Aisea e afaina ai filifiliga ou te faia?

Na tuuina mai e le Tama Faalelagi ia i tatou le filifiliga tatau, le tomai e filifili ai ma tali atu mo i tatou lava. E ui tatou te saoloto e fai a tatou lava filifiliga, ae e le mafai ona tatou filifilia taunuuga o na filifiliga. O filifiliga lelei e taitai atu ai i le fiafia tumau ma le ola e faavavau. Afai tatou te ole atu ia te Ia, o le a fesoasoani mai le Tama Faalelagi ia i tatou e fai ni filifiliga atamamai.

Saunia oe lava ia faaleagaga

O a aafiaga mai lou olaga na aoao ai oe e uiga i le faitalia? Na faapefea ona e aoao e faia ni filifiliga lelei i lou lava olaga?

O a ni filifiliga o feagai ma tamaitai talavou? O le a se mea e mafai ona e aoao ia i latou e fesoasoani ia i latou ia iloa le taua o le faia o ni filifiliga lelei?

Suesue i mau nei, ma faamaea se tasi o mea e fai o le tulaga faatauaina o le Filifiliga ma le Tali Atu mo Au Lava i le Alualu i Luma o le Tagata Lava Ia. Ao e faia, tusi i lalo ni mea sa e aoaoina e uiga i le faitalia lea e mafai ona e faasoa atua ma tamaitai talavou.

Iosua 24:15 (E mafai ona tatou filifili e auauna i le Alii)

Ioane 14:15 (O a tatou filifiliga lelei e faaali atu ai lo tatou alolofa i le Tama Faalelagi ma lo tatou mananao e fai Lona finagalo)

2 Nifae 2:16, 27; Helamana 14:30–31 (Ua tatou saoloto e filifili ma galulue mo i tatou lava)

Moronae 7:14–15 (Ua tuuina mai ia i tatou e filifili i le va o le lelei ma le leaga)

Gary B. Sabin, “Tutu i Luga i Totonu ma Tuuto Atoa Atu,” Ensign po o le Liahona, Me 2017, 52–55

Thomas S. Monson, “O Filifiliga,” Ensign po o le Liahona, Me 2016, 86

Carole M. Stephens, “Afai Tou te Alofa Mai ia te Au, ia Outou Tausi i Au Poloaiga,” Ensign po o le Liahona, Nov. 2015, 118–20

D.Todd Christofferson, “Saoloto e Faavavau, e Galue mo i Latou Lava,” Ensign po o le Liahona, Nov. 2014, 16-19

“Filifiliga ma le Tali Atu mo A’u Lava,” Alualu i Luma o le Tagata Lava Ia, 46–49

“Saolotoga,” Faamaoni i le Faatuatua (2004), 150–51

“Faitalia ma le Tali Atu mo OeLava Ia,” ma le “Musika ma Siva,” Mo Le Malosi o le Autalavou (2011), 2–3

Vitio: “Oute Le'i Fa'anoanoa (i La'u Faaiuga)”

5:39

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni o oe lava manatu e faalauiloa atu ai le lesona o lenei vaiaso:

Ia valaaulia tamaitai talavou e mafaufau i nisi o mea latou te ono faia pe a luiina o latou tulaga faatonuina e isi. O faapefea ona taumafai Satani e faafenumia’i i tatou e uiga i taunuuga o a tatou filifiliga? Ia uunaia i latou e vaavaai mo upumoni i le aluga o lenei lesona e fesoasoani ai ia i latou e teena pepelo a Satani.
Fai atu i tamaitai talavou e lisi nisi o filifiliga sa latou faia taluai nei. O le a se aafiaga o a latou filifiliga ia i latou? O faapefea ona aafia isi i a latou filifiliga?

Aoao faatasi

O le a fesoasoani gaoioiga taitasi nei i tamaitai talavou e malamalama ai i le aoaoga faavae o le faitalia. I le mulimuli ai i le taitaiga a le Agaga, filifili se tasi pe sili atu e aoga mo lau vasega:

