Aisea e taua ai feagaiga i lo’u olaga?

O se feagaiga o se faatinoga aloaia lea e i ai se uiga faaleagaga. O sauniga e faia i le pule o le perisitua ma i lalo o le taitaiga a i latou o e umia ki o le perisitua. E fesoasoani sauniga ia i tatou e manatua po o ai i tatou ma faamanatu mai ia i tatou lo tatou sootaga ma le Atua. Latou te fesoasoani ia i tatou e o mai ia Keriso ma maua le ola e faavavau.

Saunia oe lava ia faaleagaga

O a sauniga o le talalelei ua e mauaina? O faapefea ona faamanuiaina lou olaga e nei sauniga? Aisea e taua ia te oe?

O a sauniga ua mauaina e tamaitai talavou? O a sauniga o latou sauniuni ina ia mauaina? Aisea e manaomia ai lo latou malamalama i le taua o sauniga o le talalelei?

Ia suesue ma le agaga tatalo ia mau ma punaoa nei. O a mea ua musuia ai oe e faasoa atu i tamaitai talavou ina ia fesoasoani ia i latou ia malamalama i le taua o sauniga?

Mataio 3:13–17 (Papatisoga o Iesu Keriso)

Galuega 19:1–6 (Ua toe papatiso e Paulo tagata e le’i sao ona papatisoina)

3 Nifae 11:21–26 (Ua tuu atu e Iesu Keriso le pule e papatiso ai ma faatonu atu le auala sao e fai ai)

Moronae 8:10–12 (Ua aoao atu Mamona e uiga i le papatisoga)

MF&F 84:19–21 (O le mana faaleatua o loo faaalia e ala mai sauniga o le perisitua)

Mataupu Faavae o le Faatuatua 1:3–5 (E manaomia sauniga mo le faaolataga)

David A. Bednar, “[Faatumauina] Pea le Faamagaloina o a Outou Agasala,” Ensign po o le Liahona, Me 2016, 59–62

Gary E. Stevenson, “O Lau Fa Minute,” Ensign po o le Liahona, Me 2014, 84–86

“Faauuga ma Faamanuiaga o le Perisitua,” Tusitaulima 2: Taitaiina o le Ekalesia (2010), 20.1

“Sauniga,” Faamaoni i le Faatuatua (2004), 154–55

Vitio: “Faith in the Power of the Priesthood”

1:38

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Tusi le upu sauniga i le laupapa, ma fai atu i tamaitai talavou e tau mai ni uiga o lenei upu (afai latou te manaomia se fesoasoani, faasino i latou i le parakalafa i le amataga o lenei otootoga). Pe o le a faapefea ona tali atu tamaitai talavou i se tasi e faapea mai e le manaomia sauniga? (Afai e manaomia e tamaitai talavou ni manatu, e mafai ona latou faasino i le vaega ua faaulutalaina “O Le Agaga Paia ma Sauniga Faaleperisitua” i le saunoaga a Elder David A. Bednar “ [Faatumauina] Pea le Faamagaloina o a Outou Agasala.”)
Fai atu i tamaitai talavou e lisi i lalo le tele o sauniga o le talalelei e mafai ona latou mafaufau i ai. Fesoasoani ia i latou e faailoa mai sauniga i le lisi e manaomia mo le faaeaga (afai latou te manaomia le fesoasoani, e mafai ona latou faitau i le “Sauniga” i le Faamaoni i le Faatuatua). Aisea na tuuina mai ai e le Tama Faalelagi nei sauniga ia i tatou?

Aoao faatasi

O le a fesoasoani gaoioiga taitasi nei i tamaitai talavou e malamalama ai i le taua o sauniga. I le mulimuli ai i le uunaiga a le Agaga, filifili se tasi pe sili atu e aoga mo lau vasega:

