E mafai faapefea ona ou avea atili faapei o Keriso?

Na faatuina e Iesu Keriso se faataitaiga atoatoa mo i tatou, ma ua Ia poloaiina i tatou ina ia avea faapei o Ia. Na Ia faataitai mai uiga e pei o le faatuatua, faamoemoe, alofa mama, onosai, lotomaualalo, amio mama, maelega, ma le usiusitai. A o tatou aoao e uiga ia te Ia ma saili atu e atiina ae Ona uiga, o le a avea i tatou ma tamaitai lea ua finagalo i ai o Ia ma lo tatou Tama Faalelagi e avea ai i tatou.

Saunia oe lava ia faaleagaga

O a nisi o uiga paia o Iesu Keriso? O fea o nei uiga paia e matuai manaomia lava ona e atinaeina? O ai na e vaai i ai pe na e iloaina i lou olaga o loo faataitaia nei uiga paia?

O a uiga paia faaKeriso o loo e vaaia i tamaitai talavou taitasi o loo e aoaoina? E mafai faapefea ona e uunaia i latou ia mulimuli i le faataitaiga a le Faaola ma avea faapei o Ia?

O a mau ma lauga o le a uunaia ia tamaitai talavou e atiina ae ia uiga faaKeriso?

Mataio 26:36–45, 50–52; Luka 23:33–34; Ioane 19:25–27; 3 Nifae 17 (Faataitaiga o uiga o Keriso)

Mosaea 3:19 (E ala atu i le Togiola a Iesu Keriso e mafai ai ona avea i tatou ma tagata paia)

3 Nifae 12:48; Moronae 7:48 (O valaaulia ina ia avea faapei o le Faaola)

Robert D. Hales, “Avea o se Soo o lo Tatou Alii o Iesu Keriso,” Ensign po o le Liahona, Me 2017, 46–48

Henry B. Eyring, “Faalagolago i le Agaga Lena Lea na te Taitai ia Fai le Mea Lelei,” Ensign po o le Liahona, Me 2016, 16–18

Richard J. Maynes, “O Le Olioli o le Ola Ai i se Olaga e Faatotonugalemu ia Keriso,” Ensign po o le Liahona, Nov. 2015, 27–30

“O Le Keriso Soifua: O Le Molimau a le Au Aposetolo o Le Ekalesia a Iesu Keriso o le Au Paia o Aso e Gata Ai,” Ensign po o le Liahona, Ape. 2000, 2–3

“ Talai La’u Talalelei (2004), 123-36.

Vitio: “Daily Bread: Change,” “Uiga faaKeriso”

2:48

2:54

Aoao atu i le ala a le Faaola

I soo se tulaga lava, o le Faaola o lo tatou faataitaiga ma faiaoga. E mafai ona e aoao i Ona uiga e ala i le faitau i Lona soifuaga i tusitusiga paia. Sa Ia fetalai mai, “O a’u nei le ala, ma le upu moni, ma le ola” (Ioane 14:6). Ia saunia oe lava e aoao atu tamaitai talavou i le taua o le faataitaia o uiga mama faaKeriso i o latou olaga.

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Tuu atu ia tofu tamaitai talavou ma se kopi o le gaoioiga o uiga o i le itulau 135 o le Tala’i La’u Talalelei, ma fai atu ia te ia e faaaoga ni nai minute e faamaea ai le iloiloga faaletagata lava ia. Valaaulia ia tamaitai talavou e faasoa mai mea sa latou aoaoina mai lenei gaoioiga. Valaaulia nisi e faasoa mai se uiga faaKeriso latou te faamemelo i ai i se isi tagata o le vasega po o se tagata o le aiga.
Valaaulia ia tamaitai talavou e auauai mai i le laupapa e tusi se upu se tasi po o le sili atu foi lea e faamatala ai le Faaola. A uma ona maua e tagata uma le avanoa e faaopoopo ai i le lisi, fai atu i tamaitai talavou e mafaufau loloto po o fea o nei uiga latou te fia mananao tele i ai e atiina ae.

Aoao faatasi

O gaoioiga taitasi nei o le a fesoasoani i tamaitai talavou e aoao ai i le ala e atiina ae ia uiga faaKeriso. I le mulimuli ai i le taitaiga a le Agaga, filifili se tasi pe sili atu e aoga mo lau vasega:

