E faapefea e mea ou te tautala ai ona aafia ai au ma i latou o loo siomia au?

O le auala tatou te tautatala ai e atagia ai lo tatou malamalama i ituaiga tagata e i ai i tatou o ni fanau a le Atua. O la tatou gagana e mafai, a lē o le siitia ma faamalosiauina ai isi, pe e mafai foi ona faamanualia ma faatiga ai i isi. A tatou faaaogaina gagana faagaeetia, tatou te valaaulia le Agaga Paia e faatasi ma i tatou.

Saunia oe lava ia faaleagaga

Mafaufau i le mana o upu. I lou olaga, e faapefea ona e faaaogaina upu e musuia, aoao, faamafanafana, ma fesootai ai? Na faapefea ona suia tulaga faatonuina o le lalolagi e uiga i gagana talafeagai i lou soifuaga?

Mafaufau i lou vaai i fesootaiga a tamaitai talavou o le tasi ma le isi. E faapefea ona e fesoasoani ia i latou ia malamalama i le taua o le faaaogaina o le gagana musuia ma le lelei?

O a mau ma lauga o le a fesoasoani i tamaitai talavou e lagona ai le taua o upu latou te faaaogaina e fesootai ai ma isi?

Faataoto 15:1–4; 16:24; 1 Timoteo 4:12; Iakopo 3:2–10; Alema 31:5; MF&F 25:12; 108:7 (O a tatou upu e mafai ona avea ma aafiaga malosi i isi)

Esoto 20:7; Mataio 12:34-37; 15:11; Luka 12:2–3; 1 Timoteo 5:13; MF&F 42:27 (Upu masoa, faitala, gagana le migao, ma le tau faaleaga e le talafeagai i le Atua ma isi)

Efeso 4:29–32; 2 Nifae 32:2–3; MF&F 63:61–64 (O le gagana ou te faaaogaina e mafai ona aafia ai lou tomai e maua le taitaiga mai le Agaga Paia)

Mosaea 4:30 (E ao ona tatou faaeteete i upu tatou te faaaoga)

Jean B. Bingham, “O Le A Ou Aumaia le Malamalama o le Talalelei i totonu o Lo’u Aiga,” Ensign po o le Liahona, Nov. 2016, 6–9

Jeffrey R. Holland, “O Gagana a Agelu,” Ensign po o le Liahona, Me 2007, 16–18

W. Craig Zwick, “O Le A Sou Manatu?” Ensign po o le Liahona, Me 2014

“Gagana,” Mo Le Malosi o le Autalavou (2011), 20–21

“Gagana Masoa,” Faamaoni i le Faatuatua (2004), 199

Vitio: “Kalapu a le Au Le Palauvavale”; “Fiamalosi—Ia Taofia”

4:57

10:13

Aoao atu i le ala a le Faaola

Na fai atu e le Faaola ni fesili na uunaia ai Ona soo ina ia mafaufau ma faalogo lelei. Sa Ia fiafia ma le faamaoni i a latou tali. Na Ia tuuina atu avanoa ia i latou e fesili ai a latou lava fesili ma faasoa atu o latou lava lagona, ma sa Ia tali atu i a latou fesili ma faafofoga ia latou aafiaga. E faapefea ona e mulimuli i faataitaiga a le Faaola a o e aoao atu tamaitai talavou e uiga i le taua o mea latou te tautatala i ai?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

I nai aso o i luma, fai atu i se tamaitai talavou e sau saunia e faasoa atu ni tala o le paopao ma le alii talavou sa ulagia a o avea ma tama talavou mai le saunoaga a Sister Jean B. Bingham “O Le A Ou Aumaia le Malamalama o le Talalelei i totonu o Lo’u Aiga.” O a ni mea ua aoaoina e tamaitai talavou mai i nei tala e uiga i le auala e aafia ai le tasi ma le isi i a tatou upu?
Tusi fuaitau nei i luga o le laupapa: O upu tatou te faitau i ai. O upu tatou te faalogo i ai. O upu tatou te tusia. O upu tatou te tautatala i ai. Fai atu i se tamaitai talavou e faitau le Efeso 4:29–32 ma faamatala lona fesootaiga ma fuaitau e fa o loo i luga o le laupapa. Valaaulia tamaitai talavou e mafaufau loloto i nei fesili: O le a sou lagona e tusa ai ma le ituaiga o gagana o loo e faitau i ai, faalogo i ai, ma faaaogaina? E faapefea e upu ona valaaulia pe aveesea le taitaiga mai le Agaga Paia?

