E mafai faapefea ona ou atiaeina le alofa faa-Keriso?

O le alofa le pona o Keriso, lea ua iloaina o le alofa mama, o le ituaiga o alofa silisili ona maualuga, maualii, ma malosi ma e aupito sili ona olioli ai le agaga (tagai i le 1 Nifae 11:23). O Iesu Keriso o le faataitaiga atoa o le alofa mama. O Lana galuega i le olaga nei, sa Ia “femaliuai ma agalelei,” i le faaalia o le agaalofa mutimutivale mo tagata matitiva, mafatia, ma faanoanoa (tagai i le Mataio 4:23; Galuega 10:38). Ina ia atiina ae le alofa faaKeriso, e tatau ona tatou saili i ai, tatalo ia maua, ma mulimuli i le faataitaiga a le Faaola i o tatou mafaufauga, upu, ma amioga.

Saunia oe lava ia faaleagaga

O anafea na faaalia mai ai e isi ia te oe le alofa faaKeriso? O le a se aafiaga na i ai o lenei mea ia te oe? O le a se taimi na e lagonaina ai le alofa faaKeriso? E faapefea ona e atinaeina le alofa faaKeriso mo isi?

O a ni avanoa e maua e tamaitai talavou e faaali atu ai le alofa faaKeriso? Aisea e taua ai lo latou aoaoina o le auala e alofa atu ai i isi e pei ona sa faia e Keriso?

O a mau ma isi punaoa o le a fesoasoani i tamaitai talavou e atiina ae ai le uiga faaKeriso o le alofa mama?

Kenese 45; Luka 23:33–34; Alema 61:9 (O faataitaiga o tagata o loo faaalia le alofa)

Levitiko 19:18 (Alofa atu i ou tuaoi e pei o oe lava ia te oe)

1 Samuelu 16:7 (E silasila le Alii i le loto)

Ioane 15:9–13 (Na faaalia e Keriso Lona alofa mo i tatou i le tuuina mai o Lona ola)

1 Ioane 4:7–11, 18–21 (O le Atua e alofa)

Mosaea 4:16 (Fesoasoani atu i e o manaomia la outou fesoasoani)

3 Nifae 12:44 (Alofa i ou fili)

Moronae 7:45–48 (O le alofa mama o le alofa le pona o Keriso; tatalo ina ia faatumulia i lenei alofa)

Thomas S. Monson, “Agalelei, Alofa Mama, ma le Alofa,” Ensign po o le Liahona, Me 2017, 66–67

Dieter F. Uchtdorf, “O Le Alofa Atoatoa e Faateaeseina ai le Fefe,” Ensign po o le Liahona, Me 2017, 104–7

Thomas S. Monson, “Alofa—o le Ute o le Talalelei,” Ensign po o le Liahona, Me 2014, 91-94

Dallin H. Oaks, “Ola Faatasi ma Alolofa atu i Isi e Eseese o Tatou Talitonuga, ”Ensign po o leLiahona, Nov. 2014, 25-27.

“Alofa,” Faamaoni i le Faatuatua (2004), 14–15

Vitio: “Faamalosiau Atu i le Tasi ma le Isi,” “Mo Madison,” “Fetufaai atu o le Malamalama o Keriso” “Bullying—Stop It”

4:50

4:15

5:20

10:13

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

I luga o se fasi pepa, tusi ai “Na ou lagona le alofa sili mai se tagata ina ua __________________.” Tufa atu ia tofu tamaitai talavou ma nei fasi pepa ao lei amataina le vasega, ma fesili atu ia te ia e mafaufau pe faapefea ona ia faatumuina le avanoa. Valaaulia ia tamaitai talavou e faasoa mai o latou manatu e amata ai le lesona.
Valaaulia ia tamaitai talavou e usu le pese “Ia Fealofani” (Viiga, nu. 195). Fai atu i tamaitai talavou e faasoa mai po o a uiga o upu o lenei pese ia i latou.

Aoao faatasi

O gaoioiga taitasi nei o le a fesoasoani i tamaitai talavou e aoao ai i le auala e atiina ae ai le alofa faaKeriso. I le mulimuli ai i le taitaiga a le Agaga, filifili se tasi pe sili atu e aoga mo lau vasega:

