O le a le uiga o le ave i o tatou luga le suafa o Iesu Keriso?

Pe a papatisoina i tatou, tatou te osi feagaiga e ave i o tatou luga le suafa o Iesu Keriso. Tatou te faafouina lenei feagaiga pe a tatou fetagofi atu i le faamanatuga (tagai MF&F 20:77). Tatou te faataunuuina lenei feagaiga i le faamuamuaina lea o le Alii i o tatou olaga, i le taumafai lea e mafaufau ma amio e pei o le a Ia faia, ma le tutu “o ni molimau a le Atua i taimi uma ma i mea uma, ma i nofoaga uma” (Mosaea 18:9).

Saunia oe lava ia faaleagaga

O le a sou manatu i le uiga o le ave i ou luga o le suafa o Keriso? O le a se mea e te faia ina ia tausia ai lenei feagaiga?

O a luitau ma faamanuiaga e oo mai pe a ave e tamaitai talavou i o latou luga le suafa o Keriso? E mafai faapefea ona e fesoasoani i tamaitai talavou ia faamuamua le Atua i o latou olaga?

O a ni mau ma ni punaoa o le a fesoasoani i tamaitai talavou ia malamalama i le feagaiga na latou osia e ave i o latou luga le suafa o Keriso?

Mosaea 5 (Aisea e taua ai le ave i o latou luga le suafa o Keriso)

3 Nifae 27:27 (E tatau ona tatou taumafai ia faapei o Iesu Keriso)

MF&F 20:37, 77 (O le aveina i o tatou luga o le suafa o Keriso o se vaega o la tatou feagaiga o le papatisoga ma le sauniga o le faamanatuga)

Robert D. Hales, “Avea o se Kerisiano Moni e Faapei o Keriso,” Ensign po o le Liahona, Nov. 2012, 90–92

Mervyn B. Arnold, “O Lea Se Mea Ua E Faia I Lo'u Igoa ?” Ensign po o le Liahona, Nov. 2010, 105–7

Vitio: “Ia Lototele e Tu Na o Oe”

Aoao atu i le ala a le Faaola

Na silafia e le Faaola i latou na Ia aoaoina, ma na Ia silafia ituaiga tagata o le a avea ai i latou. Ina ua latou tauivi, Na te lei fiu ia i latou, ae na faaauau pea ona alofa ma auauna atu ia i latou. E faapefea ona e faaalia lou alofa ma le lagolago i tamaitai talavou o loo e aoaoina?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Tagai i isi manatu e aoao mai ma aoao atu ai.

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

• Valaaulia se tasi o tamaitai talavou e faitau le tatalo o le falaoa o le faamanatuga i le MF&F 20:77. O le a so latou talitonuga i le uiga o le “ave i o [tatou] luga le suafa o [Iesu Keriso]”?

• Fesili i tamaitai talavou pe ua latou iloa pe aisea na filifili ai e o latou matua o latou igoa. E faapefea ona aafia po o ai i latou ma po o faapefea ona latou taumafai e ola ona o o latou igoa? Fesili ia i latou po o le a le uiga ia i latou o le ave i o latou luga o le suafa o Iesu Keriso (tagai i le MF&F 20:77). E faapefea e le aveina o Lona suafa ona aafia po o ai i tatou ma le ala ua tatou taumafai ai e ola?

Aoao faatasi

Tagai i isi manatu e aoao mai ai ma aoao atu.

O gaoioiga taitasi nei o le a fesoasoani i tamaitai talavou ina ia malamalama i le uiga o le tauave o le suafa o Iesu Keriso i o latou lava luga. I le mulimuli ai i le Agaga, filifili se tasi pe sili atu e aoga mo lau vasega:

• Faaali le vitio “Ia Lototele e Tu Na o Oe.”; O le a se lagona o tamaitai talavou i le autu o le savali a Peresitene Monson i lenei vitio? Na faapefea ona faaalia e le autalavou i le vitio ua latou tauaveina i o latou luga le suafa o le Faaola? Valaaulia tamaitai talavou e faasoa mai o latou lava aafiaga faapea.

