Aisea e afaina ai filifiliga ou te faia?

Ua tuuina mai e le Tama Faalelagi ia i tatou le faitalia tatau, le tomai e filifili ai ma faatino mo i tatou lava. E ui ina tatou saoloto e fai a tatou lava filifiliga, ae e le mafai ona tatou filifilia taunuuga o na filifiliga. O filifiliga lelei e oo atu ai i le fiafia tumau ma le ola e faavavau. Afai tatou te ole atu ia te Ia, o le a fesoasoani mai le Tama Faalelagi ia tatou faia filifiliga poto.

Saunia oe lava ia faaleagaga

Mafaufau loloto i faaiuga taua ua e faia i lou olaga. E faapefea ona aafia oe ma isi e nei faaiuga? O a ni mea ua e aoaoina mai i nei faaiuga?

A o e tatalo mo alii talavou taitasi, mafaufau loloto i faaiuga o loo ia faia. O le a faapefea ona aafia e nei faaiuga o ia i le taimi nei ma i le lumanai?

Suesue ma le agaga tatalo mau ma punaoa nei. O le a se mea e te lagona o le a fesoasoani i alii talavou ina ia malamalama ai i le taua o le faia o filifiliga atamamai?

Iosua 24:15 (E mafai ona tatou filifili e auauna i le Alii)

Ioane 14:15 (O a tatou filifiliga lelei e faaali atu ai lo tatou alolofa i le Tama Faalelagi ma lo tatou mananao e fai Lona finagalo)

2 Nifae 2:16, 27; Helamana 14:30–31 (Ua tatou saoloto e filifili ma galulue mo i tatou lava)

Moronae 7:14–15 (Ua tuuina mai ia i tatou e filifili i le va o le lelei ma le leaga)

Gary B. Sabin, “Tutu i Luga i Totonu ma Tuuto Atoa Atu,” Ensign po o le Liahona, Me 2017, 52–55

Thomas S. Monson, “O Filifiliga,” Ensign po o le Liahona, Me 2016, 86

Dallin H. Oaks, “O Le Faataoto o le Lῡlῡ Saito,” Ensign po o leLiahona, Me 2015, 32–35

“Saolotoga,” Faamaoni i le Faatuatua (2004), 150–51

“Faitalia ma le Tali Atu mo Oe Lava Ia” ma le “Musika ma Siva,” Mo le Malosi o le Autalavou (2011), 2–3, 22–23

Vitio: “Tumau i totonu o Laina”; “Oute Lei Fa'anoanoa (i La'u Filifiliga)”

5:11

5:39

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Faaali atu se mea faitino e faatusa i ai se mea sa aoaoina e alii talavou i le vaiaso ua te’a, ma valaaulia i latou e faasoa atu po o le a le faiā a le mea faitino i se mea sa latou aoaoina.
Faaigoa se tasi tulimanu o se fasilaau i le “Filifiliga” ae o le isi i le “Taunuuga,” ma ia faaaoga e faaali ai o filifiliga uma tatou te faia ua pipii ai foi ma sona taunuuga (o nisi e lelei, o nisi taimi e le lelei). Ia valaaulia se alii talavou e uu le fasilaau a o e faamalamalamaina se filifiliga e ono feagai ma ia. E mafai e le alii talavou ona faamatala le taunuuga o lena filifiliga. Ia talanoaina le auala e aafia ai o tatou olaga, aiga, ma auaunaga faaleperisitua ona o a tatou filifiliga.

Aoao faatasi

O le a fesoasoani gaoioiga taitasi nei i tagata o le korama e malamalama ai i le aoaoga faavae o le faitalia. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