Valaaulia tamaitai talavou e faitau le lauga a Elder Robert D. Hales “Avea o se Soo o lo Tatou Alii o Iesu Keriso” ma talanoa pe faapefea e uiga o se soo ona pei o se filo e lalaga faastasi i se ie. Atonu e fiafia tamaitai talavou e fatu a latou lava faatusatusaga—e faaalia ai pe faapefea e le tele o vaega e galulue faatasi ona fatu ai se mea e tele atu—e fai ma sui o le auala tatou te atiina ae ai uiga faaKeriso. Valaaulia tamaitai talavou e filifili se tasi o uiga faaKeriso mai le lauga ma se sini e suesue e uiga i ai ma taumafai e atiina ae ia atoatoa atili.
I lana saunoaga “Faalagolago i le Agaga Lea na te Taitai ia Fai le Mea Lelei,” Ua aoao mai Peresitene Henry B. Eyring e faapea “o le mea muamua lava e tatau ona outou tautino atu e fai” pe a e finagalo e mulimuli i le Faaola “o le o atu lea ma auauna atu ma le iloaina tou te le o o na o outou.” Ina ia fesoasoani i alii talavou e mulimuli i lenei fautuaga, valaaulia i latou e suesue le lauga; faailoga ia folafolaga, o manatuaga, ma tautinoga latou te maua; ma faasoa mai mea ua latou aoaoina ma tagata o le vasega. O le a le mea e mafai ona faia e tamaitai talavou e faatino ai le valaaulia a Peresitene Eyring e auauna atu i isi? Mo se faataitaiga, e mafai ona latou tusia ni tusi i tagata latou te alolofa i ai, e pei o tagata o le aiga, o uo, o tuaoi, e tau atu ai lo latou faafetai ma le fiafia. Uunaia i latou e faalogo mo musumusuga a le Agaga a o latou tusiaina.
Ina ia fesoasoani i tamaitai talavou e malamalama i le aisea e tatau ai ona tatou faatotonugalemu o tatou olaga ia Iesu Keriso, e mafai ona e valaaulia i latou e taaalo i se taaloga e aofia ai ni mea faitino e faaogatotonu le faiga (e pei o se togiina o se mama po o le faapaleniina o ni poloka i se faaputuga maualuga). Faaali atu minute muamua e fa o le lauga a Elder Richard J. Maynes “O Le Olioli o le Ola Ai i se Olaga e Faatotonugalemu ia Keriso.” O a ni mea ua latou aoaoina e uiga i le taua o le faatotonugalemu o o latou olaga i le Faaola mai le gaoioiga ma le lauga? Fai atu i tagata o le vasega e galulue i ni paga e sue se tala i le lauga e faatino ai faamanuiaga tatou te maua a o tatou faatotonugalemu o tatou olaga ia Keriso. O a ni mea latou te faia ia sili atu ai ona faatotonugalemu o latou olaga i le Faaola ma Ana aoaoga?
Faasoa atu i tamaitai talavou ia uiga faaKeriso o loo lisiina atu i le mataupu e 6 o leTala'i La'u Talalelei,“Pe Faapefea Ona Ou Atiina Ae Uiga Faakeriso”; Fai atu i tamaitai talavou e filifili se tasi o nei uiga lea latou te mananao e atiina ae. Tuu atu ia i latou se taimi i le vasega e suesue ai i le uiga paia na latou filifilia, i le mulimuli ai i fautuaga o i lalo o le ulutala “Atiina ae o Uiga faaKeriso” i itulau 131–32 o le Talai La’u Talalelei. Uunaia i latou e faaauau pea ona suesue i la latou uiga paia lea na filifili i le aluga o le vaiaso a sau ma faasoa atu ni malamalamaaga mai a latou suesuega i le amataga o le lesona o le vaiaso e sosoo ai.
Fai atu i tamaitai talavou e faitau e le tagata lava ia se tasi o mau o loo fautuaina mai i lenei otootoga, faailoga upu ma fuaitau lea e faaalia mai ai nisi o uiga mama o le Faaola. Uunaia i latou e tagai mo nei uiga mama faapea ma nisi ao latou matamata i le vitio “Uiga faaKeriso.” Tuu atu ia i latou se taimi e faasoa mai ai o latou lagona e uiga i le Faaola ma uiga mama sa Ia faaalia. E faapefea ona latou atiina ae nei uiga mama i o latou lava olaga? E mafai foi ona latou faasoa mai ni faataitaiga a tagata latou te iloa o e latou te lagona e faataitaia nisi o nei uiga mama faaKeriso.

2:54

Fai i tamaitai talavou e faasoa mai mea sa latou aoaoina i le aso. O a ni o latou lagona po o ni uunaiga o i ai? Pe ua latou malamalama i le auala e mafai ai ona avea i latou ma faiaoga e sili atu ona lelei? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Aoao atu se lesona i le afiafi faaleaiga e faatatau i uiga o le Faaola e faaaoga ai se tasi o gaoioiga mai lenei otootoga.
Tuuina atu a latou molimau e uiga i le Faaola i se uo po o se tagata o le aiga po o le sauniga anapogi ma molimau.

Faasoa atu ma tamaitai talavou se mea o le a latou suesueina i le vaiaso e sosoo ai. O a ni o latou manatu ma fesili e uiga i lenei autu? O le a se mea e mafai ona latou faia e sauni ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso e sosoo ai.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.