Aisea e manaomia ai lo’u faamagaloina o isi?

Ina ia maua le faamagaloga o a tatou agasala, e manaomia lo tatou faamagaloina o isi. O le faamagaloina o isi e mafai ai ona tatou faatoilaloina lagona o le ita, lototiga, po o le fia taui ma sui. O le loto faamagalo e mafai ona faamalolo ai manu’a faaleagaga ma aumaia le filemu ma le alofa lea e na o le Atua e mafai ona tuuina mai.

Saunia oe lava ia faaleagaga

O a mea ua e aoaoina mai le faamagaloina o isi? E mafai ona e manatunatu mo se taimi na fesoasoani ai lou faamagaloina o se tasi, e te lagonaina ai le filemu ma le alofa?

O a aafiaga o feagai ma tamaitai talavou, ia e manaomia ai lo latou faamagaloina o isi? O a mea e manaomia ona latou aoaoina e uiga i lo latou faamagaloina o i latou lava? E mafai faapefea ona e fesoasoani i tamaitai talavou ina ia aoao e faamagalo atu, ina ia mafai ai ona latou maua le filemu?

Manatua: Afai o i ai ni fesili a tamaitai talavou e uiga i le faamagalo atu i mataupu tau i le sauaina, fautua i ai e saili le fautuaga mai le epikopo, po o le peresitene o le paranesi.

O a mau o le a fesoasoani i tamaitai talavou e iloa ai faamanuiaga e oo mai i o latou olaga, a o latou faamagaloina isi?

Mataio 5:44; MF&F 64:9–10 (Ua poloaiina i tatou ina ia faamagalo i tagata uma)

Mataio 6:14–15; 18:21–35 po o le vitio “Faamagalo ia Fitugafulu ni Fitu” (Ina ia maua le faamagaloga, e tatau ona tatou faamagalo atu i isi)

Luka 23:34 (Na faamagaloina e Iesu Keriso i latou, o e na faasatauroina o Ia)

Kevin R. Duncan, “O Le Uu Faamalolo o le Faamagaloga,” Ensign po o le Liahona, Me 2016, 33–35

Gordon B. Hinckley, “Faamagaloga,” Ensign po o le Liahona, Nov. 2005, 81–84.

Dieter F. Uchtdorf, “ O Le e Alofa Atu e Alofaina Mai, ” Ensign po o le Liahona, Me 2012, 70–76

Vitio: “Faamagalo Atu: Ua Mama Ai Lau Avega”

8:24

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni o oe lava manatu e faalauiloa atu ai le lesona o lenei vaiaso:

Faasoa atu le tala e uiga i le pīpī na malo i le aisa o loo i le saunoaga a Peresitene Gordon B. Hinckley “Faamagaloga.” O a mea ua faafiafiaina ai tamaitai talavou e uiga i lenei tala? Valaaulia tamaitai talavou e manatunatu, pe tusi i lalo, le igoa o se tasi na faigata ia i latou ona faamagaloina. Uunai i latou e manatunatu e uiga i lenei tagata i le taimi atoa o le lesona.
Fai atu i tamaitai talavou e manatunatu e uiga i se taimi na tatau ona latou faamagaloina ai se tasi tagata. Valaaulia i latou e faasoa mai lea aafiaga, pe a latou lagonaina le agaga e faia ai. O le a le mea na tupu i le faaiuga? Faamata o le a se tulaga ese atonu e oo i ai, pe a na outou le faamagalo atu?

Aoao faatasi

O gaoioiga taitasi o loo i lalo, e mafai ona fesoasoani i tamaitai talavou e malamalama ai i le taua o le faamagalo o isi. I le mulimuli ai i le taitaiga a le Agaga, filifili se tasi po o le sili atu o le a sili ona lelei mo lau vasega:

Vaevae tamaitai talavou i vaega, ma tuu atu i vaega taitasi kopi o se tasi o lauga ua tuuina atu i lenei otootoga (po o se isi lauga e te filifilia e uiga i le faamagalo atu). Valaaulia i latou e faaalu ni nai minute e faitau ai le lauga ma faailoga faamatalaga latou te fiafia i ai (fai atu ia i latou e aua le popole i le faitauina o le lauga atoa; ae faamamafa atu le taua o le mafaufau loloto i le savali). Fai atu i ai e faasoa mai i le vasega mea latou te mauaina, ma faamalamalama le mafuaaga e taua ai ia mea ia i latou.
Faitau faatasi le faataoto o le auauna le alofa o i le Mataio 18:23–35 (pe faaali le vitio “Faamagalo ia Fitugafulu ni Fitu”), ma fai atu i tamaitai talavou e faaopoopo ma faatusatusa ia aitalafu a le auauna ma lana uo auauna (tagai “Mamafa ma Fuafaatatau” i le Lolomifefiloi a le Tusi Paia). O le a se mea na aoao e tamaitai talavou mai lenei faataoto e faatatau i le faamagalo atu? Valaaulia ia tamaitai talavou e sue ma faasoa mai nisi mau o loo aoao mai i le taua o le faamagalo atu o isi (e pei o mau o loo fautuaina mai i lenei otootoga).
Fai atu i tamaitai talavou e faatusatusa ia faataitaiga o i tusitusiga paia e uiga i tagata o faamagalo atu i isi. E mafai ona e iloiloina faataitaiga a Iosefa i Aikupito (tagai Kenese 45:1–7), o Nifae ma ona uso (tagai 1 Nifae 7:21), o Iesu Keriso i luga o le satauro (tagai Luka 23:34), po o isi. Aisea e matua taua ai lava le faamagalo atu o tagata o le aiga? Faaali se tasi o vitio o loo fautuaina atu i le otootoga lenei, ma fai atu i tamaitai talavou e faasoa mai ni o latou lagona. O a nisi faataitaiga o le faamagalo atu e mafai ona latou faasoa maia?
Fai i tamaitai talavou e sue i tusitusiga paia se mea na aoao atu e le Faaola e uiga i le faamagalo atu o isi ma faasoa mai i le vasega se mea sa latou mauaina (mo se faataitaiga, tagai Mataio 5:44; 6:14–15; 18:22–23). Fai atu ia i latou e faasoa mai ni aafiaga o le filemu lea e oo mai i le faamagalo atu o isi.
Tusi ia fesili nei i ni fasipepa eseese, ma tuu atu ia tofu tagata o le vasega ma se fasipepa: Aisea e manaomia ai lo tatou faamagaloina o tagata uma, e aofia ai i tatou lava? Aisea ua na o le Alii e mafai ona filifilia pe tatau pe leai foi ona faamagaloina se tagata? Aisea e avea ai le le faamagalo atu ma se agasala maoae? Valaaulia ia tamaitai talavou e mafaufau loloto i a latou fesili ao latou faitauina le Mataupu Faavae ma Feagaiga 64:9–11 ona faasoa mai lea o o latou manatu ma malamalamaaga.

Fai atu i tamaitai talavou e faasoa mai mea na latou aoaoina i le asō. Ua latou malamalama ea i le taua o le faamagaloina o isi? O a lagona po o uunaiga ua latou mauaina? E i ai nisi a latou fesili? Faamata o le a fesoasoani le faaalu o se isi taimi i lenei aoaoga faavae?

Ola i mea o tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Tusi i totonu o a latou api talaaga soo se uunaiga latou te mauaina e uiga i le faamagaloina o isi. O ai e manaomia ona latou faamagaloina? O le a faapefea e lo latou faamagaloina o isi, ona faamanuiaina ai o latou olaga?
Tauloto se viiga po o se mau e faatatau i le faamagalo atu.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.