Aisea tatou te anapopogi ai?

O le anapogi o le alu lea e aunoa ma se mea’ai ma se vaiinu i lou loto fuatiaifo mo se vaitaimi faatulagaina. O le anapogi faatasi ai ma le tatalo faamaoni e mafai ona fesoasoani e saunia oe faapea ma isi ina ia maua faamanuiaga a le Atua. O le puna lea o le malosi faaleagaga. O le anapogi e mafai ai ona tatou lagona le latalata atu i le Tama Faalelagi ma faamalosia ai la tatou molimau. O le anapogi e aofia ai foi le foai atu ma le lima foai o se taulaga anapogi e fesoasoani ai ia i latou o e le tagolima.

Saunia oe lava ia faaleagaga

O a nisi o mafuaaga sa e anapogi ai, ma o a foi taunuuga o lau anapogi? O a ni mea e te faia ia anoa ai le anapogi?

Aisea e taua ai i tamaitai talavou ona malamalama i le mataupu faavae o le anapogi? O a faigata e feagai ma tamaitai talavou e fiafia ai i faamanuiaga atoatoa o le anapogi?

O a mau ma isi punaoa o le a fesoasoani i tamaitai talavou e malamalama ai i le anapogi ma faamanuiaga na te aumai?

Eseta 4:10–17; Mataio 4:1–11; Alema 17:1–3, 9; MF&F 59:12–14 (O le anapogi o se punaoa o le malosi faaleagaga)

Isaia 58:3–12; Mataio 6:16–18 (Ua faamatala mai e le Alii le ala sao e fai ai le anapogi, e aofia ai ma taulaga anapogi)

Mosaea 27:18–24; Alema 6:6 (O le anapogi e mafai ona fesoasoani e faamanuia ai isi)

Alema 5:45–46; Helamana 3:35 (E fesoasoani le anapogi e faamalosia ai le molimau)

Henry B. Eyring, “E Le o Lenei Ea le Anapogi Ou te Loto I Ai?’” Ensign or Liahona, Me 2015, 22–25

L. Tom Perry, “Se a Ea La Oulua Feau?” Ensign po o le Liahona, Me 2005, 84-87

Dean M. Davies, “O Le Tulafono o le Anapogi: O Se Tiutetauave Faaletagata Lava Ia e Tausia ai E Matitiva ma E le Tagolima,” Ensign po o le Liahona, Nov. 2014, 53–55

“Anapogi ma Taulaga Anapogi, ” Faamaoni i le Faatuatua (2004), 20–22

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Faasoa atu ma tamaitai talavou le tala i se fafine na anapogi i le lauga a Elder L. Tom Perry “ Se A Ea La Oulua Feau?” Fai atu ia i latou ia faalogo mo faamanuiaga e auala mai le anapogi. O a isi faamanuiaga latou te iloa e auala mai le anapogi?
Valaaulia tamaitai talavou e vaai faalemafaufau i se uo mai se tasi faatuatuaga ua manao e iloa le uiga o le anapogi ma pe aisea latou te faia ai. E faapefea ona latou faamatala le mataupu faavae o le anapogi i la latou uo? Faamatala le eseesega o le anapogi ma le na o le alu e aunoa ma se ai (tagai MF&F 59:13–14).

Aoao faatasi

O le a fesoasoani gaoioiga taitasi nei i tamaitai talavou ia malamalama ai i le uiga o le anapogi. I le mulimuli ai i le taitaiga a le Agaga, filifili se tasi pe sili atu e aoga mo lau vasega:

Valaaulia ia tamaitai talavou e faitau pe matamata i le saunoaga a Peresitene Henry B. Eyring “‘E Le o Lenei Ea le Anapogi Ou te Loto I Ai?’” o se vaega. A o latou faitauina pe matamata i ai, fai atu ia i latou e vaavaai mo ni tali i fesili e pei o le, “O le a le uiga o le anapogi?” “O a faamoemoega o le anapogi?” ma le “O a faamanuiaga o le anapogi?” Valaaulia ia tamaitai talavou e faasoa mai le auala na faamanuiaina ai e le anapogi o latou olaga, ma po o le a le mea o le a latou faia e faaleleia ai a latou anapogi.
Fai faatasi o se vasega se lisi o luitau masani e ono fetaiai ma tamaitai talavou. Valaaulia tamaitai talavou e faitau mau ia e faamatala ai faamanuiaga o le anapogi, e pei o loo lisiina atu i lenei otootoga. Fai atu ia i latou e lisi i luga o le laupapa ia faamanuiaga mai se anapogi sa’o. E mafai faapefea e nei faamanuiaga ona fesoasoani i tamaitai talavou e foia ai faafitauli o le soifuaga? E mafai faapefea ona fesoasoani nei mea i o latou matafaioi o le olaga i le lumanai, e aofia ai le avea o se ava ma se tina? Molimau atu i faamanuiaga o le anapogi.
Fai atu i tamaitai talavou e fai se siata e tolu koluma i se fasi pepa ma faaigoa ia koluma, “O a Mea e Ao ona Tatou Faia?” ”O Le A Se Mea E Tatau Ona Tatou Aloese Mai i le Faia?“ ma le ”O A Faamanuiaga Ua Folafola Mai e le Atua?“ Fai atu ia i latou e tusi tali latou te maua e faatatau i le anapogi i le Isaia 58:3–12. (Afai e talafeagai ai, faamatala atu o taulaga anapogi o se tasi o ala tatou te “foai atu ai [a tatou] meaai i e fia aai,” ma e valaauliaina ia tamaitai talavou e totogi taulaga anapogi.) Uunaia i latou e faasoa atu a latou tali ma faamanuiaga ua latou maua ona o le anapogi i le ala a le Alii.
Valaaulia se tasi o le au epikopo e faamatala i le vasega pe faapefea ona fesoasoani taulaga anapogi e tausia ai e matitiva ma e le tagolima. I le avea ai ma se vaega o lenei talanoaga, e mafai e tamaitai talavou ona toe iloilo ia mea sa aoao mai e Epikopo Dean M. Davies e uiga i taulaga anapogi i lana lauga “O Le Tulafono o le Anapogi: O Se Tiutetauave Faaletagata Lava Ia e Tausia ai E Matitiva ma E le Tagolima.” Fesili atu i tamaitai talavou po o le a so latou lagona e uiga i le avanoa e anapogi ai ona o lenei faaamatalaga.

Fai i tamaitai talavou e faasoa atu mea sa latou aoaoina i le aso. Pe o latou malamalama i le uiga o le anapogi? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Saunia se lisi o amioga ma uiga lea e faia ai se anapogi talafeagai ma faataitai ia mea i le Aso Sa anapogi o sosoo ai pe i sa oe lava anapogi patino.
Faasoa atu se mea sa latou aoaoina e uiga i le anapogi i afiafi faaleaiga po o le vasega o le seminare.