E mafai faapefea ona ou valaaulia tagata uma e o mai ia Keriso?

Ua tofu tagata o le Ekalesia ma se tiutetauave e fesoasoani ai i isi ia o mai ia Keriso ma maua faamanuiaga o Lana talalelei toefuataiina. O a tatou molimau o le talalelei ma a tatou faataitaiga lelei e mafai ona uunaia ai a tatou uo ma tuaoi ia mananao e aoao atili e uiga i le Faaola ma Lana talalelei.

Saunia oe lava ia faaleagaga

O a ni aafiaga sa e mauaina i le valaauliaina o isi e o mai ia Keriso? O a ni auala lelei ua e maua e talanoa ai e uiga i le talalelei i isi?

O a ni avanoa o i ai i tamaitai talavou e valaaulia ai isi e o mai ia Keriso? O a aafiaga na latou maua e mafai ona latou faasoa atu i le tasi ma le isi?

O a ni mau ma nisi punaoa o le a uunaia ia tamaitai talavou ina ia valaaulia isi e o mai ia Keriso?

1 Timoteo 4:12 (Fai ma faaa’oa’o i e ua faatuatua)

1 Peteru 3:15 (Ia saunia e tali atu ia i latou e fesili mai e uiga i o tatou talitonuga)

Mosaea 18:9 (Ua tatou naunau e tutu o ni molimau a le Atua)

MF&F 28:16; 100:3–8 (Afai tatou te tatala o tatou gutu, o le a faatumuina i upu e fai atu)

MF&F 84:85 (Afai e teu i o tatou mafaufau le upu, o mea e tatau ona tatou fai atu o le a tuuina mai ia i tatou)

Neil L. Andersen, “O Se Molimau a le Atua,” Ensign po o le Liahona, Nov. 2016, 35–38

Dallin H. Oaks, “Faasoaina Atu o le Talalelei Toefuataiina,” Ensign po o le Liahona, Nov. 2016, 57–60

David A. Bednar, “O Mai Ia Ina Matamata,” Ensign po o le Liahona, Nov. 2014, 107-10

“Galuega Faafaifeautalai,” i le mataupu e 5 o le Talai Lau Talalelei (2004), 88

Vitio: “Ona ua Maua Tele”

3:25

Aoao atu i le ala a le Faaola

Na valaaulia e le Faaola i latou na mulimuli ia te Ia e molimau atu. E mafai faapefea ona e fesoasoani i tamaitai talavou ia sili atu le toafimalie i le molimauina atu o a latou talitonuga i e o loo siomia i latou?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Tauloto faatasi o se vasega le mau a Tamaitai Talavou. Fai i tamaitai talavou pe faapefea ona latou tali i se uo o se isi lotu e fesili mai, “O le a le uiga pe a e fai mai, ‘O le a matou tutu o ni molimau a le Atua’?”
Valaaulia tamaitai talavou e faaali mai ata o faifeautalai mai o latou aiga (po o le tagai Tusi Ata o le Talalelei, 109–10). Fai ia i latou e fai se lisi o uiga ma amioga e manaomia e se tagata ia avea ai ma se faifeautalai. O fea o nei mea e mafai e tamaitai talavou ona maua i le taimi nei? Fesoasoani ia i latou ia malamalama e le tau manaomia ona valaaulia i latou e avea mai ni faifeautalai ina ia faasoa atu ai le talalelei.

Aoao faatasi

O gaoioiga taitasi nei e mafai ona fesoasoani i tamaitai talavou e aoao ai le ala e valaaulia ai isi e o mai ia Keriso. I le mulimuli ai i le taitaiga a le Agaga, filifili se tasi po o le sili atu o le a sili ona aoga i lau vasega:

