Aisea e taua ai ona faamaoni?

O le faamaoni o lona uiga o le filifili e le pepelo, gaoi, kopi, pe taufaasese i soo se mea lava. A tatou faamaoni, tatou te atiina ae le malosi o le uiga faaletagata lava ia, o le a faapea ona mafai ai ona tatou tuuina atu se auaunaga maoae i le Atua ma isi. E faamanuiaina i tatou i le filemu o le mafaufau ma le faaaloalo o le tagata ia te ia lava, ma o le a faatuatuaina i tatou e le Alii ma isi.

Saunia oe lava ia faaleagaga

O le a lou manatu o le a le uiga o le ia faamaoni i mea uma? Aisea e te manatu ai e taua ona faamaoni? O a auala na e aafia ai po o se tasi e te iloa e uiga i le faamaoni po o le le faamaoni a nisi?

O a faaosoosoga o le faamaoni e feagai ma tamaitai talavou i o latou olaga? E faapefea ona e fesoasoani ia i latou ia malamalama o faamanuiaga e oo mai ona o le faamaoni i tulaga uma lava? E faapefea ona e fesoasoani ia i latou ia maua le lototele e fai ai filifiliga faamaoni?

O a mau ma isi punaoa o le a fesoasoani i tamaitai talavou e lagona ai le taua o le faamaoni?

Salamo 101:7; Faataoto 12:22; 2 Korinito 4:2; Efeso 4:29; Alema 27:27; Faatuatuaga o le Faatuatua 1:13 (Ia faamaoni ma sao i mea uma)

Galuega 5:1–10 (E le mafai ona tatou pepelo i le Alii)

2 Nifae 9:34; Alema 12:1-5 (O le le faamaoni o le agasala ua i ai ma se faasalaga matuia)

Iosefa Samita—Talafaasolopito 1:21–25 (O le aafiaga o Iosefa i le ola faamaoni a o feagai ai ma sauaga)

Thomas S. Monson, “O Sauniuniga e Aumai ai Faamanuiaga,” Ensign po o le Liahona, Me 2010, 65–67

Robert C. Gay, “ Se A foi se Mea e Avatu e le Tagata e Togiola ai Lona Ola?” Ensign po o le Liahona, Novema, 2012, 34–36

Ann M. Dibb, “Ou te Talitonu ia Faamaoni ma Amiotonu,” Ensign po o le Liahona, Me 2011, 115–18

“Faamaoni ma le Amiosao,” Mo le Malosi o le Autalavou (2011), 19

“Faamaoni,” Faamaoni i le Faatuatua (2004), 84

Vitio: “Faamaoni: E Tatau ona e Talitonu i ai”

Aoao atu i le ala a le Faaola

Na valaaulia e le Faaola i latou sa mulimuli ia te Ia e faatino le faatuatua ma ola i upumoni na Ia aoaoina.O le a se mea e te fai e fesoasoani ai i tamaitai talavou e galulue i le faatuatua ina ia maua ai se malamalama sili i le taua o le faamaoni?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Tagai i isi manatu e aoao mai ma aoao atu ai.

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

• Fai atu i tamaitai talavoou e faitau le tala i le faatauina mai o pepa o le tifaga i le lauga a Elder Robert C. Gay “Se a Foi se Mea e Avatu e le Tagata e Togiola ai Lona Ola?” Valaaulia i latou e aotele mai le tala i le tasi ma le isi ma faasoa atu mea ua latou aoaoina mai le tala e faatatau i le taua o le faamaoni.

• Valaaulia tamaitai talavou e matamata i le “Faamaoni: E Tatau na e Talitonu I Ai.” Fai atu ia latou tusi i lalo auala e mafai ona latou saunia ai nei e teena faaosoosoga ia faimamago a o le i oo mai ia aafiaga. Valaaulia i latou e fetufaai atu o latou manatu i tamaiti uma o le vasega.

Aoao faatasi

Tagai i isi manatu e aoao mai ma aoao atu ai.

O gaoioiga taitasi o loo i lalo o le a fesoasoani i tamaitai talavou e malamalama ai i le taua o le faamaoni.I le mulimuli ai i le Agaga, filifili se tasi pe sili atu e aoga mo lau vasega:

• Faitau atu i tamaitai talavou le tala i le tamaloa na gaoia saga i le lauga a Ann M. Dibb “Ou te Talitonu i le Faamaoni ma le Upumoni.” Taofi le faitau pe a oo ina faapea mai tamaiti laiti, “Tama, e tasi le ala sa lei e vaai i ai!”Fesili i tamaitai talavou pe mata o le a le tala a le tamaitiiti e fai atu i lona tama.Ona faitau lea o lana faamatalaga.Fai atu i tamaitai talavou e talanoa i filifiliga e feagai ma i latou ina ia latou filifili ai e faamaoni.