I le saunoaga a Elder David A. Bednar “Always Retain a Remission of Your Sins,” o le vaega o le “Mauaina ma le Faatumauina o se Faamagaloga o Agasala e Auala mai i Sauniga” o loo faamatala ai faamanuiaga o sauniga o le papatisoga, faaee o lima mo le meaalofa o le Agaga Paia, ma le faamanatuga. Ina ia fesoasoani i tamaitai talavou e aoao e uiga i le auala e mafai ai ona fesoasoani nei sauniga ia i tatou, fai atu i tamaitai talavou taitasi e piki se sauniga se tasi ma lisi uma mai mea sa ia aoaoina e uiga i ai mai lenei vaega. Ona fai atu lea i tamaitai talavou e aoao atu mea sa latou aoaoina i le vasega atoa i se auala ola pe sogasoga—atonu e ala i le faaoagaina o ni ata po o le faia o se taaloga.
Valaaulia se malo faaaloalogia e avea ma failauga po o se tamaitai talavou sa ausia se mea taua e faasoa mai po o a ni tulaga manaomia o le mea sa ia ausiaina ma le auala sa ia faataunuuina ai (atonu sa ia mauaina se taui o le Alualu i Luma o le Tagata Lava Ia, mauaina se faailoga faaakatemia, po o le mauaina o se vaega i se tala faatino). Ona fai atu lea i tamaitai talavou e faitau le parakalafa e amata i le “I lea auala lava lea e tasi” mai le saunoaga a Elder Gary E. Stevenson “O Lau Fa Minute.” E faapefea ona pei sauniga o tulaga manaomia lea na faasoa mai e le malo faaaloalogia? E mafai foi ona e faitauina le vaega o totoe o le saunoaga a Elder Stevenson, tagai mo nisi mea sa ia aoaoina e uiga i sauniga.
Iloilo faatasi o se vasega le lisi o mea e manaomia e fa mo le faataunuuina o sauniga i le vaega 20.1 o le Tusitaulima 2. Valaaulia ia tamaitai talavou e faitau le 3 Nifae 11:21–26 ma faailoa mai pe na faapefea ona ausia nei tulaga manaomia i le faamatalaga a le Faaola o le papatisoga. Fai atu ia i latou e mafaufau i se sauniga sa latou molimauina talu ai nei ma faamatala mai pe na faapefea ona ausia ai nei tulaga manaomia e fa. O le a le mea e tupu pe a faataunuuina se sauniga e aunoa ma le ausiaina o nei tulaga manaomia? Fai atu i tamaitai talavou pe aisea e taua ai mo i latou le iloaina o nei tulaga manaomia.
Valaaulia ia tamaitai talavou e vaai faalemafaufau atu faapea o loo latou aoao atu se tasi o se isi tapuaiga e uiga i le papatisoga, ma o loo ia fai mai, “Ua uma ona papatisoina au i lau lotu.” E faapefea ona fesoasoani atu ia tamaitai talavou i lenei tagata ina ia malamalama, i se auala maaleale, i le mafuaaga e tatau ai ona ia toe papatiso? O a ni mau po o ni aafiaga latou te faasoa atu? E mafai ona e faasino i latou i le lisi o mea e manaomia i le vaega 20.1 o le Tusitaulima 2; Mataio 3:13–17; Galuega 19:1–6; 3 Nifae 11:21–26; po o le Moronae 8:10–12. Afai e mafai, valaaulia ni faifeautalai faamisiona e auai atu i le vasega ma faasoa atu pe faapefea ona la faamatalaina i a laua tagata sailiili le taua o sauniga (ia tapa muamua se faatagaga mai le epikopo).
Faasoa atu i le vasega le faamatalaga lenei mai ia Peresitene Spencer W. Kimball: “O sauniga e avea o ni faamanatu. O le faamoemoega moni lava lena o le faamanatuga, ia taofia mai i tatou mai le faagaloina, ina ia fesoasoani ia i tatou ia manatua” (Teachings of Spencer W. Kimball, ed. Edward L. Kimball [1982], 112). Fai atu i tamaitai talavou e lisi mai ia sauniga o le talalelei (e pei o [sauniga] ia o loo lisiiina i itulau 109–10 o le Faamaoni i le Faatuatua) ma talanoa po o a mea o loo fesoasoani ai nei sauniga ia i tatou ina ia manatua.

Fai i tamaitai talavou e faasoa mai mea sa latou aoaoina i le aso. Pe ua latou malamalama i le taua o sauniga? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Aoao atu se lesona o se afiafi faaleaiga e uiga i le taua o sauniga.
Faataunuu Mea faatonuina e fai mo le tulaga faatauaina o le Faatuatua 4 po o le Mea faatonuina e fai mo le tulaga faatauaina o le Amio Atua 4 i le Alualu i Luma o le Tagata Lava Ia.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale o le a fesoasoani i tamaitai talavou e faaaoga mea sa latou aoaoina i lenei lesona.