ʻOku ʻuhinga ki he hā ke poupouʻi hoku kau taki ʻi he Siasí?

ʻOku tau maʻu ʻa e faingamālie ke poupouʻi ʻa kinautolu kuo ui ʻe he ʻEikí ke ngāué ʻi heʻetau hoko ko e kāingalotu ʻo e Siasí. ʻOku tau hiki hotau nimá ke fakahaaʻi ʻoku tau poupouʻi e kau Taki Māʻolungá mo e kau ʻōfisa ʻo e Siasí pea mo e kau taki takitaha ʻi hotau ngaahi uōtí mo e siteiki—kau ai ʻa e kau palesitenisī fakakōlomu ʻo e Lakanga Taulaʻeiki Faka-ʻĒloné. ʻOku ʻikai ko e hikinimá pē ʻoku kau ʻi he poupouʻi ʻo e kau takí—ka ʻoku ʻuhinga ia ke tau ʻaofi kinautolu, lotua kinautolu, tali ʻa e ngaahi ngāué mo e ngaahi uiuiʻí meiate kinautolú, tokanga ki heʻenau faleʻí, pea fakaʻehiʻehi mei he fakaangaʻi kinautolú.

Teuteuʻi fakalaumālie koe

Ko e hā te ke fai ke poupouʻi e kau taki ʻo e Siasí? Kuo tāpuekina fēfē koe ʻi hoʻo fai iá?

Ko e fē ha taimi ne ke mamata ai ki he poupouʻi ʻe he kau maʻu Lakanga Taulaʻeiki Faka-ʻĒloné ʻa e kau taki ʻo e Siasí—kau ai ʻa e pīsopé pe kau mēmipa ʻo ʻenau kau palesitenisī ʻo e kōlomú? Ko e hā ha ngaahi aʻusia ʻe lava ke nau vahevahe mo e niʻihi kehé?

Ako ʻi he faʻa lotu e ngaahi potufolofola mo e maʻuʻanga tokoni ko ʻení. Ko e hā te ne ueʻi fakalaumālie e kau mēmipa ʻo e kōlomú ke poupouʻi honau kau taki ʻo e Siasí?

ʻEkesōtosi 17:8–12 (ʻOku puke hake ʻe ʻĒlone mo Hua e ongo nima ʻo Mōsesé)

T&F 21:1–6; 124:45–46 (ʻE tāpuekina ʻa kinautolu ʻoku fanongo ki he leʻo e kau tamaioʻeiki ʻa e ʻEikí)

1 Nīfai 18:9 –14; T&F 84:23–25 (Ngaahi sīpinga ʻo e kakai naʻa nau fakafisingaʻi honau kau takí)

1 Ngaahi Tuʻi 17:8–16; 2 Ngaahi Tuʻi 5:8–14 (Ngaahi sīpinga ʻo e kakai naʻa nau poupouʻi honau kau takí)

Henry B. Eyring, “Naʻe Ui ʻe he ʻOtuá pea Poupouʻi ʻe he Kakaí,” Ensign pe Liahona, Sune 2012, 4–5

Russell M. Nelson, “Ko Hono Poupouʻi ʻo e Kau Palōfitá,” Ensign pe Liahona, Nōvema 2014, 74–77

Ko e faiako ‘i he founga ‘a e Fakamo‘uí

Naʻe falala ʻa e Fakamoʻuí ki Heʻene kau ākongá, teuteuʻi kinautolu, mo ʻoange kiate kinautolu ʻa e ngaahi fatongia mahuʻinga ke akoʻi pea mo tokoniʻi ʻa e niʻihi kehé. ʻI he foungá ni, naʻá Ne tokoniʻi kinautolu ke nau ului loloto ange ki Heʻene ongoongoleleí. Te ke lava fēfē ʻo muimui he sīpinga ʻa e Fakamoʻuí ʻi hoʻo hoko ko ha ʻetivaisa ki he kau maʻu Lakanga Taulaʻeiki Faka-ʻĒloné?

Tuku ke taki e kau talavoú

ʻE tataki e fakataha fakakōlomú ʻe ha mēmipa ʻo e kau palesitenisī fakakōlomú (pe ko ha ʻasisiteni ki he pīsopé ʻi he kōlomu ʻo e kau taulaʻeikí). Te ne tataki e kau talavoú ʻi hono aleaʻi fakataha e ngaahi meʻa ʻa e kōlomú, akoʻi kinautolu ki honau ngaahi fatongia fakataulaʻeikí (mei he folofolá mo e tohi Fatongia ki he ʻOtuá), poupouʻi kinautolu ke vahevahe ʻenau ngaahi aʻusia ʻi hono fakahoko honau fatongia ki he ʻOtuá, pea fakaafeʻi ha ʻetivaisa pe mēmipa kehe ʻo e kōlomú ke akoʻi ha lēsoni ʻi he ongoongoleleí. ʻE lava ke ne teuteu ʻaki haʻane fakafonu ha ʻasenita ʻo e fakataha fakakōlomú lolotonga ha fakataha ʻa e fakapalesitenisií.

