Pe mafai faapefea ona ou iloaina lou Tama Faalelagi?

O i matou o afafine o lo tatou Tama Faalelagi, e alofa ia i matou ma e finagalo ia matou faalatalata atu ia te Ia. Ua ia tuuina mai ia i matou le avanoa e tatalo atu ai ia te Ia ma ua folafola mai e faafofoga ma tali mai ia matou tatalo. E mafai foi ona tatou iloa o Ia pe a tatou suesue i tusitusiga paia faapea ma upu a perofeta o aso e gata ai ma pe a tatou taumafai ia avea atili faapei o Ia e ala i le mulimuli atu i Lona finagalo.

Saunia oe lava ia faaleagaga

Mafaufau i lou sootaga ma lou Tama i le Lagi. O le a se taimi na sili ona e latalata ai ia te Ia? O le a se mea na e faia sa mafai ai ona e lagonaina lou latalata atili ia te Ia?

O a ni lagona o tamaitai talavou i lau vasega e uiga ia i latou lava? E mafai faapefea i le mauaina o se sootaga malosi ma le Tama Faalelagi ona faamalosia ai lo latou tulaga o le taua o le tagata lava ia? E mafai faapefea ona e fesoasoani atu i tamaitai talavou ina ia faamalosia lenei sootaga?

O a ni mau ma nisi punaoa o le a fesoasoani i tamaitai talavou ia iloa le Tama Faalelagi?

Ioane 17:3 (O le taua o le iloaina o le Tama Faalelagi)

1 Ioane 2:3–5; 4:7–8; Enosa 1:1–7; Mosaea 4:9–12; 5:13; MF&F 88:63–65; 93:1 (O le auala tatou te iloaina ai le Tama Faalelagi)

C. Scott Grow, “O Le Ola e Faavavau Foi Lenei,” Ensign po o le Liahona, Me 2017, 121–24

D. Todd Christofferson, “Tumau i Lo’u Alofa,” Ensign po o le Liahona, Nov. 2016, 48-51

Robert D. Hales, “Saili ia Iloa le Atua, Lo Tatou Tama Faalelagi, ma Lona Alo o Iesu Keriso” Ensign po o le Liahona, Nov. 2009, 29–32

Vitio: “Nate Silafia A'u,” “Tatalo”

3:1

4:11

“Ua Ou Mautinoa o Soifua Lo’u Tama,” Viiga, nu. 185; “Lo’u Tama e,” Viiga, nu. 178

Aoao atu i le ala a le Faaola

Sa Ia saunia o Ia lava e aoao atu e ala i le faaaluina o se taimi na o Ia e tatalo ma anapogi ai. Sa Ia saili atu i le taitaiga a Lona Tama Faalelagi. A o outou sauniuni e aoao atu ia tamaitai talavou i le ala latou te mafai ai ona iloa le Tama Faalelagi, mulimuli i le faataitaiga a le Faaola ma faaalu se taimi e tatalo ma anapogi ai, ma saili le taitaiga a le Tama Faalelagi. I le faagasologa o au sauniuniga, taumafai ia faalatalata atu ia te Ia, ma faasoa atu lau molimau e uiga i le Tama Faalelagi i tamaitai talavou.

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni a oe lava manatu e faalauiloa atu ai le lesona o lenei vaiaso:

Usu le pese “Ua Ou Mautinoa o Soifua Lo’u Tama” (Viiga, nu. 185) po o le “Lo’u Tama e” (Viiga, nu. 178). Talanoa faatasi ma tamaitai talavou po o a ni mea o loo aoao mai e nei viiga ia i tatou e uiga i le Tama Faalelagi ma le auala e mafai ai ona tatou iloa o Ia.
Faatasi ai ma se faatagaga mai le epikopo, valaaulia se tamā o se tasi o tamaitai talavou e faasoa mai ona lagona e uiga i le avea ai ma se tamā. E mafai ona ia talanoa mai e uiga i ona lagona e faatatau i lona afafine, o mea na te faamoemoe o le ia ausiaina i lona olaga, ma le auala na te faamoemoe e fesoasoani ai ia te ia ina ia faamanuiaina. Fai atu i tamaitai talavou e faatusatusa mea na fai mai ai lenei tama ma lagona o lo latou Tama Faalelagi e uiga ia i latou.
Tusi fesili nei i luga o le laupapa: O anafea na sili ai ona e lagona le latalata atu i le Tama Faalelagi? O a ni mea sa e faia na mafai ai ona e lagonaina le latalata atu ia te Ia? Fai atu i tamaitai talavou e tusi a latou tali ma faasoa mai pe afai latou te lagonaina le toafilemu e faasoa mai ai.

