O le a le Togiola a Iesu Keriso?

O le Togiola, o le taulaga lea na faia e Iesu Keriso e fesoasoani ai ia i tatou e faatoilalo le agasala, satani, ma le oti. O le taulaga togiola a Iesu na faataunuuina i le Faatoaga i Ketesemane ma luga o le satauro i Kalevaria. Na mafatia o Ia mo a tatou agasala, tauave i ona lava luga le oti, ma sa toetu mai. O le Togiola o le faaaliga sili lea o le alofa o le Tama Faalelagi ma Iesu Keriso.

Saunia oe lava ia faaleagaga

O le Togiola o le mea aupito sili ona taua lea na tupu i le talafaasolopito o tagata soifua. O le a le taulaga togiola a Iesu Keriso? O le a le uiga o le Togiola ia te oe?

O a mea ua iloa e tamaitai talavou e uiga i mea na tutupu i le Faatoaga o Ketesemane ma luga o le satauro? O a mea e mafai ona latou maua mai i tusitusiga paia, e faalautele ai a latou molimau i le Togiola a Iesu Keriso? O a mea e mafai ona latou aoaoina atu i le tasi ma le isi?

O a mau ma lauga o le a fesoasoani i tamaitai talavou e lagona ai le taua o le Togiola, ma malamalama ai i le taulaga na faia e le Faaola mo i latou?

Mataio 26–27 (I Ketesemane ma luga o le satauro, na mafatia ai Iesu Keriso mo a tatou agasala ma tauave i ona luga o tatou tiga)

Mataio 28:1–10 (Na faatoilaloina e Iesu Keriso le oti e ala i Lona Toetu Mai)

2 Nifae 9:6–16 (Na faatoilaloina e Iesu Keriso le oti e ala i Lona Toetu Mai)

Alema 7:11–13 (Na tauave e Iesu Keriso i Ona luga o tatou tiga, ma’i, mafatiaga, ma agasala)

“O Le Keriso Soifua: O Le Molimau a Aposetolo” Liahona, Ape. 2000, 2–3 (tagai foi i le Faamaoni I le Faatuatua, 87–89; Alualu I Luma o le Tagata Lava Ia, 102)

Russell M. Nelson, “Mauaina o le Mana o Iesu Keriso i o Tatou Olaga,” Ensign po o le Liahona, Me 2017, 39–42

Carole M. Stephens, “O Le Fomai Sili,” Nov. 2016, Ensign po o le Liahona, 9–12

Linda K. Burton, “Pe Ua Tusia Ea i O Tatou Loto le Faatuatua i le Togiola a Iesu Keriso?” Ensign po o le Liahona, Nov. 2012

“Togiola a Iesu Keriso,” Faamaoni I le Faatuatua (2004), 181–187

Ata Vitio: “Sa Leai se Tasi na I ai Faatasi ma Ia”

4:25

Aoao atu i le ala a le Faaola

Na faaaoga e le Faaola tusitusiga paia e aoao atu ai e uiga i Lana misiona. Na Ia aoao atu tagata ia manatunatu i tusitusiga paia mo i latou lava. O le a se mea e mafai ona e faia e fesoasoani ai i tamaitai talavou ina ia faaaoga tusitusiga paia ia malamalama ai i le Togiola a Iesu Keriso?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni a oe lava manatu e faalauiloa atu ai le lesona o lenei vaiaso:

Valaaulia tamaitai talavou e vaai faalemafaufau faapea o se uo mai se isi faatuatuaga na sau i le lotu ma faalogo i se tasi o ta’ua le Togiola a Iesu Keriso. Faamata e faapefea ona latou tali atu, pe a fesili la latou uo, “O le a Togiola a Iesu Keriso?”
Faaali atu se ata e faailoa ai se tasi o mea na tupu i le Togiola (e pei o le mafatiaga o le Faaola i le Faatoaga i Ketesemane, o Lona Faasatauroga, po o Lona Toetu), ma fai atu i tamaitai talavou e faasoa mai mea ua latou iloa e uiga i le mea na tupu. O a fesili o i ai ia i latou?

