E mafai faapefea ona ou faamalosia la’u molimau?

O se molimau o se molimau faaleagaga o le upumoni e tuuina mai e le Agaga Paia. I le avea ai o ni tagata o le Ekalesia, ua ia i tatou le tiute paia ma le avanoa e maua ai a tatou lava molimau. Afai tatou te sailia se molimau e ala i le suesue, tatalo, ma le ola ai i le talalelei, o le a fesoasoani le Agaga Paia tatou te iloa ai mo i tatou lava e moni le talalelei.

Saunia oe lava ia faaleagaga

Na faapefea ona e mauaina lau lava molimau? Na faapefea ona uunaia e lau molimau oe i au matafaioi o se afafine o le Atua, o se ava, tina, tuafafine, po o se faiaoga?

O le a se mea ua e iloa e uiga i molimau a tamaitai talavou i lau vasega? E faapefea ona uunaia o latou olaga i le taimi nei ma le lumanai ona o se molimau malosi? O le a se mea e mafai ona e faia e uunaia ai i latou e faamalolosia a latou molimau?

Suesue ma le agaga tatalo punaoa faatusi paia nei. O le a se mea ua e iloa o le a musuia ai tamaitai talavou ia maua se molimau?

Ioane 7:16–17 (Afai tatou te faia le finagalo o le Alii, o le a tatou maua se molimau)

1 Korinito 2:9–13; Alema 5:45–46; MF&F 8:2–3 (E molimau mai le Agaga Paia i le mea moni)

Iakopo 1:5; 1 Nifae 10:17–19; 15:11; 3 Nifae 18:20; Moronae 10:3–5 (Ina ia maua se molimau, e tatau ona tatou ole atu ma saili ia maua)

Mosaea 26:3; Alema 12:11 (O mea faalavefau i le mauaina o se molimau)

Alema 32:27–34 (Amata i se manao e talitonu)

MF&F 9:7–9 (E tatau ona tatou suesue mo i tatou lava ae tatou te lei ole atu)

Ronald A. Rasband, “Ne’i Galo ia te Oe,” Ensign po o le Liahona, Nov. 2016, 113-15

Thomas S. Monson, “Talitonu, Usitai, ma Tumau,” Ensign po o le Liahona, Me 2012, 126–29

Dieter F. Uchtdorf, “Mauaina o se Molimau o le Malamalama ma le Upumoni,” Ensign po o le Liahona, Nov. 2014, 20-23

Bonnie L. Oscarson, “Ia Outou Liua,” Ensign po o le Liahona, Nov. 2013, 76–78

“Molimau,” Faamaoni i le Faatuatua (2004), 113–16

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Fai atu i tamaitai talavou e mafaufau i taunuuga o faataitaiga faigofie. Mo se faataitaiga, e mafai ona e fesili atu, “A ou tago e faapa’u le mea faitino lenei, o le a le mea o le a tupu?” ma le “A ou kiina le ki o le moli lenei, o le a mea o le a tupu?” Fesili atu ia i latou pe faapefea ona latou iloa le mea o le a tupu i le taimi o nei faataitaiga ae e te lei faataunuuina. Faamatala atu o le faamalosia o se molimau e manaomia ai ona tatou faataitaia le upu (tagai Alema 32:27), ma a o tatou faia i le faagasologa o taimi, e mafai ona tatou aoao e faalagolago i taunuuga o a tatou faataitaiga.
Fai i tamaitai talavou e tusi i lalo se faauigaga o le upu molimau. Valaaulia i latou e faasoa mai a latou faauigaga i le vasega. E mafai ona e fautuaina i latou e faitau le “Molimau” i le Faamaoni i le Faatuatua.

