O le a le Siona?

Ua poloaiina i tatou e le Alii ia “saili e aumai i luma ma faatu le faamoemoe o Siona” (MF&F 6:6). Siona e faatatau i tagata o le Alii o e ua tasi le loto ma tasi le mafaufau ma ua nonofo faatasi i le amiotonu. E mafai ona tatou faatuina Siona e ala i le fausia o le lotogatasi ma le malosi faaleagaga i o tatou aiga, uarota po o paranesi, ma alalafaga.

Saunia oe lava ia faaleagaga

E faapefea ona e tauivi ia ola i mataupu faavae o Siona i lou olaga ma le aiga? O anafea na e lagonaina ai se agaga o le lotogatasi i se uarota po o i lou aiga?

Pe o lotogatasi tamaitai talavou i le avea ai o se usoga a tamaitai? O le a se mea e mafai ona latou faia e faatu ai Siona? O a papupuni atonu o le a latou fetaiai?

Ia suesue ma le agaga tatalo ia mau ma punaoa nei. O le a se mea e te manatu o le a fesoasoani i tamaitai talavou e aoao ai pe faapefea ona faatu le faamoemoe o Siona?

Mosaea 18:21; MF&F 38:26–27 (E tatau ona tatou saili le lotogatasi)

1 Nifae 13:37; MF&F 6:6 (Saili ia aumai i luma Siona)

4 Nifae 1:1–18 (Ua nonofo faatasi sa Nifae ma sa Lamana i se tulaga faa-Siona)

MF& 97:21; Mose 7:18 (O le a le Siona?)

Benjamín De Hoyos, “Ina ia Avea Lo Tatou Malamalama ma Tagavai mo Atunuu,” Ensign po o le Liahona, Me 2017, 124–26

Jeffrey R. Holland, “O Pese e Usuina ma Lē Usuina,” Ensign po o le Liahona, Me 2014, 49–51

D. Todd Christofferson, “O Mai i Siona, ”Ensign po o le Liahona, Nov. 2008, 37–40

Bonnie L. Oscarson, “Le Usoga: Oka, so Tatou Manaomiaina o le Tasi ma le Isi,” Ensign po o le Liahona, Me 2014, 119-121

“Siona,” Faamaoni i le Faatuatua (2004), 158–59

“Galulue e Pei o Ni Uso i Siona,”Viiga nu. 196

Aoao atu i le ala a le Faaola

I nofoaga uma lava, na avea le Faaola ma se faataitaiga ma se aoao i Ona soo. Na Ia aoaoina i latou e ola i le ala na Ia soifua ai. O le a faapefea e lau faataitaiga o le alofa ma le lotogatasi ona aafia manao o tamaitai talavou ia tauivi mo Siona?

Vitio: “Matou te Faatinoina”

Matamata atili

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Tagai i isi manatu e aoao mai ma aoao atu ai.

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

• Tusi “Siona” i le laupapa, ma fai atu i tamaitai talavou e lisi upu e oo mai i le mafaufau pe a latou mafaufau i Siona. Valaaulia i latou e faitau itulau 158–59 o le Faamaoni i le Faatuatua e faaopoopo i la latou faauigaga. O le a le tatou matafaioi i le avea ma tamaitai i le fausiaina o Siona?

• Usu faatasi le fuaiupu muamua o le “Galulue e Pei o ni Uso i Siona” (Viiga, nu. 196). Fai atu i tamaitai talavou e sue upu ma fuaitau i le viiga o loo aoao mai e uiga i Siona. Fautuaina tamaitai talavou e faasoa mai lo latou talitonuga i a latou matafaioi i le faatuina o se aiga,uarota, po o se alalafaga e faapei o Siona.

Aoao faatasi

Tagai i isi manatu e aoao mai ai ma aoao atu.

O gaoioiga taitasi nei o le a fesoasoani i tamaitai talavou e malamalama ai po o le a le Siona. I le mulimuli ai i le uunaiaga a le Agaga, filifili se tasi pe sili atu e aoga mo lau vasega:

• O le a le mea na aoao mai e Elder Jeffrey R. Holland i lana saunoaga “O Pese e Usuina ma Lē Usuina” e uiga i le auala e pei ai le Ekalesia o se aufaipese? Ina ia fesoasoani i tamaitai talavou ia malamalama i le faataoto a Elder Holland, valaaulia se tagata e toatasi pe sili atu sa pepese i se aufaipese e faasoa mai a latou manatu e uiga i le pe faapefea e le pepese ai i se aufaipese ona fesoasoani ia i latou e malamalama ai i le manaomia mo vaega o mea eseese i le malo o le Atua. E mafai faapefea ona tatou fausia Siona e ala i le faia “o se avanoa” i a tatou vasega, i a tatou vaega o Tamaitai Talavou, po o i totonu o uarota mo tagata e mafai ona lagona le le tutusa ma i tatou? O le a le fautuaga na tuuina atu e Elder Holland lea e mafai ona fesoasoani ia i tatou e faia lenei mea? 

