Aisea ua poloaiina ai i tatou e tausia le paia o le aso Sapati?

Ua tuuina mai e le Alii le aso Sapati mo lo tatou manuia ma ua poloaiina i tatou e tausia lona paia. O le tausia o le Sapati e faailoa ai lo tatou tuuto e faamamalu ma tapuai i le Atua ma tausia a tatou feagaiga. O le a tatou latalata atili atu ai i le Alii ma o tatou aiga. O le a tuuina mai ia i tatou se vaaiga e faavavau ma le malosi faaleagaga. O le Sapati foi e maua ai e i tatou le malologa mai a tatou galuega faaletino ma tapuai ai i le Alii.

Saunia oe lava ia faaleagaga

O a faamanuiaga e te fiafia i ai ona o lou tausia ia paia o le aso Sapati? E faapefea ona e iloa o a mea e talafeagai pe le talafeagai mo le Sapati? Aisea e taua ai lou auai i au sauniga o le Aso Sa?

Aisea e taua ai le malamalama o tamaitai talavou i le mafuaaga o le i ai o lo tatou aso Sapati? E faapefea ona tatou faamautuina ia i latou se naunautaiga e faapaia le aso Sapati? E faapefea ona e fesoasoani i tamaitai talavou ia iloa e i latou lava po o a gaoioiga e talafeagai mo le aso Sapati?

O a mau ma nisi punaoa o le a fesoasoani i tamaitai talavou ina ia malamalama ai i le taua o le aso Sapati ma tausi i lona paia?

Kenese 2:2 (O le amataga o le aso Sapati)

Esoto 20:8–11; 31:13 (Tausia le paia o le Aso Sapati)

Isaia 58:13–14 (O faamanuiaga i le tausia o le Sapati)

Luka 23:55–24:1 (O fafine na uuina le tino o Iesu ina ua tuanai Lona Faasatauroga sa faatali seia mavae le Sapati ona faia lea)

MF&F 59:9–13 (O le tausia o le Sapati e fesoasoani tatou te tumau ai ia le pisipisia mai le lalolagi)

Mosaea 13:16–19 (Ua poloaiina i tatou e usiusitai i le aso Sapati)

Henry B. Eyring, “Lotofaafetai i le Aso Sapati,” Ensign po o le Liahona, Nov. 2016, 99-102

Russell M. Nelson, “O Le Aso Sapati o se Aso Fiafia,” Ensign po o le Liahona, Me 2015, 129–32

Kevin S. Hamilton, “Pi'imau Pea,” Ensign or Liahona, Nov. 2013

“Sapati,” Faamaoni i le Faatuatua (2004), 145–47

“Tausia o le Aso Sapati,” Mo le Malosi o le Autalavou (2011), 30–31

Video: “Na ia Aoao le Alofa i Lona Talavou”

1:16

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Fai atu i tamaitai talavou e lisi ia faamanuiaga ua latou mauaina mai le faapaiaina o le Sapati. E faapefea ona latou tausia le aso Sapati ia paia?

Aoao faatasi

O le a fesoasoani gaoioiga taitasi nei i tamaitai talavou e malamalama ai i faamoemoega o le Aso Sapati. I le mulimuli ai i le Agaga, filifili se tasi pe sili atu e aoga mo lau vasega:

