Sau, Mulimuli Mai ia te A’u
Aisea tatou te manaomia ai le Tusi a Mamona?

Aisea tatou te manaomia ai le Tusi a Mamona?

O le Tusi a Mamona na tusia mo o tatou aso. O loo molimau mai ai ia Iesu Keriso, o loo i ai le atoatoaga o Lana talalelei, ma toefuatai mai ai upumoni na leiloloa i le Liliuese. Na aoao mai Iosefa Samita faapea o le Tusi a Mamona o “le maaauau o la tatou tapuaiga, e sili foi ona latalata atili atu o le tagata i le Atua i lona ola ai i ona mataupu, nai lo se isi lava tusi” (faatomuaga i le Tusi a Mamona).

Saunia oe lava ia faaleagaga

Mafaufau i ou lagona e uiga i le Tusi a Mamona. Ua faapefea ona e latalata atili atu ai ia Iesu Keriso? Na faapefea ona e maua lau molimau i le Tusi a Mamona? Na faapefea ona fesoasoani lenei malamalama ia te oe i lou olaga?

Mafaufau i tamaitai talavou i lau vasega. O a ni aafiaga na latou maua i le Tusi a Mamona? O le a faapefea e se molimau i lona moni ona aumaia le malosi ia i latou i o latou tausaga talavou ma lo latou lumanai?

A o e saunia, suesue ma le agaga tatalo mau ma punaoa nei. O le a le mea e mafai ona e faaaogaina e fesoasoani ai i tamaitai talavou e aoao atili ai e uiga i le Tusi a Mamona?

1 Nifae 13:40; 2 Nifae 3:12; Mataupu Faavae o le Faatuatua 1:8 (E molimau le Tusi a Mamona i le Tusi Paia, toefuatai mai mea moni taua, ma faaleaogaina aoaoga faavae sese)

2 Nifae 25:23, 26; 33:10–11 (Ua molimau mai tusitala o le Tusi a Mamona ia Iesu Keriso)

2 Nifae 29:7–11 (Ua faaali mai e le Tusi a Mamona faapea e fetalai mai le Atua i Ana fanau i le tele o atunuu)

MF&F 20:8–16 (Ua maua i le Tusi a Mamona le atoatoaga o le talalelei a Iesu Keriso)

Tusi a Mamona itulau autu ma le faatomuaga

Thomas S. Monson, “O Le Mana o le Tusi a Mamona,”Ensignpo o leLiahona,Me 2017, 86–87

Gary E. Stevenson, “Vaai i le Tusi, Vaai i le Alii,” Ensign po o le Liahona, Nov. 2016, 44–47

LeGrand R. Curtis Jr., “E I Ai Le Mana i le Tusi,” Ensign po o le Liahona, Nov. 2016, 68–71

Kevin W. Pearson, “Tumau i le Laau,”  Ensign  po o le  Liahona, Me 2015, 114–16

Aoao atu i le ala a le Faaola

Na molimau mai le Faaola i le moni ma valaaulia Ona soo ia faia foi lena mea. Na ia faaaogaina le lototoa ma le faigofie ina ia mafai e le Agaga ona molimau i le moni. E faapefea e lau molimau ona fesoasoani i tamaitai talavou ia malamalama i le taua o le Tusi a Mamona i o latou olaga ma faamalolosia ai a latou molimau i le moni o mea o loo i ai?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni a oe lava manatu e faalauiloa atu ai le lesona o lenei vaiaso:

  • Faatasi ai o se vasega, ia fausia pe tusi se ata o se ma’aauau faaofuofu (tagai i le saunoaga a Elder Gary E. Stevenson “Vaai i le Tusi, Vaai i le Alii”). Fai atu i tamaitai talavou e sue i le lauga a Elder Stevenson mafuaaga ua avea ai le Tusi a Mamona ma ma’aauau o la tatou tapuaiga. 

  • Fai atu i tamaitai talavou e mafaufau i ni fesili a a latou uo e uiga i le Tusi a Mamona. E faapefea ona latou taliina na fesili? Mafaufau e toe foi i lenei gaoioiga i le faaiuga o le vasega ina ia vaai po o a ni mea latou te faaopoopoina ia latou tali.

