Aisea e oo mai ai puapuaga ia i tatou?

O se vaega o le fuafuaga a le Tama Faalelagi, le ao ona tatou oo i puapuaga i le olaga nei. I nisi o tulaga, o puapuaga e oo mai o le taunuuga o a tatou lava filifiliga le lelei po o filifiliga a isi. O isi tofotofoga o se vaega masani lava o lo tatou aafiaga i le tino. E ui ina faigata, ae o o tatou luitau e mafai ona fesoasoani ia i tatou e tuputupu ae ai faaleagaga ma avea atili ai e pei o Iesu Keriso.

Saunia oe lava ia faaleagaga

O a ni puapuaga sa e oo i ai? O a ni mea ua e aoaoina mai ai? O le a se mea sa fesoasoani ia te oe i le taulimaina o ia mea? O i ai ni aafiaga talafeagai e mafai ona e faasoaina atu i tamaitai talavou?

Ia mafaufau loloto ma tatalo e uiga i tamaitai talavou o lau vasega. O a ni luitau ma ni tofotofoga o loo latou feagai? O faapefea ona latou taulimaina ia puapuaga i o latou olaga?

A o fai au sauniuniga, ia suesue ma le agaga tatalo ia mau ma punaoa nei, faapea ma isi mea sa fesoasoani i au aoaoga e uiga i puapuaga.

1 Samuelu 1; 1 Tupu 17; Ruta 1; Eseta 4; 1 Nifae 5:1–9 (Faataitaiga o tamaitai i tusitusiga paia o e sa feagai ma puapuaga)

2 Nifae 2:11 (O puapuaga o se vaega o le fuafuaga a le Tama Faalelagi mo i tatou)

Mosaea 23:21 (E tuuina mai e le Atua ia puapuaga e tofotofoina ai lo tatou faatuatua)

Eteru 12:27 (E tuuina mai e le Atua vaivaiga ina ia tatou lotomaualalo ai)

MF&F 58:3–4 (A mavae puapuaga ona oo mai lea o faamanuiaga)

MF&F 121:7–8 (Afai tatou te onosaia lelei puapuaga, o le a faaeaina i tatou e le Atua)

MF&F 122:4–9 (O puapuaga tatou te maua ai le poto masani ma e mo lo tatou lelei)

Yoon Hwan Choi, “Aua le Vaavaai Solo, Vaai i Luga!” Ensign po o le Liahona, Me 2017, 90–92

Evan A. Schmutz, “O Le a Soloiesea e le Atua o Loimata Uma,” Ensign po o le Liahona, Nov. 2016, 116–18

Dallin H. Oaks, “Faafeagai o Mea Uma,” Ensign po o le Liahona, Me 2016, 114–17

Neil L. Andersen, “O Asiosio Faaleagaga,” Ensign po o le Liahona, Me 2014

“Puapuaga,” Faamaoni i le Faatuatua(2004), 142–45

Vitio: “O Le A Siitia i Luga Tatou e le Atua,” “E Mafai e Le Perisitua ona Faamalolosia o Tatou Aiga i Tofotofoga,” “O le Toefausiaina o o Tatou Olaga”

4:58

1:25

1:35

Aoao atu i le ala a le Faaola

Sa silafia lelei lava e le Faaola i latou sa Ia aoaoina—ma tagata e mafai ona avea ai i latou. Ina ua latou oo i tauiviga, e le’i liliuese o Ia mai ia i latou ae sa faaauau pea ona alofa ia i latou. O a ni tauiviga o loo feagai ma tamaitai talavou? E mafai faapefea ona e faaali atu e te alofa ma lagolagoina i latou?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Iloilo faatasi o se vasega le faamatalaga a Elder Neil L. Andersen i se laau o loo tuputupu ae i se siosiomaga matagia (i lana lauga “O Asiosio Faaleagaga”). O le a se mea o aoao mai e lenei talafaatusa i tamaitai talavou e uiga i puapuaga? Valaaulia i latou e suesue i le lauga, tagai mo fautuaga latou te lagona o le a fesoasoani ia i latou e tetee atu i asiosio faaleagaga.

Aoao faatasi

O gaoioiga taitasi o loo i lalo o le a fesoasoani i tamaitai talavou e aoao e uiga i le faamoemoega o puapuaga. I le mulimuli ai i le musumusuga a le Agaga, filifili se gaoioiga se tasi pe sili atu o le a sili atu ona aoga mo lau vasega:

