O a tulaga faatonuina a le Ekalesia e faatatau i tafaoga faamasani?

Ua tuuina mai ia i tatou e perofeta o aso e gata ai ni tulaga faatonuina e uiga i tafaoga faamasani e puipuia ai i tatou mai lamatiaga faaleagaga ma fesoasoani ia i tatou e saunia ina ia i ai se aso o le a maua ai se soa agavaa e faavavau. O nei tulaga faatonuina e aofia ai le aua nei tafao faamasani ao lei atoa le 16 tausaga, aloese mai le tafafao soo ma le tagata lava e tasi, ma ia na o i latou e maualuga o latou tulaga faatonuina o le ola mama e te tafao faamasani i ai.

Saunia oe lava ia faaleagaga

O a ni faataitaiga na e vaaia na aoao ai oe i le taua o le usiusitai i tulaga faatonuina a le Alii e faatatau i tafaoga faamasani?

O a ni aafiaga ma ni aitia o loo mamanuina ai le vaaiga a tamaitai talavou e uiga i tafaoga faamasani? O a ni uunaiga o latou faalogoina? O le a se mea latou te manaomia ina ia tumau faamaoni ai i tulaga faatonuina a le Alii?

Suesue ma le agaga tatalo mau ma punaoa nei. O le a se mea o e lagona e sili ona faatatau i tamaitai talavou ao amata ona latou fegalegaleai ma alii talavou?

Teuteronome 7:3–4 (Aua nei faaipoipo i fafo atu o le feagaiga)

Mataupu Faavae ma Feagaiga 46:33 (Faataitai le ola mama ma le paia i luma o le Alii)

Mataupu Faavae o le Faatuatua 1:13 (O uiga e ao ona tatou atinaeina mo i tatou lava a o tatou saili mo se soa e faavavau)

Thomas S. Monson, “O Sauniuniga e Aumaia ai Faamanuiaga,” Ensign po o le Liahona, Me 2010, 65.

Elaine S. Dalton, “Leoleo o le Mama,” Ensign po o le Liahona, Me 2011, 121–24.

“Tafaoga Faamasani,” Mo Le Malosi o le Autalavou (2011), 4–5

Vitio: “O Se Tausaga Fou 2010: Faamasaniga”

Aoao atu i le ala a le Faaola

Na tuuina atu e le Faaola ia i latou o e na mulimuli ia te Ia ni avanoa e fai atu ai ni a latou lava fesili ma faasoa atu o latou malamalamaaga. Sa tali atu o ia i a latou fesili ma faafofoga atu i o latou aafiaga. Ona o Lona alofa, sa latou lagona ai le saogalemu i le faasoaina atu o o latou manatu ma lagona patino. E mafai faapefea ona e fesoasoani i tamaitai talavou ia lagona le saogalemu i le faasoaina mai o a latou fesili ma lagona patino?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Tagai i isi manatu e aoao mai ma aoao atu ai.

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

• Fesili i tamaitai talavou po o a ni a latou fesili o i ai e uiga i le tafao faamasani ma tusi i luga o le laupapa. Valaaulia i latou e vaavaai mo tali o a latou fesili i le faagasologa o le lesona.

• Fai i tamaitai talavou e lisi i luga o le laupapa mea ua latou iloa e uiga i tulaga faatonuina a le Ekalesia e faatatau i le tafafao faamasani. Faaopoopo i le lisi ao latou aoao atili e uiga i nei tulaga faatonuina i le faagasologa o le lesona.

Aoao faatasi

Tagai i isi manatu e aoao mai ai ma aoao atu.

O gaoioiga taitasi nei o le a mafai ona fesoasoani i tamaitai tavou ia aoao ai e uiga i tulaga faatonuina a le Ekalesia e faatatau i tafaoga faamasani. I le mulimuli ai i le taitaiga a le Agaga, filifili se tasi po o le sili atu o le a sili ona aoga i lau vasega:

• Fai atu i tamaitai talavou taitoatasi e filifili se upu po o se fuaitau mai le mataupu faavae o le faatuatua lona sefulutolu ma faamatala mai pe o faapefea ona fesootai lana upu po o le fuaitau i tulaga faatonuina o i le vaega o “Tafaoga Faamasani” i le Mo le Malosi o le Autalavou. Fai i tamaitai talavou e faasoa mai pe o faapefea ona aafia e mataupu faavae o i le mataupu faavae o le faatuatua lona sefulutolu a latou fegalegaleaiga ma alii talavou.

