O le a se mea tatou te iloa e uiga i le natura o le Aiga Atua?

O loo i ai i le Aiga Atua le Atua le Tama Faavavau, le Faaola o Iesu Keriso, ma le Agaga Paia. E ui o le Aiga Atua o ni tagata mavaevae ma e tofu ma matafaioi, ae e tasi lo Latou faamoemoe. Ua lotogatasi a’ia’i i latou i le faataunuuina o le fuafuaga o le faaolataga a le Tama Faalelagi.

Saunia oe lava ia faaleagaga

E faapefea e le malamalama i le Aiga Atua ona fesoasoani ia te oe ia iloa ai po o ai oe? E faapefea e lo tatou malamalama i le Aiga Atua ona ese mai i talitonuga o isi tapuaiga?

Pe o malamalama tamaitai talavou i le auala e galulue faatasi ai sui e toatolu o le Aiga Atua? E faapefea ona fesoasoani le iloaina o le natura o le Aiga Atua i tamaitai talavou?

O a ni mau ma ni lauga o le a fesoasoani i tamaitai talavou ina ia malamalama i le natura o le Aiga Atua ma la Latou matafaioi o loo faataunuuina i o latou olaga?

Kenese 1:27 (Na faia le tagata i le faatusa o le Atua)

Mataio 3:16–17; Ioane 14:16; Galuega 7:55–56; 3 Nifae 11:4–11; Iosefa Samita—Talafaasolopito 1:17; Mataupu Faavae o le Faatuatua 1:1 (E toatolu sui o le Aiga Atua)

Luka 24:39; Ioane 1:14; MF&F 130:22 (E toalua sui o le Aiga Atua e i ai ni tino faaletino)

Ioane 17:21; 1 Ioane 5:7; Alema 11:44; MF&F 20:28 (O le Aiga Atua ua tasi i latou)

“Aiga Atua,” Faamaoni i le Faatuatua (2004), 12–13

Dallin H. Oaks, “O Le Aiga Atua ma le Ata o le Faaolataga,” Ensign po o le Liahona, Me 2017, 100–103

Boyd K. Packer, “O Le Toasefululua,,”Ensign po o le Liahona, Me 2014, 94-97

Robert D. Hales, “O Le Ola e Faavavau—ia Iloa lo Tatou Tama Faalelagi ma Lona Alo o Iesu Keriso” Ensign po o le Liahona, Nov. 2014, 80-82

Vitio: “O Le Toefuataiga”

19:15

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni o oe lava manatu e faalauiloa atu ai le lesona o lenei vaiaso:

Tusi i luga o le laupapa, “O le a se mea tatou te iloa e uiga i le natura o le Aiga Atua?” Valaaulia ia tamaitai talavou e faitau le Mataupu Faavae o le Faatuatua 1:1 po o le Mataupu Faavae ma Feagaiga 130:22 e vaai ai mo ni tali o lenei fesili.
Tusi upu o loo maua i le Mataupu Faavae ma Feagaiga 130:22 i luga o le laupapa, ma faaavanoa ia tulaga e tuu ai isi upu autu. Valaaulia ia tamaitai talavou e mafaufau po o fea o upu e tatau ona tuu i avanoa, ona faatumu lea faatasi e le vasega.
Valaaulia ia tamaitai talavou e faatino se tala i le auala latou te aoao atu ai se tagata e le auai i lo tatou faatuatuaga e uiga i sui eseese e toatolu o le Aiga Atua. Faamata o a ni mau o le a latou faaaogaina? Aisea latou te lagona ai e taua tele lenei malamalama?

Aoao faatasi

O le a fesoasoani gaoioiga taitasi nei i tamaitai talavou e malamalama ai i natura o le Aiga Atua. I le mulimuli ai i le taitaiga a le Agaga, filifili se tasi pe sili atu e aoga mo lau vasega:

