E mafai faapefea ona ou aoao ina ia onosai atili?

O le onosai o le malosiaga lea e tumau ai i mea e tuai ona oo mai, faafitauli, mea faafeagai, po o puapuaga e aunoa ma le ita, le fiafia, po o le atuatuvale. E mafai ona tatou atinaeina le onosai e ala i le saili atu e fai le finagalo o le Atua ma taliaina Lana taimi, faatuatuaina o le a Ia faataunuuina Ana folafolaga uma ia i tatou. Ao tatou aoao ia onosai i nai mea iti, ua tatou saunia i tatou lava e fetaiai ma tofotofoga tetele atu ma le onosai.

Saunia oe lava ia faaleagaga

O a ni aafiaga na aoaoina ai oe e uiga i le onosai (e aofia uma ai ni luitau tetele ma itiiti le matautia o ni aafiaga)? O le a se mea na fesoasoani ia te oe ina ia onosai i le aluga o ni vaitaimi faigata?

O a ni faatosinaga o feagai ai ma tamaitai talavou i le lalolagi i lenei vaitaimi lea e ono taitai ai i latou ina ia le maua le onosai? Mata o faapefea ona e fesoasoani ia i latou ina ia aoao le onosai ma le faalagolago i taimi ma folafolaga a le Alii? O a ni faamanuiaga o le a oo mai ia i latou pe afai latou te onosai?

O a mau ma lauga o le a fesoasoani i tamaitai talavou e mananao ai ina ia atiina ae le uiga faaKeriso o le onosai?

Iopu 1; 19:25–26 (O le faataitaiga a Iopu)

Salamo 37:7–9; Eperu 10:35–36; Mosaea 23:21–22; Alema 26:27; MF&F 24:8 (E oo mai faamanuiaga ia i latou o e onosai)

Roma 5:3; Iakopo 1:3–4 (O tofotofoga o lo tatou faatuatua e atiina ae ai le onosai)

Mosaea 3:19 (O le tuueseina o le tagata natura e aofia ai le mauaina o le onosai)

Dieter F. Uchtdorf, “Faaauau i le Onosai,” Ensign po o le Liahona, Me 2010, 56–59; tagai foi i le vitio “Faaauau i le Onosai”

2:46

Robert D. Hales, “Faatalitali i le Alii: Ia Faia Lou Finagalo,” Ensign po o le Liahona, Nov. 2011, 71–74

Robert C. Oaks, “O Le Mana o le Onosai,” Ensign po o le Liahona, Nov. 2006, 15–17

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Faitau le palakalafa i le amataga o le lesona, ma valaaulia ia tamaitai talavou e mafaufau i se tagata mai tusitusiga paia na avea ma se faataitaiga o le onosai (e pei o Iakopo ma Rasela [Kenese 29:10–30], Hana [1 Samuelu 1:2–20], po o le fafine na maua i le puna toto [tagai i le Mataio 9:20–22]). Ona fai atu lea ia i latou e faasoa mai se mea na aoao atu e nei faataitaiga ia i latou e uiga i le onosai.
Faitau le palakalafa i le amataga o lenei otootoga, ma valaaulia ia tamaitai talavou e faasoa mai ni tulaga i o latou olaga lea atonu na manaomia ai le onosai (e pei o le olaga faaleaiga, aoga ma le galuega, faaipoipoga, po o le tulaga faatina). Faaali atu ni mea faitino lea e suitalaga i vaitau o lou olaga lea na manaomia ai lou faaalia o le onosai (mo se faataitaiga, o se tipiloma i le kolisi, se mama faaipoipo, po o se pine faafaifeautalai). Tuu atu i tamaitai talavou e mate mai po o le a se faiā o nei mea faitino i le onosai, ona faasoa mai lea o ni aafiaga sa e mauaina.

