O le a le alofa tunoa?

O le alofa tunoa, o le fesoasoaniga paia ma le malosiaga lea tatou te maua e ala i le Togiola a Iesu Keriso. E ala i le alofa tunoa, ua laveaiina i tatou mai le agasala ma le oti. I le faaopoopo atu i ai, o le alofa tunoa o se mana gafatia lea e mafai ona faamalosia i tatou i aso taitasi, ma fesoasoani ia i tatou e tumau ai e oo i le iuga. E manaomia a tatou taumafaiga, ina ia maua ai le atoatoaga o le alofa tunoa o le Alii.

Saunia oe lava ia faaleagaga

O le a le uiga o le alofa tunoa ia te oe? Na faapefea e le lagonaina o le mana o Iesu Keriso ona fesoasoani e suia ai lou olaga?

O a mea ua iloa e tamaitai talavou e uiga i le alofa tunoa? E mafai faapefea ona e fesoasoani ia i latou ia malamalama i le mana o le alofa tunoa i o latou lava olaga?

O a mau ma isi punavai ua fesoasoani ia te oe e malamalama ai i le alofa tunoa? O a mea ua uunaia ai oe e faasoa atu i tamaitai talavou, ina ia mafai ona latou malamalama ai i le alofa tunoa?

Efeso 2:8–9; 2 Nifae 25:23 (E faaolaina i tatou e le alofa tunoa)

Filipi 4:13; Iakopo 4:6–7 (O le alofa tunoa o Iesu Keriso tatou te maua ai le malosiaga)

Moronae 10:32–33 (O le alofa tunoa e mafai ona faaatoatoa ai tatou ia Keriso)

Bible Dictionary, “Alofa Tunoa”

J. Devn Cornish, “O Lava Ea Lo’u Lelei? Pe O Le A Ou Ausia Ea?” Ensign po o le Liahona, Nov. 2016, 32–34

Dieter F. Uchtdorf, “O Le Meaalofa o le Alofatunoa, ” Ensign po o le Liahona, Me 2015, 107–10

David A. Bednar, “Tauave ma le Faigofie a Latou Avega,” Ensign po o le Liahona, Me 2014

“Alofa Tunoa,” Faamaoni I le Faatuatua (2004), 18–20

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni a oe lava manatu e faalauiloa atu ai le lesona o lenei vaiaso:

Tusi i luga o le laupapa se ata faigofie o se tagata o loo i ia i se lua, faatasi ma se tasi tagata o loo tu i le pito i luga o le lua, ma o loo ia tuuina ifo i lalo se apefai. Fesili atu i tamaitai talavou po o le a le mea e tatau ona fai ina ia mafai ona laveaiina le tagata o loo i totonu o le lua? O le a le matafaioi a le tagata o loo i le pito i luga o le lua? O le a le matafaioi a le tagata o loo i totonu o le lua? O le a le mea ua aoao atu e lenei ata i tamaitai talavou e uiga i le ala e laveaiina ai i tatou e le alofa tunoa o le Faaola?
Fesili atu i tamaitai talavou, po o a mea ua latou iloaina e uiga i le alofa tunoa. O le a so latou manatu i le uiga o le alofa tunoa? O faapefea ona latou vaaia le alofa tunoa i o latou lava olaga? Pe latou te talitonu, ua faaolaina i latou e le alofa tunoa? O a fesili o i ai ia i latou e uiga i le alofa tunoa?

Aoao faatasi

O gaoioiga taitasi o loo i lalo, e mafai ona fesoasoani i tamaitai talavou e malamalama ai i le mataupu o le alofa tunoa. I le mulimuli ai i le taitaiga a le Agaga, filifili se tasi po o le sili atu o le a sili ona lelei mo lau vasega:

