Aisea e taua ai ona loto faafetai?

E finagalo le Alii ia e maua se agaga o le loto faafetai i mea uma e te faia ma tautala ai. Pe a tatou loto faafetai, o le a tatou maua le fiafiaga sili atu ma le faamalieina i o tatou olaga. O le a tatou iloaina le uunaiga ma faamanuiaga a le Alii.

Saunia oe lava ia faaleagaga

O a nisi o mea ua matua sili ona e loto faafetai ai? Ua faapefea ona faateleina e le loto faafetai lou fiafia?

O le a se mea e faia e tamaitai talavou e atiina ae ai se uiga o le faafetai? E faapefea e le mauaina o se uiga o le loto faafetai ona avea ma se faamanuiaga ia i latou i le taimi nei ma le lumanai?

O a mau ma nisi punaoa o le a fesoasoani i tamaitai talavou ina ia malamalama i le taua o le loto faafetai faapea ai ma faamanuiaga o le a oo mai i le ola ai ma le loto faafetai?

Salamo 92:1; 100; Alema 26:8 (Faaaliga o le vivii atu ma le agaga faafetai)

Luka 17:11–19 (O lepela e sefulu)

Alema 37:37; MF&F 46:32 (Ua poloaiina i tatou e avatu le faafetai)

MF&F 59:15–21 (O le le loto faafetai e faanoanoa ai le Atua)

MF&F 78:19 (O faamanuiaga o le loto faafetai)

Henry B. Eyring, “Lotofaafetai i le Aso Sapati,” Ensign po o le Liahona, Nov. 2016, 99-102

Dieter F. Uchtdorf, “Ia Lotofaafetai i Soo Se Tulaga,” Ensign po o le Liahona, Me 2014, 70-77

Russell M. Nelson, “Ia Faafetaia le Atua,” Ensign po o le Liahona, Me 2012, 77–79; tagai foi i le vitio “Ave Le Faafetai”

1:29

“Loto Faafetai,” Mo Le Malosi o le Autalavou (2011), 18

“Ua Sili Oe,”Viiga, nu. 46; “Faitau Ou Manuia,” Viiga, nu. 151

Aoao atu i le ala a le Faaola

Na silafia e le Faaola Ona soo, ma sa Ia silafia le tagata na mafai ona avea ai i latou. O lenei malamalama sa aafia ai le auala na Ia aoao ai i latou. E mafai faapefea ona e iloa ia tamaitai talavou i lau vasega? E faapefea i le iloaina o mea latou te fiafia i ai, manaoga, ma luitau ona faatosina ai le auala e te aoao atu ai i latou?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Atofa atu ia tofu tamaitai talavou ma se mataitusi o le alafapeta, ma tuu atu i le vasega se minute se tasi e lisi uma ai ia faamanuiaga latou te mafaufau i ai e amata i a latou mataitusi. Aisea tatou te le amanaia ai ia faamanuiaga e foliga itiiti na tuuina mai e le Alii ia i tatou? Fai atu i se tagata o le vasega e faitau mai le Mataupu Faavae ma Feagaiga 46:32 po o le 59:21. E mafai faapefea ona tatou faaalia atili le loto faafetai mo “soo se faamanuiaga ua faamanuiaina ai i [tatou]”?
Tusi i le laupapa, “O le tele o lo tatou ________________________ o se fua lea o lo tatou alofa ia te Ia.” Uunaia ia tamaitai talavou e faalogo i upu lea e faamaea ai le fuaiupu ao latou matamata i le vitio puupuu “Ave Le Faafetai.” Valaaulia ia tamaitai talavou e faasoa mai ni faataitaiga o tagata i o latou olaga o e o faaalia le alofa mo le Faaola e ala i le loto faafetai.