Valaaulia tamaitai talavou taitasi e suesue le saunoaga a Peresitene Henry B. Eyring “Lotofaafetai i le Aso Sapati” ma fai se lisi o ni mea na saunoa mai Peresitene Eyring e mafai ona tatou lotofaafetai ai i le Sapati. Tuu atu i tamaitai talavou e faatusatusa a latou lisi ma faasoa mai mea na latou mauaina. Faitau faatasi le valaaulia a Peresitene Eyring i le faaiuga o lana saunoaga, ma lui tagata o le vasega e faatino.
Vaevae le lauga “O Le Sapati o se Aso Fiafia” i ni vaega se tolu pe fa. Valaaulia tamaitai talavou e faitau ia vaega, a le o ni vaega toalaiti pe faitau taitoatasi. O a ni malamalamaaga ua latou mauaina e uiga i le auala e faia ai le Sapati o se aso fiafia? O le a faapefea ona faamautinoa e tamaitai talavou o a latou amioga i le Sapati o le a taitai atu ai i le olioli ma le fiafia?
Vaevae ia tamaitai talavou ia tofu paga. Valaaulia se tamaitai talavou mai paga taitasi e faitau le MF&F 59:9–15 ma lisi mea ua tau mai tatou te faia i le Sapati. Fai atu i isi tamaitai talavou e suesue fuaiupu 16–19 mo faamanuiaga folafolaina pe a tatou tausia le paia o le aso Sapati. Fai atu ia i latou e faasoa atu mea na latou maua ma isi ma talanoa e uiga i le taua o le faamamaluina o le aso Sapati. Valaaulia le vasega e talanoa pe aisea ua aumaia ai e le Alii ia i tatou le aso Sapati.Fesili atu i tamaitai talavou taitasi e mafaufau i se mea e mafai ona ia faia ina ia mautinoa ai ua faataunuuina faamoemoega o le aso Sapati i lona lava olaga.
Fesili atu i tamaitai talavou pe faapefea ona latou iloa e talafeagai le gaoioiga mo le Sapati. Valaaulia i latou e vaai i le MF&F 59:9–13 ma i le Mo le Malosi o le Autalavou (itulau 30–31) mo mataupu faavae e ono fesoasoani ia i latou. Valaaulia tamaitai talavou taitasi e mafaufau i ana ia lava gaoioiga o le Aso Sa ma faailoa mai e ia lava pe talafeagai ma nei mataupu faavae. Uunaia tamaitai talavou e fai soo se suiga ua latou lagona e talafeagai.
Tuu atu i tamaitai talavou kopi o le Mo le Malosi o le Autalavou, ma fai atu ia suesue le vaega o faaulutala “Tausia o le Aso Sapati” mo le mafuaaga ma faapefea ona tatou tausia le aso Sapati. Fai atu ia i latou ia mafaufau ma faasoa atu pe faapefea ona aoga nei mea i o latou olaga. Valaaulia i latou e faasoa atu se aafiaga i le tausia o le paia o le aso Sapati. Uunaia i latou ia vaai faalemafaufau e faapea na valaaulia i latou e se uo e auai i se gaoioiga e le talafeagai ma le Aso Sa. E faapefea ona latou fesoasoani i la latou uo ina ia malamalama i le uiga o le aso Sapati ma le mafuaaga ua latou filifili ai e tausia ia paia?
Faaali pe faatatau le tala e uiga i le tama o Elder Kevin S. Hamilton i parakalafa muamua e lua o lana lauga “Pi'imau Pea.” O ā mea ua aoaoina mai e tamaitai talavou e uiga i le taua o le tausia o le paia o le Sapati mai lenei tala? Tufa atu i tamaitai talavou kopi o parakalafa mai le lauga a Elder Hamilton lea e amata i le fuaitau “E tofu tatou taitoatasi ma le anoanoai o filifiliga e fai.” Fai atu ia i latou e faitau le parakalafa ma galulue faatasi i soa e fai se lisi o gaoioiga mo le Sapati e “lelei,” “lelei sili atu,” ma mea “silisili ona lelei”. Valaaulia i latou e faasoa mai o latou manatu i le vasega.

Fai i tamaitai talavou e faasoa mai mea sa latou aoaoina i le aso. Pe latou te malamalama i faamanuiaga o le tausia o le paia o le aso Sapati? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Ola i mea o tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Tusi ia latou tusi o talaaga se suiga e tasi latou te manaomia ona fai ina ia sili atu ona tausia le paia o le aso Sapati.
Tusi upu nei “E mafai ea e lenei gaoioiga ona sili ona ou latalata atu ai i le Tama Faalelagi?” i luga o se fasi pepa ma tuu i se nofoaga e iloagofie ai i totonu o o latou fale e avea o se faamanatu mo gaoioiga o le aso Sapati.