Aisea e oo mai ai puapuaga ia i tatou?

O se vaega o le fuafuaga a le Tama Faalelagi, e ao ona tatou oo i puapuaga i le olaga nei. I nisi o tulaga, o puapuaga e oo mai o le taunuuga o a tatou lava filifiliga le lelei po o filifiliga a isi. O isi tofotofoga o se vaega masani lava o lo tatou aafiaga i le tino. E ui ina faigata, ae o o tatou luitau e mafai ona fesoasoani ia i tatou e tuputupu ae ai faaleagaga ma avea atili ai e pei o Iesu Keriso.

Saunia oe lava ia faaleagaga

Mafaufau i tofotofoga sa e oo i ai i lou olaga. Na faapefea ona faamalosia oe e le Faaola i le gasologa o nei taimi faigata?

O nisi o alii talavou e te aoaoina atonu ua uma ona feagai ma ni tofotofoga ogaoga. O i latou uma lava o le a manaomia ona faalagolago i le alofa mutimutivale o le Faaola e maua ai le fesoasoani i le taimi o tofotofoga i o latou olaga atoa

Ia suesue ma le agaga tatalo ia mau ma punaoa nei. O a ni lagona e te maua a o e suesue?

2 Nifae 2:11 (E ao lava ona i ai le faafeagai i mea uma)

Mosaea 23:21 (E tuuina mai e le Atua ia i tatou ia puapuaga e tofotofo ai lo tatou faatuatua)

Eteru 12:27 (E aumai e le Atua ia i tatou vaivaiga ina ia tatou lotomaualalo ai)

MF&F 101:1–9 (O nisi o puapuaga e oo mai ona o a tatou lava filifiliga le lelei)

MF&F 121:7–8; 122:4–9 (O tofotofoga tatou te maua ai le potomasani ma e mo lo tatou lava lelei)

Yoon Hwan Choi, “Aua le Vaavaai Solo, Vaai i Luga!” Ensign po o le Liahona, Me 2017, 90–92

Dallin H. Oaks, “Faafeagai o Mea Uma,” Ensign po o le Liahona, Me 2016, 114–17

Koichi Aoyagi, “Piimau i Lou Ala,” Ensign po o le Liahona, Nov. 2015, 126–28

Neil L. Andersen, “O Asiosio Faaleagaga,” Ensign po o le Liahona, Me 2014

“Puapuaga,” Faamaoni i le Faatuatua (2004), 142–45

Vitio: “O Le A Siitia I Luga Tatou e le Atua,” “E Mafai e Le Perisitua ona Faamalolosia o Tatou Aiga i Tofotofoga,” “O le Toefausiaina o o Tatou Olaga”

4:58

1:25

1:35

Aoao atu i le ala a le Faaola

Sa faaaoga e le Faaola ia tusitusiga paia e aoao ma molimau mai ai e uiga i Lana misiona. O le lesona lenei o loo i ai le tele o mau mamana o loo aoao mai ai le ala o le a faamalosia ai e le Faaola i tatou i taimi o o tatou tofotofoga. A o suesue ma talanoa alii talavou i nei mau, o le a molimau mai le Agaga Paia i lo latou moni.

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Fai atu i alii talavou e mafaufau ma tusi i lalo se mea se tasi sa latou aoaoina i le vaiaso talu ai ma faasoa mai i le korama. Faaaoga lenei mea o se vaega e amata ai mo le faailoaina atu o le lesona o le vaiaso lenei.
Iloilo faatasi o se korama le faamatalaga a Elder Neil L. Andersen i se laau o loo tuputupu ae i se siosiomaga matagia (i lana lauga “O Asiosio Faaleagaga”). O le a se mea o aoao mai e lenei talafaatusa i alii talavou e uiga i puapuaga? Valaaulia i latou e suesue i le lauga, tagai mo fautuaga latou te lagona o le a fesoasoani ia i latou e tetee atu i asiosio faaleagaga.

Aoao faatasi

O gaoioiga taitasi o loo i lalo o le a fesoasoani i tagata o le korama e aoao ai e uiga i le faamoemoega o le puapuaga. I le mulimuli ai i le musumusuga a le Agaga, filifili se gaoioiga se tasi pe sili atu o le a sili atu ona aoga mo lau korama:

