O le a le toetu?

E ala i le Togiola a Iesu Keriso, o le a toetutu tagata uma. O o tatou tino ma agaga o le a toe tuufaatasia i se tulaga ola pea atoatoa. O se malamalamaaga ma se molimau i le toetu, e mafai ona aumaia ia i tatou le faamoemoe ma le vaaiga manino, pe a tatou feagai ma luitau ma manumalo o le olaga.

Saunia oe lava ia faaleagaga

O le a le mea ua e iloa e uiga i le toetu? O a manatunatuga loloto ua tatou mauaina e uiga i le toetu mai tusitusiga paia o ona po nei?

O a mea ua malamalama i ai tamaitai talavou e uiga i le toetu? E mafai faapefea e se malamalamaaga sili atu o le toetu, ona aafia ai o latou lagona e uiga i o latou tino?

O a mau po o isi punaoa atonu e mafai ona e faaaogaina e fesoasoani e aoao ai tamaitai talavou e uiga i le toetu? O a mea ua uunaia ai oe e faasoa atu?

Luka 24 (O Le Toetu o Iesu Keriso)

1 Korinito 15 (Talu ai ona ua faatoilaloina e le Faaola le oti, o le a tatou toetutu uma lava)

Alema 11:41–45 (Pe a tatou toetutu, o le a tuufaatasia o tatou agaga ma tino, ma o le a faamasinoina i tatou)

Alema 40–41 (Ua faamalamalama e Alema le toetu i lona atalii o Korianetona)

Paul V. Johnson, “Ma e Leai Foi Se Toe Oti,” Ensign po o le Liahona, Me 2016, 121–23

Thomas S. Monson, “Ua Toetu o Ia!” Ensign po o le Liahona, Me 2010, 87–90

D. Todd Christofferson, “O Le Toetu o Iesu Keriso,” Ensign po o le Liahona, Me 2014

Ata Vitio: “Ua Toetu o Ia”

22:25

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni a oe lava manatu e faalauiloa atu ai le lesona o lenei vaiaso:

Faaali atu se ata o le Faaola toetu (mo se faataitaiga, Tusi Ata o le Talalelei, 59–60). Fesili atu i tamaitai talavou pe faamata e faapefea ona latou faamalamalama le uiga o le toetu i se tasi, e le malamalama i ai.
Fesili atu i tamaitai talavou po o le a le mea lea tatou te faailogaina i le taimi o le Eseta. O a nisi o faailoga o le Eseta? O a mea ua aoao atu e nei faailoga e uiga i le toetu?

Aoao faatasi

O gaoioiga taitasi o loo i lalo, e mafai ona fesoasoani i tamaitai talavou e malamalama ai i le toetu. I le mulimuli ai i le taitaiga a le Agaga, filifili se tasi po o le sili atu o le a sili ona lelei mo lau vasega:

Filifili nisi o fuaitau mai le 1 Korinito 15 e uiga i le toetu. Valaaulia tamaitai talavou e faitau ia fuaitau, i vaega toalaiti pe taitoatasi, ma fatu se faamatalaga aotele o mea sa latou aoaoina e uiga i le toetu (mo se faataitaiga, fuaiupu 1–8 atonu e mafai ona otootoina faapea “E i ai molimau o le toetu”). Aisea e lagonaina ai e tamaitai talavou, e taua mo i latou le iloaina o nei upumoni e uiga i le toetu?
Fai atu i tamaitai talavou e vaai faalemafaufau faapea o se uo, e le o se tagata o le Ekalesia, ua misia se tagata e pele ia te ia. Valaaulia le afa o tamaitai talavou e faitau le Alema 40 ma le isi afa e faitau le Alema 41. Fai atu ia i latou e fai se lisi o aoaoga e uiga i le toetu o loo i nei mataupu, ia atonu e mafai ona latou faasoaina atu i a latou uo. Ona fai atu lea ia i latou e faasoa a latou lisi ma le isi vaega o le vasega.
I le avea ai ma se korama, fai se lisi o tagata o i tusitusiga paia o e na molimauina le Toetu o le Faaola. Valaaulia tamaitai talavou e saili i le lauga a Elder D. Todd Christofferson “O Le Toetu o Iesu Keriso” e maua ai nisi faataitaiga. Uunaia i latou e sue ia tautinoga a nei molimau i totonu o tusitusiga paia (o nisi o mau faasino o loo tauina mai i le lauga a Elder Christofferson). O le a se mea na tatou aoao e uiga i le Faaola ma Lona Toetu mai nei molimau? Faasoa atu lau molimau e uiga i le Toetu o le Faaola, ma valaaulia ni nai tamaitai talavou e faasoa mai a latou molimau.
Valaaulia tamaitai talavaou e faitau ia tala i le saunoaga a Peresitene Thomas S. Monson “Ua Toetu o Ia!” ma le saunoaga a Elder Paul V. Johnson “Ma e Leai Foi Se Toe Oti.” Fai atu ia i latou e otooto nei tala i a latou lava upu, ma faasoa mai mea ua aoao mai e nei tala ia i latou e uiga i le toetu. O a nisi mea ua uunaia ai i latou e uiga i nei tala?
Tufa atu tusi o le Aoaoga a Peresitene o le Ekalesia (pe faia ni kopi o mataupu filifilia), ma valaaulia tamaitai talavou e saili aoaoga mai perofeta o aso e gata ai e uiga i le toetu. Fai atu ia i latou e faasoa mai i le vasega mea sa latou mauaina.
Valaaulia tamaitai talavou e saili viiga e faatatau i le toetu. Usuusu faatasi e le vasega ni nai pese. Uunai tamaitai talavou e faitau mau o loo i le faaiuga o viiga taitasi, ma talanoaina mea latou te aoaoina mai viiga ma mau. Valaaulia i latou e faasoa mai a latou molimau ma lagona e uiga i le toetu.

Fai atu i tamaitai talavou e faasoa mai mea na latou aoaoina i le asō. Ua sili atu ea lo latou malamalama e uiga i le faatuatua? O a lagona ma uunaiga ua latou mauaina? O i ai nisi a latou fesili? Pe taua ea le faaaluina o se taimi faaopoopo i lenei aoaoga faavae?

Ola i mea o tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Faasoa mai a latou molimau e uiga i le toetu. O ai e mafai ona latou faasoa atu i ai a latou molimau i aso ma vaiaso o sosoo ai? Faamata e faapefea ona latou aoao atu mea ua latou aoaoina, i se isi tagata?
Saili tali o ni fesili o loo i ai pea ia i latou, e uiga i le toetu.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.