O se vasega, ia iloilo ni mea se lua ua lisiina atu e mafai ona faia e faasoa atu ai le talalelei i le saunoaga a Elder Dallin H. Oaks “Faasoaina Atu o le Talalelei Toefuataiina.” Fesoasoani i tamaitai talavou e mafaufau i ni tulaga lea e mafai ai ona latou faaaogaina se fautuaga se tasi pe sili atu a Elder Oaks. Mo se faataitaiga, atonu latou te amataina se talanoaga faaletalalelei ma se tasi latou te le masani i ai a o faatalitali i se fale faatali pasi. Atonu e fiafia tamaitai talavou e faatino se tala o nisi o tulaga nei.
Aumai se paso faigata ma tuu uma ia vaega i se faaputuga. Fai atu i se tamaitai talavou e toatasi e amata ona tuufaatasi le paso a o faitau e le vaega o totoe o le vasega le faatusatusaga a Elder Neil L. Andersen e uiga i se paso i lana saunoaga “O Se Molimau a le Atua.” E faapefea ona faapei le tuufaatasia o se paso i le galuega o le faasoaina atu o le talalelei? Valaaulia tagata uma e galulue faatasi i se paso ao e talanoaina auala e mafai ai ona tou galulue faatasi o se vasega ma faia galuega faafaifeautalai. I le avea ai ma se vaega o le talanoaga, atonu e mafai ona e faasino faapitoa atu i le vaega o le saunoaga a Elder Andersen ua faaautuina “O Se Valaaulia i le Autalavou.” E mafai faapefea ona fesoasoani le fautuaga ma le lu’i a Elder Andersen i tamaitai talavou ao latou faia ni fuafuaga e faasoa atu le talalelei?
Faatasi ai ma se faatagaga a le epikopo, valaaulia se tagata o le uarota (afai e talafeagai, o se tasi o tamaitai talavou) o le sa liliu mai i le Ekalesia e faasoa mai ni ona aafiaga i le faailoaina ia te ia o le talalelei. O a faatosinaga a faataitaiga a uo o le Au Paia o Aso e Gata Ai i filifiliga a le tagata e suesue i le talalelei? O le a se fautuaga na te tuuina atu i tamaitai talavou e uiga i le valaauliaina o isi e o mai ia Keriso? Valaaulia tamaitai talavou e fai mai soo sa latou fesili o i ai. (Mo se isi auala, e mafai ona faaali le vitio “Ona Ua Ou Maua Tele” ma talanoa i faatosinaga ua ia i tatou e fesoasoani atu ai ia tatou uo ina ia talia le talalelei.)

3:25
Tusi mau fesootai mai lenei lesona i le laupapa. Fai atu i tamaitai talavou taitasi e filifili se tasi o mau, suesue i ai, ma tusi se ata e suitulaga i le mea ua aoao mai e le mau. Fai atu i tamaitai talavou e faasoa mai savali o a latou mau, e faalagolago i a latou ata. Ona valaaulia lea o tamaitai talavou taitasi e faitau lana mau i le vasega ma faasoa mai le mea ua ia fuafuaina e fai ia ola ai i lena mau.
Ao lei amataina le vasega, fai atu i se tamaitai talavou e aumai se mea faitino po o se ata lea e suitalaga i se tasi o auala na faamanuia ai e le talalelei lona olaga. I le faagasologa o le vasega, faitau faatasi le tala e uiga i le atalii o Elder David A. Bednar i lana lauga “O Mai Ia Ina Matamata.” Aisea na matua naunau ai le uso laitiiti e faapipii lima o ana uo? Fai atu i tamaitai talavou e faasoa mai ia mea faitino o po o ata sa latou aumaia mai ia faamatala mai ia faamanuiaga o suitalaga ai nei mea faitino. Uunaia i latou e mafaufau i tagata latou te iloa o e e lei mauaina nei faamanuiaga, ma valaaulia i latou e fai se fuafuaga e faasoa atu ai le talalelei mai i latou.

Fai i tamaitai talavou e faasoa mai mea sa latou aoaoina i le aso. Pe o latou malamalama i le auala e valaaulia ai tagata ia o mai ia Keriso? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Tatalo mo avanoa e faasoa atu ai le talalelei ma talanoaina i se vasega i le lumanai aafiaga na latou maua.
Feaveai ma i latou ni kata e tufa atu i le aoga ma vaai mo avanoa e faaaoga ai na kata e faasoa atu ai le talalelei.
Suesue le mataupu e 3 o le Tala’i La’u Talalelei ma saunia e talanoa i isi e uiga i le talalelei toefuataiina.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.