O le a le matafaioi a Iosefa Samita i le Toefuataiga?

I le mavae ai o seneturi o le liliuese, na toefuatai mai ai e le Alii Lana Ekalesia ma le atoatoaga o le talalelei e ala i le Perofeta o Iosefa Samita. O lenei Toefuataiga na amata i le Uluai Faaaliga ia Iosefa, lea na faaali mai ai le Tama Faalelagi ma Iesu Keriso. Na ala mai le Perofeta o Iosefa, le aumaia e le Alii o le Tusi a Mamona ma isi tusitusiga paia, toefuataiga o le pule o le perisitua, ma faatuina Lana Ekalesia.

Saunia oe lava ia faaleagaga

Ua faapefea ona faamanuiaina lou olaga ona o mea moni na toefuatai mai ia Iosefa Samita? Na faapefea ona e maua lau molimau ia Iosefa Samita? E mafai faapefea ona e fautuaina tamaitai talavou ia maua ni a latou lava molimau?

E mafai faapefea e le suesueina o le olaga, molimau, ma le ositaulaga a Iosefa Samita ona faalolotoina molimau a tamaitai talavou taitoatasi o lau vasega? E mafai faapefea ona fesoasoani le faalogo atu i molimau a isi?

A o saunia, suesue ma le agaga tatalo mau ma punaoa nei. O le a sou lagona i le mea e sili ona taua i tamaitai talavou o loo e aoaoina?

MF&F 35:17–18 (Na toefuatai mai e le Alii le atoatoaga o le talalelei, e ala mai le Perofeta o Iosefa Samita)

MF&F 76:22–24 (Molimau a Iosefa Samita ia Iesu Keriso)

MF&F 135:3 (Na tuuina mai e le Alii isi tusitusiga paia ia i tatou, e ala mai le Perofeta o Iosefa Samita)

Iosefa Samita—Talafaasolopito 1:1–25 (Na faaali mai le Atua le Tama ma Iesu Keriso ia Iosefa Samita i le tali i lana tatalo)

Craig C. Christensen, “O Le A Ou Faatu Mai Se Tagatavaai Filifilia,” Ensign po o le Liahona, Nov. 2016, 27–30

Neil L. Andersen, “O Le Faatuatua e le Tupu Faafuasei, ae e ala i Filifiliga,” Ensign po o le Liahona, Nov. 2015, 65–68

Neil L. Andersen, “Iosefa Samita,” Ensign po o le Liahona, Nov. 2014, 28–31

“O Le Toefuataiga o le Talalelei a Iesu Keriso e ala mai ia Iosefa Samita,” Tala'i La’u Talalelei (2004), 36–37

“Iosefa Samita,” Faamaoni i le Faatuatua (2004), 83–84

Vitio: “Iosefa Samita: O Le Perofeta o le Toefuataiga,”

“Viia Le na Fetaia’i ma Ieova, ” Viiga, nu. 15

Aoao atu i le ala a le Faaola

Na valaaulia e le Faaola Ona soo e molimau atu i isi i le moni o Ana aoaoga. Na Ia folafola atu o le a fesoasoani le Agaga ia i latou e iloa le taimi e molimau ai ma upu e fai atu. E mafai faapefea ona e fesoasoani i tamaitai talavou ia iloa le taimi e uunaia ai i latou e le Agaga e faasoa atu a latou molimau?

Vitio:“Fesoasoani Mai ia Matou Iloa le Talalelei”

Matamata atili

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Tagai i isi manatu e aoao mai ai ma aoao atu .

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

• I luma atu, masalo o le lua po o le tolu vaiaso ao lei faia le vasega, valaaulia ia tamaitai talavou e talia le lui a Elder Neil L. Andersen: “Ia maua sau oe lava molimau e uiga i le Perofeta o Iosefa Samita. Tuu atu lou leo e fesoasoani i le faataunuuina o upu faavaloaga a Moronae ina ia tautala i upu lelei e uiga i le Perofeta.” Uunaia ia tamaitai talavou ia mulimuli i le fautuaga a Elder Andersen ina ia faasoa atu ma a latou uo ma aiga ia mau o i le Tusi a Mamona, “faailoa atu o Iosefa sa avea ma se meafaigaluega i aao o le Atua,” ma faitau i le molimau a le Perofeta. (Tagai “Iosefa Samita,” Ensign po o le Liahona, Nov. 2014, 30.) I le amataga o le vasega, fai atu ia i latou e faasoa mai ni mau sa latou filifilia ma soo se uunaiga sa latou mauaina ao latou faitau i le molimau a Iosefa Samita.

• Tusi i le laupapa, “E taua Iosefa Samita aua __________.” Valaaulia tamaitai talavou e faatumu le avanoa. I le faaiuga o le vasega, fai atu i tamaitai talavou e toe faatumu le avanoa i se mea na latou aoaoina i le lesona.