O le a sou manatu i le uiga o le “tuuto atoa atu”? O le a sou manatu i le uiga o le “tutu i luga i totonu”? Valaaulia ia alii talavou e faitau ia faataitaiga ma tala a Elder Gary B. Sabin na faaaoga e faamatala ai fuaitau nei i lana saunoaga “Tutu i Luga i Totonu ma Tuuto Atoa Atu.” O a nisi mea faaleagaga e ono faia e tagata ma le afa o le loto? E mafai faapefea ona tatou filifili ina ia “tuuto atoa atu” faaleagaga? Atonu e malie mo alii talavou le fatu o ni pepa lautele o i ai ni savali e faaaoga ai fuaitau “tutu i luga i totonu” po o le “tuuto atoa atu” faapea ma faataitaiga na tuuina mai e Elder Sabin. E mafai foi ona latou faaaofia ai ni a latou lava faataitaiga.
Valaaulia se uso o le korama e aoao atu se vaega o lenei lesona. E mafai ona ia faia lenei mea o se vaega o lana fuafuaga o le Tiute i le Atua e aoao mai ai ma aoao atu e uiga i le faitalia (tagai “Malamalama i le Aoaoga Faavae,” itulau 18, 42, po o 66).
Valaaulia alii talavou taitasi e faitau le leoa le “Faitalia ma le Tali Atu mo Oe Lava Ia” i le Mo le Malosi o le Autalavou ma faasoa mai mea e musuai ai o ia. E mafai ona filifili e tagata o le korama se isi tulaga faatauaina i le tusi ma faasoa mai nisi o filifiliga sa latou faia e faatatau i lena tulaga faatauaina ma faamanuiaga na oo mai mai ia latou filifiliga. Mo se faataitaiga, e mafai ona latou faitau i le “Musika ma Siva” i le Mo le Malosi o le Autalavou ma talanoaina ia faamanuiaga sa latou mauaina mai le fautuaga e aloese mai musika ma siva e le aoga.
Tuu atu ia tofu alii talavou ma se vaega o le lauga a Elder Dallin H. Oaks “O Le Faataoto o le Lulu Saito” po o le saunoaga a Peresitene Thomas S. Monson “O Filifiliga.” Valaaulia ia alii talavou e faitau na o i latou ona faasoa mai lea o ni malamalamaaga lea na uunaia i latou. E mafai ona latou faia lenei mea i vaega toalaiti pe ma le korama atoa. O a mea na latou aoaoina e uiga i taunuuga o a tatou talitonuga ma faatinoga? Valaaulia i latou e talanoa pe na faapefea ona fesoasoani ia i latou le fautuaga lea sa latou suesue i ai latou te faia ai ni filifiliga lelei.
Ia valaaulia ia alii talavou taitoatasi e sue se faataitaiga o se tagata o faia se filifiliga i tusitusiga paia (mo se faataitaiga, e mafai ona latou faatusatusaina filifiliga sa fai e Nifae ma filifiliga sa fai e Lamana ma Lemuelu o loo i le 1 Nifae 3:1–8 ma isi vaega i le 1 Nifae). O a ni taunuuga o nei filifiliga? Na faapefea ona aafia isi i filifiliga?
Matamata i se tasi o vitio o loo fautuaina atu i le otootoga lenei. Vaaaulia ia tagata o le korama e tagai mo taunuuga o filifiliga na faia e alii talavou o i le vitio. Fai i ai e faasoa mai mea ua latou maua. Valaaulia i latou e faasoa mai ni aafiaga lea atonu na latou faia lea e taua ni taunuuga. Valaaulia alii talavou taitasi e faitau se tasi o mau o i lenei otootoga ma faasoa mai le auala e mafai ona fesoasoani ai ia te ia e fai ni filifiliga sa'o i le lumanai.

Fai atu i alii talavou e faasoa mai mea na latou aoaoina i le aso. Pe ua latou malamalama lelei atili i le aoaoga faavae o le faitalia? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

”Aua e te popole pe afai e fifilemu mo ni nai sekone ia tagata o loo e aoaoina pe a uma ona e tuuina atu se fesili. Aua e te taliina lau lava fesili; tuu atu se taimi mo tagata o loo e aoaoina e mafaufau ai i ni tali. Ae peitai, o le faaumiumi o le leai o se pisa e faailoa mai ai latou te le o malamalama i le fesili ma e manaomia ai la lou toe faaupuina atu” (O Le Aoao Atu, E Leai Se Isi Valaauga E Sili Ai [1999], 72).

Valaaulia e faatino

O le alii talavou o loo taitai e faaiuina le fonotaga. E mafai ona ia:

Ia faasoa atu ni faataitaiga o filifiliga lelei sa ia faia ma faamatala pe na faapefea ona aafia lona olaga ma olaga o isi, e aofia ai lona aiga, i na filifiliga. E mafai foi ona ia valaaulia isi sui o le korama e faasoa atu.
Ia valaaulia tagata o le korama e iloilo e le tagata lava ia ia filifiliga o loo latou faia e aafia ai lo latou mafai ona avea o ni tagata faamaoni e umia le perisitua. E mafai ona ia uunaia i latou e fuafua ni auala e faaleleia atili ai.