Aisea e taua ai feagaiga i lou olaga?

Tatou te osia feagaiga pe a tatou maua sauniga e pei o le papatisoga, faauuga i le perisitua, ma sauniga o le malumalu. O se feagaiga o se maliega paia lea e faia i le va o le Atua ma Ana fanau.E faatulaga e le Atua ni aiaiga faapitoa, ma ua Ia folafola mai e faamanuia i tatou pe a tatou usiusitai i nei aiaiga. O le osia ma le tausia o feagaiga e faaagavaaina i tatou e maua faamanuiaga ua folafola mai e le Atua. Pe afai tatou te filifili e le tausia feagaiga, e le mafai ona tatou maua faamanuiaga. O a tatou feagaiga e taitaia filifiliga tatou te faia ma fesoasoani ia i tatou e tetee atu i faaosoosoga.

Saunia oe lava ia faaleagaga

Ua faapefea ona uunaia lou olaga e au feagaiga? O a faamanuiaga na e mauaina ao e osia ma tausia feagaiga paia?

E mafai faapefea ona e fesoasoani i tamaitai talavou ia malamalama i feagaiga sa latou osia ma o le a latou osia i le lumanai? E faapefea e le malamalama i feagaiga ona uunaia ia tamaitai talavou ina ia ola amiotonu atili?

A o e sauniuni, suesue ma le agaga tatalo ia mau ma punaoa nei. O le a se mea ua musuia oe e faasoa atu i tamaitai talavou?

Esoto 19:5; MF&F 35:24; 90:24 (E oo mai faamanuiaga pe a tatou tausia feagaiga)

Mosaea 5; Alema 53:10–18; 56:5–8 (O faataitaiga i le Tusi a Mamona o tagata na osia ma tausia feagaiga)

MF&F 82:10 (E noatia le Alii pe a tatou usiusitai)

Henry B. Eyring, “O Afafine i le Feagaiga,” Ensign po o le Liahona, Me 2014, 125-28

Rosemary M. Wixom, “O Le Tausia o Feagaiga e Puipuia ai i Tatou, Saunia ai i Tatou, ma Faamalosia ai i Tatou,” Ensign po o le Liahona, Me 2014, 116-18

Jean A. Stevens, “Afafine o le Feagaiga a le Atua,” Ensign po o le Liahona, Nov. 2014, 114–17

“Feagaiga,” Faamaoni i le Faatuatua (2004), 67

Vitio: “Walk in His Light” “Fetaomi Atu i Luma”

Aoao atu i le ala a le Faaola

Sa saunia o Ia lava e aoao atu e ala i le faaaluina o le taimi e tatalo ma anapogi ai na o Ia lava. I taimi patino, sa Ia sailia ai le taitaiga a Lona Tama (tagai 3 Nifae 19:19–23). Mulimuli i musumusuga a le Agaga Paia a o e sauni e aoao atu tamaitai talavou e uiga i sauniga ma feagaiga.

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Tagai i isi manatu e aoao mai ai ma aoao atu .

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

• Fai atu i tamaitai talavou e lisi feagaiga po o folafolaga na latou osia ma le Atua. Na faapefea ona uunaia o latou olaga e nei feagaiga? Fautuaina i latou e faaauau ona mafaufau e uiga i lenei fesili a o latou aoao atili e uiga i feagaiga i lenei lesona.

• Fai atu i tamaitai talavou e sue le uiga o le upu feagaiga (afai latou te manaomia se fesoasoani, faasino i latou i le faamatalaga e uiga i feagaiga i le Faamaoni i le Faatuatua). E faapefea ona tutusa le feagaiga pe eseese foi ma se maliliega, se konakarate, po o se folafolaga?

Aoao faatasi

Tagai i isi manatu e aoao mai ai ma aoao atu.

O le a fesoasoani gaoioiga taitasi nei i tamaitai talavou e malamalama ai i le auala tatou te maua ai sauniga ma osia feagaiga. I le mulimuli ai i le taitaiga a le Agaga, filifili se tasi pe sili atu e aoga mo lau vasega:

• Faaali atu se ata o le nuu o Amona o loo tanuina a latou auupega. Fai atu i se tamaitai talavou e faamatala faapuupuu mai le tala e uiga i le nuu o Amona ma le feagaiga sa latou osia (tagai Alema 53:10–18; 56:5–8). Aisea na filifili ai le nuu e tausia a latou feagaiga e ui i tulaga lamatia sa feagai ma i latou? Na faapefea ona faatosinaina o latou fili i a latou faataitaiga? Na faapefea ona faatosinaina ai a latou fanau? Valaaulia tamaitai talavou taitoatasi e tusi i luga o le laupapa le igoa o se tagata o le sa aoaoina o ia e ala atu i faataitaiga i le tausiga o feagaiga. Fai atu ia te ia e faasoa mai i le vasega le mea sa ia aoaoina mai lena tagata.