O mea uma sa faia e Iesu Keriso mo i tatou sa faia ona o le alofa atoatoa—mo i tatou ma mo Lona Tama. E mafai faapefea ona tatou atiae le tomai e usitai ai ona o le alofa atoatoa, e pei ona faia e le Faaola, ae le ona o le fefe? Vaevae le vasega i ni vaega se lua e suesue le lauga a Peresitene Dieter F. Uchtdorf “O Le Alofa Atoatoa e Faateaeseina ai le Fefe.” Tofi se tasi o vaega e faasoa mai mea na latou aoaoina mai i vaega ua faaulutaina “Fefe e pei o le Puleaina” ma le “O Le Faafitauli o le Fefe” ma le isi vaega e faasoa mai mea na latou aoao i vaega na faaulutalaina “O Se Auala Sili Atu” ma le “O Le Alofa Atoatoa e Faateaeseina ai le Fefe.” Tuu atu i tamaitai talavou se taimi e tusi ai o latou manatu i fesili nei: O a ni auala o loo noatia ai au e faia mea ona o le fefe? O a ni mea e mafai ona ou faia e atiina ae ai le alofa faaKeriso? O a ni mea ou te manao e sui ona o mea sa ou aoaoina?
Aumai ni fasi pepa i le vasega (e tasi le pepa mo tamaitai talavou taitasi) ma se upu e tasi nei i le pito i luga: Agalelei, Alofa Mama, ma le Alofa. Tuu atu se fasi pepa i tamaitai talavou taitasi, ma valaaulia o ia e suesue le lauga a Peresitene Thomas S. Monson “Alofa—o le Ute o le Talalelei” ma le “Agalelei, Alofa Mama, ma le Alofa,” ma vaavaai mo se faamatalaga po o se tala e aoao mai e uiga i le upu o loo i luga o lana pepa. Fai atu i tamaitai talavou e faasoa atu mea sa latou mauaina. O a ni avanoa o tatou maua o se vasega e atili ai ona agalelei, alofa, ma lima foai?
Valaaulia tamaitai talavou e faitau le Ioane 15:9–13; 1 Ioane 4:7–11, 18–21; ma le Moronae 7:47–48. O a ni mea sa aoaoina e tamaitai talavou mai nei mau e uiga i le auala e atiina ae le alofa faaKeriso? O le a le uiga o le fasifuaitau “alofa le pona o Keriso” ia i latou? Fai atu i tamaitai talavou e saili ni tala i tusitusiga paia lea e faaalia ai le alofa o le Faaola, ma fai atu ia i latou e faasoa mai nei tala i le tasi ma le isi. E mafai faapefea ona tatou mulimuli i le faataitaiga a le Faaola? E mafai foi ona latou faitau ma talanoaina tala i se tasi o lauga o loo lisi atu i lenei otootoga pe faasoa mai ni faataitaiga o ni taimi na faamanuiaina ai i latou po o tagata latou te iloa e galuega o le alofa faaKeriso.
Tusi mau faasino nei i luga o le laupapa: Mosaea 4:16 ma le Levitiko 19:18. Vaevae le vasega i ni vaega se lua, ma tuu atu i vaega taitasi se tasi o mau fuaitau. Faatonu tamatai talavou e faailoa mai ni poloaiga o loo tuuina atu ia latou fasifuaitau ma tusi se aotelega o poloaiga i luga o le laupapa i talaane o le mau fuaitau. O a ni avanoa o latou maua e mulimuli ai i nei poloaiga i le aiga, i le aoga, ma le nuu? O a ni papupuni o ono taofia i latou mai le usitaia o nei poloaiga? E mafai faapefea ona tatou manumalo mai nei papupuni? Valaaulia tamaitai talavou e matamata i le “Bullying—Stop It” ma talatalanoa po o le a se mea e mafai ona latou faia e ola ai i nei poloaiga pe a latou fetaiai ma ni tulaga faapenei.

10:13
O se vasega, faitau, matamata, pe faalogologo i le lauga a Elder Dallin H. Oaks “Ola Faatasi ma Alolofa atu i Isi e Eseese o Tatou Talitonuga.” Fai atu i tamaitai talavou e vaavaai mo fautuaga lena o le a fesoasoani ia i latou e alofa atu ai isi i taimi faigata. O a nisi mea e mafai e tamaitai talavou ona aoao ai e ala i le suesueina o se faataitaiga faaletusitusiga paia o se tagata na faaalia le alofa ia i latou o e na faasaua pe faaita ia te ia? O ni faataitaiga e mafai ona i ai e aofia ai le Faaola (tagai Luka 23:34), Iosefa i Aikupito (tagai Kenese 45), po o Paorana (tagai Alema 61:9). Valaaulia tamaitai talavou e mafaufau filemu i se tasi i o latou olaga o e atonu o i ai ni o latou lagona le lelei i ai ma mafaufau i ni auala e mafai ai ona latou faaali atu le faateleina o le alofa faaKeriso i lena tagata.
Matamata i se tasi o vitio o loo fautuaina atu i le otootoga lenei. O a mea ua aoaoina e tamaitai talavou e uiga i le alofa faaKeriso mai nei vitio? Fai atu i tamaitai talavou e faasoa mai se aafiaga lea sa fesoasoani ai se galuega auauna atu a se tagata ia i latou e lagona ai le alofa o le Faaola. O le a le mea na aoao atu e lena aafiaga ia i latou e uiga ia Iesu Keriso? Valaaulia tamaitai talavou e mafaufau i se tasi latou te iloaina atonu o loo manaomia ona lagonaina le alofa o le Alii. O le a se mea e mafai ona latou faia e fesoasoani ai i lena tagata?

Fai i tamaitai talavou e faasoa mai mea sa latou aoaoina i le aso. O a ni o latou lagona po o ni uunaiga o i ai? Pe o latou malamalama i le auala e atiina ae ai le alofa faaKeriso? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Tatalo mo pe faaali atu le alofa i se tagata e le lelei i ai ni o latou lagona.
Faaali atu le alofa i se tagata e ono manaomia se tausiga faapitoa po o se fesoasoani (tagai i mea faatonuina e fai o le tulaga faatauaina o Galuega Lelei 3, 5, ma le 6, Alualu i Luma o le Tagata Lava Ia, 54–55).

Faasoa atu ma tamaitai talavou se mea o le a latou suesueina i le vaiaso e sosoo ai. O a ni o latou manatu ma fesili e uiga i lenei autu? O le a se mea e mafai ona latou faia e sauni ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso e sosoo ai.