Aumai se filifili po o se ata o se filifili i le vasega. O le a se mea e tupu pe afai e motu se tasi o sootaga o le filifili? E mafai faapefea ona tatou mautinoa o le a avea i tatou o se sootaga malosi i filifili o augatupulaga i o tatou aiga e faavavau? Valaaulia ia alii talavou e saili mo le auala na tali ai e Elder Yoon Hwan Choi lenei fesili i lana saunoaga “Aua le Vaavaai Solo, Vaai i Luga!” e amata i le parakalafa lea e amata i le, “O i tatou uma o se vaega o se aiga e faavavau.” Na faapefea ona vaavaai atu Elder Choi ma lona aiga ia Keriso i tala na ia faasoaina? O a nisi taimi o le a “le faigofie [ai] pea le vaai i luga”? O a ni fautuaga na tuuina mai e Elder Choi i le parakalafa mulimuli o lana saunoaga e fesoasoani ia i tatou “e vaavaai atu ai pea ia [Keriso]” i taimi faigata?
Valaaulia ia alii talavou e faitau le tala o i le lauga a Elder Koichi Aoyagi “Piimau i Lou Ala,” e amata i le parakalafa lea na ia faamatala ai le faalavelave tautaavale. O le a se mea o aoao mai e lenei tala i alii talavou e uiga i le mafuaaga tatou te fetaiai ai ma faafitauli i lenei olaga? Mafaufau e valaaulia se alii talavou ao lei oo i le taimi e faasoa mai se aafiaga lea na faamalosia ai o ia po o se tasi o lona aiga e ala i se faafitauli po o se luitau. E mafai foi ona ia faasoa mai se tala mai lona talafaasolopito faaleaiga lea e aoaoina atu lenei mataupu faavae.
Fai atu i alii talavou taitoatasi e tusi i lalo se tofotofoga o loo i ai ia te ia po o i ai i se tasi o lona aiga. Valaaulia alii talavou e suesue i mau o loo i lenei otootoga po o isi mau latou te iloa e maua ai se mea o aoao mai ai le mafuaaga e oo mai ai puapuaga ia i tatou. Valaaulia i latou e faasoa atu mea latou te maua. E mafai faapefea ona fesoasoani lenei mau e foia le tofotofoga na latou tusia?
Faitau faatasi ia parakalafa muamua e lua o le “Puapuaga” i le Faamaoni i le Faatuatua. O le a le matafaioi o puapuaga i le fuafuaga a le Tama Faalelagi? Tuu atu i tagata taitoatasi o le korama se vaega se tasi o vaega e tolu o loo totoe e uiga i puapuaga o i le Faamaoni i le Faatuatua, ma fai atu i le alii talavou e sauni e aoao atu i tagata uma o le korama le mea ua latou aoao mai a latou vaega. Uunaia i latou e faasoa atu se ala po o se aafiaga patino e faatatau i mea sa latou faitauina.
Tusi se laina e faasasao i lalo i le ogatotonu o le laupapa, ma tusi ai “Aisea tatou te oo ai i faigata?” i le pito i luga o le tasi koluma, ma le “E faapefea ona tatou fetaiai ma luitau i o tatou olaga?” i le pito i luga o le isi. Vaevae le saunoaga a Elder Dallin H. Oaks “Faafeagai o Mea Uma” i vaega, ma tuu atu ia tofu alii talavou ma se vaega e faitau. Fai atu i alii talavou e saili mo tali o nei fesili ma tusi a latou tali i luga o le laupapa i le koluma talafeagai. O a ni malamalamaaga na maua e alii talavou mai lauga? E mafai foi ona e faaalia se tasi o vitio na fautuaina atu i lenei otootoga e fesoasoani i alii talavou ia maua ni tali faaopoopo i fesili o i luga o le laupapa.
Faatasi ai ma se faatagaga mai le epikopo, ia valaaulia tamā o alii talavou e faasoa atu i le korama auala ua fesoasoani ai Iesu Keriso ia i latou e manumalo ai i tofotofoga. O a ni mea sa latou aoao mai i o latou aafiaga i puapuaga? Fai atu i tamā e faasoa atu se mau o se vaega o le talanoaga.

Fai atu i alii talavou e faasoa atu mea ua latou aoaoina i le aso. Pe latou te malamalama i le pogai e oo mai ai puapuaga ia i tatou? O a ni o latou lagona po o manatu o i ai? O i ai ni a latou fesili faaopoopo? Mata o le a aoga le faaaluina o se isi taimi i lenei aoaoga faavae?

Motugaafa faafaiaoga

“Ia faatulaga nofoa i totonu o le potu ina ia mafai ai ona e vaai atu i mata o tagata taitoatasi ma ia mafai e tagata taitoatasi ona vaai mai i ou foliga” (O Le Aoao Atu E Leai Se Isi Valaauga E Sili Ai [1999], 75).

Valaaulia e faatino

O le alii talavou o loo taitai e faaiuina le fonotaga. E mafai ona ia:

Taitaia se talanoaga e uiga i auala e mafai ai e le korama ona faataunuu lo latou tiute faaleperisitua o le fesoasoani atu i isi i o latou tofotofoga. E mafai ona latou tusia ni fuafuaga e fesoasoani ai ia i latou i le vaega “Auauna Atu i Isi” i a latou tusi Tiute i le Atua.
Faasoa atu lana molimau i le ala na faamalosia ai e le Faaola o ia i taimi o tofotofoga.