E faapefea ona ou maua le meaalofa o le Agaga Paia?

A uma ona tatou papatiso, ona tatou maua lea o le sauniga o le faamauga. I le avea ai o se vaega o lenei sauniga, ua tau mai ia i tatou e “talia le Agaga Paia.” O lona uiga e mafai ona avea le Agaga Paia ma a tatou soa tumau pe afai tatou te manaomia ma valaaulia Lana mafutaga i o tatou olaga ma tausia faamaoni poloaiga.

Saunia oe lava ia faaleagaga

Na faapefea ona faamafanafanaina pe fesoasoani le meaalofa o le Agaga Paia ia te oe lava ia? O anafea na e lagona ai le latalata i le Agaga? O a aafiaga e mafai ona e faasoa atu i tamaitai talavou?

Pe e te iloa soo se aafiaga na mauaina e tamaitai talavou ma le Agaga Paia? Pe ua latou malamalama i mea e tatau ona latou faia ia agavaa ai mo le mafutaga a le Agaga Paia?

O a ni mau ma ni lauga o le a fesoasoani i tamaitai talavou ina ia malamalama ai i le ala e fesoasoani ai le meaalofa o le Agaga Paia ia i latou ma faamanuiaina ai i latou i o latou olaga atoa?

Galuega 8:14–17; MF&F 33:15; Mataupu Faavae o le Faatuatua 1:4 (E tuuina atu le meaalofa o le Agaga Paia e ala i le faaee o lima)

1 Nifae 2:9–20 (O le faataitaiga a Nifae o le faalogo i le Agaga Paia)

1 Nifae 15:1–11 (O le le usitaia o poloaiga e taofia ai i tatou mai le taliaina o le Agaga Paia)

1 Nifae 16:14–29; 18:8–22; Alema 37:38–46 (Faataitaiga o le Liahona)

MF&F 20:77 (E ala atu i le tagofia o le faamanatuga, tatou te faafouina ai a tatou feagaiga ma o le a mafai ai pea ona tatou maua le Agaga e faatasi ma i tatou)

MF&F 121:45–46 (Afai tatou te amio mama ma agaalofa, o le a avea pea le Agaga Paia ma a tatou soa tumau)

Henry B. Eyring, “O Le Agaga Paia e fai ma Au Soa,” Ensign po o le Liahona, Nov. 2015, 104–7

David A. Bednar, “Ia Maua le Agaga Paia,” Ensign po o leLiahona, Nov. 2010, 94–97

“Meaalofa a le Agaga Paia,” Faamaoni i le Faatuatua (2004), 8, 9

“Agaga e Taitai Mai, ”Viiga, nu. 78

Aoao atu i le ala a le Faaola

Sa faasoa atu e le Faaola ni tala faigofie, faataoto, ma ni faataitaiga moni i le olaga sa malamalama i ai i latou sa Ia aoaoina. Na Ia fesoasoani ia i latou ia iloa lesona o le talalelei i o latou lava aafiaga. E mafai faapefea ona e fesoasoani i tamaitai talavou ia faafetaia auala ua fesoasoani ai le meaalofa o le Agaga Paia ia i latou e ala atu i a latou lava aafiaga?

Vitio: “Filifili Po o le a le Mea e Aoao Mai”

Matamata atili

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Tagai i isi manatu e aoao mai ma aoao atu ai.

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

• Faalogo pe usu faatasi o se vasega, le viiga “Agaga e, Taitai Mai.” O a ni mea e aoao mai e tamaitai talavou mai lenei viiga e uiga i mea e tatau ona tatou faia e maua ai le Agaga Paia?

• Valaaulia tamaitai talavou e mafaufau e uiga i le aso na faamauina ai i latou oni tagata o le Ekalesia ma faapea atu “talia le Agaga Paia.” Ua faapefea ona faamanuiaina i latou e le Agaga Paia? O a ni a latou fesili e uiga i le meaalofa o le Agaga Paia?

Aoao faatasi

Tagai i isi manatu e aoao mai ai ma aoao atu.

O gaoioiga taitasi nei o le a fesoasoani i tamaitai talavou ia malamalama ai i le uiga o le mauaina o le Agaga Paia. I le mulimuli ai i le musumusuga a le Agaga, filifili se tasi pe sili atu o le a aoga mo lau vasega:

• Valaaulia tamaitai talavou e suesue le lauga a Peresitene Henry B. Eyring “O Le Agaga Paia e fai ma Au Soa,” ma vaavaai mo faamatalaga e fesoasoani ia i latou e malamalama ai pe mafai faapefea ona latou maua pea le mafautaga o le Agaga Paia. Uunaia i latou e mafaufau e uiga i le mafuaaga tatou te manaomia ai le mafutaga o le Agaga Paia ma le auala e tatau ai ona tatou tali atu pe a tatou maua Ana musumusuga. E faapefea e mea e vaai, mafaufau, ma faia e tamaitai talavou i aso taitasi ona aafia ai lo latou tomai e lagona le Agaga? Fai atu ia i latou e mafaufau loloto i soo se suiga e manaomia ona latou faia i o latou olaga. Fai atu ia i latou e faasoa nisi o o latou manatu pe a latou lagona le logolelei e faia ai. 