O le a sou manatu i le uiga o le “tuuto atoa atu”? O le a sou manatu i le uiga o le “tutu i luga i totonu”? Valaaulia tamaitai talavou e faitau faataitaiga ma tala na faaaoga e Elder Gary B. Sabin e faamatala ai fuaitau nei i lana saunoaga “Tutu i Luga i Totonu ma Tuuto Atoa Atu.” O a nisi o mea faaleagaga e ono faia e tagata ma se afa loto? E mafai faapefea ona tatou filifili ina ia “tuuto atoa atu” faaleagaga? Atonu e manaia mo tamaitai talavou le fatu o ni pepa lautele o i ai ni savali e faaaoga ai ia faaupuga “tutu i luga i totonu” po o le “tuuto atoa atu” ma faataitaiga na tuu mai e Elder Sabin. E mafai foi ona latou faaaofia ai ni a latou lava faataitaiga.
Valaaulia ia tamaitai talavou e sue ia vaega e fa na faamamafaina o le saunoaga a Sister Carole M. Stephens “Afai Tou te Alofa Mai ia te Au, Ia Outou Tausi i Au Poloaiga,” vaavaai mo ni tala i le tausia o poloaiga ma pe aisea e taua ai le faia o filifiliga sao. Faatasi ma se faatagaga mai le epikopo, valaaulia nisi o tamaitai amiolelei i le uarota ina ia auai i se talanoaga e uiga i le auala na faamanuia ai o latou olaga e a latou filifiliga o ni afafine o le Atua. Ia faaaofia ai tuafafine nofofua faapea foi ma tuafafine ua faaipoipo i lenei talanoaga.
Valaaulia tamaitai talavou e fai se tasi o mea e fai o le tulaga faatauaina o le Filifiliga ma le Tali Atu mo A'u Lava o i le tusi o le Alualu i Luma o le Tagata Lava Ia (taitoatasi pe i ni vaega). Ao lei maea le vasega, valaaulia tamaitai talavou taitoatasi e faasoa mai se mea sa latou aoaoina mai lana suesuega e uiga i le Faitalia. Valaaulia se tamaitai talavou e faasoa mai i le vasega atoa se mea sa ia faia na o ia e faamaea ai se tasi o mea e fai o le tulaga faatauaina o le Filifiliga ma le Tali Atu mo A'u Lava.
Valaaulia tamaitai talavou taitasi e faitau lemu “Faitalia ma le Tali Atu mo Oe Lava Ia” i le Mo le Malosi o le Autalavou ma faasoa mai mea e musuia ai o ia. E mafai ona filifili e tagata o le vasega se isi tulaga faatauaina i le tusi ma faasoa mai nisi o filifiliga sa latou faia e faatatau i lena tulaga faatauaina ma faamanuiaga na oo mai mai ia latou filifiliga. Mo se faataitaiga, e mafai ona latou faitau i le “Musika ma Siva” i le Mo le Malosi o le Autalavou ma talanoaina ia faamanuiaga sa latou mauaina mai le fautuaga e aloese mai musika ma siva e le aoga.
Tuu atu ia tofu tamaitai talavou taitasi ma se vaega o le lauga a Elder D. Todd Christofferson“Saoloto e Faavavau, e Galue mo i Latou Lava” po o le saunoaga a Peresitene Thomas S. Monson “O Filifiliga.” Valaaulia ia tamaitai talavou e faitau na o i latou ona faasoa mai lea o ni o latou malamalamaaga. E mafai ona latou faia lenei mea i vaega toalaiti pe ma le vasega atoa. O a mea sa latou aoaoina e uiga i taunuuga o o latou talitonuga ma faatinoga? Valaaulia i latou e talanoa pe na faapefea ona fesoasoani ia i latou le fautuaga lea sa latou suesue i ai latou te faia ai ni filifiliga lelei.
Valaaulia tamaitai talavou taitasi e saili se faataitaiga o se tagata sa faia se filifiliga i tusitusiga paia (mo se faataitaiga, faatusatusa i filifiliga a Maria ma Mareta i le Luka 10:38–42). O a ni taunuuga o nei filifiliga? Na faapefea ona aafia isi i filifiliga?
Matamata i se tasi o vitio o loo fautuaina atu i le otootoga lenei. Vaaaulia tamaitai talavou e tagai mo taunuuga o filifiliga na faia e tagata o i le vitio. Fai i ai e faasoa mai mea ua latou maua. Valaaulia i latou e faasoa mai ni aafiaga lea atonu na latou faia lea e taua ni taunuuga. Valaaulia tamaitai talavou taitasi e faitau se tasi o mau o i lenei otootoga ma faasoa mai le auala e mafai ona fesoasoani ai ia te ia e fai ni filifiliga sa'o i le lumanai.

Fai i tamaitai talavou e faasoa mai mea sa latou aoaoina i le aso. Pe ua latou malamalama sili atu i le aoaoga faavae o le faitalia? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Ola i mea ua tatou aoaoina

Valaaulia tamaitai talavou e mafaufau pe o le a faapefea ona latou ola i mea ua latou aoaoina i le aso. Mo se faataitaiga, e mafai ona latou:

Tusi i totonu o a latou api talaaga e uiga i faaosoosoga sa feagai ma i latou ma le auala latou te fuafua e tali atu ai ia i latou e ala i le taitaiga a le Agaga Paia.
Faaauau ona galulue mea e faatonuina e fai mo le tulaga faatauaina o le Filifiliga ma le Tali Atu mo A’u Lava i le Alualu i Luma o le Tagata Lava Ia.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.