Aisea e taua ai Iesu Keriso i lo’u olaga?

Na filifilia Iesu Keriso e avea ma o tatou Faaola. O lana Togiola ua mafai ai ona tatou toetutu ma salamo ma faamagaloina ina ia mafai ona tatou toe foi atu i le afioaga a lo tatou Tama Faalelagi. E le gata i le laveaiina o i tatou mai a tatou agasala o loo ofoina mai ia i tatou, e Iesu Keriso, lo tatou Faaola, le filemu ma le malosi i taimi o tofotofoga. Ua Ia setiina se faataitaiga atoatoa mo i tatou ma o Ana aoaoga faavae ia mo le fiafia i lenei olaga ma le ola e faavavau i le lalolagi a sau.

Saunia oe lava ia faaleagaga

Toe iloilo nisi o mau fuaitau e te fiafia i ai e uiga i le Faaola ma mafaufau loloto i lau molimau e uiga ia te Ia. Na faapefea ona e iloaina o Ia? O a ni aafiaga na e maua ai le loto faafetai mo Iesu Keriso ma Lana taulaga togiola?

E faapefea ona faamanuiaina tamaitai talavou i se molimau malosi ia Iesu Keriso? O le a se mea latou te ono faia e faalagolago atoatoa ai i aoaoga ma le Togiola a le Faaola?

O a ni mau ma nisi punaoa o le a fesoasoani i tamaitai talavou ina ia malamalama ia Iesu Keriso ma Ana uunaiga i o latou olaga i aso taitasi?

Ioane 14:6 (O Iesu Keriso o le ala, le upumoni, ma le ola)

Ioane 15:4–5 (A aunoa ma Iesu Keriso e le mafai ona tatou faia se mea)

Mosaea 3:17; Helamana 14:15–18; MF&F 18:11–12; 76:41–42 (Na faatoilalo e Keriso le agasala ma le oti)

Isaia 41:10, 13; Mataio 11:28–30; Ioane 14:27; Filipi 4:13; Mosaea 24:14–15; Alema 7:11–12; 36:3, 27; Eteru 12:27 (Ua ofo mai e le Togiola a Keriso le filemu ma le malosi i le tofotofoina po o le faaosoosoina)

David A. Bednar, “Ana Iloa e Outou o A’u,” Ensign po o le Liahona, Nov. 2016, 102–5

“O Le Keriso Soifua: O Le Molimau a Aposetolo” Liahona, Ape. 2000, 2–3 (tagai foi Faamaoni i le Faatuatua, 81–83; Alualu i Luma o le Tagata Lava Ia, 102)

José A. Teixeira, “Saili Atu i le Alii,” Ensign po o le Liahona, Me 2015, 96–98

Dallin H. Oaks, “O Aoaoga a Iesu,” Ensign po o le Liahona, Nov. 2011, 90–93

David A. Bednar, “Tauave ma le Faigofie a Latou Avega,” Ensign po o le Liahona, Me 2014

Vitio: “Toe Maua Mai,” “O Le Atua Moni e Toatasi Atoa Ma Le Na Ia Auina Mai o Iesu Keriso Lea,” “#Hallelujah—O Se Savali o le Eseta e uiga ia Iesu Keriso”

3:27

2:26

2:14

Aoao atu i le ala a le Faaola

Na valaaulia e le Faaola Ona soo e molimau atu, ma ao latou faia o lea, na pai atu le Agaga i o latou loto. A o e valaauliaina tamaitai talavou e faasoa mai a latou molimau ia Keriso ma Lana matafaioi i o latou olaga, o le a molimau mai le Agaga ia i latou e uiga i le moni o mea latou te tau mai. E mafai foi ona faamalolosia molimau a tamaitai talavou e ala i le faalogologo atu i isi (aemaise lava a latou uo) o molimau mai e uiga i le Faaola.

