ʻE anga fēfē hano tokoniʻi au ʻe ha tāpuaki fakapēteliake?

Ko e tāpuaki fakapēteliaké ko ha fakahā fakatāutaha ia ki heʻetau moʻuí. ʻOku tokoni ia ke mahino kiate kitautolu e meʻa te tau lava ke aʻusiá pea mo e ngaahi tāpuaki te tau lava ʻo maʻú kapau te tau faivelenga. ʻE lava ke kau ai ha ngaahi talaʻofa, naʻinaʻi, pe ngaahi fakatokanga ke tataki ʻetau moʻuí. ʻOku toe tokoni foki ke tau ʻilo ʻoku ʻafioʻi mo tokanga mai ʻa e Tamai Hēvaní kiate kitautolu fakatāutaha.

Teuteuʻi fakalaumālie koe

Kapau kuó ke ʻosi maʻu ho tāpuaki fakapēteliaké, kuo anga fēfē haʻane tataki hoʻo moʻuí? Kuó ne tokoniʻi fēfē koe ʻi he ngaahi taimi ʻo e faingataʻá? Ko e hā ha founga kuó ne ueʻi fakalaumālie ai koe?

Ko e hā ha ngaahi founga ʻe lava ai e tāpuaki fakapēteliaké ʻo hoko ko ha fakahinohino ʻi he moʻui ʻa e kau finemui ʻokú ke akoʻí? Ko e hā ʻoku mahuʻinga ai ke nau ʻilo honau hako ʻi he fale ʻo ʻIsilelí? ʻE founga fēfē haʻo tokoniʻi kinautolu ke nau teuteu ke maʻu ha tāpuaki fakapēteliake?

ʻI hoʻo teuteú, ako ʻi he faʻa lotu ʻa e ngaahi potufolofola mo e ngaahi maʻuʻanga tokoni ko ʻení. Ko e hā e meʻa ʻokú ke ʻilo ʻe tokoni lahi taha ki he kau finemui ʻokú ke akoʻí?

ʻAlamā 16:16–17; 3 Nīfai 17:2–3 (ʻOku totonu ke teuteuʻi hotau lotó ke maʻu ʻa e fakahinohino mei he ʻEikí)

3 Nīfai 20:25–27 (ʻOku tāpuekina ʻe he fale ʻo ʻIsilelí ʻa e ngaahi fāmili ʻo e māmaní)

T&F 82:10; 130:20–21 (ʻOku makatuʻunga ʻa e ngaahi tāpuakí ʻi he talangofuá)

Henry B. Eyring, “Tokoni ke Nau Fokotuʻu ha Taumuʻa Lelei,” Ensign pe Liahona, Nōvema 2012, 60–67

Julie B. Beck, “ʻOku ʻi ai Ho Tukufakaholo Fakaʻeiʻeiki,” Ensign pe Liahona, Mē 2006, 106–8

Carlos A. Godoy, “ʻOku ʻi ai ha Palani e ʻEikí Maʻatautolu!”Ensign pe Liahona, Nōvema 2014, 96-98

“Fekauʻaki mo e Ngaahi Tāpuaki Fakapēteliaké,” New Era, Mar. 2004, 32–35; pe Liahona, Māʻasi 2004, 18–21

“Ngaahi Tāpuaki Fakapēteliaké,” Tuʻu Maʻu ʻi he Tuí (2004), 137–139

Ko e faiako ‘i he founga ‘a e Fakamo‘uí

ʻOku ʻafioʻi ʻe he Fakamoʻuí ʻa e kau finemu ʻi hoʻo kalasí, pea ʻokú Ne ʻafioʻi ʻa e tuʻunga te nau lava ʻo aʻusiá. ʻOkú Ne kumi ha ngaahi founga makehe ke tokoniʻi kinautolu takitaha ke nau ako mo tupulaki. ʻE founga fēfē haʻo akoʻi ki he kau finemuí e ʻofa ʻa e Fakamoʻuí ʻi hoʻo talanoa fekauʻaki mo e ngaahi tāpuaki fakapēteliaké?

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi meʻa kuo nau aʻusia ʻi heʻenau fakahoko ʻa e ngaahi meʻa ne nau ako ʻi he lēsoni ʻo e uike kuo ʻosí. ʻE poupouʻi heni ʻa e ului fakatāutahá mo tokoniʻi ʻa e kau finemuí ke nau vakai ki hono mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Vakai ki he ngaahi fakakaukau kehe ki he akó mo e akoʻí.

Fili mei he ngaahi fakakaukau ko ʻení pe fakakaukau pē ʻaʻau ke fakafeʻiloaki ʻaki e lēsoni ʻo e uike ní:

• Kapau kuo ʻosi ʻi ai hao tāpuaki fakapēteliake, fakaʻaliʻali ki he kau finemuí pe ʻoku fōtunga fēfē (kae ʻoua ʻe vahevahe hano konga pau). Vahevahe mo kinautolu ʻa e anga ʻene tāpuekina hoʻo moʻuí.

• Hiki ʻi he palakipoé, “ʻE tokoniʻi fēfē au ʻe ha tāpuaki fakapēteliake?” Kole ki he kau finemuí ke nau fokotuʻu atu ha ngaahi tali ki he fehuʻi ko ʻení. Toutou fakamanatu ʻa e fehuʻi ko ʻení ʻi he lolotonga ʻo e lēsoní kotoa. Fakakaukau ke kau ʻi hoʻomou fealeʻakí hano vahevahe ʻa e talanoa ne fai ʻe ʻEletā Carlos A. Godoy’s ki hono tokoniʻi ia ʻe hono tāpuaki fakapēteliaké ke ne fai e ngaahi fili mahuʻingá heʻene moʻuí (vakai, “ʻOku ʻI ai ha Palani ʻa e ʻEikí Maʻatautolu!”Ensign pe Liahona, Nōvema 2014, 96-98

Ako fakataha

Vakai ki he ngaahi fakakaukau kehe ki he akó mo e akoʻí .