Kamata ʻa e akó

Fili mei he ngaahi fakakaukau ko ʻení pe ko haʻo fakakaukau pē ʻaʻau ke fakamanatu e lēsoni he uike kuo ʻosí mo fakafeʻiloaki ʻaki e lēsoni ʻo e uike ní:

ʻEke ki he kau talavoú e meʻa kuo nau fai ke fakaʻaongaʻi ai ʻa e meʻa ne nau ako he uike kuo ʻosí. ʻOku toe ʻi ai nai haʻanau ngaahi fehuʻi pe fakakaukau fekauʻaki mo e meʻa ne nau akó?
Hiki e tefito ʻo e lēsoni ko ʻení ʻi he palakipoé, pea kole ki he kau mēmipa ʻo e kōlomú ke nau fakakaukau ki ha ngaahi foʻi lea kehe ʻoku ʻuhinga tatau mo e poupouʻí. Hili iá pea fakaafeʻi kinautolu ke nau hiki he palakipoé ʻa e ngaahi hingoa ʻo e kau taki ʻi he uōtí, kau ai ʻa honau kau palesitenisī fakakōlomú. Ko e hā ʻoku fai ʻe he kau talavoú ke nau poupouʻi ʻa e kakai ko ʻení?

Ako fakataha

ʻE tokoni ʻa e ngaahi ʻekitivitī takitaha ʻi laló ke mahino ki he kau mēmipa ʻo e kōlomú e ʻuhinga ʻo hono poupouʻi ʻo e kau taki ʻo e Siasí. Muimui ʻi he fakahinohino ʻa e Laumālié, pea fili ha [ʻekitivitī] ʻe taha pe toe lahi ange ʻe ʻaonga taha ki hoʻo kōlomú:

Kimuʻa he fakataha fakakōlomú, fakaafeʻi e kau talavoú ke nau lau ʻa e lea ʻa Palesiteni Russell M. Nelson “Ko Hono Poupouʻi ʻo e Kau Palōfitá” pea haʻu mateuteu ke vahevahe ha meʻa mei he leá ʻokú ne ueʻi kinautolu ke nau poupouʻi ʻa Palesiteni Tōmasi S. Monisoni.
Kole ki he kau talavoú ke nau lau fakafoʻituitui e ʻEkesōtosi 17:8–12, pea fakaafeʻi hanau taha ke ne fakamatalaʻi fakanounou e talanoá ʻi he lea pē ʻaʻana. ʻOku fekauʻaki fēfē e talanoa ko ʻení mo kitautolu ʻi heʻetau poupouʻi hotau kau taki ʻo e Siasí? ʻOku tau tatau fēfē nai mo ʻĒlone mo Hua ʻi heʻetau poupouʻi hotau palesiteni kōlomú mo e kau taki kehé?
Fakaafeʻi ha niʻihi ʻo e kau talavoú ke nau kumi ha sīpinga ʻo ha kakai ʻi he folofolá naʻe ʻikai ke nau tali honau kau taki lakanga fakataulaʻeikí, hangē ko Leimana mo Lemiuela (vakai, 1 Nīfai 18:9–14), pe ko e fānau ʻo ʻIsilelí (vakai, T&F 84:23–25). Kole ki he toenga ʻo e kau talavoú ke nau kumi ha ngaahi sīpinga ʻo ha kakai ne nau muimui ki honau kau takí, hangē ko e uitou ʻi Salifatí (vakai, 1 Ngaahi Tuʻi 17:8–16), pe Neamani (2 Ngaahi Tuʻi 5:8–14). Kole ange ke nau vahevahe mai ʻenau ngaahi talanoá pea fakamatalaʻi ʻa e meʻa ʻoku nau akoʻi fekauʻaki mo e ngaahi ola ʻo hono fakasītuʻaʻi pe fakaʻapaʻapaʻi e kau taki ʻo e Siasí.
Fakaafeʻi ʻa e kau talavoú ke nau lau ʻa e fakamatala ʻa Palesiteni Henelī B. ʻAealingi “Naʻe Ui ʻe he ʻOtuá pea Poupouʻi ʻe he Kakaí,” ʻo kumi hā sīpinga ʻo e ngaahi founga ke tau poupouʻi ai hotau kau taki ʻo e Siasí. ʻOmi ha tatau ʻo e ngaahi makasini ʻa e Siasí, pea kole ki he kau talavoú ke nau kumi pea mo vahevahe ha ngaahi fakatātā ʻi he ngaahi makasiní ʻoku nau fakafofongaʻi e ngaahi founga ke poupouʻi ai e kau taki ʻo e Siasí. Ko e hā ʻoku fai ʻe he kau talavoú ke poupouʻi ai honau kau takí kau ai honau kau palesitenisī fakakōlomú? Ko e hā te nau lava ke lea ʻaki kapau ʻoku nau fanongo ki ha taha ʻokú ne fakaangaʻi ha taha ʻo honau kau takí?

Kole ki he kau talavoú ke nau vahevahe ʻa e meʻa naʻa nau ako ‘i he ‘aho ní. ʻOku mahino nai kiate kinautolu e ʻuhinga ʻo hono poupouʻi e kau taki ʻo e Siasí? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he tokāteline ko ʻení?

Fakaafeʻi ke ngāue

ʻE fakaʻosi ʻa e fakatahá ʻe he talavou ʻokú ne tatakí. Te ne lava ke:

Vahevahe ʻa ʻene ngaahi ongo fekauʻaki mo e kau taki kuo ui ke nau tokangaʻi ʻi he taimi ko ʻení.
Tataki ha fealēleaʻaki nounou fekauʻaki mo ha meʻa ʻe lava ke fai ʻe he kau mēmipa ʻo e kōlomú ke nau poupouʻi kakato ange ai ʻa honau kau taki ʻi he Siasí.