Aoao faatasi

Tagai i isi manatu e aoao mai ai ma aoao atu.

O gaoioiga taitasi nei e mafai ona fesoasoani i tamaitai talavou e aoao ai e uiga i le misiona paia a Iosefa Samita. I le mulimuli ai i le taitaiga a le Agaga, filifili se tasi po o le sili atu o le a sili ona aoga i lau vasega:

• Valaaulia ia tamaitai talavou e faitau le saunoaga a Elder Craig C. Christensen “O Le A Ou Faatu Mai Se Tagatavaai Filifilia,” ma saili mo faamanuiaga ua tatou maua ona o le Perofeta o Iosefa Samita. Fai atu ia i latou e tusi mea latou te maua i luga o le laupapa. O a nisi faamanuiaga e mafai ona mafaufau i ai tamaitai talavou ua latou maua ona o Iosefa Samita? Mafaufau e faasoa atu pe faapefea ona e mauaina lau molimau e uiga ia Iosefa Samaita ma pe faapefea ona avea le Toefuataiga o le talalelei ma se faamanuiaga i lou olaga. 

• Valaaulia tamaitai talavou taitasi e fai se lisi o mea na ia aoaoina ao ia faitau e uiga ia Iosefa Samita i le Faamaoni i le Faatuatua (itulau 83–84) po o le Mataupu Faavae ma Feagaiga 135:3. Fai atu i tamaitai talavou taitasi e faasoa mai se mea se tasi mai lana lisi ma faamatala mai pe aisea e taua ai ia te ia.

• Ia usu faatasi o se vasega, se pese e uiga ia Iosefa Samita (faaaoga le faasino upu autu o loo i tua o le tusi pese e sue ai se pese). O le a le mea o loo aoaoina ai e lenei pese tamaitai talavou e uiga ia Iosefa Samita ma le Toefuataiga? Tuu atu i tagata o le vasega e faasoa mai o latou lagona ma molimau e uiga i le Perofeta.

• Valaaulia tamaitai talavou e faitau e uiga i le Uluai Faaaliga a Iosefa Samita i le Iosefa Samita—Talafaasolopito 1:7–25, ma vaavaaii mo mea moni latou te maua i le tala (e pei o mea moni e uiga i le natura o le Atua, le mana o le tatalo, po o le Liliuese Tele). E faapefea e nei mea moni ona aafia ai o tatou olaga?

• Fai atu i tamaitai talavou e mafaufau faapea na fesili mai se uo o se isi lotu, “Aisea e taua tele ai Iosefa Samita i lau Ekalesia?” Fai atu ia i latou e tagai mo ni tali talafeagai i lenei fesili i le vitio “Iosefa Samita: Perofeta o le Toefuataiga” po o le lauga a Elder Lawrence E. Corbridge “O Le Perofeta o Iosefa Samita.” E mafai foi ona e faitauina le vaega o faaautuina “Fesili Faamaoni” mai le saunoaga a Elder Neil L. Andersen “O Le Faatuatua e le Tupu Faafuasei, ae e ala i Filifiliga” ina ia fesoasoani ia i latou i le ala e tali atu ai i faitioga e uiga ia Iosefa Samita.

• Faaali atu ni ata o faaalia ai mea na tutupu i le soifuaga o Iosefa Samita (tagai Tusi Ata o le Talalelei, 89–97). Fai atu i tamaitai talavou e faamatala mea na tutupu o loo faaalia. Pe a mafai, fesoasoani ia i latou e sue mau o loo faamatalaina ai mea na tutupu (o mau o loo fautuaina atu i le amataga o le Tusi Ata o le Talalelei). Valaaulia nisi o i latou e faasoa mai a latou molimau ia Iosefa Samita.

Fai atu i tamaitai talavou e faasoa mai mea na latou aoaoina i le aso. Pe o latou malamalama i le matafaioi a Iosefa Samita i le Toefuataiga o le talalelei? O a ni o latou lagona po o ni uunaiga? Pe o i ai nisi a latou fesili? Mata e aoga le faaaluina o nisi taimi i lenei aoaoga faavae?

Motugaafa faafaiaoga

“O fesili e tusia i luga o le laupapa ae lei amataina le vasega o le a fesoasoani i tagata o loo aoaoina e amata ona mafaufau e uiga i autu ao lei amataina le lesona” (O Le Aoao Atu, E Leai Se Isi Valaauga E Sili Ai, 100).

Ola i mea o tatou aoaoina

Tagai i isi manatu e aoao mai ai ma aoao atu.

Ia valaaulia tamaitai talavou e mafaufau pe o a ni auala o le a latou ola ai i mea ua latou aoaoina i le asō. Mo se faataitaiga, e mafai ona latou:

• Tusia a latou molimau ia Iosefa Samita ia latou api talaaga.

• Faasoa a latou molimau i o latou aiga.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.