Aoao faatasi

O gaoioiga nei taitasi e mafai ona fesoasoani i tamaitai talavou e aoao ai e uiga i le taua o le Tusi a Mamona. I le mulimuli ai i le taitaiga a le Agaga, filifili se tasi po o le sili atu o le a sili ona aoga i lau vasega:

  • Valaaulia tamaitai talavou e ta’u mai ni mea e maua mai ai le paoa [mana], e pei o maa, afi, pe’ape’a, ma folasi eletise mai le la. Valaaulia tamaitai talavou e fai se lisi o auala e aumaia ai e le Tusi a Mamona le mana [paoa] i o tatou olaga. Valaaulia tamaitai talavou e sailiili i le saunoaga a Peresitene Thomas S. Monson “O Le Mana o le Tusi a Mamona,” ma vaavaai ai mo ni malamalamaaga sa’o ma loloto e mafai ona latou faaopoopoa i a latou lisi. Tuu atu se taimi i tamaitai talavou e mafaufau loloto ai pe o le a faapefea ona latou faaaofia ai le lu’i a Peresitene Monson ia faitau le Tusi a Mamona i aso taitasi. Fai atu ia i latou e faasoa mai ni o latou manatu. 

  • Valaaulia tamaitai talavou e piki la latou tala e fiafia i ai mai le lauga a Elder LeGrand R. Curtis Jr. “E I Ai Le Mana i le Tusi” e tusi ai se faasologa o ata e faamatala ai le tala. O a ni mea e uiga i nei tala e uunaia ai i latou? Aisea e taua ai ona faasoa atu le Tusi a Mamona ma i latou e pele ia i tatou? Ia taitoatasi pe i se vaega, ia mafaufau i ni auala e faasoa atu ai le Tusi a Mamona. Valaaulia tamaitai talavou e tusi a latou molimau i totonu o se kopi o le Tusi a Mamona o le a latou faasoa atu.

  • Valaaulia tamaitai talavou e saili i le saunoaga a Elder Gary E. Stevenson “Vaai i le Tusi, Vaai i le Alii” po o le saunoaga a Elder Kevin W. Pearson “Tumau i le Laau,” ma vaavaai mo ni malamalamaaga e uiga i le Tusi a Mamona ma pe aisea e matua taua ai. E mafai ona e valaauliaina tamaitai talavou e faasoa mai nisi o upusii mai lauga po o ni mau e fiafia i ai i le Tusi a Mamona. E mafai foi ona e uunaia i latou e tusi i lalo ma faasoa mai a latou molimau e uiga i le Tusi a Mamona.  

  • Valaaulia tamaitai talavou e suesue i mau ua fautuaina atu i lenei otootoga ma le itulau autu o le Tusi a Mamona e sue ai tali i le fesili “Aisea tatou te manaomia ai le Tusi a Mamona?” Faasoa atu lau molimau i le Tusi a Mamona. Valaaulia tamaitai talavou e faasoa mai pe na faapefea ona maua a latou molimau.

  • Fesili atu i tamaitai talavou pe aisea ua avea ai le fuaitau “O se Tasi Molimau ia Iesu Keriso” o se soaautu lelei mo le Tusi a Mamona. Valaaulia i latou e faasoa mai se mau mai le Tusi a Mamona o loo aoao ma molimau mai ia Keriso (e pei o le 1 Nifae 10:4–6; Mosaea 3:5–10; 3 Nifae 11:7–11). Ua faapefea ona faamalolosia a latou molimau e le Tusi a Mamona?

  • Valaaulia tamaitai talavou e faasoa mai se mau i le Tusi a Mamona na uunaia ai i latou pe na fesoasoani ia i latou e manumalo ai i se luitau (pe faasoa atu se mau e taua ia te oe). Aisea e taua ai ia i latou? O a aafiaga e mafai ona latou faasoa mai e uiga i le ala na uunaia ai i latou e le mau? O a mea ua aoaoina ai i tatou e nei aafiaga e uiga i le taua o le Tusi a Mamona?

Fai atu i tamaitai talavou e faasoa mai mea na latou aoaoina i le aso. Pe ua latou malamalama ea i le taua o le Tusi a Mamona? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o nisi taimi i lenei aoaoga faavae?

Ola i mea ua tatou aoaoina

Valaaulia tamaitai talavou e mafaufau pe o le a faapefea ona latou ola i mea ua latou aoaoina i le aso.Mo se faataitaiga, e mafai ona latou:

  • Fai se fuafuaga patino e faitau le Tusi a Mamona ma vaai mo tali i le fesili “Aisea tatou te manaomia ai le Tusi a Mamona?”E mafai ona latou faasoa mai mea na latou maua i vasega i le lumanai.

  • Faauma le galuega faatino o le tulaga faatauaina o le Mama i le Alualu i Luma o le Tagata Lava Ia.

  • Faasoa atu a latou molimau ma se kopi o le Tusi a Mamona i se uo po o se tasi o le aiga.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.