Na faapefea ona toefuatai mai le perisitua?

Na toefuatai mai le perisitua ia Iosefa Samita i le faaee atu o lima o i latou na umia anamua le perisitua. Ia Me 1829, na toefuatai mai ai e Ioane le Papatiso le Perisitua Arona, ma e lei leva mulimuli ane, ae toefuatai mai e Peteru, Iakopo, ma Ioane, o uluai Aposetolo e toatolu a le Faaola, le Perisitua Mekisateko. O le aso 3 Aperila, 1836, na toefuatai mai ai e Mose, Elaia, ma Elia isi ki o le perisitua.

Saunia oe lava ia faaleagaga

E faapefea e lo tatou talitonuga i le pule o le perisitua ona tulagaese ai le Au Paia o Aso e Gata ai? Na faapefea ona faamanuiaina lou olaga e le perisitua?

O a mea ua iloa e tamaitai talavou e uiga i le toefuataiga o le perisitua? E faapefea ona e fesoasoani ia i latou ia malamalama i faamanuiaga ua latou maua ona o le toefuataiga o le perisitua?

A o saunia, suesue ma le agaga tatalo mau ma punaoa nei. O a mea ua uunaia ai oe e faasoa atu i tamaitai talavou?

Eperu 5:4 (E ao ona valaauina le tagata e le Atua ia maua le perisitua)

MF&F 2 (O Elia e faaalia atu le perisitua; o folafolaga i tama ua totoina i loto o le fanau)

MF&F 13; Iosefa Samita—Talafaasolopito 1:66–72 (Na toefuatai mai e Ioane le Papatiso le Perisitua Arona)

MF&F 27:12–13 (Na toefuatai mai e Peteru, Iakopo, ma Ioane le Perisitua Mekisateko)

MF&F 110:13–16 (Ua toe foi mai Elia ma tuuina mai ki o lenei tisipenisione e pei ona folafola mai e Malaki)

Mataupu Faavae o le Faatuatua 1:5 (E faaeeina atu le perisitua e ala i le faaeega o lima o le o loo i ai le pule)

Jeffrey R. Holland, “O Le Mea ua Sili ona Tulagaese ai i Tatou,” Ensign po o le Liahona, Me 2005, 43–45

Vitio: “O Le Toefuataiga o le Perisitua”

2:1

Aoao atu i le ala a le Faaola

Na aoaoina e le Faaola Ona soo e ala i le fesoasoani ia latou vaai i faataitaiga o Ana aoaoga i o latou olaga i aso taitasi. Na Ia faaaogaina tala faigofie, faataoto, ma faataitaiga moni o le olaga latou te malamalama ai. E faapefea ona e faaaogaina faataitaiga e aoao ai tamaitai talavou e uiga i le toefuataiga o le perisitua ma le ala e galue ai le perisitua i o latou olaga?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Faaali atu i tamaitai talavou se ata o Mose o loo faauuina Arona (tagai Tusi Ata o le Talalelei, 15) ma se ata o se alii talavou ua faauuina i le perisitua (tagai Tusi Ata o le Talalelei, 106)? O a ni mea ua latou matauina e tutusa ai nei ata? O a mea moni o le talalelei ua latou faaalia mai?
Valaaulia tamaitai talavou e faasoa mai mea ua latou iloa pe na faapefea ona toefuatai mai le perisitua. Ua faapefea ona faamanuiaina o latou olaga e le perisitua?

Aoao faatasi

O gaoioiga taitasi nei e mafai ona fesoasoani i tamaitai talavou e aoao ai e uiga i le toefuataiga o le perisitua. I le mulimuli ai i le taitaiga a le Agaga, filifili se tasi po o le sili atu o le a sili ona aoga i lau vasega:

Tusi i le laupapa ni nai mau faasino pe na faapefea ma pe aisea na toefuatai mai ai le perisitua (e pei o le MF&F 13; 27:12–13; Iosefa Samita—Talafaasolopito 1:66–72; Mataupu Faavae o le Faatuatua 1:5). Valaaulia ni tamaitai talavou e faitau mau, taitoatasi po o ni vaega laiti, ma tusi i le laupapa se otootoga o fuaitau taitasi. O a mea ua aoao mai e nei mau i tamaitai talavou e uiga i le toefuataiga o le perisitua? Ua faapefea ona aafia o latou olaga i le toefuataiga o le perisitua?
Vaevae le lauga e Elder Jeffrey R. Holland “O Le Mea ua Sili ona Tulagaese ai i Tatou” i tamaitai talavou. Fai atu i tamaitai talavou e suesue a latou vaega o le lauga, ma vaai mo tali i fesili “Pe faapefea ona faaee le perisitua?” ma “Aisea e tuuina mai ai le perisitua i lenei auala?” I le avea ai o se vaega o lenei talanoaga, valaaulia tamaitai talavou e faitau le Eperu 5:4 ma Mataupu Faavae o le Faatuatua 1:5. Aisea e taua ai i tamaitai talavou ona aoao e uiga i le toefuataiga o le perisitua?
Faaali atu ata e mea na tutupu i le toefuataiga o le perisitua (tagai Tusi Ata o le Talalelei 93–95), pe matamata le vitio “Toefuataiga o le Perisitua.” Fai atu i tamaitai talavou e faailoa mai tagata autu o nei mea na tutupu (e pei o Iosefa Samita, Ioane le Papatiso, ma Elia) ma faitau mau e fesootai i nei mea na tutupu (e pei o na ua fautuaina atu i lenei otootoga). Valaaulia tamaitai talavou e talanoaina pe faapefea ona mafai e le toefuataiga o le perisitua ona faamanuiaina o latou olaga i le taimi nei ma le lumanai. E faapefea e le perisitua ona faamanuiaina tamaitai ma tina?

2:1
Pe a faatagaina e le epikopo, valaaulia le tama o se tasi o tamaitai talavou po o se isi perisitua e asiasi mai i le vasega ma faasoa mai lana laina o le faasologa o le pule o le perisitua i tamaitai talavou ma faamatala mai le uiga o le laina o le pule. O le a le mea ua aoao mai e le laina o le faasologa o le pule i tamaitai talavou e uiga i le toefuataiga o le perisitua? Tuu atu lau molimau i le toefuataiga o le perisitua, ma valaaulia tamaitai talavou e tuu mai a latou molimau.

Fai atu i tamaitai talavou e faasoa mai mea na latou aoaoina i le aso. Pe ua latou malamalama i le toefuataiga o le perisitua? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o nisi taimi i lenei aoaoga faavae?

Ola i mea o tatou aoaoina

Ia valaaulia tamaitai talavou e mafaufau pe o a ni auala o le a latou ola ai i mea ua latou aoaoina i le asō. Mo se faataitaiga, e mafai ona latou:

Talanoa atu i se uo po o se tasi o le aiga o loo umia le perisitua ma fesili atu e uiga i lona aafiaga i le mauaina o le perisitua.
Ofo atu e fai se lesona o le afiafi faaleaiga e uiga i le toefuataiga o le perisitua.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.