E mafai faapefea ona ou auai i le faanatinatiina o le galuega a le Alii?

Ua tatou ola i aso e gata ai, ua faataunuu ai e le Alii Ana folafolaga: “Faauta, o le a Ou faanatinatiina la’u galuega i lona taimi” (MF&F 88:73). Ua i ai se matafaioi taua a tamaitai talavou i lenei galuega. E mafai ona tatou auai e ala i le valaau atu i tagata uma ia o mai ia Keriso e ala i le faasoaina atu o le talalelei, tuuina atu o le auaunaga faaKeriso, faamalosia o tagata fou, laveaiina o e ua le toaaga mai, ma faia sauniga faaola mo e ua maliliu.

Saunia oe lava ia faaleagaga

O le a se faamaoniga na e vaaia o loo faanatinatiina e le Alii Lana galuega i o tatou aso? O a ni aafiaga e mafai ona e faasoa mai e ono uunaia ai tamaitai talavou ina ia avea ma tagata auai ma le mataalia i lenei galuega?

O a taleni ma meaalofa o e matauina i tamaitai talavou e mafai ona matua lelei ai i le faaalualuina i luma o le galuega a le Alii? O a ni mea ua uma ona latou faia e auai ai i le galuega?

O a ni mau ma nisi punaoa o le a uunaia ia tamaitai talavou ina ia auai i le faanatinatiina o le galuega a le Alii?

Isaia 11:9; 1 Nifae 13:37; 14:14 (Valoaga e uiga i le galuega a le Alii)

Mosaea 28:1–3 (Ua mananao atalii o Mosaea e talai le talalelei)

Mose 1:39 (Ua faamalamalama mai e le Atua Lana galuega)

MF&F 138:56 (O fanau faamaoni a le Atua na saunia i le muai olaga ina ia galulue i le tovine a le Alii)

Bonnie L. Oscarson, “Tutula’i A’e i le Malolosi, Uso e i Siona,” Ensign po o le Liahona, Nov. 2016, 12–14

Carol F. McConkie, “Ua I Ai Iinei e Auauna Atu mo se Mafuaaga Amiotonu,” Ensign po o le Liahona, Nov. 2015, 12–14

Linda K. Burton, “Manaomia: Lima ma Loto e Faanatinati le Galuega,” Ensign po o le Liahona, Me 2014, 122-24

Faanatinatiina o le Galuega o le Faaolataga

Aoao atu i le ala a le Faaola

Na fai atu e le Faaola fesili na uunaia ai Ona soo e mafaufau ma faalogo lelei. Na latou iloa e alofa o Ia ia te i latou, ma na latou lagonaina le saogalemu e faasoa atu o latou manatu ma lagona patino. A o e faalogo ma le alofa ma faaali atu le naunau i tali ma manatu o tamaitai talavou, o le a e fesoasoani ia i latou e lagonaina le alofa o le Faaola.

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Tagai i isi manatu e aoao mai ai ma aoao atu .

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

• Tusi le upu faanatinati i le laupapa, ma fai atu i se tasi e faitau le Mataupu Faavae ma Feagaiga 88:73. Fai atu i tamaitai talavou e talanoaina po o le a le uiga o le faanatinatiina o se mea (afai e manaomia, e mafai ona latou sueina le upu i se lolomifefiloi). Fesili atu i tamaitai talavou pe aisea latou te manatu ai e manaomia ona faanatinatiina le galuega a le Alii i o tatou aso.

• Tusi i luga o le laupapa, “O le a le galuega a le Alii?” Valaaulia tamaitai talavou e o mai e tusi ni tali talafeagai i luga o le laupapa i le fesili lenei. Uunaia i latou e faaopoopo i lenei lisi ao latou aoao nisi mea i le aluga o lenei lesona.

Aoao faatasi

Tagai i isi manatu e aoao mai ai ma aoao atu.

O gaoioiga taitasi nei o le a fesoasoani i tamaitai talavou ia iloa le auala e mafai ai ona latou auai ao faanatinatiina e le Alii Lana galuega. I le mulimuli ai i le taitaiga a le Agaga, filifili se tasi pe sili atu e aoga mo lau vasega:

• I ni nai aso o i luma, fai atu i tamaitai talavou e asiasi i le vaega o le Faanatinatiina o le Galuega o le Faaolataga i le LDS.org ma iloilo nisi o punaoa iina. Valaaulia i latou e o mai saunia i le vasega e faasoa mai se mea mai le saite lea na uunaia i latou ia auai atili atoatoa i le galuega a le Alii.

• Valaaulia tamaitai talavou taitasi e faitau (taitoatasi pe i ni vaega toalaiti) se tasi o tala i le lauga a Sister Carol F. McConkie “Ua I Ai Iinei e Auauna Atu mo se Mafuaaga Amiotonu.” E mafai foi ona e valaauliaina se tagata o le uarota faatoa liliu mai i le Ekalesia pe ua toe toaga mai talu ai nei e faasoa mai ni ona aafiaga. Afai e faitau e tamaitai talavou ia lauga, fai atu ia i latou e aotele mai ia tala mo le vaega atoa o le vasega ma talanoa i mea sa latou aoaoina i le auai i le galuega a le Alii. O le a se mea o aoao mai ia i tatou e nei tala i le auala e auai ai i le galuega o le faaolataga? O a ni auala ua tatou auai nei?

• Faitau faatasi le lisi o faailoga o le “manaomia le fesoasoani” i le lauga a Sister Linda K. Burton “Manaomia: Lima ma Loto e Faanatinati le Galuega.” Fai atu i tamaitai talavou e piki mai ni mea mai le lisi ma fai ni faailoga lea e valaauliaina tagata ina ia auai i na vaega o le galuega a le Alii. Uunaia i latou e faaaofia i a latou faailoga nisi o agavaa mo le faia o lenei galuega ma faamanuiaga e oo mai ai. Fai atu ia i latou e faasoa mai a latou faailoga ma faasoa mai ni aafiaga sa latou mauaina i le auai atu i le galuega a le Alii.

Fai i tamaitai talavou e faasoa mai mea sa latou aoaoina i le aso. O a ni o latou lagona po o ni uunaiga? O latou malamalama i le auala e mafai ai ona latou auai i le faanatinatiina o le galuega a le Alii? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Motugaafa faafaiaoga

“E mafai ona e faaalia o loo e faalogo atu e ala lea i lou faailoa atu o se foliga o le naunau. E mafai ona e vaai i le tagata o loo tautala nai lo anomea o lau lesona po o nisi mea o loo i totonu o le potu. E mafai ona e uunaia le tagata o loo tautala e faauma ona manatu e aunoa ma le faalavelaveina. E mafai ona e aloese mai le faasalaveia o talanoaga ae lei taitai i ni fautuaga po o ni faaiuga” (O Le Aoao Atu, E Leai Se Isi Valaauga E Sili Ai [1999], 69).

Ola i mea ua tatou aoaoina

Tagai i isi manatu e aoao mai ai ma aoao atu.

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

• Valaaulia se uo i se gaoioiga o le Mutuale po o se isi gaoioiga a le Ekalesia.

• Faasoa atu a latou molimau e uiga i le talalelei i se uo po o se tasi o le aiga i le vaiaso a sau.

Faasoa atu ma tamaitai talavou se mea o le a latou suesueina i le vaiaso e sosoo ai. O a ni o latou manatu ma fesili e uiga i lenei autu? O le a se mea e mafai ona latou faia e sauni ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso e sosoo ai.