O a feagaiga na ou osia i le papatisoga?

Ina ua tatou papatiso, na tatou osia se feagaiga ma le Atua. Sa tatou folafola atu e tauave i o tatou luga le suafa o Iesu Keriso, manatua pea o Ia, tausi Ana poloaiga, ma auauna atu ia te Ia seia oo i le iuga. Tatou te faafouina lenei feagaiga i taimi uma tatou te fetagofi atu ai i le faamanatuga.

Saunia oe lava ia faaleagaga

O le a se mea o e manatua i lou papatisoga? Na faapefea ona aafia lou olaga i au feagaiga o le papatisoga?

E mafai faapefea ona e fesoasoani i tamaitai talavou ia malamalama atili ia latou feagaiga o le papatisoga? E mafai faapefea ona e fesoasoani ia i latou e faamalosia lo latou naunautaiga e tausia nei feagaiga?

O a ni mau po o isi punaoa o le a fesoasoani i tamaitai talavou e manatua ai ma tausia a latou feagaiga o le papatisoga?

Ioane 3:5; 2 Nifae 31:4–13, 17 (E manaomia le papatisoga mo le faaolataga e faavavau)

Mosaea 18:8–10; MF&F 20:37 (O tautinoga tatou te faia pe a tatou papatiso)

Hugo Montoya, “Tofotofoina ma Faaosoosoina—ae o le a Maua le Fesoasoani,” Ensign po o le Liahona, Nov. 2015, 53–55

Robert D. Hales, “O Le Feagaiga o le Papatisoga: O Le I Ai I Le Malo Ma Ni O Le Malo,” Ensign, Nov. 2000, 6–9; po o le Liahona, Ian. 2001, 6–9

Carole M. Stephens, “E iai se Mafuaaga Sili mo i Tatou e Olioli Ai,” Ensignpo o le Liahona, Nov. 2013

“O Lau Feagaiga o le Papatisoga,” “O Faamanuiaga Folafolaina o le Papatisoga,” Faamaoni i le Faatuatua (2004), 125–28

Vitio: “O le Ofu e Tasi,” “O Avanoa e Fai ai Mea Lelei”

5:2

4:2

Aoao atu i le ala a le Faaola

Na maua e le Faaola auala faapitoa e fesoasoani ai ia i latou na Ia aoaoina ia aoao ma tuputupu ae—o auala e faapitoa lava mo i latou. Na Ia fesoasoani ia i latou ia iloa lesona o le talalelei ia latou lava aafiaga. O le a se mea e mafai ona e faia e fesoasoani ai i tamaitai talavou o loo e aoaoina ia iloa auala e mafai ai e a latou feagaiga o le papatisoga ona aafia o latou olaga i aso taitasi?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Fai atu i tamaitai talavou e vaai faalemafaufau o loo latou fesoasoani e saunia se tuagane po o se uso laitiiti e papatiso. O faapefea ona latou fesoasoani ia te ia ina ia malamalama i folafolaga tatou te faia i le papatisoga? (tagai i le Faamaoni i le Faatuatua,itulau 125–27).
Faaali atu se ata o se papatisoga (e pei o le Tusi Ata o le Talalelei, 103–4). Faasoa atu mea e te manatuaina o le aso na e papatiso ai, e aofia ai lou manatuaina o ou lagona. Valaaulia tamaitai talavou e faasoa mai o latou lagona ina ua papatisoina i latou. Fesili atu po o a ni feagaiga na latou osia i lena aso. Valaaulia i latou e lisi a latou tali i le laupapa ma faaopoopo i le lisi i le taimi o le lesona a o latou aoaoina atili e uiga i a latou feagaiga o le papatisoga.

Aoao faatasi

O gaoioiga taitasi nei o le a fesoasoani i tamaitai talavou e malamalama ai i feagaiga latou te osia i le papatisoga. I le mulimuli ai i le Agaga, filifili se tasi pe sili atu e aoga mo lau vasega:

Valaaulia tamaitai talavou e faitau le Mosaea 18:8–10. O a mea ua latou aoao e uiga i le auala e tatou te folafola atu ai e taulima ai isi pe a papatiso i tatou? Ina ia fesoasoani i tamaitai talavou e aoao i le auala e tatou te siitia ai le avega a se isi tagata, vaevae i latou i ni vaega ma atofa atu i vaega taitasi e suesue se vaega o le lauga a Elder Hugo Montoya “Tofotofoina ma Faaosoosoina—ae o le a Maua le Fesoasoani.” Valaaulia vaega taitasi e faasoa mai se mea sa latou aoaoina i le vasega. Atonu e fai e vaega taitasi se pepa lautele o i ai se savali o mea ua latou aoaoina, faasoa aafiaga patino pe a talafeagai, pe faamatala tala o tusitusiga paia e fesoasoani e aoao le mataupu faavae e tasi.
Vaevae le vasega i ni vaega se tolu, ma tofi vaega taitasi e faitau se tasi o soavaega e tolu o “O Lau Feagaiga o le Papatisoga” i le Faamaoni i le Faatuatua. Valaaulia vaega taitasi e fuafua se auala musuia e aoao atu ai mea na latou aoaoina (mo se faataitaiga, i le faaaogaina o faatufugaga, solo, po o se taaloga). Tuu atu ia i latou le taimi e aoao ai e le tasi le isi. Aisea e lagona ai e tamaitai talavou e taua lo latou tausia o nei feagaiga?
Valaaulia nisi o tamaitai talavou e faitau le Mosaea 18:8–10 ao isi e faitau le MF&F 20:79. Fai atu ia i latou e vaai mo feagaiga tatou te osia pe a papatisoina i tatou. Tuu atu i tamaitai talavou taitasi se fasi pepa, ma fai atu i ai e tusi i lalo se filifiliga faigata o feagai ma le autalavou ona tuu lea o lana pepa i totonu o se koneteina. Valaaulia tamaitai talavou e auauai e piki se pepa mai le koneteina, faitau le tusiga o i ai, ma faasoa atu ni manatu i le ala e mafai ai ona ia manatua ma tausia ana feagaiga o le papatisoga a o feagai ma nei luitau.
Faaali atu se ata o le papatisoga o le Faaola (tagai Tusi Ata o le Talalelei,35), ma fai atu i se tasi o le vasega e faitau le 2 Nifae 31:4–10. Valaaulia tamaitai talavou e faasoa mai ni faataitaiga o loo i mau e faaalia ai le ala na tausia ai e Iesu Keriso Ana feagaiga ma le Tama (e mafai ona latou vaai i ata i le Tusi Ata o le Talalelei, 36–48, mo ni manatu). Fai atu ia i latou e faasoa mai ni aafiaga lea na latou taumafai ai e mulimuli i le faataitaiga a le Faaola.
Valaaulia tamaitai talavou e faitau parakalafa e tolu o le saunoaga a Elder Robert D. Hales “O Le Feagaiga o le Papatisoga: O le i ai i le Malo ma ni o le Malo,” e amata i le “I le papatisoga tatou te osia ai se feagaiga ma lo tatou Tama Faalelagi.” Fai atu ia i latou e vaai mo feagaiga tatou te osia pe a tatou papatiso, ma valaaulia i latou e tusi mea ua latou maua i le laupapa. O a auala e tatau ai ona suia o tatou olaga pe a papatiso? Na faapefea ona suia ai olaga o tamatai talavou?
Valaaulia tamaitai talavou e faitau le “O Au Feagaiga o le Papatisoga” I le Faamaoni i le Faatuatua ma faailoa folafolaga na tatou faia ina ua papatisoina i tatou. Valaaulia tamaitai talavou e matamata se tasi o vitio o loo fautuaina i le aotelega pe faitau le tala o loo i le amataga o le lauga a Carole M. Stephens “E iai se Mafuaaga Sili mo i Tatou e Olioli Ai.” Fai atu i ai e vaavaai mo faataitaiga o tagata o loo faamamaluina a latou feagaiga o le papatisoga. Tuu atu i tamaitai talavou se taimi e faasoa ai mea na latou aoaoina. O a lagona o tamaitai talavou i mea e mafai na latou faia ina ia sili atu le tausiaina o a latou feagaiga o le papatisoga i taimi uma ma nofoaga uma?

Fai i tamaitai talavou e faasoa mai mea sa latou aoaoina i le aso. Pe ua latou malamalama lelei ea ia latou feagaiga o le papatisoga? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Iloilo ma le agaga tatalo o latou olaga e iloa ai pe o i ai se mea latou te manaomia ona taofia le faia po o le amata ona faia ina ia latou faamaoni atili ia latou feagaiga o le papatisoga. Ona latou faia lea o se tautinoga patino ia amio ai.
Galulue taitoatasi pe o se vasega i mea ua faatonuina e fai mo le tulaga faatauaina o le Faatuatua 4 po o le mea ua faatonuina e fai mo le tulaga faatauaina o le Poto 4 i leAlualu i Luma o le Tagata Lava ia.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.