• Faitau le parakalafa o le saunoaga a Sister Elaine S. Dalton “Leoleo o le Mama” lea e amata i le fesili “O le a se mea e mafai ona fai e outou taitoatasi e avea ai ma se leoleo o le mama?” Fai i tamaitai talavou e talanoa i le auala o fesootai ai le fautuaga a Sister Dalton i tafaoga faamasani. Valaaulia ia tamaitai talavou e faitau le Alema 46:11–14, ma talanoa i le auala na fesoasoani ai le tagavai o le saolotoga e uunaia ia sa Nifae e puipuia lo latou saolotoga. Valaaulia ia tamaitai talavou e fai se pepa lautele e i ai se savali e mafai ona fesoasoani ia i latou e leoleo lo latou mama. E mafai ona latou tusia i luga o le pepa lautele se mea o le a latou faia e avea ai ma leoleo o le mama ao latou tafafao faamasani ai (tagai i le “Tafaoga Faamasani” i le Mo le Malosi o le Autalavou, itulau 4–5).

• Faaali atu ni vaega o le “O se Tausaga Fou 2010: Faamasaniga,” ma taofi le vitio ina ia tuu atu i tamaitai talavou se taimi e faailoa mai ai ni tulaga faatonuina e faatatau i tafaoga faamasani o loo ta’ua e tagata o i le vitio. Fai atu i tamaitai talavou e toe suesue ia “Tafaoga Faamasani” o i le Mo le Malosi o le Autalavou ma vaavaai mo nisi tulaga faatonuina e lei talanoaina i le vitio. Aisea e taua ai nei tulaga faatonuina? Mafaufau e faasoa atu ni faataitaiga o le ala na faamanuiaina ai oe i le tausia o tulaga faatonuina a le Ekalesia e faatatau i tafaoga faamasani ma valaaulia isi e faasoa mai ni aafiaga tali tutusa.

• Valaaulia ia tamaitai talavou e toe iloilo le vaega o le “Tafaoga Faamasani” o i le Mo le Malosi o le Autalavou ma tusi i lalo soo sa latou fesili o i ai e faatatau i tafaoga faamasani. Valaaulia se vaega o alii ma tamaitai talavou matutua e taliina a latou fesili ma talanoa i tulaga faatonuina o le tafaoga faamasani. Uunaia tagata o le vaega e faaaofia ai ni faataitaiga o le ala na latou ola ai i tulaga faatonuina ao latou tafafao faamasani, e pei o le laei tauagafau, filifiliina o ni gaoioiga talafeagai, ma le tafao faamasani ia i latou e maualuluga a latou tulaga faatonuina.

Fai i tamaitai talavou e faasoa mai mea sa latou aoaoina i le aso. Pe o latou malamalama i tulaga faatonuina a le Ekalesia e faatatau i tafaoga faamasani? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“Fesili atu ia i latou o loo e faiaoga ai po o le a sa latou tala e fai pe afai ua manao se tasi e fia iloa po o a mea na latou aoaoina mai le lesona” (O Le Aoao Atu, E Leai Se Isi Valaauga E Sili Ai [1999], 101).

Ola i mea ua tatou aoaoina

Tagai i isi manatu e aoao mai ai ma aoao atu.

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

• Talanoa i se tagata sa setiina se faataitaiga lelei e ala i le mulimuli i tulaga faatonuina a le Alii e faatatau i tafaoga faamasani, ma saili po o a ni mea sa ia faia e tetee atu ai i faasosoosoga o le mulimuli i tulaga faatonuina a le lalolagi e faatatau i tafaoga faamasani.

• Seti se sini e usitai i tulaga faatonuina a le Alii e faatatau i tafaoga faamasani.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.