O le a le uiga o le lagolagoina o ou taitai o le Ekalesia?

I le avea ai ma tagata o le Ekalesia, ua ia i tatou le avanoa e lagolago ai i latou ua valaauina e le Alii e auauna atu. Tatou te siiina o tatou lima e faailoa atu ai lo tatou lagolagoina o le Au Pulega Aoao ma taitai o le Ekalesia faapea ma taitai taitasi i o tatou uarota ma siteki—e aofia ai au peresitene o Tamaitai Talavou. O le lagolagoina o taitai e aofia ai le sili atu nai lo le na o le siiina o le lima—o lona uiga o lo tatou tutu lea e lagolago i latou, tatalo mo i latou, talia galuega ma tofiga mai ia i latou, usitai ia latou fautuaga, ma aloese mai le faitioina o i latou.

Saunia oe lava ia faaleagaga

O le a se mea e te faia e lagolago ai taitai o le Ekalesia? Na faapefea ona faamanuiaina oe i le faia o lea mea? E mafai faapefea ona e fesoasoani ia lagona ai e tamaitai talavou lou alofa mo i latou, i le avea ai ma se taitai?

O anafea na e vaaia ai o lagolagoina e tamaitai talavou i lau vasega ia taitai o le Ekalesia—e aofia ai tagata o le latou au peresitene o le vasega? O a ni aafiaga e mafai ona latou faasoa e le tasi ma le isi?

Ia suesue ma le agaga tatalo ia mau ma punaoa nei. O le a se mea o le a musuia tamaitai talavou e lagolago o latou taitai o le Ekalesia?

Esoto 17:8–12 (O Arona ma Huro o loo sii i luga lima o Mose)

MF&F 21:1–6; 124:45–46 (O i latou o le a faalogo i le siufofoga o auauna a le Alii o le a faamanuiaina)

1 Nifae 18:8–20; MF&F 84:23–25 (Faataitaiga o tagata o e na teena o latou taitai)

1 Tupu 17:8–16; 2 Tupu 5:1–14 (Faataitaiga o tagata o e na mulimuli i fautuaga a auauna a le Alii)

Henry B. Eyring, “Valaauina e le Atua ae Lagolagoina e Tagata,” Ensign po o le Liahona, Iuni 2012, 4–5

Russell M. Nelson, “ Lagolagoina o Perofeta, ” Ensign po o le Liahona, Nov. 2014, 74-77

James E. Faust, “Valaaulia ma Filiilia,” Ensign po o le Liahona, Nov. 2005, 53–55

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Tusi le autu o le lesona lenei i luga o le laupapa, ma fai atu i tamaitai talavou e mafaufau i nisi upu e tutusa uiga ma le upu lagolago. Ona fai atu lea ia i latou e lisi i luga o le laupapa ia igoa o taitai i le uarota, e aofia ai peresitene o le Aualofa, Tamaitai Talavou, Peraimeri, ma le peresitene o le latou vasega a Tamaitai Talavou. O le a se mea o faia e tamaitai talavou e lagolago ai nei tagata?
Fai atu i tamaitai talavou e faitau le Esoto 17:8–12 taitoatasi, ma valaaulia se tasi o i latou e otooto le tala i ana lava upu.E faapefea ona faatatau lenei tala ia i tatou ao tatou lagolagoina o tatou taitai o le Ekalesia? E faapefea ona tatou faapei o Arona ma Huro pe a tatou lagolagoina la tatou peresitene o le vasega ma isi taitai?

Aoao faatasi

O le a fesoasoani gaoioiga taitasi nei i tamaitai talavou ina ia malamalama i le uiga o le lagolagoina o taitai o le Ekalesia. I le mulimuli ai i le taitaiga a le Agaga, filifili se tasi pe sili atu e aoga mo lau vasega:

Ao lei amataina le vasega, valaaulia ia tamaitai talavou e faitau i le lauga a Peresitene Russell M. Nelson “Lagolagoina o Perofeta” ma o mai saunia e faasoa mai se mea mai le lauga na musuia ai i latou e lagolagoina ia Peresitene Thomas S. Monson.
Vaevae le vasega i ni vaega, ma tuu atu i vaega taitasi se vaega o le lauga a Peresitene James E. Faust “Valaauina ma Filifilia” po o le Mataupu Faavae ma Feagaiga 124:45–46. Fai atu ia i latou e tagai mo faamanuiaga na folafola mai ia i latou o e o lagolagoina o latou taitai ma lapataiga ia i latou o e le faia...Valaaulia i latou e faasoa mai mea sa latou mauaina. Afai latou te suesue i le lauga, fai atu ia i latou e faasoa mai ni tala mai le lauga lea na faailoa mai ai nei faamanuiaga ma lapataiga.
Valaaulia nisi o tamaitai talavou e sue se faataitaiga o tagata i mau o e na teena o latou taitai, e pei o Lamana ma Lemuelu (tagai 1 Nifae 18:9–14) ma le aiga o Isaraelu (tagai MF&F 84:23–25). Fai atu i le isi vaega o tamaitai talavou e sue faataitaiga o tagata o e na mulimuli i auauna a le Alii, e pei o le fafine Sarefata ua oti lana tane (tagai 1 Tupu 17:8–16) ma Naamanu (2 Tupu 5:8–14). Fai atu ia i latou e faasoa mai a latou tala ma faamatala mai po o a mea o latou aoao mai e uiga i taunuuga o le teenaina po o le faamamaluina o taitai o le Ekalesia.
Valaaulia tamaitai talavou e faitau le tusiga a Peresitene Henry B. Eyring“Valaauina e le Atua ae Lagolagoina e Tagata,” ma vaavaai mo faataitaiga o auala o tatou lagolagoina ai o tatou taitai o le Ekalesia. Aumai ni kopi o mekasini a le Ekalesia, ma fai atu i tamaitai talavou e sue ma faasoa mai ni ata i mekasini o suitulaga i auala e lagolagoina ai taitai o le Ekalesia. O le a se mea e ono fai atu ai tamaitai talavou pe a latou faalogo o faitioina e se tasi o latou taitai? O a mea e mafai ona latou faia e lagolago ai o latou taitai, e aofia ai lo latou au peresitene o le vasega? Valaaulia le peresitene o le vasega e faasoa mai ona lagona e uiga i lona valaauga faatasi ai ma tamaitai talavou o loo ia auauna atu i ai.

Fai i tamaitai talavou e faasoa mai mea sa latou aoaoina i le aso. Pe o latou malamalama i le uiga o le lagolagoina o taitai o le Ekalesia? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Tatalo mo o latou taitai o le Ekalesia.
Faailoa atu le loto faafetai i se taitai o le Ekalesia latou te lagona na faamalosia lona valaauga.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.