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni o oe lava manatu e faalauiloa atu ai le lesona o lenei vaiaso:

Faaali atu ni ata o le Faaola o loo fesoasoani atu i nisi (tagai Tusi Ata o le Talalelei, 36–60). Tuu atu ni nai minute i tamaitai talavou e mafaufau ai ma faasoa mai ni auala eseese na fesoasoani ai le Faaola ia i latou, o latou aiga, ma nisi latou te iloaina. Valaaulia i latou e faasoa mai ni o latou lagona e uiga i le Faaola.
Fai atu i tamaitai talavou e mafaufau loloto i le soifuaga ma aoaoga a le Faaola ao latou usuina pe faalogologo foi i se pese e uiga ia Iesu Keriso (e pei o le “Ua Ou Iloa Lo’u Faaola,” Viiga, nu. 73). Valaaulia i latou taitoatasi e tusi a latou lava tali i le fesili “Aisea e taua ai Iesu Keriso i lo’u olaga?”

Aoao faatasi

O le a fesoasoani ia gaoioiga taitasi nei i tamaitai talavou e malamalama ai i le mafuaaga e taua ai Iesu Keriso i o latou olaga. I le mulimuli ai i musumusuga a le Agaga, filifili se tasi po o le sili atu foi o le a sili ona aoga mo lau vasega:

Valaaulia ni nai tagata o le uarota ao lei taitai le taimi e o mai i le vasega ma faasoa mai se aafiaga na fesoasoani ia i latou ina ia iloa Iesu Keriso. Vaevae le vasega i ni vaega se fa ma atofaina atu i vaega taitasi e faitau se tasi o vaega o i le saunoaga Elder David A. Bednar “Ana Iloa e Outou o A’u.” Fai atu i vaega taitasi e tagai i a latou vaega mo tali i fesili nei: O le a le eseesega i le va o le iloaina e uiga ia Keriso ma le iloaina o Keriso? O le a se mea e mafai ona tatou faia ina ia iloa moni ai Keriso? O le a se taiala e mafai ona e faasoa atu ma uo o e mananao e faamalosia lo latou sootaga ma le Faaola?
Valaaulia ni tamaitai talavou e suesue i le lauga a Elder José A. Teixeira “Saili Atu i le Alii” ma vaavaai mo faamanuiaga na folafola mai e Elder Teixeira ia i latou o e saili Iesu Keriso. Valaaulia i latou e faasoa mai mea sa latou mauaina i le lauga ma mea o patino lava ona latou faia e avea ai le Faaola ma se vaega taua o lo latou olaga i aso taitasi. I le avea ai ma se vaega o lenei talanoaga, e mafai foi ona tou iloiloina faatasi ia mausa faigofie o loo fautuaina mai e ElderTeixeira i lana lauga. Valaaulia ia tamaitai talavou e seti ni sini e faaaoga ai se tasi o fautuaga na talanoaina i le vasega ina ia faalatalata atili mai ia Keriso
Faaali atu se ata o le Faaola. Tusi fesili nei i le laupapa: “O ai Iesu Keriso?” “O le a le mea ua Ia faia mo i tatou?” “E faapefea ona tatou iloa o loo soifua o Ia i le taimi nei?” Fai atu i tamaitai talavou e suesue i le “O Le Keriso Soifua: O Le Molimau a Aposetolo” e saili ai tali o nei fesili. Fai i ai e faasoa mai mea ua latou maua. Valaaulia nisi o i latou e faamatala mai pe na faapefea ona latou maua a latou molimau e uiga ia Iesu Keriso. E faapefea ona aafia e a latou molimau o latou olaga i aso taitasi? E mafai foi ona e faaalia le ata vitio “#Hallelujah—An Easter Message e uiga ia Iesu Keriso.”

