E mafai faapefea ona fesoasoani se faamanuiaga faapeteriaka ia te au?

O se faamanuiaga faapeteriaka o se faaaliga patino mo o tatou olaga. E fesoasoani tatou te malamalama ai i o tatou agavaa ma faamanuiaga e mafai ona tatou maua pe afai tatou te faamaoni. E mafai ona i ai folafolaga, aoaiga, po o lapataiga e taiala ai o tatou olaga. E fesoasoani ai foi tatou te iloa ai e silafia i tatou e le Tama ma e amanaia i tatou taitoatasi.

Saunia oe lava ia faaleagaga

Afai ua maua lou faamanuiaga faapeteriaka, o faapefea ona taialaina ai lou olaga? O faapefea ona fesoasoani ai ia te oe i taimi o puapuaga? O faapefea ona musuia ai oe?

O a ni auala e mafai ai e se faamanuiaga faapeteriaka ona avea ma taiala i olaga o tamaitai talavou o loo e faiaoga ai? Aisea e taua ai mo i latou le iloa o lo latou tupuaga i le aiga o Isaraelu? E mafai faapefea ona e fesoasoani ia i latou ia saunia mo le mauaina o se faamanuiaga faapeteriaka?

A o e sauniuni, ia suesue ma le agaga tatalo mau nei ma punaoa. O le a le mea ua e iloa o le a sili ona fesoasoani i tamaitai talavou o loo e faiaoga ai?

Alema 16:16–17; 3 Nifae 17:2–3 (E tatau ona saunia o tatou loto e talia aoaoga po o faatonuga mai le Alii)

3 Nifae 20:25–27 (O le aiga o Isaraelu e manuia ai aiga i le lalolagi)

MF&F 82:10; 130:20–21 (E faalagolago faamanuiaga i le usiusitai)

Henry B. Eyring, “Fesoasoani ia i Latou e Faatutu ni Sini Maualuluga,” Ensign po o le Liahona, Nov. 2012, 60-67

Julie B. Beck, “ E I Ai Sou Tofi Tamalii,” Ensign po o le Liahona, May 2006, 106–8

Carlos A. Godoy, “O Loo I Ai se Fuafuaga a le Alii mo i Tatou!” Ensign po o le Liahona, Nov. 2014, 96-98

“E Uiga i Faamanuiaga Faapeteriaka,” New Era, Mar. 2004, 32–35; po o leLiahona, Mati 2004, 18–21

“Faamanuiaga Faapeteriaka,” Faamaoni i le Faatuatua (2004), 47–49

Aoao atu i le ala a le Faaola

E silafia e le Faaola ia tamaitai talavou i lau vasega, ma Na te silafia tagata e mafai ona avea ai i latou. Na te sailia ala tulaga ese e fesoasoani ai ia i latou taitoatasi ia aoao ma tuputupu ae. E mafai faapefea ona e aoao atu le alofa o le Faaola mo tamaitai talavou a o e talanoa e uiga i faamanuiaga faapeteriaka?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Afai e i ai sou faamanuiaga faapeteriaka, faaali i tamaitai talavou pe faape’ī (e aunoa ma le faamatalaina o ona anotusi patino). Faamatala i ai pe na faapefea ona faamanuiaina ai lou olaga.
Tusi i luga o le laupapa, “E mafai faapefea ona fesoasoani se faamanuiaga faapeteriaka ia te au?” Fai i tamaitai talavou e tuuina mai ni tali i lenei fesili. Toe tagai i le fesili lea i le gasologa o le lesona. E avea ma se vaega o la outou talanoaga, mafaufau e faasoa atu le tala a Elder Carlos A. Godoy i le auala na fesoasoani ai lana faamanuiaga faapeteriaka ia te ia e faia ni filifiliga taua i lona olaga (tagai “O Loo I Ai se Fuafuaga a le Alii mo i Tatou!” ” Ensign po o le Liahona, Nov. 2014, 96-98).

Aoao faatasi

O le a fesoasoani gaoioiga taitasi nei i tamaitai talavou e aoao ai e uiga i faamanuiaga faapeteriaka. I le mulimuli ai i le musumusuga a le Agaga, filifili se gaoioiga se tasi pe sili atu o le a sili atu ona aoga mo lau vasega:

Valaaulia se tamaitai talavou se tasi pe sili atu e faasoa mai o latou aafiaga i le mauaina o se faamanuiaga faapeteriaka (pe faasoa foi lau lava aafiaga). Ua fesoasoani faapefea o latou faamanuiaga faapeteriaka ia i latou? (Faamanatu i tamaitai talavou o anotusi patino o faamanuiaga faapeteriaka e paia, ma e le tatau ona faasoa mai.) Otioti se kopi o le tusiga “E Uiga i Faamanuiaga Faapeteriaka” i ni fasimea, ia tofu ma le fesili ma le tali. Valaaulia tamaitai talavou e feauauai e filifili se fasimea se tasi o le tusiga ma faasoa mai le fesili ma le tali i le vasega. O a isi fesili a tamaitai talavou o i ai?
Pe a faatagaina e le epikopo, valaaulia le peteriaka o le siteki e talanoa i tamaitai talavou e uiga i faamanuiaga faapeteriaka. Uunai tamaitai talavou e fai mai soo sa latou fesili o i ai.
Fai i tamaitai talavou e tusi i lalo soo se latou fesili o i ai e uiga i faamanuiaga faapeteriaka. Vaavaai o se vasega, mo tali i le Faamaoni i le Faatuatua,itulau 47–49.
Faitau o se vasega, vaega o le saunoaga a Julie B. Beck “E I Ai Sou Tofi Tamalii” ma le saunoaga a Peresitene Henry B. Eyring e uiga i lona faamanuiaga faapeteriaka i le “Fesoasoani ia i Latou e Faatutu ni Sini Maualuluga.” A maea ona faitau vaega taitasi, valaaulia tamaitai talavou e tusi se faaupuga e aotele ai mea ua latou aoaoina e uiga i faamanuiaga faapeteriaka.
Valaaulia tamaitai talavou e faitau ia mau o loo fautuaina atu i lenei otootoga ma faasoa mai o latou lagona i mea o aoao mai e mau taitasi e uiga i faamanuiaga faapeteriaka.

Fai i tamaitai talavou e faasoa mai mea sa latou aoaoina i le aso. Pe ua sili atu so latou malamalama i faamanuiaga faapeteriaka? O a ni o latou lagona ma ni uunaiga ua i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Ola i mea o tatou aoaoina

Ia valaaulia tamaitai talavou e mafaufau pe o a ni auala o le a latou ola ai i mea ua latou aoaoina i le asō. Mo se faataitaiga, e mafai ona latou:

E mafai ona latou faamaeaina mea e fai e 2 o tulaga faatauaina o le Taua o le Tagata Lava Ia mai le Alualu i Luma o le Tagata Lava Ia.
Afai ua maua o latou faamanuiaga faapeteriaka, e mafai ona latou suesue i ai ma matau ia fautuaga, lapataiga, meaalofa faaleagaga, ma faamanuiaga o loo i ai.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.