Aoao faatasi

O gaoioiga taitasi o loo i lalo, e mafai ona fesoasoani i tamaitai talavou e aoao ai e uiga i le Togiola a Iesu Keriso. I le mulimuli ai i le taitaiga a le Agaga, filifili se tasi po o le sili atu lea o le a sili ona lelei mo lau vasega.:

Fai atu i tamaitai talavou e toe iloilo le saunoaga a Peresitene Russell M. Nelson “Mauaina o le Mana o Iesu Keriso i o Tatou Olaga” ma sue mau ia e aofia ai mea na faia pe na fetalai mai ai le Faaola. O le a se mea ua tatou aoao ai e uiga i le Faaola mai nei mau? O le a se fautuaga na tuuina mai e Peresitene Nelson e fesoasoani ia i tatou ia maua ai le mana o le Faaola i o tatou olaga? Valaaulia ia tamaitai talavou e mafaufau i ni auala latou te mafai ai ona talia le lui na tuuina atu e Peresitene Nelson i tagata talavou o le Ekalesia. Valaaulia ia tamaitai talavou e tuuto atu i mea latou te filifili e fai. Fuafua se taimi i le lumanai lea e mafai ai ona latou faasoa mai ni aafiaga sa latou maua i le suesue ai e uiga i le Faaola.
Fai atu i tamaitai talavou e faafetaui se mea na tupu i nai toe itula o le soifuaga o le Faaola, ma mau o loo i le Mataio 26–28. O a mea ua aoaoina mai e tamaitai talavou e uiga i le Faaola ma Lana Togiola, mai nei mea na tutupu? Valaaulia ni nai tagata o le vasega e faasoa mai o latou lagona e uiga i le Faaola.
Valaaulia tamaitai talavou taitasi e faitau se tasi o mataupu faavae o le Togiola o loo i le saunoaga a Linda K. Burton “Pe ua tusia ea i o tatou loto le Faatuatua i le Togiola a Keriso?” Fai atu ia te ia e vaai se tasi o le vasega na faitauina lea mataupu faavae e tasi, ma valaaulia i latou e talanoaina mea na latou aoaoina ma faasoa mai se faataitaiga mai o latou lava olaga, po o olaga o tagata latou te iloaina o loo faaalia ai le mataupu faavae. Fai atu i se tasi mai paga taitasi e faasoa mai i le isi vaega o le vasega, mea na latou talanoaina.
Fesili i tamaitai talavou po o a mea ua latou aoaoina e uiga i le Faaola ma le Togiola, mai Ana upu faaiu i luga o le satauro (tagai i le Luka 23:34, 39–43, 46; Ioane 19:26–30).
Valaaulia ia tamaitai talavou e faitau le 2 Nifae 9:6–26 pe matamata i se tasi po o le sili atu o vitio o i lenei otootoga ma faalogo mo mea sa latou aoaoina e uiga i le manaomia o le Togiola a Iesu Keriso. Tuu atu se taimi no nisi o tamaitai talavou e faasoa mai ni fuaitau sa latou filifilia ma mea o latou aoao mai. Uunaia i latou e tusi se tusi i se tasi e le talitonu i le Atua ma faaaoga fuaitau nei e faamatala ai pe aisea e taua ai le Togiola a le Faaola ma pe aisea tatou te manaomia ai se Faaola. Fai atu ia i latou e faasoa mai a latou tusi i le tasi ma le isi.
Fai atu i tamaitai talavou e lisi i luga o le laupapa nisi o tofotofoga, luitau, po o ni gasegase e feagai ma tagata. Valaaulia i latou e faitau le Alema 7:11–13 ma vaega mai le saunoaga a Sister Carole M. Stephen “O Le Fomai Sili.” O a mea ua aoaoina e tamaitai talavou e uiga i le alofa faaKeriso mai nei punaoa? E faapefea ona tatou mauaina le mana o le Togiola e fesoasoani ia i tatou i taimi o tofotofoga? (tagai i le Mosaea 24:12–14). Fai atu i tamaitai talavou e mafaufau i ni auala e mafai ai ona latou faasoaina atu mea sa latou aoaoina e uiga i le Togiola lea e mafai ona fesoasoani i tofotofoga sa latou lisiina i luga o le laupapa.

Fai atu i tamaitai talavou e faasoa mai mea na latou aoaoina i le asō. Ua sili atu ea lo latou malamalama e uiga i le Togiola? O a lagona po o uunaiga ua latou mauaina? E i ai nisi a latou fesili? Faamata o le a fesoasoani le faaalu o se isi taimi i lenei mataupu?

Ola i mea o tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Tusi i totonu o a latou api talaaga mea ua latou iloaina, ma o latou lagona e uiga i le Togiola. I le vaiaso atoa, atonu e mafai ona latou manatunatu e uiga i le auala e faamanuiaina ai e le Togiola o latou olaga, ma tusi o latou manatu i a latou api talaaga.
Fefaasoaai ma se tagata o le aiga, po o se uo mea ua latou aoaoina.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.