• Faasoa atu le saunoaga lenei mai ia Peresitene Henry B. Eyring: “Ua tatou folafola atu e ave i o tatou luga lona suafa. O lona uiga e ao ona tatou vaai ia i tatou lava o ni Ona Soo. O le a tatou faamuamua o Ia i o tatou olaga. O le a tatou mananao i mea e finagalo ai o Ia nai lo mea tatou te mananao ai po o mea ua aoao mai le lalolagi ia tatou mananao i ai” (“Ina ia Tasi i Tatou,” Ensign po o le Liahona, Iulai 1998). Vaevae le vasega i ni vaega se tolu, fai atu i vaega taitasi e talanoaina se tasi o fesili nei: O le a le uiga o le vaai ia i tatou lava o ni fanau a Keriso? E faapefea ona tatou faamuamua le Faaola i o tatou olaga? O le a le uiga o le manao i le mea o finagalo ai le Faaola? Fai atu i se tagata se toatasi mai vaega taitasi e faasoa mai i le vasega le mea na talanoaina e lana vaega.

• Valaaulia tamaitai talavou e faitau le Mosaea e 5, ma vaai mo tali i fesili e pei “O le a le uiga o le tauave i o tatou luga o le suafa o Keriso?” ma le “Aisea e taua ai le tauave i o tatou luga o le suafa o Keriso?” Fai atu ia i latou e faasoa mai mea na latou maua ma lisi ni mea faapitoa e mafai ona latou faaalia ai ua latou tauaveina i o latou luga le suafa o le Faaola.

• Valaaulia nisi o tamaitai talavou e faitau le Helamana 5:6–8, ma valaaulia isi e faitau parakalafa muamua e tolu o le lauga a Elder Mervyn B. Arnold “O Le a se Mea ua E Faia i Lo’u Igoa?” Fai atu ia i latou e aotele mo isi mea na latou faitauina. Na faapefea ona uunaia e igoa o Nifae, Liae, ma Siaosi Alapati Samita nei tagata ia ola amiotonu? O faapefea ona uunaia i tatou e la tatou feagaiga ia tauave i o tatou luga le suafa o Iesu Keriso? Faitau faatasi o se vasega ia parakalafa mulimuli e lua o le lauga, ma valaaulia tamaitai talavou e talanoaina le ala o le a latou faaaogaina ai le luitau a Elder Arnold.

• Faasoa atu le saunoaga lenei mai ia Elder Robert D. Hales: “O le upu Kerisiano o lona uiga o le tauave i o tatou luga o le suafa o Keriso. Vaevae le lauga a Elder Hales “Avea o se Kerisiano Moni Faapei o Keriso” i tamaitai talavou. Fai atu i tamaitai talavou taitasi e faitau lana vaega, ma vaai mo tali i le fesili “O le a le uiga o le avea ma Kerisiano?” Fai atu ia te ia e faasoa mai mea ua ia maua ma tuuina mai ni faataitaiga o tagata ua ia taua o ni Kerisiano moni.

Fai i tamaitai talavou e faasoa mai mea sa latou aoaoina i le aso. Pe ua latou malamalama i le uiga o le tauave i o latou luga o le suafa o Iesu Keriso? O a ni o latou lagona po o ni uunaiga?Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“Fai atu i tagata aoao e toe faamatala mai ia latou lava upu ia mataupu faavae. O le a fesoasoani lenei mea ia te oe ia iloa i le amataga o le lesona pe latou te malamalama i upu po o manatu faapitoa. Afai latou te le malamalama, e mafai ona e ofoina atu ni faamatalaga o le a sili atu ai le taua o le vaega o totoe o le lesona ia i latou” (O Le Aoao Atu, E Leai Se Valaauga E Sili Ai [1999], 26).

Vitio: “Maimoaina o se Vitio”

Matamata atili

Ola i mea ua tatou aoaoina

Tagai i isi manatu e aoao mai ai ma aoao atu.

Valaaulia tamaitai talavou e mafaufau i auala e mafai ona latou faaali atu ai ia latou faatinoga ua latou tauaveina i o latou luga le suafa o Iesu Keriso. I se vasega i le lumanai, valaaulia i latou e faasoa mai a latou aafiaga.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.