Aumai se filifili po o se ata o se filifili i le vasega. O le a se mea e tupu pe afai e motu se tasi o sootaga o le filifili? E mafai faapefea ona tatou mautinoa o le a avea i tatou ma sootaga malosi i le filifili o augatupulaga i o tatou aiga e faavavau? Valaaulia alii talavou e saili mo le auala na taliina ai e Elder Yoon Hwan Choi le fesili lenei i lana saunoaga “Aua le Vaavaai Solo, Vaai i Luga!” e amata i le parakalafa lea e amata i le, “O i tatou uma o se vaega o se aiga e faavavau.” Na faapefea ona vaavaai atu Elder Choi ma lona aiga ia Keriso i tala na ia faasoaina mai? O a nisi taimi e “le faigofie [ai] pea le vaai i luga?” O a ni fautuaga na tuuina mai e Elder Choi i lana parakalafa mulimuli o lana saunoaga “e vaavaai atu ai pea ia [Keriso]” i taimi o faigata?
Faasoa atu i tamaitai talavou le tala na faamatalaina e Elder Evan A. Schmutz e uiga ia Brother Daniel Apilado (i lana lauga “O Le a Soloiesea e le Atua o Loimata Uma”). O le a le mea na aoaoina e tamaitai talavou e uiga i faamoemoega o faafitauli mai lenei tala? O le a se fautuaga na tuuina mai e Elder Schmutz ia i latou o i ai se faafitauli?
Faitau faatasi nisi o mau lea [o loo ta’ua ai] le oo o le Faaola i puapuaga (e pei o le Mataio 4:1–11; 26:38–39; Luka 23:33–34). O a ni mea e mafai ona aoaoina e tamaitai talavou e uiga i faigata mai le soifuaga o le Faaola? Na faapefea ona Ia feagai ma Ona tofotofoga? Ia valaaulia tamaitai talavou taitoatasi e tusi i lalo se tofotofoga o loo feagai ma ia pe o loo feagai ma se tasi e pele ia te ia. Ia uunaia tamaitai talavou e mafaufau loloto i mea e mafai ona latou aoao mai le faataitaiga a le Faaola e fesoasoani ai ia i latou i lenei tofotofoga.
Ia valaaulia tamaitai talavou e mafaufau i ni faataitaiga a ni tamaitai o i tusitusiga paia o e sa feagai ma puapuaga (tagai i faataitaiga o loo fautuaina atu i le otootoga lenei). Fai atu ia i latou e faitau e uiga i nei tamaitai o loo i mau ma fai se otootoga o le tala mo isi tamaitai uma o le vasega. O a ni mea latou te aoaoina e uiga i puapuaga mai nei tala e mafai ona fesoasoani ia i latou e manumalo ai i o latou lava tofotofoga.
Vaevae le vasega i ni vaega se lua. Ia valaaulia se tasi vaega e vaavaai mo ni faataitaiga i le Tusi a Mamona o ni tagata taitoatasi po o ni vaega sa feagai ma ni luitau faigata (tagai, mo se faataitaiga i le, Mosaea 24:8–17; 3 Nifae 1:4–21; Moronae 1). Ia valaaulia le isi vaega e vaavaai i le tusi o viiga e sue ai se viiga e fesoasoani ia i latou i taimi o o latou tofotofoga. Fai atu i vaega e faasoa atu mea ua latou aoaoina e mafai ona fesoasoani ia i latou e foia ai faigata.
Tusi se laina e faasasao i lalo i le ogatotonu o le laupapa, ma tusi ai “Aisea tatou te oo ai i faigata?” i le pito i luga o le tasi koluma, ma le “E faapefea ona tatou fetaiai ma luitau i o tatou olaga?” i le pito i luga o le isi. Vaevae le saunoaga a Elder Dallin H. Oaks “Faafeagai o Mea Uma” i vaega, ma tuu atu ia tofu tamaitai talavou taitasi ma se vaega e faitau. Fai atu i tamaitai talavou e saili mo tali o nei fesili ma tusi a latou tali i luga o le laupapa i le koluma talafeagai. O a ni malamalamaaga na maua e tamaitai talavou mai saunoaga? E mafai foi ona e faaalia se tasi o vitio na fautuaina i lenei otootoga e fesoasoani i tamaitai talavou ia maua nisi o tali i fesili o i luga o le laupapa.

Fai atu i tamaitai talavou e faasoa atu mea ua latou aoaoina i le aso. Pe latou te malamalama i le pogai e oo mai ai puapuaga ia i tatou? O a ni o latou lagona po o manatu o i ai? O i ai ni a latou fesili faaopoopo? Mata o le a aoga le faaalu o se isi taimi i lenei aoaoga faavae?

Ola i mea ua tatou aoaoina

Valaaulia tamaitai talavou e mafaufau pe o le a faapefea ona latou ola i mea ua latou aoaoina i le aso. Mo se faataitaiga, e mafai ona latou:

Saili se auala e faamafanafana atu ai i se tagata e pele ia i latou o loo feagai ma se tofotofoga e ala i le faasoa atu o mea na latou aoaoina e uiga i faigata.
Talanoa i o latou aiga e uiga i tagata o le aiga o e ua manumalo mai faigata.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.