Aoao faatasi

O gaoioiga taitasi o loo i lalo o le a fesoasoani i tamaitai talavou e malamalama ai i le taua o le faaaogaina o le gagana lelei. I le mulimuli ai i le Agaga, filifili se tasi pe sili atu e aoga mo lau vasega:

I ni aso o i luma, valaaulia tamaitai talavou e aumai i le vasega se upusii lelei ma musuia. Fai atu i tamaitai talavou taitasi e faasoa atu lana upusii ma faamatala lona aafiaga i lona soifuaga. Valaaulia le vasega e saili faataitaiga i mau e faailoa ai le aafiaga malosi ma le lelei o a tatou upu i isi (mo le faataitaiga, o le Taitaiau Sili o Moronae ma le tagavai o le saolotoga [tagai Alema 46:11–22], o le Faaola ma le fafine mulilua [tagai Ioane 8:1–11], po o Apinati ma Alema [tagai Alema 5:9–12]). O a mea o aoao mai e nei faataitaiga i tamaitai talavou e faatatau i le aafia o isi i le malosi o a latou upu?
Faitau faatasi o se vasega le lauga a Elder Jeffrey R. Holland “O Gagana a Agelu.” Valaaulia tamaitai talavou e faamaumau mea ua latou fiafia i ai po o mea latou te mananao e sui i le ala o loo latou fesootai ai ma isi. Pe a talafeagai, fai atu i nisi o tamaitai talavou e faasoa atu o latou lagona.
Tusi i luga o le laupapa “Afai e mafai e le tagata ona pulea lona laulaufaiva, e mafai e ia ona pulea ____________.” Valaaulia tamaitai talavou e suesue i le Iakopo 3:2–10 ma faatumu le avanoa. Tofi tamaitai talavou taitasi e faitau se tasi o faatusatusaga sa faaaoga e Iakopo (faagutu o solofanua, fuaiupu 2 –3; vaa, fuaiupu 4; afi o le vao, fuaiupu 5–6; mea oona, fuaiupu 7–8; vai magalo, fuaiupu 10–11). Valaaulia tamaitai talavou taitasi e sauni e aoao atu i le vasega le mea o loo aoao mai e lana faatusatusaga e faatatau i le puleaina o la tatou gagana. Valaaulia tamaitai talavou e faasoa atu mea latou te mafai ona fai e pulea ai la latou gagana.
Tuu atu i tamaitai talavou taitasi se vaega o fuaitau o mau eseese mai le muai vaega o mau o lenei otootoga. Valaaulia o ia e tusi se ata faigofie e faamatala ai le feau mai le fuaitau. Fai i ai e faaali lana ata, ma valaaulia isi o le vasega e mate le mea o loo aoao mai e faatatau i fesootaiga ma isi. O a ni aafiaga e mafai e tamaitai talavou ona faasoa atu e faaalia ai le upumoni o loo aoao mai i nei mau?
Faaali se tasi o ata vitio o loo i le otootoga lenei, ma fai atu i tamaitai talavou e faasoa mai ni mea sa latou aoaoina mai le ata vitio. Valaaulia i latou e mafaufau loloto i mea e mafai ona latou faia e faatosinaina ai isi ina ia fesootai i auala e valaaulia ai le Agaga o le Alii. Mo se faataitaiga, e faapefea ona latou fesoasoani i se uo o loo i ai se vaisu o le faaaogaina o gagana lē lelei? Pe e faapefea ona latou faaaogaina fesootaiga faaeletonika e siitia ai ma faamalosiau atu i isi? Valaaulia i latou e vaavaai mo ni tali ao latou faitauina le “Gagana” i le Mo le Malosi o le Autalavou. Fai atu ia i latou e faasoa mai ni o latou manatu.
Valaaulia ia tamaitai talavou e faitau le 1 Nifae 5:1–7 ma faasoa mai mea sa latou aoaoina mai faataitaiga a Sarai ma Liae e faatatau i le aafia o i tatou lava ma isi i a tatou upu. Fai atu ia i latou e faitau mai ni faamatalaga a Elder W. Craig Zwick e faatatau i lenei tala i lana lauga “O Le A Sou Manatu?” O a nisi malamalamaaga na maua e tamaitai talavou mai lenei lauga? Uunaia i latou e faasoa mai ni auala e mafai ona latou mulimuli ai i faataitaiga a Liae ia latou fegalegaleaiga ma tagata o le aiga faapea ma isi.

Fai i tamaitai talavou e faasoa mai mea sa latou aoaoina i le aso. Pe ua latou malamalama i le taua o le faaaogina o le gagana musuia ma le mama? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Ola i mea o tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Faauma tulaga faatauaina o le Amio Sao 2 i le Alualu i Luma o le Tagata Lava Ia.
Aloese mai le faitala ma aveese upu masoa mai a latou gagana ma mafaufauga. Mafaufau e faaleo mai se pese e fiafia i ai pe a tulai ae ni faaosoosoga.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.