• Faitau o se vasega le “Faamaoni ma le Amiosao” i le Mo le Malosi o le Autalavou. Fai atu i tamaitai talavou e faailoa mai faamanuiaga o le faamaoni ma lisi i luga o le laupapa. E faapefea ona aafia e le faamaoni lo latou gafatia e fai ai mea lelei mo isi faapea ma le Alii? O anafea na faamanuiaina ai tamaitai talavou mo lo latou faamaoni? Fai atu i tamaitai talavou e mafaufau i ni mea na tutupu atonu na tofotofoina ai i latou ina ia aua nei faamaoni (e mafai ona latou vaai i tulaga faatonuina i le Mo le Malosi o le Autalavou mo ni manatu). O a ni mea latou te mafai ona fai i nei tulaga ina ia faatumauina ai lo latou faamaoni?

• Tuu i tamaitai talavou taitasi se tasi o fuaitau o mau mai lenei lesona. Fai atu ia i latou e tusi i lalo se upu se tasi e oo i le fa e faamatala ai po o le a le mea o aoao mai e le fuaitau e uiga i le faamaoni. Valaaulia i latou e faasoa mai ni mea sa latou tusiaina ma faailoa mai o latou lagona ma aafiaga e uiga i le faamaoni. E faapefea ona aafia a latou fegalegaleaiga ma isi ona o lo latou amiosao?

• Faitau faatasi o se vasega le Iosefa Samita —Tala Faasolopito 1:21–25, ma fesili atu i tamaitai talavou po o le a se mea sa latou aoaoina mai lenei tala e faatatau i le faamaoni. O faapefea ona faamanuiaina i latou ona o le faamaoni o Iosefa i mea sa ia aafia ai ma mea sa finagalo ai le Tama Faalelagi ma Iesu Keriso mo ia? O anafea na avea ai le faamaoni ma mea manaomia e tamaitai talavou ina ia lototoa ai? Na faapefea ona faamanuiaina i latou ona o le faamaoni?

• Tusi se laina mai luga i lalo i le ogatotonu o le laupapa. I le tasi itu tusi ai, “Afai ou te faamaoni…” ae o le isi itu tusi ai, “Afai ou te le faamaoni…” Fai atu i tamaitai talavou e saili auala e faauma ai fuaiupu nei a o latou faitauina le ulutala o le vaega “Faamaoni” i le Faamaoni i le Faatuatua ma le tala i le tamaitiiti aoga le faamaoni i le saunoaga a Peresitene Thomas S. Monson“O Le Saunia e Ala Mai ai Faamanuiaga.” O a nisi manatu e mafai ona latou faaopoopo i ai? Valaaulia tamaitai talavou e faasoa mai pe na faapefea ona latou vaaia nei mea i o latou lava olaga. Fai atu i le vasega e faasoa mai nisi o auala e faaaoga e tagata i nisi taimi e fai ma alofaga o le le faamaoni. E faapefea ona latou faamatala i isi a latou mafuaaga e faamaoni ai?

Fai i tamaitai talavou e faasoa mai mea sa latou aoaoina i le aso. Pe ua latou malamalama i le taua o le faamaoni? O a ni o latou lagona po o ni uunaiga?Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“E mafai ona e fesoasoani ia i latou o loo e aoaoina ina ia lagonaina atili le toafimalie e uiga i lo latou mafaia ona auai i se talanoaga pe a e tali faalelei atu i ai i soo se manatu faamaoni e tuuina mai. Mo se faataitaiga, e mafai ona e faapea atu, ‘Faafetai mo lau tali. O se manatu manaia tele’ po o le… ‘O se faataitaiga lelei tele lena’ po o le ‘Ou te talisapaia mea uma na outou tautalagia i lenei aso’” (O le Aoao Atu, E Leai Se Isi Valaauga e Sili Ai [1999], 67,68).

Ola i mea ua tatou aoaoina

Tagai i isi manatu e aoao mai ma aoao atu ai .

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

• Tautino atu o le a faamaoni i mea uma latou te aafia ai ma i latou o loo latou ola faatasi.

• Fuafua ma faataitai mea o le a latou faia pe tautala ai pe a taumafai se tasi e faaosooso i latou e fai se mea e le faamaoni.

• Faataunuu se tasi o mea faatonuina e fai o tulaga faatauaina o le Amiosao po o galuega faatino o le tulaga faatauaina mai le Alualu i Luma o le Tagata Lava Ia.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.