Aisea e tatau ai ona ou tausia lo’u tino e pei o se malumalu?

Na fausia o tatou tino i le faatusa o le Atua. O ni meaalofa ia mai lo tatou Tama Faalelagi ia mafai ai ona tatou oo i le olaga faaletino ma faaauau ai pea ina ia avea atili faapei o Ia. E aafia e lenei malamalama le auala tatou te taulimaina ai o tatou tino ma o tatou lagona i le Tama Faalelagi ma i tatou lava. A tatou taulimaina o tatou tino o ni malumalu o le Atua, tatou te mauaina faamanuiaga faaletino, faalelagona, ma le faaleagaga.

Saunia oe lava ia faaleagaga

O a ni faamanuiaga ua e maua a o e taulimaina lou tino e pei o se malumalu o le Atua? O le a se tuputupu ae o lou malamalamaaga e uiga i le paia o lou tino a o e ola ai i le olaga ma vaavaai atu i olaga o isi?

O a ni luitau e feagai ma tamaitai talavou a o latou taumafai e fai o latou tino o ni meaalofa paia mai le Atua? E mafai faapefea ona e fesoasoani ia i latou ia malamalama i le taua o o latou tino i le ata o le faaolataga?

Ia suesue ma le agaga tatalo ia mau ma punaoa nei. O le a se mea ua musuia oe e le Agaga e faasoa atu i tamaitai talavou?

Kenese 39:1–21; Tanielu 1:3–21 (Sa faaalia e Iosefa ma Tanielu le faaaloalo mo o laua tino)

1 Korinito 6:19–20; MF&F 93:33–35 (O i tatou o malumalu o le Atua)

MF&F 88:15–16 (O le agaga ma le tino o le auga atoa lea o le tagata)

MF&F 130:22; Mose 6:9 (Ua faia i tatou i le faatusa o le Atua)

Gordon B. Hinckley, “O le a Faatupulaia le Filemu o Au Fanau,” Ensign, Nov. 2000, 50–53

Susan W. Tanner, “O le Paia o le Tino,” Ensign po o le Liahona, Nov. 2005, 13–15

“Mama,” Alualu i Luma o le Tagata Lava Ia Tamaitai Talavou (2009), 69–72

Vitio: “Ola Mama: O Fea e Tuaoi Ai?”

NaN:NaN

Vitio: “195 Ofu”

Aoao atu i le ala a le Faaola

Sa alofa le Faaola ia i latou sa Ia aoaoina. Sa Ia silafia i latou ma tagata e mafai ona avea ai i latou. Sa Ia sailia ni auala tulaga ese ia latou tuputupu ae ai—auala sa faapitoa lava mo na o i latou. Pe a latou oo i ni tauiviga, e le liliuese o Ia mai ia i latou ae faaauau pea ona alofa ma auauna atu ia i latou. O le a se mea e mafai ona e faia e alofa ma auauna atu ai i tamaitai talavou e pei ona faia e le Faaola?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni o oe lava manatu e faalauiloa atu ai le lesona o lenei vaiaso:

Faaali le vitio “195 Ofu,” ma fai atu i tamaitai talavou e vaavaai mo faamanuiaga e oo mai i le ofuina o lavalava talafeagai. O le a sa latou tala e fai atu i se tagata e fesiligia i latou pe aisea ua taua tele ai le tauagafau?
Faaali atu se ata o se malumalu. Fai atu i tamaitai talavou pe aisea e matuai matagofie ai le malumalu ma pe faapefea ona faapei o tatou tino o malumalu o le Atua. Ia valaaulia i latou e vaavaai mo tali i le fesili “Aisea e tatau ai ona ou tausia lo’u tino e pei o se malumalu?” i le taualumaga o le lesona.