Aoao faatasi

O gaoioiga taitasi o i lalo o le a fesoasoani i tamatai talavou ia malamalama i le auala e mafai ai ona latou iloa atili lo latou Tama Faalelagi. E ala i le mulimuli i musumusuga a le Agaga, filifili se gaoioiga se tasi pe sili atu foi lea o le a sili ona aoga mo lau vasega:

Valaaulia ia tamaitai talavou e suesue i auala e mafai ona tatou iloa ai le Tama Faalelagi e pei ona aoaoina i le saunoaga a Elder C. Scott Grow “O Le Ola e Faavavau Foi Lenei.” O a ni aafiaga e mafai ona faasoa mai e tamaitai talavou pe a fesoasoani se tasi o fautuaga nei ia latou lagona ai le latalata i le Tama Faalelagi? Aisea e taua ai le iloa lelei o le Tama Faalelagi?
Valaaulia tamaitai talavou e vaai faalemafaufau o loo fai atu se tasi o a latou uo ia i latou, “E alofa ma le atoatoa le Atua ia i tatou, o lea e le afaina ai pe faapefea ona tatou amioa’i—o le a faasaoina uma lava i tatou.” E faapefea ona latou tali atu i a latou uo? Valaaulia tamaitai talavou e iloilo vaega o le saunoaga a Elder D. Todd Christofferson “Tumau i Lo’u Alofa,” ma vaavaai mo fautuaga e mafai ona latou faaaogaina e fesoasoani ai i o latou uo ina ia malamalama i le alofa o le Atua.
Faaali atu ni mea e fai ma faatusa o le tatalo, le Agaga Paia, ma upu a perofeta (e pei o se telefoni feaveai, se moliuila, ma se faafanua). Tau atu i tamatai talavou o nei mea taitasi o loo suitulaga i se mea na tuuina atu e le Tama Faalelagi ia te oe ina ia e iloa atili ai o Ia. Valaaulia i latou e fautua atu po o a ni mea o loo faatusa i ai nei aitema. Faitau faatasi o se vasega le lauga a Elder Robert D. Hales “Saili ia Iloa le Atua, Lo Tatou Tama Faalelagi, ma Lona Alo o Iesu Keriso.” (Mafaufau e valaaulia tamaitai talavou e faitau le lauga lenei a o le’i o mai i le vasega.) Valaaulia ia tamaitai talavou e vaavaai mo ni faamatalaga lea e aoao ai i latou i le auala e mafai ona fesoasoani ai le tatalo, le Agaga Paia, ma upu a perofeta ina ia latou iloa le Tama Faalelagi. O a nisi mea latou te mafaufau ai i lenei lauga e mafai ona musuia ai i latou ina ia mananao ia iloa atili le Tama Faalelagi? Valaaulia i latou e faasoa mai o latou lagona e uiga i le Tama Faalelagi.
Atofa atu i tamaitai talavou taitasi se tasi o mau nei: 1 Ioane 2:3–5; 4:7–8; Enosa 1:1–7; Mosaea 4:9–12; 5:13; MF&F 88:63–65; 93:1. Fai atu i tamaitai talavou e suesue a latou fuaitau o mau ma tagai mo ni auala e mafai ai ona latou iloa le Tama Faalelagi. Valaaulia i latou e faasoa mai ni mea latou te aoaoina ma soo se aafiaga ua latou iloaina ai lo latou Tama Faalelagi i nei auala.
Valaaulia ia tamaitai talavou e faitau le Ioane 17:3, ma fai atu ia i latou e faamatala mai le eseesega i le va o le iloaina e uiga i se tasi ma le iloaina o se tagata. Valaaulia i latou e mafaufau e uiga i se tasi latou te iloa lelei. O le a se mea sa latou faia e iloa ai lena tagata? Tusi a latou tali i luga o le laupapa. E mafai faapefea ona tatou faia ni metotia talitutusa ia iloa ai le Tama Faalelagi? Valaaulia le vasega e faitau le Enosa 1:1–7 ma vaavaai mo auala e mafai ona faaleleia ai a latou fesootaiga ma le Tama o i le Lagi. A uma ona latou talanoaina mea na latou maua, valaaulia i latou e mafaufau loloto i a latou fegalegaleaiga ma le Tama Faalelagi mo ni nai minute ma mafaufau i mea e mafai ona latou faia e faaleleia ai.
Tusi i luga o le laupapa: “E alofa le Tama Faalelagi ia i tatou ma e finagalo ia i tatou ia faalatalata atu ia te Ia. Ua Ia tuuina mai ia i tatou le avanoa e tatalo atu ai ia te Ia.” Fai atu i se tamaitai talavou e faitau leotele mai ia faamatalaga nei, ma valaaulia le vasega e faasoa mai ni aafiaga sa latou maua e uiga i le tatalo. Faaali le vitio “Tatalo”. O a ni mea na uunaia ai tamaitai talavou e uiga i le molimau a Peresitene Monson? O le a se mea na matauina e tamaitai talavou e uiga i le sootaga a Sister Ogando ma le Tama Faalelagi? O le a le matafaioi na faia e le tatalo i lena sootaga? Tuu atu i tamaitai talavou ni nai minute e toe manatunatu ai i le latou sootaga ma le Tama Faalelagi ma pe faapefea ona latou faaleleia lena sootaga.

4:11

Fai atu i tamaitai talavou e faasoa mai ni mea sa latou aoaoina i le asō. O a ni lagona po o ni uunaiga o latou mauaina? Pe o latou malamalama i le auala e mafai ai ona latou iloaina lelei lo latou Tama Faalelagi? Pe i ai ni isi a latou fesili? Pe e aoga le faaaluina atili o le taimi i lenei aoaoga faavae?

Ola i mea o tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Tusi i totonu o a latou api talaaga se mea sa latou fuafuaina e faia e faaleleia ai lo latou sootaga ma le Tama Faalelagi ma mulimuli ai i le latou fuafuaga.
Faatumu le vaega o le Taua o le Tagata Lava Ia o mea faatonuina e fai mo le tulaga faatauaina 1 mai le Alualu i Luma o le Tagata Lava Ia.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.