• Valaaulia ia tamaitai talavou e faitau ia mau (e pei o na o loo lisiina atu i lenei otootoga) ma lisi i luga o le laupapa ia faamanuiaga na folafola atu mai nei mau ia i latou o e osia ma tausia feagaiga paia. Fesili i tamaitai talavou pe o faapefea ona faataunuuina nei faamanuiaga i o latou olaga (uunaia i latou e faasoa mai ni faataitaiga). Molimau atu i faamanuiaga sa e mauaina a o e tausia ia feagaiga.

• Valaaulia ia tamaitai talavou e suesue i le lauga a Peresitene Henry B. Eyring “O Afafine i le Feagaiga” po o le lauga a Sister Jean A. Stevens “Afafine o le Feagaiga a le Atua.” Fai atu ia i latou e tagai mo ni faataitaiga o tamaitai ma teineiti tausi feagaiga i le lauga ma tusi i luga o le laupapa le auala na tausia ai e tamaitai taitasi ana feagaiga. O a ni mea ua aoao e tamaitai talavou mai nei uso? O a ni faataitaiga a tamaitai tausi feagaiga na faatosinaina o latou olaga?

• Matamata o se vasega le vitio “Walk in His Light.” Fai atu i tamaitai talavou e fai se lisi, ao latou matamata, o ni faataitaiga ua latou vaaia o ni feagaiga sa osia ma tausia. A maea le vitio, fai atu ia i latou e suesue i le lauga a Sister Rosemary M. Wixom “O Le Tausiga o Feagaiga e Puipuia ai i Tatou, Saunia ai i Tatou, ma Faamalosia ai i Tatou” e faailoa mai ai ia faamanuiaga lea e oo mai mai feagaiga o loo i a latou lisi. Fai atu i tamaitai talavou e faasoa mai mea sa latou mauaina ma talanoa i tulaga faapitoa e mafai ona feagai ma i latou lea e mafai ona latou maua ai le malosi po o le puipuiga i a latou feagaiga.

• Valaaulia ia tamaitai talavou e vaai faalemafaufau ia i latou o loo taumafai e fesoasoani e faamalamalama i se uo mai se isi faatuatuaga e uiga i feagaiga. Valaaulia i latou e suesue i le “Feagaiga” i leFaamaoni i le Faatuatua po o mau o loo lisiina atu i lenei otootoga ma saunia ni auala e faamatala ai ia feagaiga i le latou uo. Valaaulia i latou e faatino se tala o le aoao atu o le tasi ma le isi. Fai atu ia i latou e faaaofia i la latou faamatalaga ia mafuaaga e taua ai feagaiga ia i latou.

Fai i tamaitai talavou e faasoa mai mea sa latou aoaoina i le aso. Pe ua sili atu lo latou malamalama i feagaiga? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“E mafai ona e faaalia o loo e faalogo atu e ala lea i lou faailoa atu o se foliga o le naunau. E mafai ona e vaai i le tagata o loo tautala nai lo anomea o lau lesona po o nisi mea o loo i totonu o le potu. E mafai ona e uunaia le tagata o loo tautala e faauma ona manatu e aunoa ma le faalavelaveina. E mafai ona e aloese mai le faasalaveia o talanoaga ae lei taitai i ni fautuaga po o ni faaiuga” (O Le Aoao Atu, E Leai Se Isi Valaauga E Sili Ai [1999], 69).

Vitio: “Faaaogaina o Ata”

Matamata atili

Ola i mea ua tatou aoaoina

Tagai i isi manatu e aoao mai ma aoao atu ai .

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

• Iloilo o latou olaga i le vaiaso a sau ma tusi faamanuiaga e oo mai ona o le tausia o a latou feagaiga. Fautuaina i latou e faasoa mai o latou manatu ma malamalamaaga i vasega o i le lumanai.

• Tauloto le MF&F 82:10 ma tusi ia latou tusi talaaga le mea o loo aoaoina mai e lenei mau e uiga i sauniga ma feagaiga ma mea o le a latou faia e saunia ai mo feagaiga o le a latou osia i le lumanai.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.