O le a le faamoemoega o le olaga?

I le aluga o lenei olaga o le a tatou maua ai tino faaletino ma tofotofoina e iloa ai pe o le a tatou usiusitai i poloaiga a le Atua. Na tatou o mai i le lalolagi e saunia ai ia maua se aiga e faavavau, faamanuia ia fanau a le Atua, ma fausia Lona malo. O a tatou aafiaga i le taimi o le olaga faaletino e tatau ona fesoasoani ia i tatou ina ia avea atili ai faapei o lo tatou Tama Faalelagi.

Saunia oe lava ia faaleagaga

O faapefea ona e maua le olioli i lenei olaga? O a ni aafiaga ua fesoasoani e te tuputupu ae ai faaleagaga?

O a ni mea o fai e tamaitai talavou e avea atili ai e pei o le Tama Faalelagi?

Ia suesue ma le agaga tatalo ia mau ma punaoa nei. O le a se mea ua e lagona ua musuia ai oe e le Agaga e faasoa atu i tamaitai talavou?

2 Nifae 2:25 (Ua faia i tatou ina ia tatou maua le olioli)

Alema 12:25; 34:32; 42:4; Aperaamo 3:25–26 (O le olaga lenei o se taimi e tofotofoina ai ma saunia ai e fetaiai ma le Atua)

3 Nifae 12:3–12 (Sa ta’u mai e le Faaola nisi o uiga auaumama faaleatua)

3 Nifae 12:48 (E finagalo le Tama Faalelagi ia tatou atoatoa e pei ona atoatoa o Ia)

MF&F 138:53–56 (Ua tatou i ai iinei e fesoasoani e fausia le malo o le Atua)

“O Le Aiga: O Se Folafolaga i le Lalolagi,” Ensign po o le Liahona, Nov. 2010, 129

Carol F. McConkie, “O Le Malumalu e Matagofie,” Ensign po o le Liahona, Me 2017, 9–12

Thomas S. Monson, “ O Le Tausinioga o le Olaga,” Ensign po o le Liahona, Me 2012, 90–93

Gary E. Stevenson, “O Lau Fa Minute,” Ensign po o le Liahona, Me 2014

“Ata o le Faaolataga,” Faamaoni i le Faatuatua (2004), 27–29

Aoao atu i le ala a le Faaola

Sa alofa le Faaola ia i latou sa Ia aoaoina. Sa Ia silafia i latou ma tagata e mafai ona avea ai i latou. Sa Ia sailia ni auala tulaga ese ia latou tuputupu ae ai—auala sa faapitoa lava mo na o i latou. Pe a latou oo i ni tauiviga, e le’i liliuese o Ia mai ia i latou ae sa faaauau pea ona alofa ma auauna atu ia i latou. O le a se mea e mafai ona e faia e alofa ma auauna atu ai i tamaitai talavou e pei ona faia e le Faaola?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Tagai i isi manatu e aoao mai ai ma aoao atu.

Filifili mai manatu nei pe mafaufau ni o oe lava manatu e faalauiloa atu ai le lesona o lenei vaiaso:

• Tusi i luga o le laupapa le, “O le a le faamoemoega o le olaga?” Fai atu i tamaitai talavou e fautua atu ni auala e ono tali ai e tagata lenei fesili pe afai latou te le’i maua le atoatoaga o le talalelei. E faapefea ona ese nei tali mai i tali o loo maua i le talalelei a Iesu Keriso?

• Faaali atu se manoa umi e i ai se faapona e nonoa i lona ogatotonu, ma talanoa le auala e mafai ai ona avea le faapona ma faatusa o le olaga lenei, ae o mea uma o loo i le isi itu o le faapona e faatusa i le muai olaga ae o mea uma o loo i le isi itu e faatusa i le olaga pe a mavae le olaga nei. Na faapefea ona aafia le olaga nei i a tatou filifiliga ae tatou te le’i o mai i lenei olaga? E faapefea ona aafia lo tatou lumanai i le olaga nei ma le faavavau ona o a tatou filifiliga i le olaga nei?

Aoao faatasi

Tagai i isi manatu e aoao mai ai ma aoao atu.

O gaoioiga taitasi o loo i lalo o le a fesoasoani i tamaitai talavou ia malamalama i le aoaoga faavae o le faamoemoega o le olaga. I le mulimuli ai i le musumusuga a le Agaga, filifili se gaoioiga se tasi pe sili atu o le a sili atu ona aoga mo lau vasega:

• Tuu atu ia tofu tamaitai talavou ma se fasi pepa, ma fai atu ia te ia e tusi le uiga o le upu mamalu. Valaaulia tamaitai talavou e faitau le saunoaga a Sister Carol F. McConkie “O Le Malumalu e Matagofie” ma faaopoopo ana faamatalaga o le mamalu i a latou faauigaga. O le a se mea e mafai ona tatou faia e atili ai ona tatou mamalu? Valaaulia tamaitai talavou e filifili se tasi o faauigaga o le mamalu sa latou tusia ma faasoa atu le ala latou te taumafai ai ia mamalu atili i lena auala. 