Aoao faatasi

O gaoioiga taitasi o loo i lalo o le a fesoasoani i tamaitai talavou e malamalama ai i le taua o le faamaoni. I le mulimuli ai i le Agaga, filifili se tasi pe sili atu e aoga mo lau vasega:

Tusi i le laupapa ni nai fesili e uiga ia Iopu (O le a le ituaiga tagata na i ai Iopu? O le a se mea na tofotofo ai lona onosai? O le a se mea na ia aoao ai i tatou e uiga i le onosai?) Faitau faatasi o se vasega le Iopu 1; 19:25–26, ma talanoa i tali o fesili. O le a se mea o aoaoina e tamaitai talavou mai le faataitaiga a Iopu lea e ono fesoasoani ia i latou ina ia maua atili le onosai? Na faapefea ona fesoasoani lona faatuatua i le Faaola na te fetaiai ai ma ona tofotofoga ma le onosai?
Faasoa atu le tala o se tama onosai mai le lauga a Elder Robert C. Oaks “O Le Mana o le Onosai,” ma valaaulia ia tamaitai talavou e faasoa mai soo se latou tala e uiga i le onosai. Tuu atu ia tofu tamaitai talavou ma se vaega itiiti o lenei lauga lea atonu e te manatu o le a aoga. Valaaulia o ia e faitau ma aotele mai i le vasega. O le a se mea na aoaoina e tamaitai talavou mai lenei lauga lea na uunaia ai i latou ina ia faalagolago atu i le Alii ma Lana taimi? O a nisi mafuaaga tatou te le onosai ai? E mafai faapefea ona tatou manumalo mai lenei amioga?
Faitau faatasi o se vasega ia palakalafa 9 e oo i le 17 o le lauga a Elder Robert D. Hales “Faatalitali i le Alii: Ia Faia Lou Finagalo,” vaavaai mo tali i le fesili “O le a le uiga o le faatalitali i le Alii?” Mo nisi malamalamaaga, valaaulia ia tamaitai talavou e sue ia mau ia na sii mai e Elder Hales ma faasoa atu soo se mea na aoao mai e nei mau e uiga i le onosai. E faapefea ona faaaoga e tamaitai talavou ia upu a Elder Hales po o mau nei e fesoasoani ai i se tasi atonu ua leai se faamoemoe?
Tusi i le laupapa ia ulutala “Onosai” ma le “Le Onosai”. Tuu atu ia tofu tamaitai talavou ma se tasi o mau e faatatau i le onosai o loo fautuaina atu i lenei otootoga. Valaaulia le vasega e auauai i le faitauina o a latou mau ua atofaina atu, talanoaina lana savali, ma tusi i le laupapa ni faamanuiaga o le onosai po o taunuuga o le onosai na aoao atu i le mau. O a ni faamanuiaga faaopoopo ma ni taunuuga e mafai ona latou faaopoopoina i a latou lisi? Valaaulia ia tamaitai talavou e tusi i se fasi pepa se tulaga e ono manaomia ai le onosai (fautuaina i latou e aua le na o le faaaofia ai o faafitauli tetele ae ia aofia ai foi ma faaletonu o aso taitasi). Fai atu ia i latou e fesuiai pepa ma le isi tamaitai talavou, tusi i lalo se tali o le a faaalia ai le onosai, ona faasoa atu lea i le vasega le mea sa latou tusiaina.
Faaali le vitio “Faaauau i le Onosai,” ma fai i tamaitai talavou e talanoa i mea sa latou aoaoina mai le vitio e uiga i le onosai . O a nisi tulaga o le a oo ai ia tamaitai talavou i le le onosai? Valaaulia ia tamaitai talavou taitasi e faitau se vaega e tasi mai le lauga a Peresitene Dieter F. Uchtdorf “Faaauau i le Onosai,” ma fai atu ia te ia e aotele mai i le vasega atoa mea sa ia aoaoina mai le vaega sa ia faitauina. E mafai faapefea e le fautuaga a Peresitene Uchtdorf ona fesoasoani i tamaitai talavou ina ia maua atili le onosai?

2:46

Fai i tamaitai talavou e faasoa mai mea sa latou aoaoina i le aso. O a ni o latou lagona po o ni uunaiga? O latou malamalama i le ala ina ia mafai ai ona onosai atili? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Faaali atili le onosai ma o latou aiga i le vaiaso a sau.
Fai se lisi o ni auala faatopetope e fesoasoani e pulea ai lo latou le onosai i se tulaga faapopolevale, e pei o le faitau e oo i le 10 po o le usuina o se pese.

Faasoa atu ma tamaitai talavou se mea o le a latou suesueina i le vaiaso e sosoo ai. O a ni o latou manatu ma fesili e uiga i lenei autu? O le a se mea e mafai ona latou faia e sauni ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso e sosoo ai.