ʻE tokoni ʻa e ʻekitivitī takitaha ʻi laló ke ako ai e kau finemuí kau ki he ngaahi tāpuaki fakapēteliaké. Muimui ʻi he ueʻi ʻa e Laumālié ʻo fili ha ʻekitivitī ʻe taha pe toe lahi ange ʻe ngāue lelei taha ki hoʻo kalasí:

• Fakaafeʻi ha finemui ʻe toko taha pe toe tokolahi ange ke nau vahevahe e ngaahi meʻa kuo nau aʻusiá ʻi hono maʻu ʻo ha tāpuaki fakapēteliaké (pe vahevahe hoʻo aʻusiá). Kuo tokoniʻi fēfē kinautolu ʻe honau tāpuaki fakapēteliaké? (Fakamanatu ki he kau finemuí ʻoku ʻi ai ha ngaahi konga pau ʻo e ngaahi tāpuaki fakapēteliaké ʻoku toputapu pea ʻoku ʻikai totonu ke nau vahevahe.) Kosi fakakongokonga ha tatau ʻo e fakamatala “Fekauʻaki mo e Ngaahi Tāpuaki Fakapēteliaké”, konga ʻe taha ki he fehuʻi mo e tali takitaha. Fakaafeʻi e kau finemuí ke nau taufetongi ʻi hono fili ha konga ʻe taha ʻo e fakamatalá pea vahevahe e fehuʻí mo e talí ki he kalasí. ʻOku toe ʻi ai nai ha ngaahi fehuʻi kehe ʻa e kau finemuí?

• ʻI hano fakangofua ʻe he pīsopé, fakaafeʻi e pēteliake fakasiteikí ke lea ki he kau finemuí fekauʻaki mo e tāpuaki fakapēteliaké. Poupouʻi e kau finemuí ke nau fai haʻanau faʻahinga fehuʻi pē.

• Kole ki he kau finemuí ke hiki haʻanau faʻahinga fehuʻi pē fekauʻaki mo e tāpuaki fakapēteliaké. Kumi fakakalasi ʻa e talí ʻi he Tuʻu Maʻu ʻi he Tuí,peesi 137–139.

• Lau fakakalasi ʻa e ngaahi konga ʻo e lea ʻa Suli B. Pekí ko e “ʻOku ʻi ai Ho Tukufakaholo Fakaʻeiʻeiki” mo e fakamatala ʻa Palesiteni Henelī B. ʻAealingi fekauʻaki mo hono tāpuaki fakapēteliaké ʻi he “ Tokoni ke Fokotuʻu ha Taumuʻa Leleí.” Hili hoʻomou lau ʻa e konga takitaha, fakaafeʻi ʻa e kau finemuí ke nau hiki ha sētesi ʻokú ne fakamatalaʻi fakanounou ʻa e meʻa ʻoku nau ako fekauʻaki mo e tāpuaki fakapēteliaké.

• Fakaafei ʻa e kau finemuí ke nau lau ʻa e ngaahi potufolofola ʻoku fokotuʻu atu ʻi he fokotuʻutuʻu ko ʻení pea vahevahe ʻa ʻenau ongó ki he meʻa ʻoku akoʻi ʻe he potufolofolá takitaha fekauʻaki mo e tāpuaki fakapēteliaké.

Kole ki he kau finemuí ke nau vahevahe e meʻa ne nau ako ʻi he ʻaho ní. ʻOku mahino lelei ange nai ʻa e tāpuaki fakapēteliaké kiate kinautolu? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ki he tokāteline ko ʻení?

Tokoni fakafaiako

“ʻI he taimi ʻoku fai ai ʻe ha taha ha fehuʻí, fakakaukau ke ke fakaafeʻi ha taha ke ne tali ia kae ʻoua naʻá ke tali ia. Hangē ko ʻení, te ke lava ʻo pehē ange, ‘Ko ha fehuʻi mahuʻinga ia. Ko e hā hoʻomou fakakaukau ki aí?’ pe ‘ʻE lava nai ha taha ʻo tokoni ʻi he fehuʻi ko ʻení?’” ʻOku ʻIkai Ha Ui ʻe Mahuʻinga Ange ʻi he Faiakó (2000), 71.

Moʻui ʻaki e meʻa ʻoku tau akó

Vakai ki he ngaahi fakakaukau ki he akó mo e akoʻí.

Fakaafeʻi e kau finemuí ke nau fakakaukauʻi ha founga te nau moʻui ʻaki ai ʻa e meʻa kuo nau ako ʻi he ʻaho ní. Hangē ko ʻení:

• Te nau lava ʻo fakakakato e Mahuiʻnga Fakafoʻituituí ʻi he ʻulungaanga mahuʻinga fika 2 he Fakalakalaka Fakatāutahá.

• Kapau kuo ʻosi maʻu honau tāpuaki fakapēteliaké, te nau lava ʻo ako ia pea mo fakaʻilongaʻi ʻa e faleʻi, ngaahi fakatokanga, ngaahi meʻafoaki fakalaumālie, pea mo e ngaahi tāpuaki ʻoku ʻi aí.

Vahevahe mo e kau finemuí ʻa e meʻa te nau ako ki ai he uike kahaʻú. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike kahaʻú.