Aisea tatou te totogi ai sefuluai?

O le totogiina o le sefuluai o se avanoa paia. Pe a tatou totogi le sefuluai ua tatou faailoa atu le faafetai mo mea uma ua foaiina mai e le Atua mo i tatou ma toe faafoi atu ia te Ia se vaega o mea ua tatou maua. E faaaoga le sefuluai e fausia ai malumalu ma fale tatalo, faaliliu ma lomia tusitusiga paia, faia o galuega faafaifeautalai ma talafaasolopito o aiga, ma isi auala e fausia ai le malo o le Atua i le fogaeleele.

Saunia oe lava ia faaleagaga

Mafaufau i faamanuiaga faaleagaga ma faaletino ua e maua mai le totogiina o lau sefuluai. O a ni aafiaga na e maua e mafai ona e faasoa atu i tamaitai talavou?

Aisea e taua ai mo tamaitai talavou le totogi o le sefuluai? E faapefea ona e aoao i latou i le taua o le ola ai i le tulafono o le sefuluai?

O a ni mau ma isi punaoa o le a fesoasoani i tamaitai talavou ina ia malamalama ai pe aisea tatou te totogi ai le sefuluai?

Malaki 3:8–10 po o le 3 Nifae 24:8–10; MF&F 64:23 (O faamanuiaga ua folafolaina mo i latou o e totogi le sefuluai)

MF&F 119 (Ua faaalia le tulafono o le sefuluai)

Henry B. Eyring, “O Faamanuiaga o le Sefuluai,” Liahona, Iuni 2011, 4–5

David A. Bednar, “O Pupuni o le Lagi,” Ensign po o le Liahona, Nov 2013

Jeffrey R. Holland, “E Faapei o Se Togalaau ua Sausauina,” Ensign, Novema, 2001, 33–35

Gordon B. Hinckley, “O Le Faatuatua Ua Matou Savavali Ai,” Ensign, Me 2002, 72–74

“Sefuluai, ” Faamaoni i le Faatuatua (2004), 155–57

“Sefuluai ma Taulaga,” Mo Le Malosi o le Autalavou (2011), 38–39

Aoao atu i le ala a le Faaola

Na valaaulia e le Faaola i latou na Ia aoaoina ia molimau, ma a o latou faia, na pa’i atu le Agaga i o latou loto. E faapefea ona e fausia se siosiomaga e ulufale mai ai le Agaga, ina ia mafai ona Ia pai mai i loto o tamaitai talavou? E faapefea ona e valaaulia ia tamaitai talavou ia molimau e uiga i faamanuiaga o le sefuluai?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Fai atu i nisi o tamaitai talavou e faitau le tala ia Mary Fielding Smith i le lauga a Elder Jeffrey R. Holland “E Faapei o se Togalaau ua Sausauina.” Fai i tamaitai talavou o totoe e faitau le tala i le tamaitiiti iunivesite i Pasila i le lauga a Peresitene Gordon B. Hinckley “Tatou te Savavali i le Faatuatua.”Valaaulia i latou e aotele ia tala e le tasi i le isi ma faasoa atu mea ua latou aoao mai tala e uiga i le taua o le totogi o le sefuluai.
Tusi i luga o le laupapa, “Aisea e te totogi ai le sefuluai?” Valaaulia tamaitai talavou e vaai faalemafaufau i se uo mai se tasi o faatuatuaga ua fesili atu ia i latou lenei fesili. E faapefea ona latou tali atu? Uunaia i latou e faasoa atu se aafiaga sa maua e i latou po o o latou aiga e faatatau i le sefuluai.

Aoao faatasi

O gaoioiga taitasi nei o le a fesoasoani i tamaitai talavou e malamalama ai i le taua o le tulafono o le sefuluai. I le mulimuli ai i le Agaga, filifili se tasi pe sili atu e aoga mo lau vasega:

Fai atu i tamaitai talavou e suesue le Malaki 3:8–10 ma le MF&F 64:23 ma faasoa atu folafolaga sa tuuina mai i e totogi sefuluai. Fai atu i tamaitai talavou e saili po o le a le finagalo o le Alii mo i tatou i le totogiina o le sefuluai e ala i le faitauina o le MF&F 119 (faamatala atu o le “tului” o lo tatou “tupe maua lea o le tausaga”). Tufa atu lisiti o sefuluai, ma tuu atu i tamaitai talavou e faamatala e le tasi i le isi le auala e faaaoga ai. Faasoa atu pe na faapefea ona faamanuiaina oe ona o le totogiina o le sefuluai.
Tusi ni koluma se tolu i luga o le laupapa faatasi ai ma ulutala nei: Faamanuiaga, Auala o loo Faaaogaina Ai Tupe, ma Amio. Vaevae le vasega i ni vaega toalaiti, ma tuu atu i vaega taitasi se tasi o autu e suesue i ai i le vaega o loo faaulutala “Sefuluai ma Taulaga ” i le Mo le Malosi o le Autalavou. Fai atu i tamaitai talavou e tusi mea sa latou maua i le koluma talafeagai i luga o le laupapa. Valaaulia nisi o i latou e faasoa atu a latou molimau e faatatau i le tulafono o le sefuluai.
Vaevae le vasega i ni vaega se lua. Fai atu i le tasi vaega e faitau le lauga a Peresitene Henry B. Eyring “ O Faamanuiaga o le Sefuluai,” ma fai atu i le isi vaega e faitau le parakalafa 2–13 o le lauga a Elder David A. Bednar “O Pupuni o le Lagi.” Fai atu ia i latou fai se lisi o faamanuiaga tatou te maua pe a totogi a tatou sefuluai, ona tusi lea o faamanuiaga i luga o le laupapa. Valaaulia tamaitai talavou e faasoa mai ni faamanuiaga na latou maua ma o latou aiga ona o le totogiina o le sefuluai. Fesili ia i latou pe faapefea e le ola ai i le tulafono o le sefuluai ona fesoasoani i a latou faaipoipoga ma aiga i le lumanai.

Fai i tamaitai talavou e faasoa mai mea sa latou aoaoina i le aso. Pe o latou malamalama pe aisea tatou te totogi ai le sefuluai? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Tautino atu ia totogi atoa le sefuluai ma tusi lena sini i a latou tusi o talaaga.
Faamaea le mea faatonuina e fai o le tulaga faatauaina o le Filifiliga ma le Tali Atu Mo Au Lava e 7 i le Alualu i Luma o le Tagata Lava Ia.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.