O le a le faamoemoega o le olaga?

I le olaga lenei ua tatou maua ai ni tino faaletino ma tofotofoina ina ia iloa ai pe o le a tatou usitai i poloaiga a le Atua. O o tatou aafiaga i le aluga o le olaga nei ua fuafuaina e fesoasoani ia i tatou ia avea atili e pei o lo tatou Tama Faalelagi.

Saunia oe lava ia faaleagaga

Na faapefea ona e maua le olioli i lenei olaga? O a ni aafiaga na fesoasoani i lou tuputupu ae faaleagaga?

O a ni mea o fai e alii talavou e avea atili ai e pei o le Tama Faalelagi?

Suesue ma le agaga tatalo mau ma punaoa nei. O a mea ua uunaia oe e faasoa atu i le korama?

2 Nifae 2:25 (Ua faia i tatou ina ia tatou maua le olioli)

Alema 12:24; 34:32; 42:4 (O le olaga lenei o se taimi lea e tofotofoina ai ma saunia ai e fetaiai ma le Atua)

3 Nifae 12:3–12 (Sa ta’u mai e le Faaola nisi o uiga auaumama faaleatua)

3 Nifae 12:48 (E finagalo le Tama Faalelagi ia tatou atoatoa e pei ona atoatoa o Ia)

“O Le Aiga: O Se Folafolaga i le Lalolagi,” Ensign po o le Liahona, Nov. 2010, 129

Carol F. McConkie, “O Le Malumalu o le Matagofie,” Ensign po o le Liahona, Me 2017, 9–12

Thomas S. Monson, “Taialaina ma le Saogalemu i le Aiga,” Ensign po o le Liahona, Nov. 2014, 67-69

Gary E. Stevenson, “O Lau Fa Minute,” Ensign po o le Liahona, Me 2014, 84-86

“Ata o le Faaolataga,” Faamaoni i le Faatuatua (2004), 27–29

Aoao atu i le ala a le Faaola

Na valaaulia e le Faaola Ona soo e molimau atu. Mo se faataitaiga, Na Ia fesili atu i Ona soo, “O le a sa outou upu o ai Au?” (Mataio 16:15). A e fai atu ni fesili musuia i alii talavou, e mafai ona avea a latou tali ma avanoa e molimau atu ai ma faamalolosia a latou molimau.

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Fai atu i alii talavou e faasoa atu se mea sa latou aoaoina i le lesona o le vaiaso talu ai. Ua faapefea ona aafia o latou olaga i le lesona? O le a se mea ua ese lo latou faia ona o mea ua latou aoaoina? O a ni faamanuiaga ua ala mai i a latou faatinoga?
Faaali atu se manoa e i ai ni faapona e nonoa i le ogatotonu. Faamalamalama atu le auala e mafai ona faatusa ai le faapona i lenei olaga, ae o isi mea uma o loo i le isi itu o le faapona ua faatusa i le olaga i le tino ma mea uma o loo i le isi itu e faatusa i le olaga pe a mavae le olaga nei. E mafai ona avea lenei mea o se fesoasoani vaaia e faatatau atu i ai taualumaga o le fonotaga a le korama.

Aoao faatasi

O le a fesoasoani gaoioiga taitasi nei i tagata o le korama e aoao ai i uiga o le faamoemoega o le olaga. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Tuu atu ia tofu alii talavou ma se fasi pepa, ma valaaulia o ia e tusi se faaiugaga o le upu mamalu. Valaaulia ia alii talavou e faitau le saunoaga a Sister Carol F. McConkie “O Le Malumalu o le Matagofie” ma faaopoopo ana faamatalaga o le mamalu i a latou faauigaga. O le a se mea e mafai ona tatou faia ia mamalu atili ai? Valaaulia ia alii talavou e filifili se tasi o faauigaga o le mamalu sa latou tusia i lalo ma faasoa atu le auala e mafai ona latou tauivi ai ina ia mamalu atili ai i lena auala.
Ia valaaulia alii talavou e suesue i mau o loo i lenei otootoga ma faasoa atu mea ua latou aoaoina e uiga i le faamoemoega o le olaga lenei (e mafai foi ona latou suesue i le Faamaoni i le Faatuatua, itulau 115–16). E faapefea ona aafia filifiliga latou te faia i lo latou iloaina o lenei faamoemoega?
Valaaulia alii talavou e faitau i Faaamuia o i le 3 Nifae 12:3–12 ma vaavaai mo uiga auau mama e finagalo le Tama Faalelagi ia tatou atiina ae i le aluga o o tatou olaga faaletino. Fai atu ia i latou e mafaufau i tagata o i tusitusiga paia po o i o latou lava olaga o e aumaia faataitaiga o nei mataupu faavae. E faapefea ona fesoasoani aoaoga a le Faaola o loo i le 3 Nifae 12 tatou te malamalama ai i lo tatou faamoemoega o ni atalii o le Atua?
Tuu atu ia tofu tagata o le korama ma se kopi a le o le “O Le Aiga: O Se Folafolaga i le Lalolagi” po o le saunoaga a Peresitene Thomas S. Monson “Taialaina ma le Saogalemu i le Aiga.” Fai atu i tagata o le korama e faailoga upu ma fuaitau lea e aoaoina i latou e uiga i lo latou faamoemoega i le olaga o ni atalii o le Atua ao latou faitau. Valaaulia ia alii talavou e faasoa mai mea sa latou faailogaina ma faamatala mai pe aisea e anoa ai ia i latou.
Fai atu i le afa o le korama e faitau e uiga ia Noelle Pikus-Pace i le lauga a Epikopo Gary E. Stevenson “O Lau Fa Minute,” ma fai atu i le isi afa e faitau e uiga ia Torah Bright i lea lava lauga e tasi. Valaaulia i latou e faasoa atu i le tasi ma le isi mea sa latou aoaoina e uiga i le faamoemoega o le olaga mai nei tala. Tuu atu i alii talavou ni nai minute e toe iloilo ai le vaega o totoe o le saunoaga a Epikopo Stevenson ma mafaufau loloto po o a mai i latou i la latou “fa minute”—o a sauniga taua po o faatumutumuga o i lo latou lumanai, ma po o le a se mea o latou faia e saunia ai? Valaaulia ia alii talavou e faasoa mai o latou manatu.

Fai atu i alii talavou e faasoa mai mea na latou aoaoina i le aso. Pe ua latou malamalama lelei atili i le faamoemoega o le olaga? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Valaaulia e faatino

E faaiuina e le uso o le au peresitene o le korama lea o loo taitai le fonotaga. E mafai ona ia:

Faasoa atu lana molimau e uiga i mea sa aoaoina.
Ia uunaia tagata o le korama e faatino soo se uunaiga latou te maua i le taimi o le fonotaga a le korama.