• Ia valaaulia tamaitai talavou e faitau ia Faaamuia o loo i le 3 Nifae 12:3–12 ma vaavaai mo uiga auaumama e finagalo le Tama Faalelagi ia tatou atiina ae i o tatou olaga i le tino. Fai atu ia i latou e mafaufau i tagata o loo i tusitusiga paia po o o latou lava olaga o e faataitaia nei mataupu faavae. E faapefea ona fesoasoani aoaoga a le Faaola o loo i lenei mataupu tatou te malamalama ai i lo tatou faamoemoega i le avea ai ma ni tamaitai?

• Vaevae le saunoaga a Peresitene Thomas S. Monson “O Le Tausinioga o le Olaga” i vaega, ma valaaulia tamaitai talavou e saili se vaega ma faasoa mai mea sa latou mauaina lea e fesoasoani ia i latou ia malamalama i le faamoemoega o le olaga. Fai atu ia i latou e mafaufau loloto i mea sa latou faia—ma le mea e tatau ona latou faia—ia lelei atili ai le faataunuuina o o latou faamoemoega. Valaaulia nisi o i latou e faasoa mai o latou manatu.

• Ia valaaulia tamaitai talavou e sue se mau po o ni mau o le a latou faaaogaina e fesoasoani ai i se tasi e le iloa le faamoemoega o le olaga (mo se faataitaiga, e mafai ona latou faaaogaina mau o loo fautuaina atu i le otootoga lenei). Fai i ai e faasoa atu mea ua latou maua, i se isi tagata o le vasega. Ia uunaia i latou e mafaufau i ni auala e mafai ona latou faasoa atu ai a latou mau i se uo po o se tagata o le aiga e le o malamalama atoatoa i le faamoemoega o le olaga.

• Fai atu i le afa o le vasega e faitau e uiga ia Noelle Pikus-Pace i le saunoaga a Epikopo Gary E. Stevenson “O Lau Fa Minute,” ma fai atu i le isi afa e faitau e uiga ia Torah Bright i le lauga lava e tasi. Valaaulia i latou e faasoa atu i le tasi ma le isi mea sa latou aoaoina e faatatau i le faamoemoega o le olaga mai nei tala. Tuu atu ni nai minute i tamaitai talavou e iloilo ai le vaega o totoe o le saunoaga a Epikopo Stevenson ma mafaufau loloto pe o a mai i latou i le latou “fa minute”—o a ni sauniga taua po o ni faamoemoega o i lo latou lumanai, ma po o le a se mea o latou faia e sauniuni ai? Valaaulia tamaitai talavou e faasoa mai o latou manatu.

• Tuu atu i tamaitai talavou taitoatasi se kopi o le “O Le Aiga: O Se Folafolaga i le Lalolagi,” ma fai atu i ai e faitau ma faailoga upu ma fuaitau o loo aoao atu ia te ia e uiga i ona faamoemoega o se afafine o le Atua. Valaaulia tamaitai talavou e faasoa atu mea ua latou maua ma faamatala atu pe aisea e aoga ai ia i latou.

Fai atu i tamaitai talavou e faasoa atu mea ua latou aoaoina i le aso. Pe ua latou malamalama lelei i le faamoemoega o le olaga? O a ni o latou lagona po o ni manatu o i ai? E i ai ni a latou fesili faaopoopo? Mata o le a aoga le faaalu o se isi taimi i lenei aoaoga faavae?

Motugaafa faafaiaoga

“Ia avea le faataupupula atu i mata o i latou o loo aoaoina e avea ma auala e faatosina mai ai i latou i lesona. Afai e te aoao atu i le faaaogaina o le faataupupula atu i o latou mata, o loo taulai atu lou naunautai ia i latou o loo e aoaoina nai lo mea o lo faaaoga i le lesona. O le pupula sa’o atu i mata a o e faalogo atu ia latou faamatalaga ma fesili, e fesoasoani latou te iloa ai o loo e naunau i mea o loo latou fai mai ai” (O Le Aoao Atu, E Leai Se Isi Valaauga E Sili Ai [1999], 75).

Vitio: “Aoao Atu Isi mai Tusitusiga Paia”

Matamata atili

Ola i mea o tatou aoaoina

Tagai i isi manatu e aoao mai ai ma aoao atu.

Ia valaaulia tamaitai talavou e mafaufau pe o a ni auala o le a latou ola ai i mea ua latou aoaoina i le asō. Mo se faataitaiga, e mafai ona latou:

• Faasoa atu se mea sa latou aoaoina i le vasega na musuia ai i latou e faaauau pea ona fai filifiliga lelei pe fai ni suiga i o latou olaga.

• Mafaufau i se mea faapitoa o le a latou faia i lenei vaiaso e faataunuuina lelei ai o latou faamoemoega e faavavau.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.