki ʻo e nima ki he meʻafoaki ʻo e Laumālie Māʻoniʻoni, pea mo e sākalamēnití mei he lea ʻa ʻEletā David A. Bednar’s “Tauhi Maʻu Ai pē ha Fakamolemole ʻo Hoʻomou Ngaahi Angahalá.” Fakaafeʻi e kau talavoú ke fili ha ouau ʻe taha pea lisi kotoa e meʻa ne ako ʻo kau ki he vahe ko ʻení, ke tokoni kiate kinautolu ke ako ʻo kau ki he founga ʻe faitokonia ai kinautolu ʻe he ngaahi ouau ko ʻení. Pea fakaafeʻi e kau talavoú ke akoʻi e toenga ʻo e kōlomú ʻo e meʻa ne nau ako ʻi ha founga mohu founga—te ke lave ʻo fakaʻaongaʻi ha ngaahi fakatātā pe vaʻinga ha keimi.
Fakaafeʻi ha fakaafe fakalangilangi ke lea pe ko ha talavou kuó ne lavaʻi lelei ha meʻa maʻongoʻonga ke vahevahe pe ko e hā ʻa e ngaahi fei maʻu ki ha lava meʻa na ne maʻu mo e founga ke maʻu ai kinautolú (mahalo na ne maʻu ha pale ʻi he Sikautí, maʻu ha ngaahi lava meʻa fakaako, pe lava meʻa ʻi ha fakaʻaliʻali ki ha konga ʻo ha tulama). Pea fakaafeʻi e kau talavoú ke lau ʻa e palakalafi ʻoku kamata ʻaki “Hangē ko ia ʻoku ʻi ai” mei he lea ʻa ʻEletā Gary E. Stevenson “Ko Hoʻo Miniti ʻe Faá.” ʻOku tatau fēfē ʻa e ngaahi ouaú ki he ngaahi fiemaʻu ne vahevahe ʻe he fakaafe fakalangilangí pe talavoú? Te ke malava foki ʻo lau e toenga ʻo e lea ʻa ʻEletā Stevenson ʻo kumi pe ko e hā fua e ngaahi meʻa kehe naʻá ne akoʻi ʻo kau ki he ngaahi ouaú.
Fakaafeʻi e kau talavoú ke sio he vitiō “Faith in the Power of the Priesthood.” Kole ange ke nau hiki ʻi he palakipoé ʻa e ngaahi ouau ne fakalaú mo e ngaahi tāpuaki ʻoku tau maʻu ʻi he kau ʻi he ngaahi ouaú takitaha. Fakaafeʻi ʻa e toʻu tupú ke nau fakamatalaʻi ha ngaahi aʻusia ne nau maʻu pe siotonu ai ʻi ha taha ʻo e ngaahi ouau ko ʻení (pe ngaahi ouau kehe, hangē ko ha tāpuaki fakaetamai pe faingāue). Naʻe tāpuekina mo fakamālohia fēfē kinautolu ʻe he ngaahi aʻusia ko ʻení?
Vakaiʻi mo e kolomú ha e lisi ʻo e ngaahi fie maʻu ʻe fā ki hono fakahoko e ngaahi ouau ʻi he konga 20.1 ʻo e Tohi Tuʻutuʻuni Fika 2. Fakaafeʻi ʻa e kau talavoú ke lau ʻa e 3 Nīfai 11:21–26 pea feinga ke ʻilo e founga ʻoku feau ai ʻa e ngaahi fie maʻu ko ʻení ʻi he fakamatala ʻa e Fakamoʻuí ki he papitaisó. ʻOku fakakakato fēfē ʻe heʻenau tāpuakiʻi ʻo e sākalamēnití ʻa e ngaahi fie maʻu ʻe fā ko ʻení? Ko e hā ʻoku hoko kapau naʻe fakahoko ha ouau ʻoku ʻikai fakakakato ai e ngaahi fie maʻu ko ʻení? Fehuʻi ki he kau talavoú pe ko e hā ʻoku mahuʻinga ai ke ʻilo ki he ngaahi fie maʻu ko ʻení ʻi heʻenau teuteu ke akoʻi e niʻihi kehé fekauʻaki mo e ngaahi ouaú.
Fakaafeʻi e kau talavoú ke nau fakakaukau ʻoku nau akoʻi ha taha mei ha tui fakalotu kehe kau ki he papitaisó, peá ne talaange ʻe ia, “Ne u ʻosi papitaiso au ʻi hoku siasí.” ʻE tokoni fēfē ʻa e kau talavoú ke mahino ki he tokotahá ni, ʻi ha founga lelei, ʻa e ʻuhinga ʻe fie maʻu ai ke toe papitaisó? Ko e hā ha ngaahi potufolofola pe aʻusia te nau vahevahe? Te ke lava ʻo fakahinohino kinautolu ki he lisi ʻo e ngaahi fie maʻu ʻi he konga 20.1 ʻo e Tohi Tuʻutuʻuni Fika 2; Mātiu 3:13–17; Ngāue 19:1–6; 3 Nīfai 11:21–26; Molonai 8:10–12. Kapau ʻe lava, pea fakaafeʻi ʻa e kau faifekau taimi kakató ke nau fakamatala ki he kōlomú ʻa e founga ʻo ʻenau fakamatalaʻi ki he kau fie-fanongó hono mahuʻinga ʻo e ngaahi ouaú (ʻuluaki maʻu ha ngofua mei he pīsopé).
Vahevahe mo e kōlomú ʻa e fakamatala ko ʻeni ʻa Palesiteni Sipenisā W. Kimipoló: “[ʻOku hoko e ngaahi ouaú ko e ngaahi fakamanatu]. Ko e taumuʻa moʻoni ia ʻo e sākalamēnití, ke fakamanatu ke ʻoua naʻa ngalo ʻiate kitautolu, pea mo tokoni ke tau manatuʻi]” (Teachings of Spencer W. Kimball, ed. Edward L. Kimball [1982], 112). Kole ki he kau talavoú ke hiki ʻa e ngaahi ouau ʻo e ongoongoleleí (hangē ko ia ʻi he peesi 136–37 ʻo e Tuʻu Maʻu ʻi he Tuí) pea aleaʻi pe ko e hā ʻoku tokoni ʻa e ngaahi ouaú ni takitaha ke tau manatuʻí.

