O Le Ata o le Faaolataga

“Faauta, o la’u galuega ma lo’u mamalu lenei—ia faataunuu le faaofuina o le tagata i le tino ola pea ma le ola faavavau” (Mose 1:39).

O le tele o filifiliga faigata e faia e se tamaitai talavou o le a faigofie atu pe a ia malamalama i le ata o le faaolataga. O le iloaina sa ia mau faatasi ma lona Tama Faalelagi ao lei fanau mai ma na Ia auina mai o ia iinei ma se faamoemoega paia lea e mafai ona fesoasoani ia te ia e vaai atu i ana tofotofoga ma luitau ma se vaaiga faavavau. O le iloaina o le avea ma se tamaitai o se vaega o lona faasinomaga faavavau e mafai ona fesoasoani ia te ia e atiina ae ana meaalofa paia ma saunia mo lona lumanai. O le iloaina o le faitalia o se meaalofa ma o le a ia tali atu mo ana filifiliga e mafai ona uunaia ai o ia e faia ni filifiliga e faavae i luga o mataupu faavae e faavavau.

Otootoga e Filifili mai ai i le Masina Lenei

• O le a le ata o le faaolataga?

• O le a le mea na tupu i lo’u muai olaga?

• O le a le faamoemoega o le olaga?

• Aisea e afaina ai filifiliga ou te faia?

• Aisea e oo mai ai puapuaga ia i tatou?

• E mafai faapefea ona ou maua le mafanafana pe a maliu se tasi ou te alofa i ai?

• Aisea e tatau ai ona ou tausia lo’u tino e pei o se malumalu?

Faamatalaga i le Faiaoga

E mafai ona e mafaufau e valaaulia tamaitai talavou e faia se ata po o se siata o le ata o le faaolataga i le amataga o lenei iunite. E mafai ona tagai i ai i le faagasologa o le iunite ma faaopoopo ni mau po o ni malamalamaaga latou te mauaina ao latou suesue i le ata o le faaolataga.

Mutuale

Mafaufau pe mafai faapefea ona e fuafuaina gaoioiga ia e fesootai ma mea o loo aoaoina e le autalavou. O loo avanoa le saite o Gaoioiga a le Autalavou a le Ekalesia e fesoasoani ia te oe. O le tele o gaoioiga e aoao ai i nei otootoga e mafai foi ona avea o ni gaoioiga anoa o le Mutuale. Galulue ma au peresitene o vasega e filifili ma fuafua gaoioiga talafeagai ia e faamalosia ai mea na aoaoina e tamaitai talavou i le Aso Sa.

Alualu i Luma o le Tagata Lava Ia

O gaoioiga nei mai le Alualu i Luma o le Tagata Lava Ia e faatatau i lesona o loo i le iunite lenei:

• O mea faatonuina e fai mo le tulaga faatauaina o le Taua o le Tagata Lava Ia 1

• O mea faatonuina e fai mo le tulaga faatauaina o le Filifiliga ma le Tali Atu mo A’u Lava ma galuega faatino mo le tulaga faatauaina

• O mea faatonuina e fai mo le tulaga faatauaina o le Mama 1 ma le 2