Aoao faatasi

O gaoioiga taitasi o loo i lalo o le a fesoasoani i tamaitai talavou e aoao ai i le ala e maua ai a latou lava molimau. I le mulimuli ai i le taitaiga a le Agaga, filifili se tasi pe sili atu e aoga mo lau vasega:

Faaali i tamaitai talavou ni fatu ma se laau o toto i se koneteina. Fesili i ai po o le a le mea e tatau ona tupu ina ia ola ai le fatu ma avea o se laau. Faitau le Alema 32:27–34, ma fai i tamaitai talavou e faatusatusa le ola o se laau i le mauaina o se molimau. O faapefea ona ola a latou molimau? O le a se mea e mafai ona latou faia e fafaga ai a latou molimau? Valaaulia i latou e tusi ia latou api talaaga pe o faapefea ona ola a latou molimau ma pe o le a le mea e mafai ona latou faia e faamalolosia ai.
Fai faatasi o se vasega se lisi, o tagata o i tusitusiga paia na mauaina se molimau. Talanoaina po o a mea na fai e tagata nei ma pe na faapefea ona maua a latou molimau faaleagaga (tagai 1 Nifae 10:17–19; Alema 5:45–46). Valaaulia tamaitai talavou e faasoa mai o latou aafiaga na faamalolosia ai a latou molimau.
Valaaulia tamaitai talavou taitasi e fai se lisi o mea e ono faavaivaia se molimau ma ni auala e tausia ai le malosi o se molimau a o faitau e tamaitai talavou ia mau i totonu o lenei otootoga, i le saunoaga a Elder Ronald A. Rasband “Ne’i Galo ia te Oe,” po o le parakalafa lona 12 ma le 13 o le saunoaga a Peresitene Thomas S. Monson “Talitonu, Usitai, ma Tumau.” Valaaulia tamaitai talavou e faasoa mai nisi o manatu o i o latou lisi, ona talanoa lea faatasi o se vasega le auala e mafai ai ona fesoasoani atu tamaitai talavou i isi e faamalosia a latou molimau. E mafai faapefea ona latou fesoasoani i tagata o aiga? i uo?
Fai atu i tamaitai talavou e mafaufau i se tagata latou te iloa o loo tauivi ma lana molimau? Uunaia i latou e suesue i le lauga a Peresitene Dieter F. Uchtdorf “Mauaina o se Molimau o le Malamalama ma le Upumoni,” ma vaavaai mo mea e mafai ona fesoasoani i lena tagata. O le a se mea e mafai ona latou faasoa atu ma lena tagata?
I le aluga o le vaiaso, fai atu i se tasi o tamaitai talavou e sau saunia i le vasega e faamatala mai le tala ia Agnes Hoggan mai le lauga a Sister Bonnie L. Oscarson “Ia Outou Liua,” e aofia ai le auala na uunaia ai e le molimau a Agnes ana filifiliga. Tuu atu ia tofu tamaitai talavou ma se fasipepa o i ai se fuaiupu e tasi mai le lauga a Sister Oscarson lea e aoao atua se mataupu faavae e uiga i le faamalosia o se molimau. Fai atu i tamaitai talavou taitasi e faasoa mai lana fuaiupu i le vasega ma talanoaina mea sa ia aoaoina mai ai ma soo se malamalamaaga na ia faasoa mai.
Fai i tamaitai talavou taitoatasi e faitau se tasi o mau o i lenei otootoga e sue ai ni auala e maua ai ma faamalosia se molimau po o mea e taofia ai i tatou mai le mauaina o se molimau. A uma ona latou faasoa mai ni manatu, fai i ai e mafaufau e uiga i auala e mafai ona latou fesoasoani ai i isi e faamalolosia a latou molimau. E mafai faapefea ona latou fesoasoani i tagata o le aiga? i uo i le aoga?

Fai i tamaitai talavou e faasoa mai mea sa latou aoaoina i le aso. Pe ua latou malamalama i le auala na maua ai a latou lava molimau? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Ola i mea ua tatou aoaoina

Valaaulia tamaitai talavou e mafaufau pe o le a faapefea ona latou ola i mea ua latou aoaoina i le aso. Mo se faataitaiga, e mafai ona latou:

Tuu atu a latou molimau i le vasega.
Faatu se sini e faamalolosia a latou molimau e ala i le ola ai i se tasi o mataupu faavae sa latou aoaoina.
Faasoa atu a latou molimau i se uo po o se tasi o le aiga i le vaiaso a sau.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.