1:29

Aoao faatasi

O gaoioiga taitasi o loo i lalo o le a fesoasoani i tamaitai talavou e malamalama ai i le taua o le faamaoni. I le mulimuli ai i le Agaga, filifili se tasi pe sili atu e aoga mo lau vasega:

Tusi fesili nei i le laupapa: Aisea e taua ai le lotofaafetai? O le a se mea e mafai ona ou faia, aemaise lava i le aso Sapati, ina ia maua atili ai le lotofaafetai? Valaaulia tamaitai talavou taitasi e filifili se tasi o fesili ma tagai mo tali i le saunoaga a Peresitene Henry B. Eyring “Lotofaafetai i le Aso Sapati.” A maea ona latou faia, tuu atu ia i latou e faasoa mai mea sa latou mauaina, ma fai atu ia i latou e fai se fuafuaga e faatino ai se tasi o fautuaga a Peresitene Eyring.
Valaaulia tamaitai talavou taitasi e faitau le Luka 17:11–19 ma faasoa mai pe aisea latou te manatu ai e lei faafetai ia lepela e toaiva o le toasefulu i le Faaola. O a nisi mea e ono taofia ai i tatou mai le faaalia o le loto faafetai? Valaaulia ia tamaitai talavou e mafaufau e uiga i se faamanuiaga sa latou mauaina lea latou te lei faaalia ai le loto faafetai talafeagai. Aisea e taua ai le faaalia o le faafetai? O le a se mea o le a latou faia e faaalia ai le loto faafetai?
Faitau faatasi o se vasega ia fuaitau o mau ma usu ni pese e vivii atu ai ma faafetai, e pei o na o loo lisiina atu i lenei otootoga. Valaaulia ia tamaitai talavou e vaavaai mo fuaitau e uiga i mea lea latou te lagonaina ai foi le loto faafetai po o le vivii atu. Valaaulia i latou e faasoa mai ia fuaitau sa latou filifilia, faamatala mai pe aisea na latou filifilia ai, ma faailoa mai o latou lava lagona o le loto faafetai.
Faamatala pe faitau foi le tala o le ia mai le lauga a Elder Russell M. Nelson “Ia Faafetaia le Atua.” Fesili atu i tamaitai talavou pe sa i ai se taimi sa latou fesoasoani atu ai i nisi (e pei o le tagata tausimea o i le tala) e aunoa ma le tuuina mai o se faafetai. Vaevae le vaega o totoe o le lauga i ulutala o vaega, ma atofa atu ia tofu le tamaitai talavou ma se vaega e faitau. Fai atu i tamaitai talavou e tusi i lalo se mea sa latou aoaoina e uiga i le loto faafetai ma se mau e faatatau i le mea sa latou aoaoina (e mafai ona latou faaaogaina le Taiala o Tusitusiga Paia). Tuu atu i tamaitai talavou e faasoa mai mea sa latou tusia i lalo ma faamatala se taimi sa latou lagona ai le loto faafetai mo se tasi o meaalofa a le Atua.
Totofi ia tamaitai talavou taitasi e suesue se vaega o le saunoaga a Peresitene Dieter F. Uchtdorf “Ia Lotofaafetai i Soo Se Tulaga,” e aunoa ma le tuuina atu ia i latou o autu o a latou vaega. Fai atu i ai e tusi a latou lava autu—fuaitau po o fuaiupu latou te lagona o aotele mai ai mea sa latou suesueina. Fai atu ia i latou e faasoa mai a latou autu ma soo se mea sa latou aoao mai i le fautuaga a Peresitene Uchtdorf e uiga i le lotofaafetai. O le a se mea e mafai ona latou faia e atiina ae ai le uiga o le lotofaafetai o loo famatalaina e Peresitene Uchtdorf?

Fai i tamaitai talavou e faasoa mai mea sa latou aoaoina i le aso. O a ni o latou lagona po o ni uunaiga? Pe ua latou malamalama i le taua o le loto faafetai? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Ofo atu se tatalo mo na o le loto faafetai, faafetai atu i le Tama Faalelagi mo faamanuiaga ma aua nei ole atu mo se mea.
Vaavaai mo avanoa e faaalia ai le loto faafetai i le aluga o le vaiaso.

Faasoa atu ma tamaitai talavou se mea o le a latou suesueina i le vaiaso e sosoo ai. O a ni o latou manatu ma fesili e uiga i lenei autu? O le a se mea e mafai ona latou faia e sauni ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso e sosoo ai.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.