O ai au, ma o ai e mafai ona avea ai au?

O i tatou o ni afafine agaga faapelepele o ni matua faalelagi, ma, i le avea ai, ua i ai so tatou natura paia ma se taunuuga. O le mamanu paia, ua tatou maua ai ni meaalofa ma ni taleni uiga ese lea o loo fesoasoani ia i tatou e ausia lo tatou taunuuga o ni afafine o le Atua. O le iloaina po o ai i tatou ua tatou maua ai se faamoemoega i o tatou olaga ma ua fesoasoani lea ia i tatou i le faia o ni filifiliga sao.

Saunia oe lava ia faaleagaga

O le a le uiga ia te oe o le avea ma se afafine o le Atua? E faapefea e le iloaina o oe o se afafine o le Atua ona faamanuiaina ai oe ma faatosinaina ai au filifiliga e fai?

E mafai faapefea ona e fesoasoani i tamaitai talavou ia malamalama i le taua o le iloaina o i latou o ni afafine o le Atua? E faapefea e le iloaina o lenei mea ona aafia ai filifiliga latou te faia, o latou lagona e uiga ia i latou lava, ma la latou vaaiga mamao mo lo latou lumanai?

O a ni mau ma ni lauga o le a fesoasoani i tamaitai talavou ina ia malamalama po o ai i latou ma pe o a ni tulaga e mafai ona avea ai i latou?

Kenese 1:26–27 (Ua foafoaina i tatou i le faatusa o le Atua)

Salamo 82:6; Mose 1:39; Aperaamo 3:22–26 (O lo tatou faamoemoega paia o le mauaina o le ola e faavavau)

Luka 15:4–6, 11–32; Ioane 3:16; MF&F 18:10–15 (Ua tele lava le taua o se agaga)

Dale G. Renlund, “Le Au Paia o Aso e Gata Ai, Taumafai Pea,” Ensign po o le Liahona, Me 2015, 56–58

Rosemary M. Wixom, “Iloaina o le Paia i Totonu o i Tatou,” Ensign po o le Liahona, Nov. 2015, 6–8

Dieter F. Uchtdorf, “Ola Fiafia i le Talalelei,” Ensign po o le Liahona, Nov. 2014, 120-23

D. Todd Christofferson, “O Le Malosiaga Amiotonu o Tamaitai,” Ensign po o le Liahona, Nov. 2013, 29-32

“Savali i le Autalavou mai le Au Peresitene Sili,” Mo Le Malosi o le Autalavou (2011), ii–iii

Vitio: “E Taua i Ala Uma,” “O Lo Tatou Faasinomaga Moni”

2:41

3:40

Aoao atu i le ala a le Faaola

Na faapefea ona Ia fesoasoani i isi e aoao, tuputupu ae faaleagaga, ma liua i Lana talalelei? Na silafia e Ia i latou ma tagata o le a avea ai i latou. A o e aoao atu tamaitai talavou, fesoasoani ia i latou ia malamalama o i latou o afafine o le Atua ma e mafai ona latou avea faapei o Ia ma toe nonofo faatasi ma Ia.

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni o oe lava manatu e faalauiloa atu ai le lesona o lenei vaiaso:

Tusi igoa o tamaitai talavou i ni fasipepa eseese. Fai atu i tamaitai talavou taitasi e filifili se fasipepa se tasi ma faailoa mai se uiga faale-Atua o i ai i lana fasipepa. Faailoa mai nisi uiga paia na e vaaia i le tamaitai talavou.
Tusi i luga o le laupapa, “O ai au, ma o ai e mafai ona avea ai au?” Valaaulia ia tamaitai talavou e vaai ni tali o fesili nei i le mau autu a Tamaitai Talavou. O le a so latou lagona e uiga i lo latou fesootaiga ma le Tama Faalelagi i le taulotoina o lenei mau autu?

Aoao faatasi

O gaoioiga taitasi nei o le a fesoasoani i tamaitai talavou ina ia malamalama po o ai i latou ma pe o a ni tulaga e mafai ona avea ai i latou? I le mulimuli ai i le taitaiga a le Agaga, filifili se tasi pe sili atu e aoga mo lau vasega:

Mafaufau i se gaoioiga faigofie lea o le fesoasoani i tamaitai talavou ina ia malamalama o le avea faapei o le Atua e manaomia ai le onosai ma le tumau ai. O lenei gaoioiga e tatau ona manaomia ai ni taumafaiga se tele e ausia ai ma le manuia. Mo se faataitaiga e mafai ona taumafai pea lava pea ia tamaitai talavou e togi se mea faitino i totonu o se paelo lapisi e aunoa ma le tilotilo i ai. O le a se mea o aoao atu e lenei gaoioiga ia i tatou e uiga i taumafaiga faifaipea tumau. E faapefea ona tatou faafesootaia lenei gaoioiga i le avea ai faapei o le Tama Faalelagi? Valaaulia tamaitai talavou taitasi e tagai mo ma faasoa mai ni faamatalaga mai le lauga a Elder Dale G. Renlund “Le Au Paia o Aso e Gata Ai Taumafai Pea” lea e faaalia ai mea sa ia aoaoina mai le gaoioiga.
Fai atu i tamaitai talavou e vaai faalemafaufau faapea o loo i ai sa latou uo o loo tauivi ma lona taua faaletagata. Fai atu ia i latou e saili i le lauga a Sister Rosemary M. Wixom “Iloaina o le Paia i Totonu o i Tatou” mo ni manatu i le auala e fesoasoani ai i lena uo ina ia malamalama i lona taua. O le a se aoaoga a Sister Wixom e uiga i lo tatou natura paia? O le a se mea e tatau ona tatou suia ina ia tatou faamaoni i lo tatou natura paia?
Faaali atu i tamaitai talavou se fatu laau, ma fesili atu ia i latou po o le a se laau latou te manatu o le a tupu mai ai. Faaali atu ia i latou le laau (po o se ata o le laau) lea o le a tupu mai le fatu laau. Fesili atu i tamaitai talavou pe faapefea i le avea ai o i tatou, o ni fanau o le Atua, ona pei o se fatu laau. Fai atu ia i latou e suesue i fuaitau o mau nei ma faasoa mai ni mea sa latou mauaina lea na aoao ai i latou po o ai i latou ma tagata e mafai ona avea ai i latou: 1 Ioane 3:1–3; MF&F 84:37–38; 88:107; 132:20. Fai atu i tamaitai talavou e faasoa mai le auala na aafia ai e lenei malamalama a latou filifiliga ma le auala latou te taulimaina ai isi fanau o le Atua. I le avea ai ma se vaega o lenei talanoaga, mafaufau e faasoa atu le faamatalaga lenei mai ia Peresitene Gordon B. Hinckley: “O le fuafuaga atoa o le talalelei o le taitaiina atu lea o i tatou agai i luma ma luga i taunuuga silisili, e ui ina avea ai o ni atua” (“Aua Ne'i Pa'u le Polo,” Ensign or Liahona, Nov. 1994, 48).
Ao lei amataina le vasega, tusi upu nei e tolu i luga o le laupapa: tupuaga, faamoemoega, taunuuga (mai le saunoaga a Peresitene Uchtdorf “Ola Fiafia i le Talalelei”). Usu faatasi le pese “O Le Atua Lo'u Tama” (Viiga, nu. 184), ma fesili atu i tamaitai talavou po o le a se mea sa latou aoaoina e uiga o latou tupuaga, faamoemoega, ma le taunuuga mai lenei pese. Fai atu ia i latou e tusi ni o latou manatu i luga o le laupapa i talaane o upu sa e tusiaina. Fai atu i tamaitai talavou e faitau ia vaega ”O Afafine o le Atua“ ma le ”Ola Fiafia i le Talalelei“ mai le saunoaga a Peresitene Uchtdorf ma tusi nisi upumoni sa latou aoaoina e uiga i o latou tupuaga, faamoemoega, ma le taunuuga. E mafai faapefea ona aafia e nei upumoni ia filifiliga latou te faia?
Fai atu i tamaitai talavou e lisi nisi o savali o tuuina mai e le lalolagi i tamaitai e uiga i le po o ai i tatou ma po o a uiga e faataua ai i tatou. Faaali le vitio “E Taua Ala Uma” po o le “O Lo Tatou Siosiomaga Moni,” ma fai atu i tamaitai talavou e faatusatusa savali o i nei vitio ma savali a le lalolagi. Fai atu ia i latou e sue ni mau, e aofia ai ni tala faatusipaia, lea e aoao atu ia i latou e uiga i lo latou taua o ni afafine o le Atua (e pei ona fautuaina mai i mau o i lenei otootoga). O le a se mea e mafai ona faia e tamaitai talavou e lagolago ai le tasi ma le isi ao latou taumafai e ola i lo latou siosiomaga moni o ni afafine o le Atua?

2:41

3:40
Faitau faatasi o se vasega ia parakalafa muamua e lua o le lauga a Elder D. Todd Christofferson “O Le Malosiaga Amiotonu o Tamaitai” ma faailoa mai nisi o meaalofa na tuuina atu e le Atua i Ona afafine. Faatasi ai ma se faatagaga mai le epikopo, fai atu i nisi o tamaitai talavou i le uarota e toe iloilo le lauga ma faasoa mai i tamaitai talavou mea sa latou faia e foia ai ia uunaiga le lelei i tulaga faatamaitai ma ia atiina ae a latou meaalofa paia. Fai atu i tamaitai talavou e faasoa mai ni o latou lava aafiaga ma le malamalamaaga i o latou matafaioi i le avea ai ma tamaitai ma po o le a se mea o le a latou faia ia avea ai ma se malosiaga mo le lelei.

Fai atu i tamaitai talavou e faasoa mai mea sa latou aoaoina i le aso. O a ni o latou lagona po o ni uunaiga o i ai? O latou malamalama po o ai i latou ma le tagata e mafai ona avea ai i latou? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Faatumu le vaega o le Amio Atua o mea faatonuina e fai mo le tulaga faatauaina 1, 2, po o le 6 mai le Alualu i Luma o le Tagata Lava Ia.
Tauloto le Salamo 82:6 ma toe fai soo e manatua ai lo latou faamoemoega paia.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.