2:14
Valaaulia tamaitai talavou e sue “Iesu Keriso” i le Topical Guide ma toe iloilo ia le lisi o faamatalaga i lalo ifo o le ulutala. E mafai foi ona latou saili ia “Iesu Keriso—Faaola” i Autu o le faasino upu i le tusipese e sue ai se pese o loo aoao atu ai ia mea na faia e Iesu Keriso mo i latou. Fai atu ia i latou e sue ni upu ma fuaitau o loo faamatalaina ai matafaioi ma le misiona a Keriso. O a mea na latou aoaoina e uiga ia Iesu Keriso i le iloiloina o lenei lisi? O a ni o latou lagona e uiga ia te Ia ina ua uma ona iloiloina mea sa Ia faia mo i tatou?
Totofi tamaitai talavou taitasi e faitau se tasi o mau o loo fautuaina atu i lenei otootoga po o se vaega e faatatau i ai i le lauga a Elder David A. Bednar “Tauave ma le Faigofie a Latou Avega.” Fai atu ia te ia e faamatala mai i ana lava upu po o le a le fesoasoani na ofoina mai e Iesu Keriso ia i latou o e mulimuli ia te Ia. Fai i tamaitai talavou e faasoa mai ni faataitaiga o le auala na latou molimauina ai le filemu po o le malosiaga o le Faaola i o latou lava olaga po o olaga o isi.
Faapipii i luga o puipui ni molimau o sui o le Au Peresitene Sili ia Iesu Keriso mai le lomiga o le Ensign po o le Liahona o le konafesi talu ai nei (e masani ona i ai i le faaiuga o lauga nei molimau). Fesili atu ia i latou po o a ni o latou lagona ina ua latou faalogo pe faitau foi i mau a molimau faapitoa a le Faaola. Fesili atu ia i latou pe na aafia a latou galuega i aso taitasi ona o a latou molimau ia Keriso. Tuu atu se taimi mo tagata o le vasega e faailoa mai ai lo latou alolofa ma le molimau ia Iesu Keriso.
Faitau le parakalafa i lalo o le ulutala “O Le Mea Sa Ia Faia mo i Matou” i le lauga a Elder Dallin H. Oaks “O Aoaoga a Iesu.” Faamata o le a se tali mai a tamaitai talavou i le fesili a le fafine “O le a Lana mea sa fai mo au?” Tusi i luga o le laupapa ulutala e iva na e sosoo ai mai le lauga (mai le “Ola i le Lalolagi” i le “O Le Togiola”). Valaaulia ia tamaitai talavou e filifili se tasi po o le sili atu foi o nei ulutala ma saunia se fuaiupu se tasi pe lua foi e mafai ona latou faaaogaina e aoao atu ai le fafine e uiga i mea sa faia e Iesu Keriso mo ia. E mafai ona latou faaaogaina le lauga a Elder Oaks, mau e faatatau i ai (e pei o mau ia o loo fautuaina mai i lenei otootoga), ma o latou lava aafiaga ma molimau. Valaaulia i latou e faasoa mai le mea sa latou saunia.
Faaali le ata vitio “Toe Maua Mai.” O le a se mea na aoao mai e tamaitai talavou mai le ata vitio e uiga i le mea e mafai ona faia e Iesu Keriso mo i latou? E mafai faapefea ona latou faaaogaina le savali mai lenei vitio e fesoasoani ai i tagata o loo faafaigata ona latou faamagaloina i latou lava pe lagona ua latou le maua le fesoasoani a le Faaola? O a ni mau latou te faaaogaina? (tagai, mo se faataitaiga, Isaia 1:18; Alema 36:3, 27; Eteru 12:27; MF&F 58:42–43).

3:27

Fai i tamaitai talavou e faasoa mai mea sa latou aoaoina i le aso.O a ni o latou lagona po o ni uunaiga?O latou malamalama pe aisea e taua ai Iesu Keriso i o latou olaga? Pe o i ai ni a latou fesili faaopoopo?Mata e aoga le faaaluina o se isi taimi i lenei aoaoga faavae?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Faatumu le vaega o mea faatonuina e fai mo le tulaga faatauaina o le Faatuatua 5 i le Alualu i Luma o le Tagata Lava Ia.
Taumafai ia faapei atili o le Faaola ma faasoa atu ni o latou aafiaga i se vasega i le lumanai.
Mafaufau i se tagata e mafai ona faamanuiaina i le iloaina o le mea sa faia e le Faaola mo i tatou ma fuafua ni auala e faasoa atu ai ni a latou molimau i lena tagata.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.