O le a le mea na tupu i lo’u muai olaga?

Ae tatou te lei fananau mai, sa tatou mau faatasi ma le Tama Faalelagi o ni Ana fanau faaleagaga. I le Fono i le Lagi, na folasia mai ai ia i tatou e le Tama Lana fuafuaga o le faaolataga, ma filifili ai Iesu Keriso e avea ma o tatou Faaola. Sa saili Satani e sui le fuafuaga, e aveese la tatou filifiliga saoloto, ma sa tutuliesea o ia ma lana vaega. Na tatou talia le fuafuaga a lo tatou Tama ma filifili e mulimuli ia Iesu Keriso.

Saunia oe lava ia faaleagaga

Mafaufau i filifiliga amiotonu ua e faia i le olaga. Ua i ai se aafiaga o au filifiliga amiotonu ia te oe? O le a faapefea ona aafia ai lou faasinomaga e faavavau? O a ni aafiaga o lou malamalama i le muai olaga i na filifiliga?

Mafaufau i tamaitai talavou o lau vasega. O a ni filifiliga o e faia? E mafai faapefea e lo latou malamalamaaga e uiga i le muai olaga ona faatosinaina i latou e fai filifiliga amiotonu i lenei olaga?

A o fai au sauniuniga, ia suesue ma le agaga tatalo ia mau ma punaoa nei. O le a se mea e te lagona e sili atu le taua i tamaitai talavou e te aoaoina?

Faaaliga 12:7–9, 11 (I le muai olaga, sa tatou faatoilaloina Satani e ala i a tatou molimau ia Iesu Keriso)

MF&F 138:55–56; Aperaamo 3:22–26 (Sa filifilia ma saunia agaga tamalii i le muai olaga e fai le galuega a le Atua i le olaga lenei)

Mose 4:1–4 (Ua saili Satani e faaumatia le faitalia o le tagata ma ua tuliesea ai)

“O Le Aiga: O Se Folafolaga i le Lalolagi,” Ensign ma le Liahona, Nov. 2010, 129.

Dieter F. Uchtdorf,“ O Aafiaga o Tamaitai Amiotonu,” Ensign, Sete. 2009, 5–9

“Ata o le Faaolataga,” Faamaoni i le Faatuatua (2004), 115–17

Aoao atu i le ala a le Faaola

Na fetalai le Faaola, “O la’u mataupu, e le o sa’u lava, a o lana na auina mai a’u” (Ioane 7:16). Sa Ia aoao atu le aoaoga faavae sa Ia aoaoina mai Lona Tama. E mafai faapefea ona e mautinoa o loo e aoaoina atu aoaoga faavae moni?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni o oe lava manatu e faalauiloa atu ai le lesona o lenei vaiaso:

Tusi i luga o le laupapa le, “O le a le mea sa tupu i lo tatou muai olaga?” Ia valaaulia tamaitai talavou e lisi ni tali se tele latou te mafaia ma faaopoopo atu i a latou lisi a o latou aoao atili e uiga i le muai olaga i le aluga o le lesona lenei.
Fai atu i tamaitai talavou e mafaufau ma faasoa atu soo se filifiliga amiotonu sa latou faia i le taimi ua tuanai ma auala ua faamanuiaina ai o latou olaga i le taimi nei e na faaiuga. Ona fai atu lea ia i latou e ta’u mai se filifiliga sa latou faia ae latou te le’i fananau mai. O le a se aafiaga ua faia e lenei filifiliga i o latou olaga?

Aoao faatasi

O gaoioiga taitasi o loo i lalo o le a fesoasoani i tamaitai talavou e aoao ai e uiga i le muai olaga. I le mulimuli ai i le musumusuga a le Agaga, filifili se gaoioiga se tasi pe sili atu o le a sili atu ona aoga mo lau vasega:

Ia valaaulia tamaitai talavou e suesue ia mau o loo i lenei otootoga, o se vasega, i vaega toalaiti, pe taitoatasi. Fai atu ia i latou e faasoa atu mea sa latou aoaoina e uiga i le muai olaga ma le mafuaaga e taua ai lena malamalamaaga ia i latou. Ia faasoa atu foi ou manatu ma lagona.
Fai atu i tamaitai talavou e faitau parakalafa muamua e tolu o le “O Le Aiga: O Se Folafolaga i le Lalolagi” ma faailoa mai mea ua latou aoaoina e uiga i o latou faasinomaga e faavavau. Ia valaaulia i latou e faitau le vaega ua faaautuina “A Unique Feminine Identity” mai le saunoaga a Peresitene Dieter F. Uchtdorf “O Aafiaga o Tamaitai Amiotonu,” ma fai atu ia i latou e faasoa atu soo se lagona latou te maua e uiga i o latou lava faasinomaga o ni afafine o le Atua.
Ia valaaulia tamaitai talavou e faitau le vaega ua faaautuina o le “Muai Olaga” i le Faamaoni i le Faatuatua (itulau 115–16) ma tusi ni fesili e mafai ona taliina e faamatalaga o loo i lenei vaega. Tuu atu ia i latou e faafesuiai fesili ma le tasi ma le isi ma vaavaai mo tali. Ia valaaulia i latou e faasoa atu soo se malamalamaaga latou te maua.
Ia valaaulia tamaitai talavou e galulue i le aafiaga 1 o le tulaga faatauaina o le Taua o le Tagata Lava Ia i le tusi Alualu i Luma o le Tagata Lava Ia taitoatasi pe o ni vaega. Tuu atu i tamaitai talavou taitoatasi se taimi i le vasega e fatu ai se pepa lautele o i ai se savali e i ai ni upumoni taua sa ia aoaoina e faatatau i le uiga o le avea ma se afafine o le Atua. Tuu atu ia latou e faasoa atu a latou pepa lautele o i ai se savali i le vasega.

Fai atu i tamaitai talavou e faasoa atu mea ua latou aoaoina i le asō. Pe ua latou malamalama lelei i le muai olaga? O a ni o latou lagona po o manatu o i ai? O i ai ni a latou fesili faaopoopo? Mata o le a aoga le faaalu o se isi taimi i lenei aoaoga faavae?

Ola i mea o tatou aoaoina

Ia valaaulia tamaitai talavou e mafaufau pe o a ni auala o le a latou ola ai i mea ua latou aoaoina i le asō. Mo se faataitaiga, e mafai ona latou:

Aoao atu mea ua latou aoaoina i o latou tuagane ma uso laiti po o se uo e le iloa e uiga i le muai olaga.
Mafaufau loloto i le fesili lenei: E mafai faapefea i se malamalamaaga o le muai olaga ona aafia ai filifiliga ou te faia i lenei olaga? Ia fautua atu i tamaitai talavou e tusi a latou tali i a latou api talaaga.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.