Valaaulia tamaitai talavou e faitau i vaega o le saunoaga a Elder J. Devn Cornish “O Lava Ea Lou Lelei? Pe O Le A Ou Ausia Ea?” Fai atu ia te i latou e vaavaai mo tali i fesili nei: “O le a le alofa tunoa? E mafai faapefea ona ou mauaina le alofa tunoa i lou olaga? E mafai faapefea ona ou agavaa atili i le alofa tunoa a le Faaola? Pe o le a ou toe foi atu ea i le lagi?” A maea ona maua e tamaitai talavou le taimi e mafaufau loloto ai i nei fesili, valaaulia i latou e mafaufau e uiga i se uo atonu o loo tauivi ma lona faatuatua ma le talitonu i le talalelei. E mafai faapefea ona fesoasoani lenei saunoaga i a latou uo?
Mafaufau e tusi se ata o se pa o loo matala ma ni faamalama o loo matala i luga o le laupapa, ma fai atu i tamaitai talavou e saili le amataga o le lauga a Peresitene Dieter F. Uchtdorf “O Le Meaalofa o le Alofatunoa” e maua ai le faatusatusaga na ia faia i le va o le alofatunoa ma mea faitino nei. Vaevae vaega o totoe o le lauga i tamaitai talavou ma fai atu ia i latou e tusi ma faasoa mai se otootoga e tasi le fuaiupu o mea ua latou aoaoina e uiga i le alofatunoa mai o latou vaega. O le a le mea latou te faia e maua ai le alofatunoa o le Faaola?
I nai aso o i luma, fai atu i se tasi o tamaitai talavou e aoao po o le a le uiga o le aveina i o tatou luga o le avega a le Faaola, mai le Mataio 11:28–30 ma le lauga a Elder David A. Bednar “Tauave ma le Faigofie a Latou Avega.” Fai atu i ai e sau saunia i le vasega e taitai se talanoaga e uiga i mea sa ia aoaoina ma le auala e mafai ai e le avega ona fai ma sui o la tatou fegalegaleaiga ma Iesu Keriso. Uunaia o ia e faasoa mai se faamatalaga mai le lauga a Elder Bednar na te lagona o le a fesoasoani i tamaitai talavou ia malamalama i le alofatunoa o le Faaola.
Tusi otootoga pupuu o mau mai lenei otootoga, ma faapipii otootoga taitasi i luga o le puipui o le potu. Tofi tamaitai talavou taitasi e faitau se tasi o mau, ona saili lea ma tu i tafatafa o le otootoga e fetaui lelei ma lana mau. Fai atu i tamaitai talavou e faasoa mai mea ua latou aoaoina mai a latou mau e uiga i le alofa tunoa. O le a se faamaoniga o le alofa tunoa ua latou vaaia i o latou olaga? O a faataitaiga e mafai ona latou manatunatu i ai mai tusitusiga paia (e pei o Nifae, Amona, ma Alema le Itiiti)?
Valaaulia ia tamaitai talavou taitasi e fai se lisi o mea na ia aoaoina ao ia faitau e uiga i le alofatunoa i le Lolomifefiloi o le Tusi Paia ma i le Faamaoni i le Faatuatua. Fai i tamaitai talavou e faasoa mai se mea mai a latou lisi ma faamalamalama mai pe aisea e taua ai ia i latou. Valaaulia i latou e saili ni ata (i le Tusi Ata o le Talalelei po o se mekasini a le Ekalesia) lea e faailoa mai tagata na mauaina le alofatunoa po o se fesoasoani mai le Atua, ma fai atu ia i latou e faasoa mai mea sa latou aoaoina e uiga i tagata nei i vaega taitoalua po o ni vaega toalaiti. O a aafiaga e mafai ona latou faasoa mai mai o latou lava olaga?
Aumai se lala laau mai se laau i le vasega, ma valaaulia tamaitai talavou e saili pe na faapefea ona faaaoga e le Faaola lala laau e aoao atu ai e uiga i le alofa tunoa i totonu o le Ioane 15:1–10. O a ni manatu ua latou maua e uiga i le alofa tunoa mai nei mau? Valaaulia se tamaitai talavou e faaaoga le lala laau na e aumaia, e otooto ai i le isi vaega o le vasega, mea na ia aoaoina mai e uiga i le alofa tunoa.

Fai atu i tamaitai talavou e faasoa mai mea na latou aoaoina i le asō. Ua latou malamalama ea i le aoaoga faavae o le alofa tunoa? O a lagona po o uunaiga ua latou mauaina? E i ai nisi a latou fesili? Faamata o le a fesoasoani le faaalu o se isi taimi i lenei aoaoga faavae?

Ola i mea ua tatou aoaoina

Fesoasoani i tamaitai talavou e faia se lisi o mea e mafai ona latou faia e faaaoga ai mea na latou aoaoina i le asō. Valaaulia i latou e filifili mea o le a latou faia i le vaiaso atoa e sosoo ai.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.