Aisea e taua ai le Uluai Faaaliga?

I le tautotogo o le 1820, na faaali mai ai le Atua le Tama ma Lona Alo, o Iesu Keriso, i le Perofeta o Iosefa Samita. O lenei faaaliga, ua faailogaina ai le amataga o le Toefuataiga o le talalelei, o le mea sili lea ona taua ua tupu talu mai le Toetu o Iesu Keriso. O le tatalo lotomaualalo a Iosefa Samita na taitai atu ai i le toefuataiga o upumoni o le talalelei, le pule o le perisitua, ma sauniga faaola. ”O lena faaaliga e tasi ua taliina uma ai fesili faasaienisi e uiga i le Atua ma le moni o lona tagata. ... O lona naunau mai i le aiga tagata e ala i le pule ua faasafua mai i tagata e matuai iloga lava. Ua mautinoa le lumanai o le galuega. O nei upumoni ma le tele o isi upumoni ua faamaninoina mai i lena uluai faaaliga mamalu” (Aoaoga a Peresitene o le Ekalesia: Tavita O. MaKei [2003], 105).

Saunia oe lava ia faaleagaga

Na faapefea ona e maua se molimau na vaai Iosefa Samita i le Atua le Tama ma Lona Alo, o Iesu Keriso? Ua faapefea ona faamanuiaina lou olaga ona o lenei molimau? O le a le taua o le Uluai Faaaliga ia te oe?E mafai faapefea ona loloto molimau a tamaitai talavou taitasi o lau vasega i le suesueina o le Uluai Faaaliga? E mafai faapefea ona e fesoasoani ia malamalama tamaitai talavou i le taua o lenei mea maoae?

A o e saunia, suesue ma le agaga tatalo mau ma punaoa nei ma isi e te filifilia. O le a sou lagona i le mea o le a sili ona taua i tamaitai talavou o loo e aoaoina?

Iosefa Samita—Talafaasolopito 1:11–19, 24–25

Vitio: “O Le Toefuataiga”

19:15

Dieter F. Uchtdorf, “O Fua o le Uluai Faaaliga Vaaia,” Ensign po o le Liahona, Me 2005, 36–38

Aoao atu i le ala a le Faaola

Na valaaulia e le Faaola Ona soo e molimau atu i isi i le moni o Ana aoaoga. A o latou faia, na pai atu le Agaga i o latou loto. E mafai faapefea ona e fautuaina tamaitai talavou e molimau atu le tasi i le isi?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso taitasi.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Faaali atu se ata o le Uluai Faaaliga. Fai atu i se tasi o le vasega e otooto mai le mea o loo tupu i le ata. Valaaulia tamaitai talavou e mafaufau loloto mo ni nai minute i le taua o lenei mea. Fai atu ia i latou e vaavaai mo ni manatu i le taimi o le lesona o le a fesoasoani ia i latou e malamalama ai i le taua o le Uluai Faaaliga.
Fai atu i le vasega, e usu faatasi le pese “O Le Talosaga Muamua a Iosefa Samita” (Viiga, nu. 14). Valaaulia tamaitai talavou e faasoa mai o latou lagona e uiga ia Iosefa Samita ma lona aafiaga i le vaai ma talanoa i le Atua le Tama ma Iesu Keriso.

Aoao faatasi

O gaoioiga taitasi o loo i lalo e mafai ona fesoasoani i tamaitai talavou e aoao ai e uiga i le Uluai Faaaliga ia Iosefa Samita. I le mulimuli ai i le taitaiga a le Agaga, filifili se tasi po o le sili atu o le a sili ona aoga i lau vasega:

Valaaulia tamaitai talavou e tusi i lalo nisi o faamanuiaga na latou maua ona o le Uluai Faaaliga. Fai atu ia i latou e vaai mo nisi faamanuiaga o le Uluai Faaaliga ao latou faitauina parakalafa mulimuli e 10 o le saunoaga a Peresitene Dieter F. Uchtdorf “O Fua o le Uluai Faaaliga.” Valaaulia i latou e faasoa mai mea na latou maua ma o latou lagona e uiga i le taua o le Uluai Faaaliga.
Fai atu i le vasega, e faitau faatasi le Uluai Faaaliga ia Iosefa Samita i le Iosefa Samita—Talafaasolopito 1:7–20. Valaaulia tamaitai talavou e vaavaai mo mea moni e mafai ona latou aoao mai le aafiaga o Iosefa (mo se faataitaiga, e moni le Tama ma le Alo, o ni tagata mavaevae; o Satani ma lona mana e moni, ae peitai e malosi atu ai le mana o le Atua; e faafofoga ma tali mai le Atua i tatalo; e lei faamutaina faaaliga). Valaaulia se tamaitai talavou e tusi upumoni i le laupapa. E faapefea ona ese nei upumoni mai talitonuga o isi lotu? Mata e ese faapefea o tatou olaga pe ana faapea tatou te le iloa nei mea?
Valaaulia tamaitai talavou e faitau lemu ma mafaufau loloto i le Uluai Faaaliga ia Iosefa Samita ma lana molimau i le Iosefa Samita—Talafaasolopito 1:11–19, 24–25 (pe matamata i le vitio “O Le Toefuataiga”. Fai atu ia i latou e mafaufau pe aisea e taua ai le Uluai Faaaliga i le talafaasolopito o le lalolagi. Aisea e taua ai ia i tatou taitoatasi? Faasoa atu lau molimau e uiga i le taua o le Uluai Faaaliga, ma valaaulia tamaitai talavou e faasoa mai o latou manatu ma molimau.

19:15
Valaaulia tamaitai talavou e iloilo tala faatusipaia o le faaali atu o le Atua le Tama ma Iesu Keriso i tagata i le lalolagi (e pei o le Mataio 3:13–17; Galuega 7:54–60; 3 Nifae 11:3–10). E mafai foi ona e faaali atu ata o nei mea na tutupu (tagai Tusi Ata o le Talalelei,35, 63, ma le 82). Fai atu ia i latou e aotele tala taitasi. Ona valaaulia lea o i latou e faitau le Iosefa Samita Talafaasolopito 1:17 (tagai Tusi Ata o le Talalelei,90). E faapefea ona tutusa le Uluai Faaaliga a Iosefa Samita ma isi o nei faaaliga? E faapefea ona tulaga ese? Valaaulia tamaitai talavou e faasoa mai pe aisea e taua ai le Uluai Faaaliga ia i latou.

Fai i tamaitai talavou e faasoa mai mea na latou aoaoina i le aso. Pe ua sili atu lo latou malamalama i le Uluai Faaaliga ia Iosefa Samita? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga ona faaaluina se isi taimi i lenei aoaoga faavae?

Ola i mea o tatou aoaoina

Ia valaaulia tamaitai talavou e mafaufau pe o a ni auala o le a latou ola ai i mea ua latou aoaoina i le asō. Mo se faataitaiga, e mafai ona latou:

Tusi a latou molimau i le Uluai Faaaliga a Iosefa Samita ia latou api talaaga.
Faasoa a latou molimau o le Uluai Faaaliga i o latou aiga.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.