Kole ki he kau talavoú ke vahevahe e meʻa ne nau ako he ʻaho ní. ʻOku mahino nai kiate kinautolu e mahuʻinga ʻo e ngaahi ouaú? Ko e hā haʻanau ngaahi ongo pe fakakaukau? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he tokāteline ko ʻení?

Tokoni fakafaiakó

“ʻI hoʻo teuteu ke faiakó, fakapapauʻi ʻokú ke fakaʻaongaʻi ha ngaahi founga fakafaiako kehekehe mei he lēsoni ki he lēsoni. ʻE lava ke ʻuhinga ʻeni ki haʻo fakaʻaongaʻi ha kiʻi meʻa faingofua hangē ko ha fakatātā fakaʻofoʻofa, pe saati he holisí ʻi ha lēsoni ʻe taha pea lisi ʻo ha ngaahi fehuʻi ʻi he palakipoé ʻi he lēsoni ʻe taha” ( ʻOku ʻIkai ha Ui ʻe Mahuʻinga Ange ʻi he Faiakó [2000], 102).

Fakaafeʻi ke ngāue

ʻE fakaʻosi ʻa e fakatahá ʻe he talavou ʻokú ne tatakí. ʻE lava ke ne:

Vahevahe ʻene ongo fekauʻaki mo e ngaahi ouau ʻo e ongoongoleleí.
Tataki ha fealēleaʻaki nounou fekauʻaki mo e founga ʻoku totonu ke nau teuteu fakalaumālie ai ke ngāue ʻi he ngaahi ouau toputapú.