Aoao faatasi

O gaoioiga taitasi o loo i lalo o le a fesoasoani i tamaitai talavou ia malamalama o o latou tino e paia. O le mulimuli ai i le musumusuga a le Agaga, filifili se gaoioiga se tasi pe sili atu o le a sili atu ona aoga mo lau vasega:

Tuu atu ia tofu tamaitai talavou ma se mau se tasi o i ai i lenei otootoga. Valaaulia o ia e suesue i le mau ma aotele mai i se fuaiupu ia mea ua ia aoaoina pe aisea ua paia ai o tatou tino. Fai i tamaitai talavou e mafaufau i ala o loo taumafai ai Satani e faasese ia tamaitai talavou e tusa ai ma nei upumoni. O a mea e mafai ona latou faia e lagolago ai e le tasi le isi, a o latou taumafai e tausia le paia o o latou tino?
Ia faitau, matamata, pe faalogologo faatasi o se vasega i se tasi o saunoaga o loo fautuaina atu i le otootoga lenei. Fai atu i tamaitai talavou e mafaufau i se tasi latou te iloa e ono faamanuiaina i nei savali e uiga i le paia o le tino (ia faamanatu ia i latou e aua le talanoa e uiga i tagata o le vasega). O a vaega o le lauga o le a sili ona aoga i lena tagata? Ia valaaulia i latou e fuafua ni auala e mafai ona latou faasoa atu ai lenei savali i le tagata o loo latou mafaufau i ai. Ia uunaia i latou e faaaoga se upusii mai le lauga ma o latou lava aafiaga patino ma molimau.
Faitau faatasi o se vasega le 1 Korinito 6:19–20 ma le Mataupu Faavae ma Feagaiga 93:33–35. Vaevae tamaitai talavou i ni vaega, ma fai atu i vaega taitasi e fai se lisi o auala ua pei ai o tatou tino o se malumalu o le Atua. Tuufaatasi ia lisi i se lisi e tasi, ma valaaulia le vasega e talanoa i nisi o luitau e feagai ma tamaitai i le tausia o o latou tino ia pei o se malumalu. O a ni mea e mafai ona latou faia e foia ai nei luitau?
Vaevae tamaitai talavou i ni vaega taitoalua. Tofi se tagata se toatasi o vaega taitasi e faitau le Kenese 39:1–21 ae o le isi e faitau le Tanielu 1:3–21 (mo ata o nei tala, tagai i le Tusi Ata o le Talalelei, 11, 23). Fai atu ia i latou e vaavaai mo ni auala sa faaalia ai e Iosefa ma Tanielu le faaaloalo mo o laua tino, ona faasoa atu lea i le tasi ma le isi mea latou te maua. E mafai faapefea ona latou mulimuli i faataitaiga a Iosefa ma Tanielu?
Ia valaaulia tamaitai talavou e tagai i le faasino mataupu o le Mo Le Malosi o le Autalavou ma faailoa po o fea o tulaga faatauaina e faatatau i le tausisia o o tatou mafaufau ma tino ia mama. Vaevae tamaitai talavou i ni vaega, ae tuu atu ia i latou e suesue nei vaega ma sue tali i le fesili “Aisea e paia ai lo’u tino?” Valaaulia i latou e faasoa atu ni mea e mafai ona latou faia e ola ai i nei tulaga faatauaina.
Ia tusi fesili nei i luga o le laupapa, ona valaaulia lea o tamaitai talavou taitoatasi e filifili se fesili na te manao e sue lona tali: O a tulaga faatauaina o le Alii e uiga i le tauagafau? Aisea e taua ai ia te a’u le mulimuli i nei tulaga faatauaina? E aafia faapefea e le tauagafau o tatou uiga faaalia i le tulafono o le ola mama? Fai atu i tamaitai talavou e faaaoga le vaega o “Ofu ma Foliga Vaaia” i le Mo Le Malosi o le Autalavou e sue ai tali i fesili latou e filifilia. Ia valaaulia i latou e faasoa atu mea latou te mauaina.

Fai atu i tamaitai talavou e faasoa atu mea sa latou aoaoina i le aso. Pe ua latou malamalama lelei i le paia o o latou tino? O a ni o latou lagona po o ni manatu o i ai? E i ai ni a latou fesili faaopoopo? Mata e aoga le faaalu o se isi taimi i lenei aoaoga faavae?

Ola i mea ua tatou aoaoina

Valaaulia tamaitai talavou e mafaufau pe o le a faapefea ona latou ola i mea ua latou aoaoina i le aso. Mo se faataitaiga, e mafai ona latou:

Tautino e faia ni suiga i le ala latou te faia ai o latou tino, e faavae lea i mea ua latou aoaoina i le asō.
Faamaea le mea ua faatinoina e fai mo le tulaga faatauaina o le Mama 1 po o le 2 i le Alualu i Luma o le Tagata Lava Ia.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.