• Fai atu i tamaitai talavou e faitau taitoatasi le 1 Nifae 2:9–19 ma le1 Nifae 15:1–11. Valaaulia le afa o le vasega e vaai ma talanoaina le mea na faia e Nifae e maua ai le Agaga Paia. Valaaulia le isi afa e vaai mo ma talanoaina le mea na fai e Lamana ma Lemuelu na taofia ai i laua mai le mauaina o le Agaga Paia. Ona fai atu lea ia i latou e tusi i le laupapa mea ua latou maua. O a mea ua aoaoina e tamaitai talavou mai nei faataitaiga o le a fesoasoani ia i latou ina ia maua le Agaga Paia i o latou olaga?

• Ia mautinoa ua tofu tagata taitoatasi o le vasega ma se kopi o le Mo le Malosi o le Autalavou. Valaaulia tamaitai talavou taitasi e filifili se tasi o vaega i le Mo le Malosi o le Autalavou, faitau, ma faailoga mea e tatau ona latou faia ma mea e le tatau ona faia ina ia maua ai le Agaga Paia. Valaaulia i latou e faasoa mai mea ua latou aoaoina e uiga i le Agaga Paia mai mea na latou faitauina. E faapefea ona fesoasoani lenei mea ia i latou ina ia maua le Agaga Paia i o latou olaga?

• Faitau faatasi o se vasega, parakalafa mulimuli e tolu o le vaega ua faaulutalaina “O le Meaalofa o le Agaga Paia” i le saunoaga a Elder David A. Bednar “Talia le Agaga Paia.” Fai atu i se tamaitai talavou e aotele le manatu autu a Elder Bednar. Tofi tamaitai talavou taitasi e faitau se tasi o vaega e tolu e sosoo o le lauga, ma vaai mo tali i fesili faapenei: E faapefea ona tatou agavaa ina ia maua le mafutaga a le Agaga Paia? O a mea e mafai ona taofia i tatou mai le mauaina o le Agaga Paia? Fai atu ia i latou e faasoa mai mea ua latou maua ma lo latou fuafuaga e faatino ai le fautuaga a Elder Bednar.

• Faaali atu se ata o Liae ma le Liahona (tagai i Tusi Ata o le Talalelei,68), ma fai atu i tamaitai talavou e faasoa mai mea ua latou iloa e uiga i le Liahona. Valaaulia le afa o le vasega e faitau le 1 Nifae 16:14–29, ae valaaulia le isi afa e faitau le 1 Nifae 18:8–22. Fai atu ia i latou e vaai mo tali i le fesili lenei: “E faapefea ona pei le Liahona o le Agaga Paia?” Valaaulia i latou e faasoa mai o latou manatu. O a mea ua aoaoina e tamaitai talavou mai aafiaga o le aiga o Liae e mafai ona fesoasoani ia i latou i le mauaina o le Agaga Paia? I le avea ai o se vaega o lenei talanoaga, faitau faatasi leAlema 37:38–46.

• Faitau faatasi o se vasega le Mataupu Faavae ma Feagaiga 121:45–46. Fesili atu pe o i ai ni upu i nei fuaiupu e le malamalama ai tamaitai talavou, ma fesoasoani ia i latou e faamatala mai uiga o na upu (mo se faataitaiga, loto o lona uiga o “le pito sili ona loloto”; teuteuina o lona uiga o le “faateleina” pe “faaleleia”; solo malosi o lona uiga o le “faateleina o le malosi”). O a mea ua aoaoina e tamaitai talavou mai nei fuaiupu e uiga i le ala e maua ai le Agaga Paia?

Fai i tamaitai talavou e faasoa mai mea sa latou aoaoina i le aso.Pe ua latou malamalama i le ala e maua ai le Agaga Paia? O a ni o latou lagona po o ni uunaiga?Pe o i ai ni a latou fesili faaopoopo?Mata e aoga le faaaluina o se isi taimi i lenei aoaoga faavae?

Motugaafa faafaiaoga

“Atonu e musuia e le Agaga Paia se tasi pe sili atu foi o i latou o loo e aoaoina e tuuina mai ni manatu e moomia ona faalogo i ai isi. Ia malamalama i musumusuga e te maua ina ia valaauina ni tagata patino. E te lagona foi lava le faagaeetia e talosagaina se tagata e lei ofo mai e faailoa mai ona manatu” (O Le Aoao Atu, E Leai Se Isi Valaauga E Sili Ai [1999], 63).

Ola i mea ua tatou aoaoina

Tagai i isi manatu e aoao mai ai ma aoao atu.

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

• Valaaulia le mafutaga a le Agaga Paia i aso uma ia latou tatalo patino.

• Faamaea mea ua faatonuina e fai o le tulaga faatauaina o le Filifiliga Saoloto ma le Tali Atu mo Au Lava 5 po o mea ua faatonuina e fai o le tulaga faatauaina o le Mama 4 i le Alualu i Luma o le Tagata Lava Ia.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.