Valaaulia tamaitai talavou e mafaufau i ni luitau o feagai ma tamaitai talavou i lenei vaitaimi. O le a se mea na maua e tamaitai talavou i le vaega IV o le saunoaga a Elder Dallin H. Oaks “O Le Aiga Atua ma le Ata o le Faaolataga” lea e mafai ona fesoasoani ia i latou i nei luitau? Ina ia fesoasoani ia i latou e aoao atili i sui o le Aiga Atua, vaevae ia tamaitai talavou i ni vaega se tolu, ma tuu atu ia tofu vaega taitasi ma se fasi pepa o i ai ia ulutala nei: “Le Atua le Tama,” “O Le Aso,” ma le “O Le Agaga Paia.” Valaaulia vaega taitasi e sue i le vaega o sosoo ai o le saunoaga a Elder Oaks ma sue ia mau na ia faasoa mai. Fai atu i tamaitai talavou e faamaumau mea sa latou aoaoina i luga o a latou pepa ma faasoa mai o latou manatu i le vasega. E mafai faapefea e upumoni na tatou aoaoina e uiga i le Aiga Atua ona fesoasoani ia i tatou i luitau na tatou mauaina?
Tusi ”Le Atua le Tama,“ ”Iesu Keriso,“ ma le ”O Le Agaga Paia“ i luga o le laupapa. Filifili ni vaega mai le saunoaga a Peresitene Boyd K. Packer “O Le Molimau” lea o le a fesoasoani i tamaitai talavou ina ia malamalama i le Aiga Atua. Tuu atu ia tofu tamaitai talavou ma se vaega e faitau lemu ona aotele mai lea i ana lava upu i le vaega atoa o le vasega. Ao ia lipoti mai, fai atu ia te ia e tusi i luga o le laupapa i lalo o le ulutala talafeagai mea sa ia aoaoina e uiga i lena sui o le Aiga Atua. Aisea e lagona ai e tamaitai talavou e taua le malamalama i nei upumoni e uiga i le Aiga Atua? E faapefea ona latou faamatalaina o latou talitonuga ia i latou e eseese o latou vaaiga i le Aiga Atua?
Valaaulia tamaitai talavou taitasi e faitau le “Aiga Atua” i le Faamaoni i le Faatuatua. Fai i se tasi o tamaitai talavou e faasoa mai se mea sa ia aoaoina mai lana faitauga. Ona fai atu lea i se isi tamaitai talavou e toe faamatala mai le mea sa tau mai e le tamaitai talavou muamua ona faasoa mai lea o se isi mea sa aoaoina e ia lava ia. Toe fai seiiloga ua maua e tamaitai talavou taitasi le avanoa e faasoa mai ai. Fesili atu i tamaitai talavou pe faapefea ona ese la tatou vaaiga i le Aiga Atua mai vaaiga a isi tapuaiga. E mafai faapefea i le mauaina o se vaaiga sao e uiga i le Aiga Atua ona faamanuiaina ai tamaitai talavou?
Tusi ulutala e tolu i luga o le laupapa: ”E toatolu sui o le Aiga Atua,“ ”E tuufaatasia le Aiga Atua ma e tasi i latou,“ ma le ”O le Tama Faalelagi ma Iesu Keriso e i ai tino faaletino.“ Tusi mau faasino e uiga i le Aiga Atua (e pei o mau na o loo lisiina atu i lenei otootoga) i luga o ni tamai kata. Fai atu i tamaitai talavou e auauai i le pikiina o se kata, faitauina leotele o le mau, ma tusi le mau faasino i lalo o le ulutala talafeagai i luga o le laupapa (o nisi o mau e ono sili atu ma le tasi se ulutala e aafia ai). E mafai faapefea e le iloaina o nei upumoni e uiga i le Aiga Atua ona faamanuia ai tamaitai talavou? Uunaia tamaitai talavou e teu se lisi o nei mau faasino i totonu o a latou tusitusiga paia ina ia mafai ona latou faaaogaina e aoao atu ai isi e uiga i le Aiga Atua.
Tuu atu i tamaitai talavou se pepa o i ai fesili nei: E faapefea ona e faamatalaina le mafutaga a le Faaola ma Lona Tama? O le a le tulaga e tasi ai le Tama ma le Alo? O a ni matafaioi a le Agaga Paia? Fai atu ia i latou e mafaufau loloto i nei fesili ao latou matamata, faalogologo, pe faitau i le lauga a Elder Robert D. Hales “O Le Ola e Faavavau—ia Iloa lo Tatou Tama Faalelagi ma Lona Alo o Iesu Keriso.” Tuu atu ia i latou se taimi e tusi ai a latou tali, ma valaaulia i latou e faasoa mai mea sa latou tusia.

Fai i tamaitai talavou e faasoa mai mea sa latou aoaoina i le aso. Pe ua latou malamalama i le natura o le Aiga Atua? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa Faafaiaoga

E mafai ona e faaaogaina gaoioiga e aoao ai i lenei vaega e fuafua ai po o a ni mea ua uma ona iloa e tamaitai talavou e uiga i le aoaoga faavae ma po o a mea o loo manaomia pea latou aoaoina. Ia nofo sauni e fetuunai le fuafuaga o lau lesona e fetaui lelei ma o latou manaoga pe a talafeagai ai.

Ola i mea o tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Tauloto ma mafaufau loloto i le mataupu faavae o le faatuatua muamua ma faasoa atu i se tasi.
Faatumu le vaega o le Amio Atua o mea faatonuina e fai mo le tulaga faatauaina 2 i le Alualu i Luma o le Tagata Lava Ia.
Aoao atu se lesona o le afiafi faaleaiga e uiga i le Aiga Atua, faaaoga mau sa latou suesueina i le faagasologa o lenei lesona.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.