E mafai faapefea ona ou maua le mafanafana pe a maliu se tasi ou te alofa i ai?

O le oti o se vaega tatau o le ata o le faaolataga. Ina ia avea atili faapei o lo tatou Tama Faalelagi, e tatau ona tatou feoti ma maua ni tino atoatoa ma toetutu. A tatou malamalama o le oti o se vaega o le fuafuaga a le Tama Faalelagi ma o le manumalo o Iesu Keriso mai le oti e ala i Lana Togiola, ua mafai ai ona tatou maua le faamoemoe ma le filemu pe a maliu se tasi e pele ia i tatou.

Saunia oe lava ia faaleagaga

O faapefea ona faamanuiaina lou olaga i se malamalamaaga i le olaga pe a mavae le oti? O a ni mau na fesoasoani ia te oe e te malamalama ai i le mea e tupu pe a mavae le oti?

Atonu ua uma ona feagai nisi o tamaitai talavou ma le maliu o se tasi e pele [ia te i latou]. O le a oo uma i ai i latou i se aso. O le a se mea e te manao ia latou iloa e faapea ona fesoasoani ia i latou?

Ia suesue ma le agaga tatalo ia mau ma punaoa nei. O le a se mea e te lagona o le a aoga i tamaitai talavou o loo e aoaoina?

1 Korinito 15:22 (O le toetu o se meaalofa mai ia Keriso i tagata ola uma)

Mosaea 16:7–8 (O Le Toetu o Iesu Keriso ua aveese ai le tui o le oti)

Mosaea 18:8–10 (Tatou te faamafanafana ia i latou e manaomia le faamafanafanaga)

Alema 11:42–45 (O le a tatou maua o tatou tino ona o le Toetu o le Faaola)

Alema 28:12; MF&F 42:45–46 (Tatou te faavauvau mo i latou o e maliliu, peitai o le oti e suamalie ia i latou o e oti o i le Alii)

Alema 40:11–14 (O le a ola pea o tatou agaga pe a mavae le oti)

MF&F 137:5–10 (Ua vaai Iosefa Samita i lona uso o Alavini, tamaiti laiti, ma isi o i le malo selesitila)

MF&F 138 (Faaaliga a Peresitene Iosefa F. Samita e uiga i le lalolagi o agaga)

Thomas S. Monson, “Mrs. Patton—e Faaauau Pea le Tala,” Ensign po o le Liahona, Nov. 2007, 21–24; tagai foi i le vitio “Seia Tatou Toe Feiloai”

3:39

Russell M. Nelson, “Faitotoa o le Oti,” Ensign, Me 1992, 72–74

Shayne M. Bowen, “‘Ou Te Ola A’u, O Le Mea Lea E Ola Ai Outou,’” Ensign po o le Liahona, Nov. 2012

Vitio: “O Loo Avea Pea i Tatou o se Aiga,” “O le a Ia Fesoasoani ia te Oe”

4:46

4:47

Aoao atu i le ala a le Faaola

Sa fesili le Faaola i ni fesili sa faapea ona mafua ai ona mafaufau ma [i ai] lagona loloto o e na mulimuli ia te Ia. E mafai faapefea ona e valaaulia tamaitai talavou e mafaufau loloto ma saili mo musumusuga? E mafai faapefea ona e fesoasoani ia latou lagona le saogalemu i le faasoa atu o o latou lagona patino?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni o oe lava manatu e faalauiloa atu ai le lesona o lenei vaiaso:

Faasoa atu sou lava aafiaga, po o se aafiaga mai se isi tagata, e uiga i le mauaina o le toafilemu i le mavae ai o le maliu o se tasi e pele. Ia valaaulia tamaitai talavou e faasoa atu o latou aafiaga.
Ia valaaulia tamaitai talavou e faasoa atu soo se aafiaga sa latou oo i ai i le maliu o se tasi e pele ia i latou. Na faapefea ona fesoasoani lo latou malamalama e uiga i le Togiola ma le ata o le Faaolataga latou te maua ai le faamafanafanaga?