• Sa fai atu e Elder Benjamín De Hoyos le fesili lenei i lana lauga “Ina ia Avea Lo Tatou Malamalama ma Tagavai mo Atunuu”: “O a nisi o mea taua e faia i lenei taimi matagofie o le atiina ae o Siona ma le faapotopotoina o Isaraelu?” Ina ia fesoasoani i tamaitai talavou e saili tali i lenei fesili, e mafai ona latou faitaua parakalafa mulimuli e 11 o le lauga a Elder De Hoyos. E mafai faapefea ona tatou atiina ae Siona i auala e tolu na ia faasoa mai? 

• Faitau faatasi o se vasega le MF&F 38:27 ma le Mose 7:18. O le a le uiga o le tasi o le loto ma le mafaufau? Aisea e matua taua ai le lotogatasi o se vaega o le fausiaina o Siona? Vaevae se tasi o lauga o le konafesi o lenei otootoga i tamaitai talavou, ma fai atu ia i latou e sue ni mataupu faavae o le a mafai ona fesoasoani ia i tatou e ausia atili ai le lotogatasi i o tatou aiga ma le avea ai o se vasega a Tamaitai Talavou. Valaaulia tamaitai talavou e tusi mataupu faavae latou te maua i le laupapa. O a ni papupuni e taofia tamaitai talavou mai le mauaina o le lotogatasi? E mafai faapefea ona latou manumalo i nei papupuni? Fautuaina tamaitai talavou e faatutu ni sini patino e faaaoga ai se tasi o nei mataupu faavae ia faateleina ai le lotogatasi i o latou aiga. Galulue faatasi e faatu se sini faapena ina ia sili atu le lotogatasi i le avea ai o se vasega.

• Faitau faatasi o se vasega palakalafa muamua e lima o le lauga a Elder D. Todd Christofferson “O Mai i Siona,” ma vaai mo tali i le fesili “O le a le uiga o le sosolaese mai Papelonia ae o mai i Siona?” Vaevae le vasega i ni vaega se tolu, ma tofi vaega taitasi e faitau le vaega “Lotogatasi,” “Paia,” po o le “Tausia o e Matitiva” o le lauga. Valaaulia i latou e talanoaina i a latou vaega mea e mafai ona latou faia e faaaoga ai nei mataupu faavae e fausia ai Siona i o latou aiga o i ai nei ma le lumanai. Fai atu ia i latou e faasoa mai mea na latou talanoaina i le isi vaega o le vasega.

• Vaevae le vasega i ni vaega se lua. Fai atu i se vaega e tasi e faitau ma talanoaina le Mosaea 18:21 ma le Mataupu Faavae ma Feagaiga 97:21, ma fai atu i le isi vaega e faitau ma talanoaina le Mataupu Faavae ma Feagaiga 38:27 ma le Mose 7:18. Valaaulia ia vaega e fuafua se lesona faatino e mafai ona latou faaaogaina e aoao atu ai le vaega o totoe o le vasega i mea na latou aoaoina mai i mau (a latou manaomia le fesoasoani, faasoa atu ma i latou “Faaaoga Tala ma Faataitaiga e Aoao Atu ai Mataupu Faavae o le Talalelei” i le itulau 22 o le Aoao Atu i le Ala a le Faaola). Fai atu ia i latou e faasoa mai o latou manatu i le tasi ma le isi. O a mea ua latou aoaoina mai nei mau e mafai ona fesoasoani ia i latou e fausia ai Siona i o latou aiga, a latou vasega, ma a latou uarota po o paranesi?

• Valaaulia tamaitai talavou e faitau le 4 Nifae 1:1–18 ma lisi i le laupapa upu po o fuaitau na e faamatalaina se nuu e pei o Siona na faatuina e sa Nifae ma sa Lamana ina ua mavae le afio mai o Keriso. Valaaulia i latou e fai se isi lisi o mea faapitoa e mafai ona latou faia o ni tagata taitoatasi po o se vasega ina ia ola ai i nei mataupu faavae ma faamalosia isi ia faia faapea.

Fai i tamaitai talavou e faasoa mai mea sa latou aoaoina i le aso. O a ni o latou lagona po o ni uunaiga? Pe ua latou malamalama po o le a le Siona? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“E le tatau ona tatou faauigaina ia faamatalaga i taitai o le Ekalesia e aunoa ma le faamautuina o le faapogai o faamatalaga. Afai tatou te sii maia mau, e tatau ona tatou mautinoa o lo tatou faaaogaina o na mau e ogatasi lea ma la latou matalalaga” (O Le Aoao Atu, E Leai Se Isi Valaauga E Sili Ai [1999], 55).

Ola i mea ua tatou aoaoina

Tagai i isi manatu e aoao mai ma aoao atu ai .

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

• Faamalosia se va ma se tagata o le aiga po o se uo (tagai i mea e fai o le tulaga faatauaina o le Amio Atua 3 i le Alualu i Luma o le Tagata Lava Ia).

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.