Aoao faatasi

O gaoioiga taitasi o loo i lalo o le a fesoasoani i tamaitai talavou e aoao ai e uiga i le olaga pe a mavae le oti. I le mulimuli ai i le musumusuga a le Agaga, filifili se gaoioiga se tasi pe sili atu o le a sili atu ona aoga mo lau vasega:

Ia valaaulia tamaitai talavou e tusi i lalo a latou fesili, manatu, po o popolega e uiga i le oti, ona tuu atu lea latou te sue mo tali i mau o loo fautuaina atu i lenei otootoga pe mai le saunoaga a Elder Russell M. Nelson “Faitotoa o le Oti.” Ia uunaia i latou e tusi i lalo ni mau faapitoa po o faamatalaga o loo ta’ua faapitoa ai le tiute o le Faaola i le fesoasoani ia i tatou e faatoilalo le oti. Fai atu ia i latou e faasoa atu mea ua latou aoaoina. Valaaulia i latou e faasoa atu o latou lagona e uiga i mea ua faia e le Faaola mo i tatou.
Faaali le vitio “O le a ia Fesoasoani ia te Oe,” ma valaaulia tamaitai talavou e faasoa atu o latou manatu. Fai atu i tamaitai talavou e vaai faalemafaufau pe o le a se eseesega e i ai le lalolagi pe ana faapea ua iloa uma e tagata le mea ua iloa e le alii talavou o loo i le vitio. O le a se aafiaga e faia e lenei malamalamaaga i o tatou olaga i aso taitasi? Ia valaaulia se tamaitai talavou e faasoa atu lana molimau e uiga i le olaga pe a mavae le oti, ae o le a foi le mea e tuuina atu ia te ia le faamoemoe.

4:47
Faasoa atu le tala e uiga ia Mrs. Patton mai le saunoaga a Peresitene Thomas S. Monson “Mrs. Patton—e Faaauau Pea le Tala,” pe faaali atu le vitio “Seia Tatou Toe Feiloai.” Fai atu i tamaitai talavou pe o le a sa latou tali atu i le fesili sa fesili ai Mrs. Patton ia Thomas Monson talavou. Ia faitau faatasi o se vasega le Mosaea 18:8–10. Ia talanoa i le tiutetauave o loo ia i tatou uma e tuuina atu le faamafanafanaga, lagolagosua, ma isi auaunaga i aiga o ua maliliu nisi e pele ia i latou. Mafaufau e valaaulia se sui o le au peresitene o le Aualofa e auai i le talanoaga lenei.

3:39
Valaaulia le afa o le vasega e faitau le tala ia Sister Ramirez i le lauga a Elder Shayne M. Bowen “‘Ou Te Ola A'u, O Le Mea Lea E Ola Ai Outou,’” ma valaaulia le isi afa e faitau le tala i le atalii o Elder Bowen o Tyson. Fai atu ia i latou e faasoa mai se mea sa latou aoaoina e uiga i le auala e maua ai le faamafanafanaga pe a maliu se tasi e pele ia i latou ma le auala e faamafanafana atu ai i isi. Valaaulia ia tamaitai talavou e faasoa mai soo se aafiaga na latou mauaina ina ua maliu se tasi e pele ia i latou. O le a se auala na fesoasoani ai lo latou malamalama i le Togiola ma le ata o le faaolaga e maua ai le faamafanafanaga? Afai e mafai, faasoa atu sau oe lava aafiaga.
Vaevae le vasega i ni vaega se lua.Fai atu i se tasi o vaega e faitau le Mataupu Faavae ma Feagaiga 137:5–10 ma le isi vaega e faitau le Mataupu Faavae ma Feagaiga 138:57–58. Fai atu i tamaitai talavou e talanoaina ia latou vaega ni mea o aoao mai e nei mau e uiga i mea o le a tutupu pe a mavae le oti. Ona talanoa lea faatasi o se vasega, le auala e mafai ai e lenei malamalama ona fesoasoani i se tasi ua maliu se e pele ia te ia. E faapefea ona fesootai lenei malamalama ma lo tatou tiutetauave o le faia o le galuega o le talafaasolopito o aiga ma le malumalu?

Fai atu i tamaitai talavou e faasoa atu se mea sa latou aoaoina nei. Pe ua latou malamalama i le ala e maua ai le mafanafana pe a maliu se tasi latou te alolofa i ai? O a ni o latou lagona po o ni manatu o i ai? E i ai ni a latou fesili faaopoopo? Mata e aoga le faaalu o se isi taimi i lenei aoaoga faavae?

Ola i mea o tatou aoaoina

Fesili atu i tamaitai talavou pe faapefea ona latou faaali atu le agalelei i se tagata ua maliu se tasi e pele ia te ia. O i ai ni tina ua maliliu a latou tane po o isi o le uarota po o le alalafaga e ono manaomia se fesoasoani?

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.